Глаз ёрос

Глаз ёрос

Герб Флаг
Центр	Глаз
Улӥсьёс
- ваньмыз	19 152
- плотность	9,2 адями/км²
Территория
- ваньмыз	2160 км²

Глаз ёрос — Удмуртилэн уй палаз интыяськемын. Центрез — Глаз кар. Мукет улон интыос пӧлысь тужгес тодмо луо Октябрьской, Понина, Дондыкар, Парзи. Глаз карлы матэ интыяськемын Иднакар гурт — солэн нимыз тодмо луэм вашкала Иднакар гуӵинэз археологъёслэн шедьтэм беразы. Бускель ёросъёсыз: Яр, Юкаменск, Красногорье, Балезино но Киров улосысь Омутнинск но Афанасьево ёросъёс.

Ёрос кылдӥз 1935-тӥ арын, соку отын 13 сельсовет, 102 населённой пункт лыдъяськиз. 1998-тӥ арын ортчытэм лыдъян-чотанъя ёросын ваньмыз-ӧвӧлэз 21,1 сюрс улӥсез: удмуртъёс — 79,1 %, ӟучъёс — 17,7 %, бигеръёс — 2,2 %, мукет калыкъёс — 1 %. Огъя площадез — 2160 км².

Инкуазез

Ёросэтӥ бызё Чупчи, Ыбыт, Пызеп, Кузьма, Белая, Сёва, Люм, Жаба шуръёс. Та палъёс узыресь мувӧен, горд сюен, песокен-луоен, гыбедэн, мергелен. Ёрослэн 30 % му вылаз будэ нюлэс.

Промышленность

Гыбедэн выре «Дзякино» огазеяськон. Машинаосты, тракторъёсты тупатъя «Реммаш» завод, лэсьтӥськон бордын гижысь-пиньысь тырше «Чепца» предприятие. Вань на татын комбикорм поттонъя завод, нянь пыжонъя комбинат, нюлэсэн вырись «Чура», «Леспром» но мукет. Гурт удыс борды кырмиськемын ог 24 хозяйство. Ёросын тылобурдо вордонъя кык фабрика ужа — Глазовской но Удмуртской.

Ёрослэн шортӥз ик ортче Киров—Пермь бадӟым чугун сюрес. Та ёрос пыр ик асфальт сюрес валемын Юкаменск, Красногорск, Карсовай, Понино черкогуртъёсы.

Дышетон, тазалыкез утён, культура

Ёросын 22 пала школаос, вань на школа-интернат, ДЮСШ, нылпи искусствоосъя 1 школа, школалэсь азьвыл нылпиосты визьноданъя 23 учреждение, ёрос больница, солэн 20 филиалэз, участокъёсъя 4 больница, 36 ФАП, историысь 89 памятникъёс. Ёросын ваньмыз-ӧвӧлэз 12 клуб ужа. Тужгес бадӟымез — 300 адямилы чаклам культурая юрт.

Историез чакласа, Глаз ёрос вашкала удмуртъёслэн вордӥськем интыенызы лыдъяське. Сое валаны луэ археологи кельтосъёсъя но отын кылем вашкала улон интыосъя: Иднакар, Дондыкар, Эбгакар, Весьякар. Россиысь наукаосъя академилэн Урал ёзысьтыз Историяя, кылъя но литературая Удмурт институтысь тодосчиослэн эскеронъёссы но историысь фактъёс вылэ пыкиськыса, «Глазовская земля — легендарная Родина удмуртского народа» бренд кылдытэмын. «ДондыДор» со проектлэн валтӥсь люкетэз луэ, проектэз азинтыны юртто Кун Думаысь депутат Алексей Загребин но Глаз ёрос администрация.

Глазов ёрос администарцилэн йырызлэн 2000-тӥ арын 1-тӥ тулыспалэ юнматэм пуктэтэзъя Глазов ёросысь историяя но шаертодонъя музей комплекс кылдытэмын вал, со Коӵышгуртысь «Сепычкар» но Пӧжы (Золотарёво) гуртысь «Истоки» шаертодонъя музейёсты огазеяз, таос ёзъёсыз луизы.

Чӧлсконъёс

• Глаз ёрослэн сайтэз  [ӟуч]
• Глаз ёрос Кун Кенешлэн сайтаз  [ӟуч]