Кам заводъёс

Википедиысь материал
Валтӥсь статьяос: Вотка завод, Ижсталь и "Калашников" нимо огазеяськон
Кам заводъёс
Кылдэм арез 1759
Кылдытӥсьёсыз Шувалов, Пётр Иванович
Интыяськемез РоссияFlag of Russia.svg Россия: Вотка, Ижкар, Удмуртия
Валтӥсь адямиос Москвин Алексей Степанович но Дерябин Андрей Фёдорович
Удысэз Корт ӵыжатон, ожтӥрлык поттон
Поттэм вузэз (бизнес) пӧртэм пумо корт, пӧртэм ожтӥрлык, якорьёс, чугун сюрес техника но выжъёс, зарезь но шур судноос, паровозъёс, экскаваторъёс, зарни поттон драгаос, калыкын но промышленностьын кутӥськись уно пумо тӥрлык
Ужасьёслэн лыдзы 1300-лэсь ятыр мурт (1764-тӥ арын)
Гкждз 02.JPG
Arms factory.jpg
Votkinsk pond-1.jpg
Damb of Izhevsk Arms Plant-6.jpg
Воткаысь но Ижысь пыӵалтӥрлык поттон заводлэн ӵыпетъёссы

Кам заводъёс — Ижысь (али — «Калашников» нимо огазеяськон но Ижсталь) но Воткаысь (али — Вотка завод) корт ӵыжатон но ожтӥрлык поттон заводъёслэн огъя нимзы. Граф П. И. Шувалов кивалтэм улсын XVIII дауре Кам шурлэн бассейназ ӝутэмын.

1750-тӥ аръёсы Кам заводъёсты ӝутон Удмурт Прикамьеез индустриализация ласянь азинтонын но Пермь музъемъёсты Ӟуч кун борды итонын бадӟым инты басьтӥз.

Историез

Ижысь пыӵалтӥрлык поттон но корт ӵыжатон заводъёс. 1916-тӥ аръёс

1754-тӥ арын императрица Елизавета Петровналэн указэзъя фаворитэзлы граф П. И. Шуваловлы ӟеч условиосын (нырысетӥ ужан араз казнаысь коньдонэн юрттон но 20 арлы проценттэк кредит висъян) Гороблагодатской заводъёс  [ӟуч] (удм. сётэмын, корт поттонэз йылэтыны курыса. 1757-тӥ арын 15-тӥ куарусёнэ Шуваловез Берг-коллегия куинь молотовой завод пуктыны лэзиз: кыксэ Кузон губерниысь Вотка но Частой шуръёс вылын, огзэ Уфа провинциысь Кутмас шур вылын. Та заводъёс пӧлысь огез гинэ ӝутэмын вал — Воткаын, мукет кыкъёсыз интые Шувалов Иже завод лэсьтӥз, нырысетӥезлэсь лымшор но шундыӝужан пала 70 версталы палэнэгес[1]. Гороблагодатской чугунлэсь тӥрлык лэсьтон понна Кам шур дурысь Иже но Воткае кык выль завод пуктоно кариськиз, малы ке шуоно Уралын со вакытэ ик эстӥськон но ву ресурсъёслы ёрмон шӧдӥськыны кутскиз. Чугунэз Чусовая но Кам шуръёс кузя келяны чаклаллязы[2][3][4].

Кыкез но завод А. С. Москвин кивалтэм улсын пуктӥськиз, таос Гороблагодатской, Пермь но Богословской заводъёсын ӵош Шувалов графлэн Гороблагодатской горной округаз пыризы[5][6]. Кыксэ но заводэз ӝутон, Вотка но Иж тыметъёсты ӵыпон понна механизмъёслэсь приводной питранъёссэс бергатыны кужым чот кутэмын вал матысь поселениос борды юнматэм крестьянъёс но Гороблагатской заводъёсысь мастеровойёс[2]. 1769-тӥ—1770-тӥ аръёсы Кам заводъёсы вуылэм П. С. Паллас  [ӟуч] (удм. паськыт нюлэсъёсты, заводъёслэсь ӟеч интыяськемзэс, ужаны быгатэмзэс, ужез ӟеч радъямзэс пусйиз, татын Москвинлэсь данъетсэ возьматыса[7].

Кам заводъёсты ӝутон Удмурт Прикамьеез индустриализация ласянь азинтонын но Пермь музъемъёсты Ӟуч кун борды итонын бадӟым инты басьтӥз[8].

