Вотка

Эскерем гожтос

Кар
Вотка
ӟуч Воткинск
Благовещенской собор но В. И. Ленинлы синпелет. Шор карлуд.
Флаг Герб
57°03′ с. ш. 54°00′ в. д.
Кун	Россия
Федерацилэн асмосэз	Удмуртия
Кар округ	Вотка кар
Историез но географиез
Кылдытэмын	1759-тӥ арын
Кар	1813-тӥ арысен
Быдӟалаез	112,18 км²
Шор интылэн ӝуждалаез	130 м
Часовой поясэз	UTC+4:00
Улӥсез
Улӥсез	↗97 471 мурт (2021)
Улӥсь калыклэн ӵемлыкез	868,88 адями/км²
Йӧскалыкъёс	ӟучъёс, удмуртъёс, бигеръёс
Инмарлы оскон	православнойёс, мусульманъёс, старообрядецъёс
Катойконим	Воткалан улӥсь (во́ткинцы, воткинец)
Официальной кылъёс	удмурт, ӟуч
Лыдпус тодметъёс
Телефон код	+7 34145
Почта индекс	427430-427459
Код ОКАТО	94410
Код ОКТМО	94710000001
votkinsk.ru
Вотка Москва Ижевск Вотка
Медиафайлъёс РувикиМедиа пушкын

Вотка (ӟуч Воткинск) — городов Удмурт Элькунлэн куать каръёсыз пӧлысь одӥгез, Вотка ёрослэн кивалтон центрез, солэн пушпӧлаз уг пыры. Вотка кар кар округ кылдытэ. Улӥсьёслэн лыдзыя Иж кар бере кыкетӥез лыдъяське. 2023-тӥ арын 11-тӥ куарусёнэ РФ Азмуртлэн Косэтэзъя Вотка карлы «Город трудовой доблести» ним сётэмын.

Вотка быдӟым крезьгурчилэн Петр Ильич Чайковскийлэн вордӥськем шаерез шуыса тодмо луэ.

Нимыз

1759-тӥ арын Воткаысь корт лэсьтон завод котырын каргурт кылдытэмын вал. Солы Вотка шуръя (Камлэн бурпал вайшурез) нималлям. Нош шурлэн нимыз вот, вотяки ― удмуртъёслэн вашкала нимзылэсь пӧрмемын (ӵошатэ Вотской автономи улос — Удмуртилэн 1920—1934-тӥ аръёсы таӵе нимыз вал).

Историез

Файл:Wotkinsk.JPG

Воткаысь Петр Чайковскийлы синпелет

«Вотка городищеысь» нырысетӥ улон интыос III—V дауръёсы кылдытэмын вылэм, мазунинской археологической культура вапуме.

Вотка карлэн кылдэмез герӟаськемын ӟуч императрицаен Елизавета Петровнаен. 1757-тӥ арын солэн Косэтэзъя Вотка шур дурын корт ӵыжатонъя завод ӝутэмын. Лэсьтӥськонъя кыл кутӥсе юнматэмын граф П. Шувалов. Озьы 21-тӥ куарусёнэ 1759-тӥ арын завод гижысь-пиньысь ужаны кутскиз. Нырысетӥ нуналаз ик кунлы тужгес кулэ луись заказъёс быдэсъяны кутскиз. Заводлэн огсыр ужаменыз татысь улон инты туж ӝог паськытаз. 1759-тӥ арысен 1796-тӥ арозь Вотка завод котырысь каргурт Кузон губерниысь Ватка палъёсы пыре вал, 1797-тӥ арысен 1921-тӥ арозь ― Ватка губерниысь Сарапул уездэ. 1935-тӥ арын 20-тӥ гудырикошконэ Вотка черкогуртлы кар инлык сётэмын но Киров улос исполкомлэн Вотка горсоветаз пыртэмын. Вотка кар Удмурт АССР-лэн пушпӧлаз 1937-тӥ арын 22-тӥ коньывуонэ пыиз.

