Шувалов, Пётр Иванович

Рувикиын таӵе фамилиен мукет муртъёс сярысь гожтосъёс вань. Учке: Шувалов.

РАН экспертиза

Экспертизаез ортчытэ
Россиысь Тодосъёсъя Академия

Рос-прос лыдӟе

РАН экспертиза

Экспертизаез ортчытэ
Россиысь Тодосъёсъя Академия

Рос-прос лыдӟе

Пётр Иванович Шувалов
Вордӥськем дырыз	1711
Кулэм дырыз	4‑тӥ (15-тӥ) толшоре 1762
Кулэм интыез	Санкт-Петербург, Росси империя[d]
Кунмуртлыкез	Росси империя
Званиез	Генерал-фельдмаршал
Данъетъёсыз
Медиафайлъёс РувикиМедиа пушкын

Шувалов графъёслэн кунпуссы
(Боньча герб воштэмын)

Граф Пётр Ива́нович Шува́лов (1711 — 4‑тӥ (15-тӥ) толшоре 1762, Санкт-Петербург) — Елизавета Петровна императрицалэн кивалтонэзлэн пумаз ӟуч правительстволэн йырыз вал, Россиысь генерал-фельдмаршал, конференц-министр, камергер, сенатор, реформатор но изобретатель. Андрей Шувалов писательлэн атаез, ӵапак со мукет Шувалов графъёслы кутскон сётӥз.

Улон сюресэз

Пётр Шуваловлэн выжыез кострома ӟызы помещикъёсысь потэмын. Выборгысь комендантлэн Иван Максимович Шуваловлэн (бадӟымез) кыкетӥез пиез. Агаез Александр Иванович Шувалов генерал-фельдмаршал вал, уно аръёс ӵоже лушкем канцеляриен кивалтӥз.

Пётр I эксэй кивалтон аръёсы азбараз паж луыса службазэ нуиз. Собере Елизавета Петровна эксэй бордын камер-юнкер вал, 1741-тӥ арын со кунлы императрицаез кужмысь пуктон ужрадэ, кунын кылдэм бугыръяськонэ пыриськиз. Со арын ик камергере, гвардейской подпоручике но генерал-майоре юнматэмын вал. Вуоно араз Вӧсьлыко Анналэсь но Вӧсьлыко Александр Невскийлэсь орденъёсынызы пусъемын, гвардиысь поручик луиз. 1744-тӥ арын П. И. Шуваловез генерал-лейтенантозь ӝутӥзы, сенатор луиз. 1746-тӥ арын Росси империысь дано графъёс радэ поттӥзы, 1748-тӥ арын генерал-адъютант луэ. Шуваловлэн туж ӝог ӝутсконэзлы трос лэсьтэ но юрттэ солэн кышноез, Мавра Егоровна, (вордскемезъя — Шепелева), Елизавета Петровналэн егит дырысеныз матысь эшез.

1749-тӥ арысен шуваловской партиен валче Пётр Шувалов аслэсьтыз двоюродной агайзэ Иван Иванович Шуваловез Елизаветалы фаворитэ поттыны быгатэмез бере, Пётр Ивановичлэн кивалтон, югдурез кияз кутон луонлыкез пумтэм паськытаз. Та дырысен граф Шувалов империлэн тужгес бадӟымез сановникез луиз: огез но кун уж сотэк сэрттэмын-пертчемын луыны уг быгаты вал. Татчыозь котьмае быгатӥсь Бестужев канцлер кивалтон понна ожмаськонын ӵемысь Шуваловлы келяно, сётсконо луылӥз. Пырак Елизавета кулытозь, таукаронъёс, кузьымъёс, данъетъёс, казнаысь пайдаё заказъёс графлэн кияз пумтэм вуылӥзы.

Пётр Шувалов императрицалэсь 10 нуналлы гинэ тросгес улӥз на. Пётр III император сое генерал-фельдмаршалозь ӝутыны вуттӥз на. Берло аръёссэ П. И. Шувалов секыт ыштонъёсты чидано луиз: 1755-тӥ арын бадӟым пизэ Николаез ыштӥз, нош 1759-тӥ арын 2-тӥ инвожое кышнозэ ватэ, кудӥз картэз понна трос ма лэсьтӥз. Кыкетӥ кышноез Анна, И. В. Одоевский сенатор князьлэн нылыз, кузпалъяськемзы бере одӥг ар но тырмытэк, 1761-тӥ арын, пинал вайыкуз, кулӥз.

