Вотка завод

Википедиысь материал
«Вотка завод» АО
Изображение логотипа
Типез Акционер огазеяськон
Кылдэм арез 1759
Интыяськемез РоссияFlag of Russia.svg Россия: Вотка, Удмуртия
Валтӥсь адямиос Чурбанов Игорь Юрьевич (валтӥсь директор)
Удысэз Машиностроение
Поттэм вузэз (бизнес) Мувӧй но газ кыскон, гурезьёсты но муэз портон-эскерон тӥрлык, калыкын кутӥськись арбериос, станокъёс, ожгар техника
Ужасьёслэн лыдзы 10,5 сюрс (2011 ар)
Данъетъёсыз Орден Ленина Орден Ленина Ужысь Горд Знамя нимо орденУжысь Горд Знамя нимо орден
Сайт www.vzavod.ru
Логотип РУВИКИ.Медиа Медиафайлъёс РувикиМедиа пушкын

Во́тка заво́д (али — «Вотка завод» акционер огазеяськон) — Удмурт Элькунысь Воткаысь валтӥсез предприятие, 1759-тӥ арын кылдытэмын.

1757-тӥ арын Елизавета императрица граф П. И. Шуваловлы Воткае корт ӵыжатон завод пуктыны лэзиз, сое 1758-тӥ арын кун Берг-коллегилэн указэзъя ӝутыны кутскизы. 1759-тӥ арын 21-тӥ куарусёнэ (2-тӥ оштолэзе) Воткаысь корт ӵыжатон завод нырысетӥ вуззэ поттӥз.

1837-тӥ—1848-тӥ аръёсы Воткаысь корт поттон заводэн кивалтӥз Камско-Воткинской округлэн кивалтӥсез Илья Петрович Чайковский (1795-1880), Пётр Ильич Чайковский композиторлэн атаез.

XVIII—XX дауръёс ӵоже Воткаысь заводын корт, якорьёс, чугун сюрес техника но выжъёс, зарезь но шур судноос, паровозъёс, экскаваторъёс, зарни поттон драгаос, пӧртэм ожтӥрлык, калыкын но промышленностьын кутӥськись уно пумо тӥрлык лэсьтӥзы. 1840-тӥ арын заводын якорь синпелет ӵыжатӥзы, бератаз сое Вотка ӵыпет дуре юнматӥзы.

Али Вотка завод бурд улын ужась огез предприятие Россиысь ядерной щитлэн инъетэз луись стратегической «Тополь-М  [ӟуч] (удм.» континентальной ракетаосты но ожгар тӥрлык поттэ. Калыкын кутӥськись вузъёс пӧлын лэсьтоно арбериосыз — мувӧй, газ промышленностьлы тӥрлык но станокъёс.

Историез

Озьы ик учке: Вотка § История и Кам заводъёс § История

1917-тӥ арозь

Вотка заводысь адӟытон тэркы Уралысь историяя но археологияя музейын утиське

Уралысь XVIII даурлэн шораз гурезь предприятиос вӧзысь нюлэсъёс быремен, завод пуктыны муг луиз. Кыдёкысен пу ваён корт поттонэз дуноятӥз. Та югдурысь потон амал луиз корамтэ нюлэсо интыысь рудаез утялтон. Воткаысь корт ӵыжатон заводэз сяна, таӵе стратегиен ик кыдёке ик ӧвӧл 1760-тӥ—1763-тӥ аръёсы пуктэмын Ижысь корт ӵыжатон завод но. Кам заводъёслы инты бырйыкузы, бадӟым ву вирсэръёслэсь (туала Вотка карлэсь 15-20 иськемын бызись Кам шур) матын луэмзэс санэ басьтӥзы, озьы ик промышленностьлы со вакытэ валтӥсь эстӥськон луись нюлэсъёслэсь артэ будэмзэс чаклазы, гурезь ваньбуръя предприятиослы матэ интыяськемзэс эскеризы. 1754-тӥ—1763-тӥ аръёсы Россия империын нимо-дано адямиослэн луись (граф П. И. Шуваловлэн, граф М. И. Воронцовлэн но мукетъёсызлэн) 42 частной заводъёс пуктэмын вал[1][2].

1763-тӥ арын, Шувалова кулэм бере (1762), Воткаысь но Ижысь заводъёс Шуваловлэсь семья пунэмъёссэ кысэм чот казна кие выжизы[3].