Сенатлэн 1757-тӥ арын 20-тӥ коньывуонэ кутэм указэзъя Кам заводъёс борды 4 сюрс 160 кун крестьянъёс юнматэмын вал. Та уж 1757-тӥ—1758-тӥ аръёсы толалтэ кутскиз, соку заводъёс борды матысь Сива волостьысь крестьянъёс юнматэмын вал. Отӥяз кыдёкысь волостьёсысь, Алабуго котырысь гуртъёсысь но крестьянъёсты заводъёсын герӟазы. Приписка улэ 15-60 аресъем ӟуч выжыысь ужась воргоронъёс гинэ шедизы. Крестьянъёсты кышкатон-буйгатон понна та ужен Кузон губерниысь солдат отрядъёсын ӵош канцеляриысь ыстэм офицеръёс гинэ выризы. Кужмысь карон ужрадъёс дыръя крестьянъёс пӧлын бугыръяськонозь вуттылӥз, соосты зӥбломытон понна граф Шувалов императрицалы вазиськылӥз, юрттэт курыса[9]. Талы пумит Елизавета Петровна 1761-тӥ арын 12-тӥ тулыспалэ указ поттӥз, соя Гороблагодатской но Кам заводъёс Шуваловлы ваньбур чот сётэмын, нош крестьянъёс заводъёс борды юнматэм вал, кузёзы соосты ас чакламъя мукет интые улыны выжтыны быгатылӥз[10].

Вотка завод 1759-тӥ арын ужаны кутскиз, нош Иж завод — 1760-тӥ арын[2].

1762-тӥ ар пумын Екатерина II бугыръяськись крестьянъёсын сэрен кылдэм ужпумъёсты сэрттон-пертчон понна Уралэ князь А. А. Вяземский кивалтэм улсын нимысьтыз комиссия ыстӥз[11]. Бугыръяськисьёс пӧлысь оглюкетэз со вакытэ тюрьмаосы пытсамын ни вал (1763-тӥ арын тулыспалэ калыкез ӝуткамзы понна 55 осуждённойёс пӧлысь пытсэт сьӧры 12-ез ворсамын вал). Вяземский кыксэ каторгае келяз, мукетъёссэ мозмытӥз, куд-огзэ сюлоен жугытыса[12]. Отӥяз со оскем муртъёсыз пыр крестьянъёслэсь ӝожтӥськонъёссэс люказ, нимысьтыз завод борды кужмысь лек юнматонлы пум понӥз но бусы ужъёс дыръя крестьянъёслы лудын ужаны луонлык сётӥз[13]. Вяземский озьы ик крестьянъёслэсь югдурзэс секытомытӥсь заводысь взяточникъёслэсь кылзэс лек юалляз[14]. Но та амалъёс но Вяземскийлы крестьянъёсты пумозяз буйгатыны ӧз юрттэ, соослэн бугыръяськонъёссы отӥяз Емельян Пугачёвен радъям крестьян ожлы пуромиз[15].

Кам заводъёсы юнматэм крестьянъёслы Вяземский нырысьсэ ужамзы понна уждун тырыса эскериз. Екатерина II аслаз 1763-тӥ арын 9-тӥ оштолэзе кутэм указэныз тазьы уждун тыронэз вань заводъёсы пыӵатӥз[16]. Бӧрысь косонъёсызлэсь оглюкетсэ со ачиз ик куштӥськиз. 1764-тӥ арын коньывуонэ заводъёсын юнматэм котькуд ужасьлы выт тыронэз выльысь юнматӥз, заводысь кивалтӥсьёсты крестьянъёсты судъяны но кылзэс юаны правозэс берыктӥзы. 1765-тӥ арын указэн помещикъёслы ас мылкыд каремзыя крестьянъёсты каторгае келяны лэзиз, нош 1767-тӥ арын кутэм законъя крестьянэз каторгае помещик вылэ котькуд ӝожтӥськемез понна ысто вал[17].

1764-тӥ арын лыдъян-чотанъя Кам заводъёсын 1,3 сюрслэсь ятыр ужась нылкышноос но воргоронъёс пусъемын. Урал заводъёсысь выжтэмъёсты нимысьтыз чотазы: 175 пиосмуртъёс но 154 кышномуртъёс. 1777-тӥ—1778-тӥ аръёсы Вотка заводын 380 ужась пусъемын, Иж заводын — 330[18].