Шуваловлэн кивалтон аръёсыз уно выль реформаос малпанэн но соосты улонэ пыӵатонэн герӟаськемын. Туала вакытэ улӥсьёс пусъемъя, солэн юртъерез вельможалэн дворецезлы уг — бадӟым канцелярилы укша. Аслаз ужасьёсызлэсь буйгатскытэк куре пумтэм выль малпанъёсты, проектъёсты, умоятонъёсты, реформаосын ӵектонъёсты. Со ассэ ачиз кадь ик усто но задор дилетантъёсын котыртэ. Дышетскемез быдӟым ӧй вал ке но, инкуазен сётэм вылӥ ужазинлыкез, дан но данъет сьӧры уйиськемез, бугыръяськись мылкыдыз но ваменэс сямыз Шуваловлы кужым сётэ котькыӵе ужез, проектэз зол воштыны, туала куронъёслы тупатыны, ӟечомытыны. Графлэн вормонъёсыз таӵеесь луизы:

• музъемъёсты гожъян валтӥсь ужрадлы кичӧлтонэн потӥз;
• воргоронъёсты рекрутэ кутонэз капчиен радъян вылысь кунэз войсковой округъёслы (полосаослы) люкиз;
• кун пушкысь таможнялы пум понӥз.

Тужгес тунсыкоосыз, но улэп дыръяз улонэ пыӵатытэк кельтэм ӵектонъёсыз:

• вузкаронъя но промышленностья политикая планэз дасян понна Сенат бордын ужась коммерческой комиссия кылдытон;
• гурт удысын поттэм сиён-юонлы резерв кылдытон вылысь нянь возёнъя кун магазинъёс усьтон сярысь проект гожтӥз. Та лавкаос армиез сюдыны, няньлы дунъёсты кутыны-чакланы, крестьянъёсты войскоослы инты дасян, военнойёсты сюдон сярысь сюлмаськонзылэсь мозмытыны кулэ вал. Екатерина II проектэз умоен лыдъяз (1762-тӥ арын 20-тӥ гудырикошконэ нимысьтыз указ но поттӥз), но казнаын коньдон ӧвӧлэн, улонэ пыӵаса ӧз вутты. Нянь магазинъёс усьтон понна зэмос вамышъёс Павел I гинэ лэсьтыны быгатӥз, но солэн преемникез дыръя но нянь возён лавкаос пумысен правилоосты быдэстыны ӧз кутске.

1754-тӥ арын кужмо аракыосты пӧзьтон — со дворянъёслэн монополизы луиз. Быдэс Сибирьын вина пӧзьтыны калыклэсь выт бичась граф Пётр Иванович Шувалов луиз.

Солэн реформаосызлэн бервылъёсыз шоры пӧртэм сямен учкыны луэ, куд-огез изъянэн берытскиз, казналы ыштонъёс вайиз. Улонэз умоятон вылысь ас ужаз кутоно «принципиевъёсызлы» сётэм дунъетъёсыз курытэсь но куддыр шонертэмесь луо шуыса, Екатерина II тодытэк-валатэк ӧз улы, но императрица лыдъя вал, соос «обществолы сокем пайдаё ӧвӧл ке но, бадӟым пайда ваё аслыз граф Шуваловлы». Ужатозяз граф Россиысь тужгес узырез выт бичась (откупщик) луиз, со ас кияз бадӟым табыш вайись удысъёсты кутӥз.

П. И. Шуваловлы сӥзем Ижысь синпелет

Котьма ке но, Шуваловлэн нимтулыз Россилэн историяз кылиз бере, со понна воксё но императрицаен эшъяськись кузпалызлы но самодержавицалэн фаворитаз улӥсь двоюродной агаезлы гинэ тау кароно ӧвӧл — калыклэн, кунлэн улон-вылоназ бадӟым воштӥськонъёс пыртэмез Шуваловлэн син шоры йӧтымон, кылсярысь, кун пушкын таможнялы пошлинаосты быдтӥз, Россиын нырысетӥ банкъёсты кылдытӥз. Со сяна, Шувалов генерал-фельдцейхмейстер луон вакытаз, Военной академия проектъя росси артиллериез выльдӥз, мукет реформаосты быдэстӥз. Ваньмыз та ужрадъёс солэн нимыныз герӟаськемын.