Отӥяз (XVIII—XX дауръёсы) Вотка заводын якорьёс, чугун сюрес техника но выжъёс, зарезь но шур судноос, экскаваторъёс, зарни поттон драгаос, пӧртэм ожтӥрлык лэсьтӥзы.

Озьы, кылсярысь, XVIII даурлэн кыкетӥ палараз Екатерина II императрицалэн 1773-тӥ арын юнматэм указэзъя Военно-морской флотлы якорьёс поттыны кутскемын. XIX даурлэн нырысетӥ палараз Россиын вань ӵыжатоно якорьёс пӧлысь 62 процентсэ Вотка заводын лэсьтӥзы[4].

1810-тӥ арын А. Ф. Дерябинэн ӧтем механик Л. Ф. Сабакин кивалтэм улсын Вотка заводэ пуктэмын Уралысь нырысетӥез кортэз вечки листлы пӧрмытӥсь стан, умоятэмын омыр пельтон машина, озьы ик Гороблагодатской заводъёслы  [ӟуч] (удм. ярась винт вандылон станокъёсты поттыны ӧдъязы[5].

Воткаысь завод Гороблагатской заводъёсысь чугунэз тупатъян-воштон понна 1 пудзэ ог 1 манетэн басьялляз. XIX дауре корт ӵыжатон кричной горнъёсын радъяськылӥз, гурысь потэмзэ отӥяз молотъёсын кокаллязы. Со вакытэ ар куспын уже кутэм чугунлэн быдӟалаез шорлыдын 270 сюрс пуд люкаськылӥз, корт поттон — 200 сюрс пуд. Заводысь механизмъёсты ужатон понна 71 ву питран бергалляз[6].

Вотка завод со вакытысь огез азьмынӥсь предприятие вал. 1811-тӥ арын С. И. Бадаев металлурглэсь выль сямен андан ӵыжатон амалзэ асэстӥзы. Озьы вылӥ ӟечлыко андан пӧртэм тӥрлык лэсьтонын кутӥськылӥз (корт вандон, эмъян, штампъёс пӧрмытон). Заводлэсь быгатонлыкъёссэ но данзэ пусйыса кадь, 1858-тӥ арын вотка усточиос бадӟым заказэз быдэстӥзы: Петропавловской крепостьлэн соборезлы шпилезлы каркас ӵыжатӥзы но бичазы[7]. Шпильлы XVIII дауре лэсьтэм нырысетӥез конструкция умойтэмгес пӧрмемын вал, сое ӵемысь тупатъяно луылӥз. Шпилез Англиын яке Вотка казённой заводын гинэ ӵыжатыны луэ шуыса, царьлы ивортӥзы лыдъяське[8]. Выль шпилез лэсьтон пумысен заказ заводэ 1857-тӥ ар пумын вуиз, нош 1858-тӥ арын 30-тӥ пӧсьтолэзе шпилез колокольня вылэ ӝутыны ӧдъязы ни. Казналы та ужъёс 26 662 манет тыр усизы — англи усточиослы 2 поллы уногес тырысалзы

1834-тӥ арын Вотка завод 500 сюрс манет тыр пӧртэм пумо 100 сюрс пуд корт поттӥз. Интыысь рынокын 2 сюрс пуд пала корт вузамын вал, Нижний Новгородысь ярмаркае 180 сюрс манет тыр ог 70 сюрс пуд келямын вал[6].

Завод озьы ик Военно-морской флотлы кулэ луись броня кадь чурыт андан поттылӥз.

1840-тӥ арын, Илья Петрович Чайковский кивалтон вакытэ, предприятие удыссэ воштэ но чисто корт поттӥсь завод интые машиностроительной заводлы пӧрме. 1847-тӥ арын пароходъёс лэсьтыны кутскемын, 1868-тӥ арын — паровозъёс. Та вормонъёслэн аспӧртэмлыксы бадӟым: завод пичи гинэ векчи шурлэн ярдуръёсаз, Кам шурлэсь меӵак 12 иськемын интыяськемын, кун чугун сюресъёсын герӟаськемын ӧй вал. Соин ик пароходъёсты но мукет судноосты лэсьтыны кутскыкузы, соосты тулыс тудву вакытлы вуттыны тыршизы. Предприятие котыре ву люкан вылысь нимысьтыз ӵыпет лэсьтӥзы. Тулыс ву со ӵыпетэ сюрылӥз, озьы судно лэсьтон котырез вуэн тырмытъяз. Лэсьтэм судноос ву вылэ лӧптылӥзы. Соку ву люкан ӵыпетлэсь ӧсъёссэ усьяллязы, озьы пароходъёс бадӟым вуэн Вотка шур кузя Сива шуре кошкылӥзы, отӥяз ини Кам шуре вуылӥзы. Оглом завод пӧртэм пумо 400 пала судноос лэсьтӥз[4]. Ӵапак тазьы ик бадӟым ву кузя паровозъёсты но келяллязы. Нырысь ик соосты нимысьтыз биржае ӝоктылӥзы, отӥяз Вотка, Кам но Сива шуръёс кузя матысь чугун сюрес станциёзь келяллязы. Озьы 1916-тӥ арозь ужазы, со аре Вотка заводэз кунысьтымы чугун сюресэн герӟазы. Предприятиын ваньзэ-ӧвӧлзэ паськыт колеялы пӧртэм пумо 631 паровозъёс бичазы[4].

