Глезденёв, Валерий Васильевич
| Валерий Васильевич Глезденёв | |
|---|---|
 | |
| Вордӥськем нуналыз | 10-тӥ толшоре 1950 |
| Вордӥськем интыез | |
| Кулон нуналыз | 10-тӥ коньывуонэ 1984 (34 года) |
| Кулэм интыез | |
| Кун | |
| Ужудысэз | ожгар корреспондент |
| Данъетъёсыз |
 |
Вале́рий Васи́льевич Глезденёв (10-тӥ толшоре 1950, Ӟунняшур, Удмурт Автономной Советской Социалистической Республика — 10-тӥ коньывуонэ 1984, Афганистан) — майор, ожгар корреспондент. Редакцилэсь косэм ужзэ быдэстон сямен быриз. Горд Кизили кык орденэн пусъемын.
Улон сюресэз
Вордӥськиз 1950-тӥ арын 10-тӥ толшоре Удмурт АССР-ысь Алнаш ёросысь Ӟунняшурын. Ӟатча (ӟуч: Варзи-Ятчи) шор ёзо школаез йылпумъямез бере «Алнашский колхозник» ёрос газетлэн редакцияз ужаз[1].
1968-тӥ арын сӥзьыл Совето армие басьтӥзы. Демобилизация бере 1969-тӥ арын Львовысь ожгаръя но политикая вылӥ училищее дышетскыны пыриз, сое 1973-тӥ арын йылпумъяз[1]. Отӥяз Ожгаръя но политикая академилэн редактор ёзэтаз тодон-валанзэ муромытӥз[2].
1981-тӥ арысен Туркестан ожгар округысь «Фрунзевец» газетын ужаз, ожгар подготовкая ёзэтлы кивалтӥсе юнматэмын вал. Афганистан Демократияя Республикае командировкаосы ӵемысь поталляз. Огаз сыӵе ужрадын, 1981-тӥ арын толсуре, пазьгем вертолётлэсь экипажзэ утиз, нош 1982-тӥ арын дугдылытэк ыбылэм меӵ тыл улын ож лудысь сӧсырмем солдатэз поттӥз[2].
1983-тӥ арын сӥзьыл Афганистанын командировкаын дыръяз контузия басьтӥз: Глезденёвез нуись машина, мина вылэ пырыса, пуштӥз. Военкорлэн тазалыкез кема тупатскыны выриз. 1984-тӥ арын куартолэзе Горд Кизили орденэн сӥлы каремын вал[3].
1984-тӥ арын 10-тӥ коньывуонэ, Афганистанэ эшшо огаз командировкае лобӟыкуз, Валерий Глезденёвен вертолётэз душманъёс уськытӥзы. Пазьгем бервылысь кык ӝуам мугоръёсты шедьтӥзы. Редакциын Глезденёвлэн утиськемезлы, оло, пленэ сюремезлы оскылӥзы. Но кӧня ке нунал ортчыса, пуштэм инты котырысь ик мугорзэ шараязы[4].
Валерий Глезденёвез Ташкентысь Чиланзар шайвылэ ватӥзы[4].
Семьяез
Валерий Глезденёв кышнояськемын вал. Наталья кышноеныз Алексей пизэс будэтӥзы. Наталья Глезденёва картэз вӧзын Ташкентысь Чиланзар шайвылын ватэмын[1].
Данъетъёсыз
Горд Кизили кык орденэн пусъемын (кыкетӥез — кулэмез бӧрсьы)[4].
Буре ваён
Валерий Глезденёвлэн нимыз сётэмын Ӟатча шор ёзо школалы, ӵапак сое йылпумъяз ожгар корреспондент[3].
Ӟунняшур гуртысь шор ульча Валерий Глезденёвлэсь нимзэ нуллэ, солэн вордскем коркаез борды мемориал пул юнматэмын[3].
.jpg)
Валерий Глезденёв нимо ӵошатскон
1986-тӥ арын Львовысь ВВПУ-лэн журналистикая кафедраез Валерий Глезденёвлэн призэз понна творчествоя ӵошатскон ялӥз. Сыӵе ик конкурс «Фрунзевец» газетлэн редакциез радъяз. СССР куашкам бере военкоръёс пӧлын ӵошатсконъёсты ортчытъямысь дугдӥзы[3].
2003-тӥ арын РФ-ысь Обороная министерстволэн Александр Невский нимо ожгар университетысьтыз журналистикая факультетын конкурсэз выльысь улӟытӥзы. Валерий Глезденёвлэсь приззэ арлы быдэ факультетысь устоезлы курсантлы сёто[5].
Валэктонъёс
- ↑ 1 2 3 Михаил Захарчук (08.09.2018) В эти дни исполняется 68 лет Глезденёву Валерию Васильевичу… [ӟуч] haifainfo.com. Эскеремын 13.10.2025 арын
- ↑ 1 2 Ирина Прусс Возрождённая традиция. В конкурсе имени «афганца» победили авторы «Военного образования» [ӟуч] Учительская газета. Эскеремын 13.10.2025 арын
- ↑ 1 2 3 4 Александр Маршал (24.03.2024) Валерий Глезденёв [ӟуч] Телеканал «Звезда». Эскеремын 13.10.2025 арын
- ↑ 1 2 3 Памяти павших в Афганской войне [ӟуч] afgan.ru. Эскеремын 13.10.2025 арын
- ↑ Стать бойцом информационного фронта [ӟуч] ФГБУ «РИЦ «Красная Звезда» Минобороны России (24.02.2023). Эскеремын 13.10.2025 арын
Литература
- Дышев С. М. Манящая бездна: о жизни и гибели военного журналиста В. Глезденёва. — Ижевск: Удмуртия, 1991. — 158 с. — 3000 экз. — ISBN 5-7659-0378-9.
- Туганаев В. В. Удмуртская Республика: энциклопедия. — Ижевск: Удмуртия, 2008. — С. 280. — 767 с. — ISBN 978-5-7659-0486-2.
Чӧлсконъёс
- Валерий Глезденёв [ӟуч]