Ижысь промышленностья но экономикая колледж
| Ижысь промышленностья но экономикая колледж | |
|---|---|
 | |
| Кылдон арез | 1940 |
| Директорез | Сарварова Ирина Викторовна |
| Сайтэз | ciur.ru/ipek/default.aspx |
 |
|
Ижысь промышленностья но экономикая колледж (вакч. ИПЭК; ӟуч: Ижевский промышленно-экономический колледж) — Удмурт Элькунысь Ижкарысь шоро-куспо дышетон ужъюрт. Пӧртэм удысъёслы ӧнерчиосты дася, соос пӧлын заводын, кышкыттэм ивортодэтъя ӧрын но югдурез утёнын ужасьёс.
Историез
1920-тӥ арын Ижсталь завод бордын усьтӥськиз фабрикаослы но заводъёслы ужасьёсты дасянъя школа. 1940-тӥ арын солэн инъетэз вылын кылдытэмын вал 3 номеро ремесленной училище, со Удмурт АССР-ысь Калыкез дышетонъя министерстволэн бурд улаз ужаз[1].
1940-тӥ арын толсуре училищеын 1500 мурт слесарьлы, токарьлы, фрезеровщиклы, столярлы дышетскиз. 1944-тӥ арозь Ижсталь завод огшоры тӥрлык поттӥз: молоток, плоскогубцы, гаечной усьтонъёс, штангенциркульёс. Нош 1946-тӥ арысен токарно-винтовой станокъёс, вить тоннаем домкратъёс лэсьтыны кутскиз, 1953-тӥ арысен — куинь кулачковой нимо патронъёс но 2118-А станокъёс[2].
Заводъёслы ужасьёсты дасясь 3 номеро ремесленной училищее ӵемысь нылпи юртъёсысь пиналъёсты кутылӥзы, дышетсконзэс йылпумъямзы бере соосты Совето Союзысь пӧртэм каръёсы ужаны ыстылӥзы[2].
1962-тӥ арын 3 номеро ремесленной училищелэсь нимзэ воштӥзы, со луиз 3 номеро профессионально-технической кар училище (ГПТУ № 3), 1969-тӥ арын — 3 номеро шор ёзо профессионально-технической кар училище (СГПТУ № 3), нош 1984-тӥ арын — 3 номеро шор ёзо профессионально-технической училище (СПТУ № 3)[3].
1993-тӥ арын 1-тӥ куарусёнэ 3 номеро шор ёзо профессионально-технической училищелэн инъетэз вылын, озьы ик машина лэсьтонъя ӝыт техникумлэн инъетэз вылын усьтэмын вал Ижысь металлургияя колледж, со Удмуртиысь Калыкез дышетонъя министерстволэн бурд улаз ужаз. 1994-тӥ арын министерство колледжлэсь нимзэ Ижысь промышленностья но экономикая колледжлы воштӥз[4].
2008-тӥ арын ужъюртлэн юридической статусэз воштӥськиз — суз Удмурт Элькунысь профессиослы дышетонъя шор ёзо нимаз ужъюрт луиз[3].
2009-тӥ арын Ижысь промышленностья но экономикая колледж борды итэмын вал Ижысь правоосъя колледж[5].
2015-тӥ арысен дышетон заведенилэн быдэс нимыз луиз Удмурт Элькунысь профессиослы дышетонъя «Ижысь промышленностья но экономикая колледж» нимаз ужъюрт. Вакчияк — АПОУ «ИПЭК»[3].