1865-тӥ арысен 1868-тӥ арозь Вотка заводлэн горной кивалтӥсез генерал-майор А. И. Арсеньев вал[9][10]. 1860-тӥ аръёслэн пумазы Воткаысь заводын А. А. Иосса кивалтэм улсын атыкай металлургиын нырысетӥ опытъёс ортчытъязы: кизер чугунлэсь нимысьтыз гурын, пушкытӥз омыр лэзьыса, бессемер амалэн андан ӵыжатъязы. 1868-тӥ арын Иосса Горной департаментлэн директорезлы В. К. Рашетлы докладной гожтэт ыстӥз, отын мартен гуръёсын андан ӵыжатон амалъёсты эскеронлэн кулэлыкез пумысен ивортылӥз. Коньдон ӝегамен, Иосса Пермьысь анданлэсь пушкаос ӵыжатон заводэ  [ӟуч] (удм. выжем бере гинэ та эскеронъёс Вотка заводын кутскизы[11][12][13][14].

1871-тӥ арын Россиын кыкетӥез, нош Уралын нырысетӥез мартен гуръёс лэземын вал. Мартен анданлэсь чугун сюрес рельсаос лэсьтонэз радъязы.

1887-тӥ арын Екатеринбургын ортчем Сибирьысь но Уралысь наукая но промышленностья адӟытонын Вотка завод кортэзлэн вылӥ ӟечлыкез понна УОЛЕ зарни медален, озьы ик кортэз листъёсы ӵыжатон амалъёсты умоятэмез понна ИРТО туй медален пусъемын[15].

XIX даурлэн пумаз, Транссибирской магистралез лэсьтонэн валче, завод выль продукция поттонэз, чугун сюресъёслы выж ӵыжатонэз, радъяз. 1915-тӥ арын чугун сюрес выжъёс лэсьтэмезъя Вотка завод Россиын нырысетӥ интые потӥз.

Заводын вань поттоно вузъёс пӧлысь нырысетӥ интые паровозъёс лэсьтон потӥз, со вань производство пӧлысь 40 процентсэ басьтылӥз[4].

1917-тӥ—1957-тӥ аръёсы

Граждан ож вакытэ заводэз трос пол таркаллязы, соин сэрен со ужзэ дугдытӥз но 1922-тӥ арын пытсаськиз. 1925-тӥ арын 9-тӥ куарусёнэ завод гурт удыслы тӥрлык поттӥсь сямен выльысь усьтӥськиз.

1930-тӥ—1937-тӥ аръёсы завод Союзысь секыт промышленностья огазеяськонлэн бурд улаз вылӥ ӟечлыко паровой экскаваторъёс но зарни поттӥсь драгаос лэсьтыны кутскиз. 7 ар ӵоже ужатозяз, кунысь лэсьтӥськонъёсы 271 машинаос бичаз но келяз[4].

1938-тӥ арын 1-тӥ толшорысен, Обороная промышленностьысь Наркоматлэн бурд улаз выжтэмзы бере, завод артиллерийской луиз. 1938-тӥ арын 11-тӥ южтолэзе 235 номеро завод нимамын. Калыкын кутӥськись тӥрлык поттыны чаклам интыосты бушатӥзы, отын 152-мм гаубица  [ӟуч] (удм. поттыны ӧдъязы. 1941-тӥ арын Быдӟым Атыкай ож кутскемен, гаубицаосты поттэмысь дугдӥзы но 1937-тӥ арысь образецъёсъя 45-мм танкъёслы пумит 53-К пушкаосты  [ӟуч] (удм. ӵыжатыны ӧдъязы, нош 1943-тӥ арын 1942-тӥ арысь образецъя (ЗИС-3  [ӟуч] (удм.) 76,2-мм дивизионной пушкаосты поттыны кутскизы. Со дыре ик 45-мм танкъёслы пумит пушкаосты лэсьтон дугдытэмын вал. Поттэм артиллерияя орудиослэн лыдзы:

  • 1941-тӥ арын — 597 единица 1937-тӥ арын поттэм образецъя 45-мм танклы пумит 53-К пушкаос;
  • 1942-тӥ арын — 11 143 единица 45-мм 53-К пушкаос;
  • 1943-тӥ арын — 12 730 единица 45-мм 53-К пушкаос но 1 655 единица 1942-тӥ арысь образецъя потэм 76,2-мм дивизилы ЗИС-3 пушкаос, ваньмыз — 14 385 артиллерияя орудиос;
  • 1944-тӥ арын — 200 единица 45-мм танкъёслы пумит 53-К пушкаос но 2 899 единица 76,2-мм ЗИС-3 пушкаос;
  • 1945-тӥ арын толшорысен оштолэзёзь — 1 820 единица ЗИС-3 пушкаос.

Война вакытэ ваньмыз-ӧвӧлэз 31 044 (мукет лыдпусъёсъя — 52 000 ятыр[16]) пушкаос (24 670 единица 45-мм но 6 374 единица 76,2-мм) поттэмын, кунамы вань ӵыжатэм артиллерияя орудиос пӧлысь 18,39 процентэз луэ[4][17].

Быдӟым ож йылпумъяськем дырысен 1957-тӥ арозь Воткаысь машиностроительной завод 100-мм зенитной КС-19 пушкаос , 57-мм танк пумит ЗИС-2 пушкаос но мукет ожгар тӥрлык поттӥз, озьы ик калыкын кутӥськись производствоез радъяз (гурт удысылы локомобильёс, сюбег колеяослы паровозъёс но башенной кранъёс).

1956-тӥ арысен заводын станок лэсьтонлэн ӧръяськонэз кутскиз.

Ракета поттон (1957-тӥ арысен али дырозь)

1957-тӥ арын КПСС-лэн ЦК-езлэн но СССР-ысь Министръёслэн Советсылэн постановлениенызы предприятие баллистической ракетаосты  [ӟуч] (удм. поттонэ выжтэмын. Нырысетӥез бичаны кутскем ракета — ОКБ-1 амалъя лэсьтэм кизер двигателен ужась но 150 иськемозь лобӟыны быгатӥсь оперативно-тактической 8А61 ракета вал, со вооружение 1955-тӥ арын пӧсьтолэзе кутэмын. Заводын нырысетӥез 8А61 ракета 1958-тӥ арын поттэмын.

Озьы ик завод 8А61 ракеталы ядерной модификация — 8К11 лэсьтӥз, нош 1960-тӥ арысен таос вылын СКБ-385 разработкаен 300 иськемозь лобӟыны быгатӥсь оперативно-тактической 8К14 ракетаез лэсьтыны кутскиз. Тазэ 25 арлэсь кема серийно амалэн лэсьтылӥзы, со 30 арлэсь кема СССР-ысь Совето Армилэн вооруженияз кутӥськиз.

1962-тӥ арын КПСС-лэн ЦК-езлэн но СССР-ысь Министръёслэн Советсылэн пуктэмзыя Воткаысь машиностроительной заводын кужмо 9M76 оперативно-тактической ракета лэсьтыны кутскизы, со 9К76 «Темп-С  [ӟуч] (удм.» комплексэ пыриз. Нырысетӥ серийной ракетаос 1966-тӥ арын поттэмын вал. «Темп-С» СССР-ысь Совето Армилэн вооруженияз кутэм нырысетӥез чурыт топливоен кивалтоно баллистической ракета комплекс луиз. Бӧрысь та ракетаос шоро-куспо но вакчи кузьдалае лобӟыны быгатӥсь ракетаосты быдтон пумысен 1987-тӥ арын 8-тӥ толсуре юнматэм огкылъя таркамын вал.

1974-тӥ арын музъем вылысь подвижной «Темп-2С  [ӟуч] (удм.» ракета комплекслы межконтинентальной 15Ж42 ракетаосты лэсьтыны кутскемын, 1975-тӥ арын — БРСД 15Ж45 РК 15П645 «Пионер  [ӟуч] (удм.», 1976-тӥ арын — «Ока  [ӟуч] (удм.» комплексысь оперативно-тактической 9М714 ракетаосты, 1989-тӥ арын — 9M79-1 «Точка-У» комплекслы тактической 9М79-1 ракетаосты.