Екатерин II-лэн Косэтэзъя 1779-тӥ арын Вотка заводын Росси ВМФ-лэн корабльёсызлы якорь лэсьтыны кутскизы но та удысэз 140 ар ӵоже азинтӥзы. 1801-тӥ арын Иж заводэз (али дыре Концерн «Калашников» но Ижсталь)заводэз горной ведомствоысь военное выжтэм бере Воткинске А. Ф. Дерябин вуиз. 1807-тӥ арын со Вотка заводын инструментальной сталь поттонэз радъяз.

Горной город-заводлэн гербез. 1875. Воткинск.

1813-тӥ арын завод каргурт горной кар инлык басьтӥз.

1898-тӥ арын 1-тӥ куартолэзьысен Воткинск завод асэрико горной округлы пӧрмытэмын вал. Та вакытэ ик заводын В. Н. Петёнкин архитекторлэн проектъёсызъя выльдӥськон ужъёс кутскизы.

1837—48-тӥ аръёсы Камско-Воткинской заводъёсын кивалтӥз подполковник И. П. Чайковский. Со кивалтэм улсын 1837-тӥ арын татын быдэс Россиысь нырысетӥез пудлинговой гур пуктэмын вал. 1847-тӥ арын вувыл судноос лэсьтон радъяськиз, 1848-тӥ арын Вотка но Сива шуръёс кузя Каме нырысетӥез пароход васькытэмын («Астрабад»). 80 ар ӵоже татын 400-лэсь ятыр судно поттэмын. 1840-тӥ арын 25-тӥ оштолэзе Вотка завод карын вордӥськиз но 8 арес тырмытозяз татын улӥз Пётр Ильич Чайковский.

1857-тӥ арын Вотка заводын Петропавловской крепостьлы 48,5 м ӝуждалаем но секталаезъя 3500 пудъем шпиль лэсьтэмын.

1895-тӥ арын Вотка ёросысь Галёво черкогуртын Камысь пристанез заводэн огазеясь (Удмуртиын нырысетӥез чугун сюрес кыскемын..

1902-тӥ арын 18-тӥ коньывуонэ Вотка карын вордӥськиз Евгений Андреевич Пермяк, ӟуч совето гожъяськись, драматург, журналист но режиссёр.

1918-тӥ арын 17-тӥ гудырикошконэ Ижысь большевикъёслы пумит ӝутӥськонлы дурбасьтыса, Воткаын улӥсьёс совето властез палэнтӥзы. Берло Ижевско-Воткинской ӝутӥськон Вятской губерниысь быдэс Сарапул уездэ вӧлскиз. 11-тӥ шуркынмонозь (1918-тӥ ар) ӝутӥськемъёс Горд Армилэн 2-тӥ но 3-тӥ армиезлэсь карез утем сяна, ӝутӥськемлэсь висгожъёссэ Пермь, Уфа но Казань губерниос дороозь паськытатӥзы. Берлань чигнан но Тӧдьы армиен огазеяськон дыре гинэ Воткаысь ог 30 сюрс пала ужась калык кошкиз.

1919-тӥ арын южтолэзе Вотка карез А. В. Колчаклэн Сибирской армиез киултӥз, инвожое — ужась но крестьян Горд Арми. Та ӝутӥськон сярысь гожтэмын А. Коробейниковлэн "Воткинск в огне Гражданской войны" книгаяз.

Граждан ож вакытэ Воткаын улӥсьёслэн лыдзы кык поллы кулэсмиз, завод быдэсак куашкатэмын вал. 1922-тӥ арын шуркынмонэ заводэз копак пытсазы. Выльысь ужаны со 1925-тӥ арын кутскиз.

2019-тӥ арын 26-тӥ куарусёнысен карлэн официальной нимыз — Удмурт Элькунысь "Вотка кар" муниципал кар округ .

2023-тӥ арын 11-тӥ куарусёнэ 1941–1945-тӥ аръёсы Быдӟым Атыкай ожын юрттэт сётэмез но дугдылытэк ожгар но граждан продукци поттэмез понна, озьы ик ужась калыклэн геройлыко но чидась лумез понна, Росси Федерацилэн Азьмуртэзлэн Косэтэзъя Вотка карлы «Город трудовой доблести» ним сётэмын.