Озьы ик Шуваловлэн нимыныз герӟаськемын таӵе промышленной но горной предприятиосты кылдытон но усьтон: Гороблагодатской но Кам заводъёс но мукет.

Пётр Шувалов сярысь чурыт кылзэ вера ӟуч историк но публицист Михаил Щербатов «О повреждении нравов в России» нимо ужаз :

«Котькытысь адӟыны луэ солэсь кивалтонын дан но данъетъёс сьӧры уйиськемзэ, узырмыны выремзэ: юртъеръёсты бырон калэ вуттонын но, сям-йылолъёсты куашкатонын но. Но кытын та сямыз тужгес бадӟым куректон но изъян вайиз? Кытын та сямыз, кивалтыны яратонэныз но яркыт улыны тыршеменыз пунӥськыса, ӟеч лэсьтыны турттон мылкыдъёссэ вормиз? Ваньмыз та вал граф Пётр Иванович Шуваловлэн сюлмаз но тусаз». Шувалов сярысь со пыр-поч гожтэ, кызьы граф байлыко улонэн ассэ котыртӥз, короналы матэ луэменыз, узырмиз. Со сяна, историк но публицист пусйылӥз: «Пётр Иванович Шувалов визьмо, шаплы, дан поттӥсь, аслыз гинэ пайда утчась, сук, узыр адями вал, императрицалэн яратоно эшеныз, трос шекъёсын пачылам Мавра Егоровна Шепелеваен кышнояськылӥз».

Шувалов пӧртэм пумо вузъёслы ачиз дунъёс пуктылӥз, вожвылъяськисьёс медаз кылдэ шуыса сюлмаськиз, монополиос кылдытъяз, кылсярысь, виналы но табаклы, ачиз ик таос вылын узырмиз но. Огвакытэ токма шорысь ӵектэм-быръем вузъёслы пошлинаосты будэтӥз, сылаллы дунэз йылтӥз, таин валче каръёсын сылаллы ёрмыны кутскизы, висёнъёс пуромизы. Пушкаосты манетъёслы ӵыжатылӥз но таин юн данъяськылӥз, калыкын ушъяськыса вералляз «тодмотэм но бырись узырлыкез зэмос узырлыке берыктӥ» шуыса. Пётр Великийлэн рудокопной заводъёсты частной кие сётон сярысь законэз вылэ пыкиськыса, зол кулэстэм дунын Гороблогодацкой заводэз аслыз сётыны-вузаны куриз. Щербатов со сярысь тазьы вералляз: «Кивалтыны яратэмез узырмыны тыршон но сук сямыныз валче пумтэм вал».

Шуваловлэн выль кат (уложение) сярысь сочинениез пумысен тазьы пусъемын: «Гожтэм асьсэ уложенизэс пӧртэм пумо чеберъям статьяосын тырмытӥзы, со статьяосъя котькудӥз аслэсьтыз ужзэ быдэстыны я выльзэ мытыны, мукетъёссэ быронозь я куашканозь вуттыны малпаз. Уложениез татчыозь кылылымтэ но адӟылымтэ чурыт кыл кутонъёсын тырмытӥзы, та сочинениез Сенатлы но мукет кун чинъёслы возьматъятэк ик, Государынялы лыдӟытэк гожтӥськыны вуттӥзы. Соиз, ужкагазъёсты бугыръяны ӧдъяз но, кыл кутытонъя курадӟытонъёс сярысь статьяез адӟыса, куалектӥз, кинюртэмзэ пуктытэк ик, бумагаосты палэнтӥз, ваньзэ воштыны куриз. Озьы Россия адямилы пумит ужась законлэсь шӧдтэк шорысь мозмытскиз».

Пётр Иванович Шувалов Санкт-Петербургысь Александро-Невской лавраысь Лазаревской шайвылын ватэмын, нош солэн нырысетӥ кышноез пиеныз ӵош Тверь улосысь Николаевской Малицкой пиосмурт монастырьлэн кезьыт Спасской черклэн Николай Чудотворецлы сӥзем пределаз сюе понэмын.