1987-тӥ арын СССР но США куспын юнматэм шоро-куспо но вакчи кузьдалае лобӟыны быгатӥсь ракетаосты быдтон пумысен огкылын Вотка завод но пусъемын, огкылэз тӥянлэсь кутон вылысь со ялан эскероно предприятиос пӧлы пыртэмын (XI статьяысь 6b пункт)[18].

1998-тӥ арын стратегияя «Тополь-М» межконтинентальной ракета лэсьтон радъямын вал.

1966-тӥ—1988-тӥ аръёсы ракета поттонэз азинтон понна трос лэсьтӥз директорез, Социалистической Ужысь кык полэс Герой (1976, 1981), Ленин нимо куинь полэс орденэн, Ужысь Горд Знамя нимо орденэн, ВДНХ-ысь зарни но азьвесь медальёсын пусъем мурт, СССР-ысь Кун премилэн лауреатэз Владимир Геннадиевич Садовников. Солэн нимыз Воткаысь огез выль ульчалы сётэмын.

2006-тӥ арын «Искандер-М» ракета комплексъёс сериен потыны кутскизы (комплекслэн индексэз — 9К720, МО США-лэн но НАТО-лэн классификациезъя — SS-26 Stone, меӵак верано ке, «Камень»)[19].

2010-тӥ арын 1-тӥ инвожое «Мускоысь теплотехникая институт» ОАО корпорациез кылдытон улсын «Вотка завод» ФГУП луиз «Вотка завод» ОАО, 2011-тӥ арын 25-тӥ южтолэзе завод корпорацие пыриз[20]. Мускоысь теплотехникая институтэн валче завод «Роскосмос» кун корпорацие пыре.

В. В. Путин Вотка заводын, 2011-тӥ арын южтолэзе

Калыклы арбериос поттон

«Ракета лэсьтон вакытъёсы» но предприятие калыкын кутӥськись арбериосты поттэмысь ӧз дугдылы. Нимысьтыз пусйыны кулэ пӧртэм пумо станок ӵыжатэмъёссэ: оглом 30 сюрслэсь ятыр станокъёс поттэмын.

1963-тӥ арысен нылпи коляскаос поттэ, нош 1965-тӥ арысен — Ижысь автозаводлы машина детальёс но ёзъёс. 1982-тӥ арысен али дырозь «Фея» мисьтаськон машина но солэсь модификациоссэ бича.

Выльдӥськон вакыт кутскем бере, военной заказъёс кулэсмемен, граждан продукция поттон трослы йылӥз. Предприятиез возён понна калыкын кутӥськись вуз поттон ӧръёсты мытӥзы: рефрижератор контейнеръёс, мувӧй но газ кыскон тӥрлык, ӝӧквыл токарной но портон станокъёсты, атомной реакторъёслы ёзъёс. Нош ӧжыт барыш вайись граждан вуз поттонэз (мисьтаськон машинаосты но нылпи коляскаосты) висъяськем предприятилы сётӥз.

1998-тӥ арын коньывуонэ нырысетӥ вице-премьер Ю. Д. Маслюков Воткаын Россиысь ВПК-ТЭК кенешон ортчытӥз, татчы мувӧй но газ кыскон удысысь кужмо предприятиослэсь кивалтӥсьёссэс ӧтиз. Кылсярысь, «Роснефтьлэсь» кивалтӥсьсэ Сергей Богданчиковез, ЮКОС-лэсь азьвыл йырзэ Михаил Ходорковскиез но «Транснефть» АК-лэсь тӧрозэ Семён Вайнштокез. Та пумиськонлы луыса, Вотка заводлы мувӧй но газ кыскон тӥрлыклы заказъёс йылӥзы, заводысь калыклы эшшо уж сюриз[21].

Шуэрес учыръёс

РБК-лэн ивортэмезъя, 2024-тӥ арын 7-тӥ тулыспалэ Вотка завод ракета двигательёсты эскерон вакытэ туж зол пуштӥз. Вотка котырысь Ягул каргурт котырысь полигонын шуэрес учыр пуромиз, шуо. Удмуртиысь Дэри ёросъя диспетчеръёслэн огъя дежурной службазы (ЕДДС) пусйиз, завод испытаниос сярысь азьвыл ик ивортылӥз но пуштон учыр «плановой» вал шуыса[22].

