Якорь (Воткаысь синпелет)
| Синпелет | |
| Якорь | |
|---|---|
 | |
| 57°03′08″ с. ш. 53°58′21″ в. д.GЯO | |
| Кун |
 Россия |
| Интыяськемез | Удмуртия, Вотка кар, Вотка тыметлэн ярдурез |
| Кылдытэмын | 1959 |
| Юртэз пуктэмын | 1840 |
| Инлыкез |
 ОКН № 1800041000 |
| Ӝуждалаез | 5,5 м |
| Лэсьтӥськон материалъёс | чугун, туй |
 |
|
 Медиафайлъёс РувикиМедиа пушкын | |
 | Россилэн лулчеберето кылёс лэсьтосъёсыз улос инлыкен рег. № 181610539630005 (ЕГРОКН) лэсьтос № 1800041000 (БД Викигида) |
«Якорь» синпелет (ӟуч: Якорь (памятник, Воткинск)) — туала Удмуртилэн интывылаз кылдэм нырысетӥез официальной луись синпелет[1]. Воткаысь Чайковскийлэн но Азинлэн сюрес вожысьтызы площадязы интыяськемын.
Историез
Воткаын якорь ӵыжатон
1779-тӥ арын Екатерина II императрицалэн именной указэзъя Воткаын якорь лэсьтон усьтэмын вал, ӝоген со зол азинскиз: XIX дауре 24 урал заводъёсысь вань поттэм якорьёс пӧлысь 62 % Вотка заводын ӵыжатэмын вал[2].
Синпелетэз лэсьтон но усьтон
1837-тӥ арын каре Россиысь престоллэн наследникез, быдӟым князь Александр Николаевич вуиз но выль якорез кисьтонэ ачиз пыриськиз, та сярысь якорьлэн бурдъёсыз вискын пусйыса гожтэм кельтэмын вал: «Солэн Императорской Высочествоез Государь Всероссийской Престоллэн Наследникез Быдӟым Князь Александр Николаевич 167 пуд секталаем якорез ас киосыныз дуриз. 1837-тӥ арын 22-тӥ куартолэзе». Та учырез адӟисьёс пӧлын вуоно композиторлэн Пётр Ильич Чайковскийлэн бубиз, гурезь ужъёсъя заводэн кивалтӥсь Илья Петрович Чайковский вал[3].
Наследникен ӵыжатэм якорез синпелетэз сямен Вотка заводэ кельтон сярысь огкылысь кенешизы (монументлы проектлэн авторез — заводысь управитель Василий Ипатович Романов). 1840-тӥ арын 16-тӥ инвожое завод котыре юнматэм синпелетэз сӥё-дано усьтӥзы, сое Ватка но Слободской епископ Неофит вӧсяз. 1850-тӥ арын «Якорь» кар ӵыпет вылэ выжтэмын вал[3][4].
Синпелетэз куашкатон но выльысь лэсьтон
1917-тӥ арысь революция бере синпелетлэн постаментэз куашкатэмын вал, нош ассэ якорез ӵыжатӥзы-быдтӥзы: совето властьлэн оскем муртъёсызлы якорь шорысь ивортонъёсын пул вылысь престоллэн наследникез сярысь тодэ вайытон ӧз яра[5].
1959-тӥ арын Вотка заводлы 200 ар тырмонэн валче синпелетэз выльысь пичигес быдӟалаем дуризы, сое Вотка тыметлэн шундыпуксён ярдураз Ленин нимо лулчеберетъя юрт вадьсы юнматӥзы. Эшшо кӧня ар ортчыса, со набережнойысь азьвыл интыяз берыктэмын вал[3][4].
Утён
Удмурт АССР-ысь Министръёслэн Кенешсылэн 1979-тӥ арын 5-тӥ толсуре юнматэм 362 номеро «Удмурт АССР-ысь историысь но лулчеберетысь синпелетъёсты кунэн утён сярысь» постановлениезъя Воткаысь ужез данъясь «Якорь» нимо памятник улос инлыкен историысь утёно синпелетъёс пӧлы пыртэмын вал[6].
Валэктонъёс
- ↑ Первый официальный памятник Удмуртии – Якорь в Воткинске [ӟуч], iz-article.ru. Эскеремын: 14 гудырикошконэ 2025 арын.
- ↑ Экскурсия «Воткинский якорь как символ России» [ӟуч], culture.ru. Эскеремын: 14 гудырикошконэ 2025 арын.
- ↑ 1 2 3 Памятник Якорь [ӟуч], historical-baggage.ru/. Эскеремын: 14 гудырикошконэ 2025 арын.
- ↑ 1 2 Туганаев, 2008, с. 526.
- ↑ В Воткинске отмечают 175-летие знаменитого якоря [ӟуч], izhevsk-news.net. Эскеремын: 14 гудырикошконэ 2025 арын.
- ↑ Постановление Совета Министров Удмуртской АССР «О постановке на государственную охрану памятников истории и культуры Удмуртской АССР» № 362 [ӟуч], okn-mk.mkrf.ru. Эскеремын: 14 гудырикошконэ 2025 арын.
Литература
- Памятник-якорь // Памятники истории и культуры // Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — С. 526. — 768 с. — 2200 экз. — ISBN 978-5-7659-0486-2.