Граф Шувалов кулэм бере, 1763-тӥ арын Кам заводъёс бадӟым пунэмъёсынызы валче казнае сётэмын, чаклаз соосты Берг-коллегия[5]. Заводъёсын кивалтон понна Кам заводъёслэн валтӥсь конторазы кылдытэмын вал[19]. 1782-тӥ—1896-тӥ аръёсы завод Ватка казённой палаталэн ваньбурез лыдъяськиз[20]. Та дыр ӵоже вуз поттон но ужасьёслэн кулэсмемзы шӧдӥськиз. Горной офицеръёс граждан службае выжыны тыршизы, отын коньдон тырон югдур умойгес вал [21]. 1796-тӥ арын заводъёсты выльысь Берг-коллегие сётӥзы.

1799-тӥ арын Кам заводъёсты Екатеринбургысь горной заводъёсын кивалтонъя комиссия эскеремын. Комиссилэн отчётаз пусъемын: заводъёсын 50 ар талэсь азьло кадь ик тӥрлык уже кутӥське, нош та вакытлы частной предприятиосын сямен пыӵатэм техникая выльдӥськонъёс казённой Камской заводъёсын ӧз ортче. Заводъёслэн висъетъёссы но котырзы вужмемын, кема дыр ӵоже тупатъямтэ ни[22].

1801-тӥ арын Гороблагодатской горной кивалтон ёз кылдытэмын[5], нош Гороблагодатской, Кам, Пермь заводъёслы кивалтӥсе А. Ф. Дерябин юнматэмын[23].

Куинь ар ортчыса, 1802-тӥ арысь эскеронъёсъя, Кам заводъёслы из юртъёс пуктон вылысь коньдон висъямын: Иж заводлы крич корт но якорь ӵыжатон кык юрт лэсьтон вылысь но Воткаысь заводлы якорь поттон но дурон ужъёсъя кык юрт ӝутон вылысь[22].

1807-тӥ арын Ижысь завод А. Ф. Дерябинлэн кичӧлтэмезъя пыӵалтӥрлык поттонэ выжиз, нош 1808-тӥ арын 28-тӥ коньывуонэ сое Военной министерстволэн бурд улаз сётӥзы. Та нуналысен Кам заводъёслэн огъя историзылэн пумыз лыдъяське, соос азьланяз ог-огзылэсь нимаз азинскизы. 1809-тӥ арын Кам заводъёслэн валтӥсь конторазы быдтэмын[24][25][26].

1830-тӥ аръёсы Воткаысь заводын судостроение радъямын вал, 1860-тӥ—1870-тӥ аръёсы — паровозъёс поттон. 1861-тӥ арын крепостной ужысь вольнонаёмное выжон заводын вуз поттонлэсь асдунзэ ӝутӥз. Якорьёслы заказъёс кулэсмемен, 1870-тӥ аръёсы производствоез Ижор заводъёсы  [ӟуч] (удм. выжтӥзы; артиллерияя орудиосты поттонэз Пермьысь пушкаосты ӵыжатон заводэ выжтэмын. Кылдэм югдурен валче Вотка заводын мукет вузъёсты поттонэз эскероно кариськизы. Предприятилэн бадӟым судоходной магистральлы кыдёке интыяськемез уродэн шӧдӥськиз: заводын лэсьтэм продукциез нырысь ӵыпетозь вуттэм баржаосы ӝоктылӥзы, отӥяз Сиваетӥ Кам шурозь келяллязы. 1896-тӥ арын гинэ завод Кам дурысь Галёво чугун сюрес станциен герӟамын вал[27]. 1871-тӥ—1873-тӥ аръёсы Воткаын рельсаос лэсьтыны кутскылӥзы, но талэсь ӧжыт барыш люкаськемен, производствоез дугдытӥзы. 1880-тӥ арын Вотка заводын артиллерияя орудиослы лафертъёслы 170 парлэсь ятыр станинаос лэсьтӥзы, 1885-тӥ арысен чугун сюрес вылын кутӥськись ёзъёс поттыны кутскизы, 1891-тӥ арысен — Транссиб магистральлы чугун сюрес выжъёс[28].