Интыяськемез

Вотка кар — Вотка ёрослэн шорсюлмыз. Ижлэсь уйпал но шундыӝужан пала 52 иськемын., Мускоен — 1 сюрс 191 иськем. Карлэн огъя быдӟалаез 112,18 квадратной километр. Интыяськемын Вотка тымет дуре (Идӟи, Берёзовка но Шаркан шуръёсты огазеяса кылдытэмын). Тыметлэн быдӟалаез 18 квадратной километр, Удмуртиысь тужгес бадӟымез ву возён инты лыдъяське.

Ёросъёсыз

Воткаысь ёросъёс

Кар укмыс ёрослы люкиське:

• Берёзовка
• Центральной
• Восточной
• Привокзальной
• Плодопитомник
• Заречной
• Южной
• Сельхозхимия
• Вогулка

Улӥсьёсыз

2009-тӥ арын лыдъян-чотанъя Воткинскын 96 сюрс 936 улӥсез вал. Соос пӧлысь ужась калыклэн лыдыз — 60 сюрс 990. Вотка карын уло ӟучъёс — 78,7 %, удмуртъёс — 8,5 %, бигеръёс — 3,2 %.

Кивалтӥсьёсыз

Кар йыръёс:

• 1994—2002 — Валерий Леонидович Фридрих;
• 2005—2010 — Александр Владимирович Кузнецов;
• 2010—2011 — Владимир Григорьевич Ушатиков
• 2012—2018 — Владимир Михайлович Перевозчиков;
• 2018-тӥ арысен — Алексей Владимирович Заметаев.

Экономикаез

Вотка кар аспӧртэмлыко интыын сылэ — Ижез Шаркан но Дэбес ёросъёсын герӟа, Удмурт Элькунэз — Пермь улосэн. Вотка пыр Пермь — Кузон — Нижний Новгород газопровод ортче. Ваньмыз-ӧвӧлэз татын 980 ужбергатонни, отын 42 сюрслэсь трос адями тырше. Пӧртэм удысъёс азинско ке но (сиён-юон поттонъя промышленность — 9,8 %, лэсьтӥськонын кутӥськись материалъёсты дасянъя промышленность — 0,8 %), валтӥсьёсыз луо машина поттон но корт ӵыжатон (85 %) удысъёс. Карлэн экономикаяз бадӟым инты басьтэ Вотка завод.

Транспорт

Валтӥсь статьяос: Воткаысь автобус и Воткинск станция

Городын усьтэмын 14 автобус маршрут. Карлэн шораз сылэ автовокзал, отысь автобусъёс нуналлы быдэ ветло бускель каръёсы но черкогуртъёсы. Воткалэн лымшор палаз интыяськемын Кузон вокзал. Со Ижысь шундыӝужан пала мынӥсь чугун сюреслэн берпум станциез луэ.

Валэктонъёс

Литература

• Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — 768 с. — 2200 экз. — ISBN 978-5-7659-0486-2.
• Металлургические заводы Урала XVII—XX вв. Энциклопедия / гл. ред. В. В. Алексеев. — Екатеринбург: Академкнига, 2001. — 536 с. — 1000 экз. — ISBN 5-93472-057-0.

Архивная копия от 4 гудырикошконэ 2021 на Wayback Machine

• Поспелов Е. М. Географические названия России. Топонимический словарь. — М.: Астрель, АСТ, 2008. — 523 с. — 1500 экз. — ISBN 978-5-17-054966-5.
• Справочник по административно-территориальному делению Удмуртии. 1917—1991 гг. / Составители: О. М. Безносова, С. Т. Дерендяева, А. А. Королёва. — Ижевск: Удмуртия, 1995. — 744 с. — 2000 экз. — ISBN 5-7659-0425-4.

Чӧлсконъёс

• «Мой город» нимо калык энциклопеди: Воткинск
• Коробейников А.В., Ларионова О.Ю. Воткинск в огне Гражданской войны. Сборник историко-публицистических очерков и архивных документов. – Ижевск: Иднакар, 2018. – 716 с. ISBN 978-5-4344-0575-1