Алнаш ёрос

Алнаш ёрос

Герб Флаг
Центр	Алнаш
Улӥсьёс
- ваньмыз	22 300
- плотность	24,9 адями/км²
Территория
- ваньмыз	896 км²

Алнаш ёрос (ӟуч: Алнашский район) — Удмуртиысь кивалтоно люкетэз (муниципал ёрос). Центрез — Алнаш черкогуртын.

Ёрослэн территориез 896 км².

Алнаш ёрос интыяськемын Удмурт Элькунлэн лымшор палаз. Та ёросэз котырто шаерысьтымы Можга, Грах ёросъёс, Бигер шаерысь Агрыз но Менделеевск ёросъёс. Алнаш ёросэтӥ ортче паськыт сюрес — Ижез герӟа Набережные Челны карен.

Тунсыко: ёросысь Кизекгуртын вань Пугачка шурзы. Таӵе ним солы гуртоос сётӥллям Е. Пугачёвлэн ожгарчиосыз татын тулкымъяськем бере.

Кылдэмез

Алнаш ёрос кылдӥз 15-тӥ пӧсьтолэзе 1929-тӥ арын. Отчы Можга уездысь Большекибьинской но Алнашской волостьёсысь 17 сельсовет пыриз. Аръёс ортчемъя ёрослэн оглюкетэз выжиз Можга районэ, нош Елабужской ёрослэн одӥг сельсоветэз пыриз Алнашлэназ.

Пусъёно: сельсоветъёслэн лыдзы арысь аре вошъяськылӥз. Кылсярысь, 1939-тӥ арын вал 14, 1955-тӥ арын — 10, 1957-тӥын — 12, нош 1971-тӥ арын — 9. 1995-тӥ арысен Алнаш ёросэ пыро 11 сельсоветъёс:

• Азамат,
• Алнаш,
• Асан,
• Байтэрек,
• Ӟатча,
• Кузёбай,
• Писэйгурт,
• Ромашкино,
• Техникум,
• Вуж Утчан,
• Туймыйыл.

2005-тӥ арын таос пӧлы пыриз на Муважи сельсовет но.

Ёрос кылдыку, ваньмыз-ӧвӧлэз татын 157 гуртъёс, починкаос вылӥллям, нош улӥсьёсыз — 38 сюрс 114 адями. Та вакытэ ёросын ог 80 населенной пункт лыдъяське, улӥсез — ог 20 сюрс 800 мурт.

Нырысетӥез сельхозартель — «Луч» — кылдӥз 1920-тӥ арын. Коллективизация йылпумъяськиз 1937-тӥ арын. 1950-тӥ арозь ёросын ужаз-тыршиз 108 колхоз. Туннэ нуналлы кылемын на 20-ез гинэ. Фермер огазеяськонъёс кылдыны ӧдъязы 1991-тӥ арысен. Али дырлы татын ог 160 фермер-хозяйство.

Улӥсьёс

Ёросын улэ ог 20 800 адями. Пӧлазы пӧртэм выжыысь калыкъёс вань: удмуртъёс — 82 %, ӟучъёс — 12 %, бигеръёс — 3,5 %, поръёс — 2,1 %.

Узырлыкез

Ёросын ужало кирпич поттонъя завод, «Тойма» фирма, вӧй-сыр поттонъя завод, нянь пыжонъя завод, пищекомбинат. Вань 3 банксы но. Быдэс Удмурт шаерын улӥсьёс тодо Ӟатчаысь «Варзи-Ятчи» санаторизэс. Отысь вузы, дэризы пӧртэм висёнъёслэсь эмъя. Та ёрослэн бадӟым узырлыкез со но — писательлэн Г. Красильниковлэн но кылбурчилэн Ашальчи Окилэн музей-коркаоссы, соос Алнашысь историяя но литературая музейлэн ёзъёсыз луо.