Мукет заводъёсын сярысь, Иж заводын крепостной правоез бергес быдтӥзы, та пумысен 1866-тӥ арын 22-тӥ шуркынмонэ кутэм нимысьтыз «Ижысь пыӵалтӥрлык поттон завод борды юнматэм крестьянъёсты кунмуртъёс пӧлы пыртон сярысь положение» вань. 1867-тӥ арын 15-тӥ толшоре заводэз арендае кутӥзы, та пумысен 1865-тӥ арын коньывуонэ кутэм ужкагазъёс утисько. Ужасьёс эрико луизы, но арендаторъёслэн, заводлы кышкытлык кылдыку, калык улонэ пыриськыны правозы вал. Крепостной правоез быдтэмен валче заводысь калык лачак кошкыны кутскиз. 1867-тӥ ар кутсконын ужасьёс 4125 кузя вал ке, ар пумын 2673 кузя кылизы[29][30].

Ужан амал

Дуроно мехъёс Ижысь К. Герд нимо йӧскалык музейын утисько

Кам заводъёсын вуз поттон вылысь Гороблагодатской заводъёсысь чугун вуттылӥзы [31], химияя анализ со вакытэ ӧз лэсьтылэ бере, тусызъя пӧртэм пумо кортъёслы люкылӥзы. Кортлэсь арбериос пӧрмытон вылысь пурысь чугун яраз. Крица лэсьтонын тӥръёс, лопатаос, крюкъёс, мастерскойёс но кыскись клещъёс, тӥръёс, балда, корт кобыос, клюшкаос, наковальной молот доры крицаез вайыны юрттӥсь тележкаос кутӥськизы. Ӵыжатон ужъёс чугун плитаослэсь ӝутэм крич горнъёсын радъямын вал. Улӥ плитазэ вуэн сӥятылӥзы, горнлэсь урдэсъёссэ тыл басьтӥсьтэм кирпичен юнматъязы. Одинаръёс горнлэн кузьдалаез 240 см, пасьталаез 213 см вал, нош 30-35 см мурдалаё кык полэс горнлэн 442 см но 360 см. Гумылэн ӝуждалаез 15 метрозь вуылӥз. Котькуд горн борды омыр сётӥсь кык фурма юнматъязы. 1790-тӥ арын Вотка заводын 32 горнъёс ужазы (соос пӧлын крич фабрикаын 10 одинарной но 11 кык полэс горнъёс, мукетъёсыз — музон висъетъёсын). Вотка заводын, Ижын сярысь, андан ӵыжатонлэн ӟечлыкез вылӥынгес вал бере, фурмаосты гур пыдсыгес интыям ӧжыт омыр сётӥсь лапег горнъёс пуктонлы кулэяськизы[32].

Крич корт поттон понна горн пыдэсы эгыр тырылӥзы, со вылэ ӵыжатэм кортлэсь кылем-мылемзэ вӧлдылӥзы. Эгырез кенжытэм бере корт ломен суро чугун люкетъёсты вылаз тырылӥзы, та вылэ нош ик эгыр вӧлдылӥзы. Ву колёсаосын ужась мехъёсын омыр пельтылӥзы. Кислород но чурыт окислительёс вуэмен, углерод, кремний но чугунысь мукет суретъёс ӝуаллязы. Горн пыдэсы губка кадь, ыльнянь выллем крицаос пумен люкаськылӥзы. Крицаез люкетъёслы висъяллязы но кӧня ке пол ӵыжатъязы. Таин валче кортысь углеродзэ поттылӥзы, нош пушкысьтыз кылем-мылем шлакъёссэ нимысьтыз молотъёсын кокаллязы. 20—30 процентэз корт ӝуаса бырылӥз. Мастер, подмастерье но ужасьёслэсь кылдытэм бригада 12 час ужан сменазы ӵоже 12—13 пуд корт поттылӥзы[32].

XVIII даурлэн пумаз — XIX даурлэн кутсконаз Кам заводъёсты пумен выльдӥзы, ву питранъёсты парен ужасьёсызлы воштӥзы, пу эгыр эстӥськонэз изэн воштӥзы, тигель гуръёсты вуттӥзы. Обработкаын но машиностроительной производствоын кутӥськись кортлы ӟечлыкъя куронъёс ялан йылӥзы. Крич амалэз уже кутыса ужан амал вужмиз, со сяна, ӵыжатон дыръя корт трос кошкемен, экономика ласянь ыштонъёс вайыны кутскиз[33][28].

