Ижсталь

Заводлэн административной юртэз

Ижкарысь металлургической завод (ОАО «Ижсталь») — кунысьтымы корт поттон удысысь огез валтӥсез луэ. Заводлэн историез 240 ар пала кыстӥське. Туннэ нуналлы завод — Россиысь «Мечел» корпорацилэн ог люкетэз луэ.

Азинскон сюресэз

1760-тӥ арын граф П. И. Шуваловлэн кивалтэмез улсын Оӵ шур дурын корт дурон завод но молотовой фабрика лэсьтон радъямын вал. Нырысь аръёсаз ик завод вылӥ ӟечлыкен потӥсь кортэныз дано луиз. Соин сэрен 1859-тӥ арысен Ижысь завод Россиысь вань пыӵалтӥрлык заводъёсы огназ корт вуттӥсь (поставщик) луиз.

XIX-тӥ даурысен заводлэн производствоез азинскиз: ужанрадлыказ выль технологиос пыӵаны кутскизы. Вылӥ ӟечлыкъем корт арбериосты пӧртэм калыккуспо адӟытонъёсын возьматыны кутскизы. Парижысь огаз калыккуспо адӟытонын Ижысь завод вылӥ данъетэн пусъемын вал.

1914-тӥ арын Нырысетӥ дунневыл ожмаськонэн сэрен корт поттон удыс паськытатэмын вал. Сталь лэсьтон уж ожгар вакытъёсы арысь аре азинскиз.

1920-тӥ арын Ижсталь завод бордын усьтӥськиз фабрикаослы но заводъёслы ужасьёсты дасянъя школа. 1940-тӥ арын солэн инъетэз вылын кылдытэмын вал 3 номеро ремесленной училище, али со Ижысь промышленностья но экономикая колледж сямен тодмо.

1925-тӥ арын татын кортлэсь авиационной маркаосты поттон радъямын. 1931-тӥ арын комиссилэн эскеремезья, Ижысь сталь, дуннеысь стален ӵошатыса, умоен лыдъямын, ӟечлыкезъя швед стальлэсь номырин висъяськисьтэм.

Бадӟым Атыкай ож дырья корт поттон кык поллы будэтэмын ке но вал, ӟечлыкез ӧз усьы.

1961-1985-тӥ аръёсы Ижысь металлургической завод выль азинскон сюресэ кожиз — завод бордын интеллекутальной ёзэт кылдытэмын. Ӧнерчиос туала куронъёсъя тупась корт дурон производствоез радъяло. Соин ик со вакытэ Ижкар та ӧръя Россилэн валтӥсь центрез луиз.

Туннэ нуналлы «Ижсталь» заводлэн 4 ёзэтэз ужа: сталелитейной, прокатной, кузнечно-термической, ез но лента поттон. Заводын поттэм стальлез подшипникъёс, пружинаос, автомобильёс, сельхоз машинаос, самолётъёс, инсьӧр аппаратъёс лэсьтонын куто.

2001-тӥ арын заводын, Муско кивалтэт косэмъя, Мускоысь Царь-пушкалэн копиез лэсьтэмын вал. 2014-тӥ арын со заводэ пырон азе интыямын. Ижкарлэн тодметпусъёсыз пӧлысь одӥгез.