Данъетъёсыз

Синпелетъёс

Заводлэн историезлы сӥзьыса, азьвыл поттэм учкымон луись продукцилы синпелетъёс Вотка карын юнматэмын:

  • кык якорьёс (огез предприятилэн котыраз, мукетыз Вотка ӵыпет азе пырон дорын);
  • 57-мм пушка ЗИС-2 «2243-17», Удмуртиысь Комсомол нимо танкъёслы пумит ожмаськем 174-тӥ артдивизионлы сӥземын.

Валэктонъёс

  1. ↑ Сергеев, 1958, с. 5.
  2. ↑ Алексеев, 2001, с. 155, 173.
  3. ↑ Алексеев, 2001, с. 155.
  4. ↑ 1 2 3 4 5 6 От листового железа до стратегических ракет Независимая газета. Эскеремын 2010-08-13 арын
  5. ↑ Новиков, 1999, с. 17—18.
  6. ↑ 1 2 Строльман Н. П. Воткинский завод // Энциклопедический лексикон: В 17 т. — СПб.: Тип. А. Плюшара, 1838. — Т. XII: ВОО—ВЯЗ. — С. 112—113.
  7. ↑ Туганаев, 2008, с. 248.
  8. ↑ Официальный сайт муниципального образования «Город Воткинск». Новости. Информация. События. Воткинск
  9. ↑ Заболоцкий Е. М. Горное ведомство дореволюционной России (ӟуч): Очерк истории: Биографический словарь — М.: Новый хронограф, 2014. — С. 27. — 280 с. — 300 экз. — ISBN 978-5-94881-279-3
  10. ↑ Козлов А. Г. Творцы науки и техники на Урале. XVIII — начало XX в. (ӟуч): Биографический справочник — Екатеринбург: Средне-Уральское книжное издательство, 1981. — С. 10. — 224 с. — 15000 экз.
  11. ↑ Заболоцкий Е. М. Иосса Александр Александрович // Горное ведомство дореволюционной России (ӟуч): Очерк истории: Биографический словарь — М.: Новый хронограф, 2014. — С. 105. — 280 с. — 300 экз. — ISBN 978-5-94881-279-3
  12. ↑ Иосса Александр Александрович / Микитюк В. П. // Уральская историческая энциклопедия : [арх. 20 коньывуонэ 2021] / глав. ред. В. В. Алексеев. — 2-е изд., перераб. и доп. — Екатеринбург : Издательство Академкнига; УрО РАН, 2000. — С. 232. — 640 с. — 2000 экз. — ISBN 5-93472-019-8.
  13. ↑ Иосса Александр Александрович // Инженеры Урала (ӟуч): Энциклопедия / под ред. Н. И. Данилов — Екатеринбург: Уральский рабочий, 2001. — С. 224. — 696 с. — 3000 экз. — ISBN 5-85383-203-4
  14. ↑ Иосса (Jossa) Александр Александрович // Немцы России : энциклопедия : в 3 т. / пред. редкол. В. Караев — М. : Общественная Академия наук российских немцев, 1999. — Т. 1 : А–И. — С. 820. — 832 с. — 5500 экз. — ISBN 5-93227-002-0.
  15. ↑ Корепанова С. А. Промышленные выставки России XIX века : к 120-летию Сибирско-Уральской научно-промышленной выставки 1887 года / науч. ред. Б. Б. Овчинникова. — Екатеринбург : Издательство «Квадрат», 2007. — С. 216. — 320 с. — 1000 экз. — ISBN 978-5-91357-003-1.
  16. ↑ Воткинский завод. 1945—2010 / рук. редколлегии В. И. Овчинников. — Ижевск: ГУП УР «Ижевский полиграфический комбинат», 2010. — С. 140. — 191 с. — 1480 экз. — ISBN 978-5-87469-158-5.
  17. ↑ Государственная корпорация по космической деятельности РОСКОСМОС
  18. ↑ United Nations
  19. ↑ 9К720 Искандер — SS-26 STONE | MilitaryRussia.Ru — отечественная военная техника (после 1945 г.)
  20. ↑ 1990 г. — наши дни. АО «Воткинский завод»
  21. ↑ Саидов Руслан. В Удмуртии Фрадков пообещал профинансировать «Тополь-М» // forum-msk.org. Эскеремын 2012-04-06 арын
  22. ↑ Экстренные службы назвали причину взрыва под Ижевском РБК.

Литература

«https://udm.ruwiki.ru/w/index.php?title=Вотка_завод&oldid=507346»-ысь басьтэмын