1832-тӥ арын толшоре Кам заводъёсын корт но андан ӵыжатон амалъёсты умоятон вылысь нимысьтыз комитет кылдытэмын. Комитет ар ӵоже пайдатэк ужаз. 1838-тӥ арын Николай I императорлы Ижысь заводэз быдтон пумысен проект вуттӥзы. Со проект улэ гожтӥськиз, но военнойёс заводэз утьыны быгатӥзы, малы ке шуоно Ижын ожтӥрлык поттонын кутӥськись ӵыжатэм корт со вакытэ кунын устоез вал. 1844-тӥ арын Вотка заводын Урал заводъёслэн кивалтӥсьсы В. А. Глинки чаклам улсын гумыос лэсьтонын кутӥськись корт поттонэз эскеронъя комиссия озьы ик толыктэм ужаз[34].

Бессемер конвертерлэн схемаез

1836-тӥ арын корт поттонын кужмогес выль амалъёсты кутон вылысь Вотка заводэ Россиысь нырысетӥез пудлинговой гур пуктэмын. Ужазинлык йылӥз ке но, Ижын пыӵалтӥрлык гумыос лэсьтонъя Воткаын ӵыжатэм анданлэн ӟечлыкез кулэсмиз. Отӥяз гуръёсты нимысьтыз генератор бордысен газэн ужатыны кутскемзы бере ӟечлыкез йылӥз ик. Таӵе амалэн ӵыжатэм корт 90 процентлы тросгес потыны кутскиз. 1911-тӥ арын крич амалэн корт поттон Вотка заводын быдтэмын вал[35].

XIX даурлэн кутсконаз ӵыжатэм кортлэсь ӟечлыксэ умоятон вылысь кык стадиен ужась пудлинговой гурез кутыны ӧдъязы, отӥяз тигель гуръёсты кыказ но заводэ юнматӥзы. 1864-тӥ арын Вотка заводын эскерон вылысь Бессемерлэн гурез пуктэмын вал, со 150 пуд чугунлы чакламын вал. Эскерон умоен ортчиз, но ӧз азинтӥськы. 1868-тӥ арын Вотка заводын Уралысь нырысетӥез, Россиысь кыкетӥез мартен гуръёс  [ӟуч] (удм. кылдӥзы, 1871-тӥ арын 18-тӥ тулыспалэ отын нырысьсэ корт ӵыжатӥзы. 1877-тӥ арын П. А. Бильдерлинг кивалтэм улсын Ижысь заводэ мартен гуръёс пуктӥзы[36][28].

Поттэм вуз

Воткаысь завод нырысетӥ араз уно пумо 75 сюрс 617 пуд корт поттӥз. 1763-тӥ арлэн кыкетӥ палараз Иж заводын 7 сюрс пуд корт поттӥзы, нош 1764-тӥ арын — 17 сюрс пуд. Кунын вань поттоно якорьёс пӧлысь Вотка заводын 3 процентсэ но Ижысь заводын 1,15 процентсэ лэсьтылӥзы. Полосовой но сортовой корт люкетэз 85-87 процент вал. 1760-тӥ арысен 1808-тӥ арозь заводъёс ӵошен 8,65 млн пуд корт поттӥзы — араз шорлыдын 184 сюрс пуд поттыны кужымез чакламын[37]. Отӥяз Иж заводэз пыӵалтӥрлык лэсьтонэ поттӥзы, нош Вотка заводын пӧртэм тӥрлык но бумага кадь векчи андан лист поттыны ӧдъязы[38].

XX даурлэн кутсконаз Кам заводъёсын вуз поттон таӵе вал[39]:

Завод Корт поттон аръёсъя (сюрс пуд)
1914-тӥ ар 1915-тӥ ар 1916-тӥ ар
Ижысь 4286 6900 9700
Воткаысь 1349 1420 1830