Шуваловлэн реформаосыз

Артиллерия

Шувалов Пётр Иванович (1760-тӥ арысь гравюра). XIX даурлэн пумыз

«Шуваловлэн лушкем гаубицаез»
(«Военной энциклопедиысь» туспуктэм)

Пётр I кивалтэм бере Россиысь артиллерияя ужпумъёс гуньдӥзы, шуыны луоз, артиллерияя ведомствоен угось та удыслэсь воксё палэнысь адямиос кивалтылӥзы. Ужамзы пумысен серем пыр кадь ивортэ А. Нилус но: огез француз ожгар теоретиклэсь сочиненизэ ӟуч кылэ берыктӥз, мукетыз артиллеристъёсты йырсизэс пудраен маялляны-пазяны кужмысь косӥз но та выллем ужпумъёсты быдэсъяз.

Таин валче росси артиллерия ӟечлыкеныз но, быдӟалаеныз но Шундыӝужан Европалэсь бере кыльыны ӧдъяз, нош та Европаен бадӟым ожлы (бератаз сое сизьым ар кыстӥськись ож нималозы) дасяськонлы бадӟым шуккет луиз. Росси артиллерилэн пусъем дыре валтӥсь тырмымтэосыз — орудиослэн бадӟым секталаенызы сэрен интыысь интые ӝог мыныны луонлыкъёс кулэсмо; калибръёслэн бадӟым пӧртэмлыксы; артиллеристъёс ляб дасямын (быдэс кунлы — одӥг гинэ артиллеристъёсты дасянъя школаын одӥг дышетӥсь, со но пумтэм юэ, куинь адямиосты виемез пумысен сьӧлыке уськытэмын).

1756-тӥ арын П. И. Шуваловез генерал-фельдцейхмейстере, мукет сямен — артиллерияя ведомстволы кивалтӥсе юнматэмзы бере, югдур шуак воштӥськыны ӧдъяз. 1753-тӥ арын ай со Сенатлы возьматӥз-ӵектӥз асэныз малпам но кылдытэм «лушкем гаубицаез». Шуваловез генерал-фельдцейхмейстере пуктэмзы выль ожтӥрлык поттыны кутсконэз ӝутэ, вакчи дыр куспын трос выль проектъёс кылдо, соос пӧлын кулэ луисьёсыз но, пайда вайисьёсыз но, толыктэмъёсыз но, быдэстыны луымтэосыз но вал. Оглом верано ке, выль изобретениос лэсьтон росси армилы кулэ луись аспӧртэм ожтӥрлык кылдытыны луонлык сётӥз, соос пӧлысь тужгес устоосыз XIX даурлэн кыкетӥ паларозяз росси армилэн вооруженияз выльдытэк кутӥськизы но яразы, быдэс Европалы адӟем карымон луизы. «Шуваловлэн гаубицаез» Кунерсдорф ожмаськонын дано луиз (1759-тӥ арын), Фридрих Великий со сярысь тазьы гожъялляз:

Та пушкаос — шайталэн кылдытэмез. Ӟуч пушкаослэсь кадь номырлэсь но таӵе зол уг кышкаськы.

Зэм, мукет источникъёсты учконо ке, кылсярысь, |«ЭСБЕ»-ез, Шуваловлэн лушкем гаубицаез сярысь отын сокем данъяськыса уг мадё. Кылсярысь, отын пусъемын: «…мукетъёсызлэсь висъяськиз музъем валлин ӵыжатэм бадӟым овал каль осеныз, солэн гумыез-каналэз выжыысеныз паськытаса кошкылӥз. Та пушкаез кылдытӥсь малпа вал, таӵе канал картечлы зол лобӟыны но пазьгиськыны юрттоз шуыса, но улон воксё мукетсэ возьматӥз, малы ке шуоно пуштыны но лобӟыны кужым сётэ одӥг пулялэн мукетыз борды зӥбемез. Шуваловлэн гаубицаез, картечен ыбылӥськонын ӧз висъяськы, огшоры гаубицаослэсь гранатаосын но лябгес ыбылӥз, соин ик кивалтӥсьёс солы пумит вал, но вооружениысь куштыны-поттыны сое Шувалов кулэм бере гинэ 1762-тӥ арын луонлык шедиз».