Тодмо адямиос

• Ашальчи Оки — тодмо удмурт кылбурчи, гожъяськись но эмъясь;
• Николай Семёнович Байтеряков — тодмо удмурт кылбурчи. Вордскиз Ӟатча черкогуртын;
• Филипп Григорьевич Кедров — Тодмо удмурт гожъяськись. Вордскиз Алнаш черкогуртын;
• Глезденёв Валерий Васильевич — майор, ожгар корреспондент. Редакцилэсь косэм ужзэ быдэстон сямен Афганистатын быриз. Горд Кизили кык орденъёсын пусъемын;
• Гришкин Иван Георгиевич — совето но росси педиатр, пульмонолог, эм наукаосъя доктор, профессор, Удмуртиысь но Россиысь дано эмчи, Удмурт Элькунысь Кун премилэн лауреатэз. Вань удмуртъёслэн «Удмурт Кенеш» ассоциацизылэн тӧроез (1994—1997);
• Загуляева Валентина Александровна — удмурт актриса. Удмурт АССР-ысь дано артистка (1970) но Удмурт АССР-ысь калык артистка (1987). Росси Федерациысь дано артистка (1997);
• Альберт Алексеевич Разин — тодмо удмурт историк;
• Семёнов Иосиф Ефимович — Туймыйылысь «Прогресс» колхозлэн воштонтэм тӧроез. УАССР-ысь Вылӥ Кенешлэн 5-тӥ ӧтчамысьтыз депутат. Социалистической Ужысь Герой. Алнаш ёрослэн дано муртэз. Удмурт Элькунлэн дано муртэз;
• Семёнов Игорь Николаевич — Удмурт Элькунысь Кун Кенешлэн нырысетӥ (1995—1999), кыкетӥ (1999—2003) куинетӥ (2003—2007), ньылетӥ (2007—2011) ӧтчамъёсысьтыз депутат. Удмурт Элькунысь Кун Кенешлэн Тӧроез (2000–2007);
• Савельев Владимир Никифорович — тодосчи, эмчи-хирург, эм наукаосъя доктор, профессор. Удмурт Элькунысь тазалыкез утён удысысь дано ужась, Росси Федерациысь тазалыкез утён удысысь дано ужась. Удмурт Элькун Кивалтэтлэн премиезлэн лауреатэз, Удмурт Элькунысь Кун премилэн лауреатэз. 1975-тӥ—1990-тӥ аръёсы — Удмурт АССР-ысь тазалыкез утёнъя министр. УАССР-ысь Вылӥ Кенешысь 9-тӥ но 10-тӥ ӧтчамъёсысьтыз депутат;
• Кутлыбаев Геннадий Андреевич — удмурт скульптор, суредась. Удмуртиысь но Россиысь калык суредась, Россиысь Суредасьёслэн огазеяськонысьтызы ёзчи, Мускоысь суреданъя академиысь зэмос ёзчи. Удмуртиысь Кун премилэн лауреатэз;
• Япаров Дмитрий Семёнович — росси куасчи, спортъя сӥё-дано мастер.

Лулчеберлык

Ёросын 36 дышетсконни, 22 лыдӟиськонни, 38 культурая юрт но 3 музей вань.

2017-тӥ арын Президент грантлэн коньдонэныз Кучырангуртын совето вакытысь гуртлы сӥзем «Кучыран» (азьвыл нимыз — «Советской гурт») туризмъя комплекс усьтӥськиз. Татын покчиосты дышетонъя 1911-тӥ арын пуктэм школалэн юртэз тупатъямын, кунокуа но кафе лэсьтэмын вал. Кучыран школаын политик, этнограф, публицист Трофим Борисов дышетскиз.

Чӧлсконъёс

• Алнаш ёрос Кун Кенешлэн сайтаз (Ӟ)
• Алнаш ёросысь муниципальной образованиос (Ӟ)
• Алнаш ёрос Удмуртиысь валтӥсь федеральной инспекторлэн сайтаз (Ӟ)
• Удмуртиысь ёросъёс (Ӟ)
• Алнаш | Алнаш ёрос | Алнаш малпанъёс