Синпелетъёс

Воткаысь тымет дурысь синпелет якорь

Вотка заводлэн ӟеч корт поттӥсь завод сямен данэз Адмиралтействолы якорьёс лэсьтэменыз валче но будӥз. Уралын поттоно вань якорьёс пӧлысь 60 процентсэ Воткаын ӵыжатъязы — со 10—15 сюрс пуд. 1850-тӥ—1860-тӥ аръёсы Вотка Россиысь военно-морской флотлы огназ атыкай якорьёс лэсьтылӥз. 1837-тӥ арын заводын 167 пудъем якорь ӵыжатэмын вал, сое лэсьтонэ заводэ вуылэм престоллэн наследникез, вуоно император Александр II пыриськиз[40]. 1840-тӥ арын якорез синпелетэз сямен завод котырысь пьедесталэ пуктӥзы, со Удмуртиысь нырысетӥез монумент луиз (архитекторъёсыз Петенкин В. В., Романов В. И.)[41]. 1850-тӥ арын якорь синпелетэз ӵыпет вылэ юнматӥзы, 1930-тӥ аръёсы якорез выльысь ӵыжатӥзы, нош 1959-тӥ арын азьвылэз быдӟа ик выль якорь кисьтӥзы[42]. 2012-тӥ арын выльдэмзы бере синпелетэз Вотка тыметлэн ӵыпет дораз пуктӥзы, Воткаысь огез учкымон инты луэ[43][44].

Ижысь пыӵалтӥрлык поттон заводлэн валтӥсь корпусэз но Ижысь пыӵалтӥрлык поттон заводлэн ӵыпетэз архитектурая утёно федерал синпелетъёс пӧлы пыро[45].

Валэктонъёс

  1. ↑ Алексеев, 2001, с. 155.
  2. ↑ 1 2 3 Александров, 1996, с. 181.
  3. ↑ Сергеев, 1958, с. 5.
  4. ↑ Алексеев, 2001, с. 155, 173.
  5. ↑ 1 2 3 Алексеев, 2001, с. 173.
  6. ↑ Туганаев, 2008, с. 302.
  7. ↑ Паллас П. С. Путешествие по разным провинциям Российского государства = Путешествiе по разнымъ провинцiямъ Российскаго Государства. — СПб. : Императорская Академия Наук, 1788. — С. 50—51.
  8. ↑ Пислегин, Чураков, 2018, с. 45.
  9. ↑ Сергеев, 1958, с. 10.
  10. ↑ Сергеев, 1958, с. 17.
  11. ↑ Сергеев, 1958, с. 26.
  12. ↑ Сергеев, 1958, с. 27—28.
  13. ↑ Сергеев, 1958, с. 28—30.
  14. ↑ Сергеев, 1958, с. 32.
  15. ↑ Сергеев, 1958, с. 34—35.
  16. ↑ Сергеев, 1958, с. 36—40.
  17. ↑ Сергеев, 1958, с. 40—41.
  18. ↑ Пислегин, Чураков, 2018, с. 46, 48.
  19. ↑ Туганаев, 2008, с. 344.
  20. ↑ Васина, 2006, с. 41.
  21. ↑ Александров, 1996, с. 186.
  22. ↑ 1 2 Сергеев, 1958, с. 67.
  23. ↑ Туганаев, 2008, с. 248.
  24. ↑ Алексеев, 2001, с. 220.
  25. ↑ Сергеев, 1958, с. 68.
  26. ↑ Васина, 2006, с. 41—42.
  27. ↑ Алексеев, 2001, с. 159.
  28. ↑ 1 2 3 Алексеев, 2001, с. 158.
  29. ↑ Алексеев, 2001, с. 221.
  30. ↑ Александров, 1996, с. 129—131.
  31. ↑ Столетие Вятской губернии. 1780—1880: сборник материалов к истории Вятского края. — Издание Вятского губернского статистического комитета. — Вятка: Типография Губернского правления и литография Котлевич, 1880. — Т. 1. — С. 31. — 388, 110 с.
  32. ↑ 1 2 Александров, 1996, с. 184.
  33. ↑ Александров, 1996, с. 190—192.
  34. ↑ Александров, 1996, с. 193.
  35. ↑ Александров, 1996, с. 195—201.
  36. ↑ Александров, 1996, с. 202—206.
  37. ↑ Александров, 1996, с. 187.
  38. ↑ Александров, 1996, с. 188.
  39. ↑ Александров, 1996, с. 207.
  40. ↑ Новиков, 1999, с. 16.
  41. ↑ Туганаев, 2008, с. 141.
  42. ↑ Загребин, 2012, с. 353.
  43. ↑ Алексеев, 2001, с. 157.
  44. ↑ В Воткинске отмечают 175-летие знаменитого якоря Редакция газеты «Удмуртская правда». Эскеремын 2019-07-02 арын
  45. ↑ Указ Президента РФ «Об утверждении Перечня объектов исторического и культурного наследия федерального (общероссийского) значения» № 176 от 20.02.1995

Литература

«https://udm.ruwiki.ru/w/index.php?title=Кам_заводъёс&oldid=507160»-ысь басьтэмын