Дасян ӧръёс
2024-тӥ арын куарусёнэ ивортонъёсъя, Ижысь промышленностья но экономикая колледж таӵе удысъёсъя ӧнерчиосты дася:
- Сетевой но системной администрирование;
- Ивортодэтъя сӧзнэтъёс но программирование;
- Автоматизированной сӧзнэтъёсты ивортодэтъя кышкытлыклэсь утён;
- Шуныт сётон но шуныт сётӥсь тӥрлык;
- Электро но электромеханикая тӥрлыкез тупатон но уже кутон (удысъёсъя);
- Машина лэсьтон амалъёс;
- Югдурез утён удыс;
- Юриспруденция;
- Электро тӥрлыкез тупатонъя но уже кутонъя электромонтёр (удысъёсъя);
- Ивортодэтъя системаослэн но ресурсъёслэн операторзы[6].
Колледже дышетскыны куто шор ёзо я инъет луись образование басьтэм абитуриентъёсты. ИПЭК-ын соос шоро-куспо профессия басьтыны я квалификацизэс будэтыны-воштыны быгато[2].
Дышетон бюджет чотын но дунын радъяське[6].
Ёзъёсыз
2024-тӥ арын ивортонъёсъя, Ижысь промышленностья но экономикая колледжлэн одӥг ёзэз, со Удмурт Элькунысь Можга карын ужа[7].
ИПЭК-лэн историезъя музей
1980-тӥ арын 3 номеро ПТУ-ын дышетон ужъюртлэн историезлы сӥзем музей кылдытэмын вал. Сӥё-дано усьтон ужрад 1991-тӥ арын оштолэзе ортчиз. Музейысь экспозиция 2015-тӥ арын куартолэзьысен ужа. 2024-тӥ арын музейлэн валтӥсь фондаз 726 утёно арбери утиське[8].
Музеен кивалтэ Алла Шутова — ватсаса тодон-валан сётонъя вылӥ категориен дышетӥсь, УАССР-ысь профтехобразованиея дано дышетӥсь но Росси Федерациысь СПО-ысь дано ужась. Озьы ик Шутова Ижысь промышленностья но экономикая колледжлэн историезъя кык изданиослэн авторзы луэ[8][9][10].
Валэктонъёс
- ↑ Муссаев Х. А. Встреча с прошлым открывает для нас настоящее (рус.) // Хроника знаменательных событий Ижевского промышленно-экономического колледжа. — 2016. — С. 3.
- ↑ 1 2 3 Государственное образовательное учреждение среднего профессионального образования Ижевский промышленно-экономический колледж Министерства образования и науки Удмуртской Республики [ӟуч] Архивный отдел Управления по делам архивов Администрации города Ижевска. Эскеремын 18-10-2025 арын
- ↑ 1 2 3 Этапы реорганизаций и изменений статуса Ижевского промышленно-экономического колледжа (рус.) // Хроника знаменательных событий Ижевского промышленно-экономического колледжа. — 2016. — С. 4.
- ↑ Государственное образовательное учреждение среднего профессионального образования Ижевский промышленно-экономический колледж Министерства образования и науки Удмуртской Республики [ӟуч] Фондовый каталог УР. Эскеремын 18-10-2025 арын
- ↑ Ижевский экономический колледж берет «под свое крыло» правоведов [ӟуч] susanin.news (29.06.2009). Эскеремын 18-10-2025 арын
- ↑ 1 2 Информация для поступления [ӟуч] ciur.ru. Эскеремын 18-10-2025 арын
- ↑ Структура и органы управления образовательной организацией [ӟуч] ciur.ru. Эскеремын 18-10-2025 арын
- ↑ 1 2 Музей истории ИПЭК [ӟуч] АПОУ УР «Ижевский промышленно-экономический колледж». Эскеремын 18-10-2025 арын
- ↑ Шутова А. В. Хроника знаменательных событий Ижевского промышленно-экономического колледжа. — Ижевск: ИПЭК, 2016. — 61 с.
- ↑ Летопись событий музея [ӟуч] ciur.ru. Эскеремын 18-10-2025 арын
Литература
- Шутова А. В. Хроника знаменательных событий Ижевского промышленно-экономического колледжа. — Ижевск: ИПЭК, 2016. — 61 с.
