10-тӥ толшоре
10-тӥ толшоре — Григориан дырпусъя — арлэн 10-тӥ нуналыз. Выль арозь 355 нунал кылемын (касьян аре — 356 нунал).
|
|||||||||||||||||||||||||||||||||||||||||||
| 2025-тӥ ар | |||||||||||||||||||||||||||||||||||||||||||
Нунал тодметъёс
- Калык дырпусъя туннэ Романлэн нуналыз. Та нуналэ, койык сюр утчаса, нюлэскы ветло. Сыӵе шедьтос, пе, юртъерез синусёнлэсь но мукет черлэсь уте. Та нуналэ, шунытске ке, нылкышносты киужен вырыны уг лэзё. Шунытэз "вурӟод" шуо.
- Та уй кизилиё ке — ӝоген кезьытскоз. Пильмо ке — шунытскоз.
- Шунды гордэктыса ӝужа ке — туж зол тӧласькоз.
Нимнуналзэс пусъё
- Агафья, Александр, Арефа, Аркадий, Вавила, Гликерий, Горгоний, Давид, Домна, Дорофей, Евфимий/Ефим, Зинон, Игнатий, Индис, Иосиф, Корнилий, Леонид, Мардоний, Мигдоний, Никанор, Никодим, Пётр, Симон, Феоктист, Феофил, Феофила, Яков.
Праздникъёс но буре ваён нуналъёс
Бенин — Вуду-лэн нуналыз. (Шундыпуксёнпал Африкаысь, Кариб бассейнысь но США-ысь афроамериканецъёслэн синкретической культсылэн огъя нимыз).
Таиланд — Конституцилэн нуналыз.- Футболлэн дунневыл нуналыз.
- Ханты-Манси автономи округез кылдытон нунал (Югралэн нуналыз).
- Пор гожъяськетлэн нуналыз.
Луэм учыръёс
Удмуртиын
- 1930 — удмурт кылын «Дась Лу!» нимо пионер газетлэн нырысетӥ номерез потӥз, али «Ӟечбур!» шуыса нимаське.
- 1934 — Ижысь ТЭЦ-1-лэн нырысь черодэз усьтэмын но ужатыны кутскемын.
- 1944 — огдырлы усьтэмын Ижкар — Балезино чугун сюрес .
- 1945 — Сарапулысь электромеханической техникум усьтэмын.
- 1954 — Ижкарын Пушкинской урамын Центральной нылпи библиотека усьтӥськиз.(1954 арысен – М.Ю. Лермонтов нимо нылпи кун библиотека)
- 1966 — Алнаш, Грах, Кияса но Шаркан ёросъёсын пудо-животъёслэн висёнъёсынызы нюръяськонъя станциос кылдытэмын.
Россиын но дуннеын
- 49 ар асьме вакытозь — Юлий Цезарь ожгарчиосыныз Рубикон вамен выжиз.
- 1072 — Роберт Гвискар арабъёслэсь Палермозэс берлань басьтӥз.
- 1475 — Васлуй котырын ожмаськонын Молдовалэн Штефан Великий господарез Осман ожгарчиосты пазьгиз.
- 1776 — Томас Пейн «Common Sense» нимтултэм памфлет поттӥз.
- 1863 — Лондонын дуннеысь нырысетӥез метрополитен линия лэземын.
- 1878 — ӟуч но болгар ожгарчиос Шипка кар котырысь ожмаськонын Весиль-пашалэсь 30-сюрсъем турок армизэ вормизы.
- 1916 — Эрзурум ожмаськонлэн кутсконэз. Та ожын Николай Юденич генераллэн ожгарчиосыз 3-тӥ турок армиез пазьгизы.
- 1923 — Литва Клайпеда шаерез киултӥз.
- 1927 — Берлинысь «УФА-паласт» кинотеатрын «Метрополис» блокбастерлэн премьераез ортчиз.
- 1929 — Эрже Тинтин сярысь комиксъёс поттыны кутскиз.
- 1943 — «Кольцо» операцилэн кутсконэз. Таин йылпумъяськиз Сталинград ожмаськон.
- 1946 — ООН-лэн Генеральной Ассамблеяезлэн Лондонын нырысетӥ кенешез ортчиз.
- 1966 — Индия но Пакистан куспын ожмаськонэз дугдытон сярысь Ташкентской деклараци гожтэмын.
- 2001 — "Нупедилэн"люкетэз улсын нырысьсэ улонэ потӥз Wikipedia. 5 нунал ортчыса, Wikipedia асэрико сайтлы пӧрмиз.
Вордскизы
- 1908 — Степан Ефремов, 1959-тӥ арысен 1967-тӥ арозь УАССР-ысь Министръёслэн Кенешсылэн тӧроез.
- 1920 — Михаил Гасников, Удмуртиысь Быдӟым Атыкай оже пыриськись, Совето Союзлэн Героез.
- 1927 — Владимир Пономарёв, удмурт математик, педагогика наукаосъя кандидат.
- 1945 — Юрий Болденков, Удмуртиысь крезьгурчи.
- 1949 — Василий Михайлов, удмурт тележурналист но режиссёр.
- 1883 — Алексей Толстой, ӟуч совето гожъясьчи.
- 1934 — Леонид Кравчук, Украинаысь нырысетӥ президент (1991—1994).
Кулӥзы
- 1862 — Сэмюэл Кольт, Америкаысь конструктор но промышленник, пыӵал лэсьтон фирмаез инъясь.
- 1956 — Иван Опалёв, Глаз ёросысь Быдӟым Атыкай оже пыриськись, Совето Союзлэн Героез.
- 1971 — Габриель «Коко» Шанель, француз кутюрье.
- 1989 — Валентин Глушко, ракетно-космической техника удысысь совето тодосчи.
- 2016 — Дэвид Боуи, Великобританиысь кырӟась.