Шуваловлэн «лушкем» гаубицаез (со сярысь вералляз Пруссиысь король Фридрих II Гогенцоллерн) но Шуваловлэн «единорогез» (талэсь но король туж кышкалляз, но солэн овал кадь лэсьтэм каналэз ӧй вал) — со артиллерия ожтӥрлыклэн кык пӧртэм модельёсыз, соин ик текстын кык пусъем цитатаос зэмлыко луо, ог-огзылы пумит уг шудо.

Кӧня ке дыр ортчыса, Шувалов Елизаветалы «Выль артиллерилэсь атлассэ» адӟытыны быгатэ, тае со ачиз малпаз но кылдытӥз, шуэ (графлэн кепыран сямыз ӧй вал).

Номыр шоры учкытэк, Шуваловлэн выльдӥськон реформаос пӧлысь пайдаен берытскиз полевой артиллериез штатъёслы шонер люкылэмез: 1757-тӥ арын артиллерияя бригадаос кылдӥзы (1760-тӥ арысен котькудаз 20 орудие); орудиосты, ожтӥрлыкез чакласьёс-утялтӥсьёсты, соин ужасьёсты но вань тӥрлыкъёслы кулэ луись зарядъёсты котькуд ёз борды пыраклы сямен юнматӥзы; полкысь но дивизиысь артиллерияя офицеръёс кылдӥзы (полкысь но дивизиысь артиллерилэн кивалтӥсьёсызлэн инъетэз); артиллеристъёслы нимысьтыз форма вуризы. Со сяна, артиллерияя кадръёсты дасянэ выльдонъёс пыртӥзы: 1758-тӥ арысен офицеръёсты артиллерияя но инженерияя огазеям дворян школаын дышетӥзы (1762-тӥ арысен — Артиллерияя но инженерияя шляхетной кадет корпус), улӥысь чинъёсты нимысьтыз кылдытэм лагерьёсын визьнодазы (азьвыл таосты войскоосын дасяллязы). Пехота йыр вадьсытӥ артиллериен ыбылӥськыны дышетӥзы, со дыре ик ог-огзы мышкы султытэм кык орудиысь ыбылӥськыны мед быгатозы шуыса, чаклаллязы. Улонэзлэн берпуметӥ аръёсаз П. И. Шувалов Артиллерияя академия усьтонлы проект дасялляз, но сое йылаз-пумаз вуттыны ӧз пӧрмыты ни.

Данъетъёсыз

• Вӧсьлыко Андрей Первозванной апостоллэн орденэз (1753-тӥ арын 18-тӥ толсуре)
• Вӧсьлыко Александр Невскийлэн орденэз (1742-тӥ арын 25-тӥ оштолэзе)
• Вӧсьлыко Анналэн орденэз (1742-тӥ арын 5-тӥ тулыспалэ)
• Тӧдьы ӧрӟилэн орденэз (Речь Посполитая)

Киноын улӟытэмъёс

• 2015-тӥ арын пуктэм кино — Великая (телесериал, 2015) — Виктор Тереля.

Валэктонъёс

Литература

• РБС/ВТ/Шувалов, Петр Иванович // Русский биографический словарь : в 25 томах. — СПб.—М., 1896—1918.
• Рудаков В. Е. Шувалов, Пётр Иванович // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.
• Шувалов Пётр Иванович // Чаган — Экс-ле-Бен. — М. : Советская энциклопедия, 1978. — С. 511. — (Большая советская энциклопедия#Третье издание / гл. ред. А. М. Прохоров ; 1969—1978, т. 29).
• Андриайнен С. В. Империя проектов: государственная деятельность П. И. Шувалова. — СПб.: Изд. СПбГУЭФ, 2011.
• Бантыш-Каменский Д. Н. 21-й генералъ-фельдмаршал. Граф Пётр Иванович Шувалов // Биографии российских генералиссимусов и генерал-фельдмаршалов. В 4 частях. Репринтное воспроизведение издания 1840 года. Часть 1–2. — Пушкино: Культура (издательство) = 1991. — 620 с. — ISBN 5-7158-0002-1.
• Оточкин В. В. Граф П. И. Шувалов: реформатор или прожектёр? // Военно-исторический журнал. — 1995. — № 4. — С.78-
• Избранные труды / Петр Иванович Шувалов, Иван Иванович Шувалов; сост., авт. коммент. С. В. Андриайнен. — М.: РОССПЭН, 2010.

Чӧлсконъёс

• Владельцы дач в Лигове. Мыза Маврино.