Чайковский, Илья Петрович

Рувикиын таӵе фамилиен мукет муртъёс сярысь гожтосъёс вань. Учке: Чайковский.

Илья Петрович Чайковский
Илья Петрович Чайковский, 1867-тӥ ар
Вордӥськем дырыз	20-тӥ пӧсьтолэзе 1795({{padleft:1795|4|0}}-{{padleft:7|2|0}}-{{padleft:20|2|0}})
Вордӥськем интыез	Слободской, Вятское наместничество[d], Росси империя[d] яке Глаз, Ватка губерния, Росси империя[d]
Кулэм дырыз	21-тӥ толшоре 1880({{padleft:1880|4|0}}-{{padleft:1|2|0}}-{{padleft:21|2|0}}) (84 года)
Кулэм интыез	Санкт-Петербург, Росси империя[d]
Тодос удысэз	гурезь уж
Дышетскемез	Санкт-Петербургский горный университет[d] (1817)
Данъетъёсыз

Илья Петрович Чайковский (20-тӥ пӧсьтолэзе 1795, Слободской, Вятское наместничество^[d] яке Глаз, Ватка губерния, Росси империя^[d] — 21-тӥ толшоре 1880, Санкт-Петербург) — гурезь ужъёсъя инженер, инженер-генерал-майор, П. И. Чайковский композиторлэн атаез.

И. П. Чайковский но А. А. Ассиер егит дыръязы. Миниатюраос

И. П. Чайковскийлэн Воткаысь Чайковскийёслэн музей-усадьбаязы кабинетэзлэн реконструкциез но данъетъёсыз

Улон сюресэз

Бубиз — Пётр Фёдорович Чайковский — городничий, 20 ар стажен эмчи, Ватка зэмлыко судысь заседатель. Мумиз — Анастасия Степановна Посохова.

Пётр Фёдорович 1785-тӥ арын Екатерина II императрицалэн указэныз выжыезъя дворянин луиз. Бадӟым семьязэ сюдӥз-вордӥз, Илья Петрович берпуметӥ пиез вал.

1795-тӥ арын толшоре Пётр Фёдорович Слободской карлы городничие юнматэмын вал. 1795-тӥ арын 20-тӥ пӧсьтолэзе Вознесенской но Екатерининской соборлэн метрикая книгаяз «Вордскемъёс сярысь» люкетаз гожтэмын: «Слободской карын городничийлэн ужинтыяз тыршись Пётр Фёдорович Чайковскийлэн Илья пиез». Ӝоген, 1796-тӥ арын тулыспалэ, Пётр Фёдорович городничий луыса Глазове выжтэмын вал.

Ваткаысь кык классъем калык училищеез йылпумъямез бере (1806—1808), 13 аресъем Илья Петрович Ижысь заводэ уже интыяськиз, татын со А. Ф. Дерябин кивалтэм улсын ужкагазъёсысь, чертёжъёсысь зэмос копиосты лэсьтӥсь луыса тыршиз (унтер-шихтмейстер должностьын). Та званиын ик 1811-тӥ арын Вотка заводын ужаз.

Аслаз улэм-вылэмез сярысь гожъямъёсаз Илья Петрович Чайковский пусйылӥз:

«Атаймылэн ми ваньмы 9 кузя вал… пиос пӧлысь мон берпуметӥез луылӥ. Вань агайёсы ожгар службае юнматэмын вал… нош монэ, миськинь пияшез, Ваткаысь калык училищеез йылпумъяме бере, 1808-тӥ арын аныкае Иж заводэ нуиз… татын Андрей Федорович Дерябин кивалтӥз»

— .

1811-тӥ арын Санкт-Петербургысь Горной кадет корпусэ пыриз (татчы сое директор А. Ф. Дерябин выжтӥз), но сое 6 ар ортчыса гинэ йылпумъяз (1817-тӥ арын), бадӟым азвесь медален пусъемын вал (кадет корпусын оглом 3 ар ӵоже дышетскылӥзы).

Кык арзэ (1818—1820) Пермьысь гурезь ужъёсъя правлениын валтӥсь маркшейдерлэн чертёжъёс лэсьтонъя юрттӥсез луыса тыршиз.

1820-тӥ арысен 1828-тӥ арозь — Гурезь но сылал ужъёсъя департаментын пӧртэм ужинтыосын тыршиз.

1828-тӥ—1831-тӥ аръёсы Горной институтысь кык вылӥ классъёсын гурезь статистикалы но гурезь законоведенилы дышетӥз.

1831-тӥ арын 2-тӥ толшорысен — Онегаысь Сылал поттон ужъёсъя правлениен кивалтӥз.

Сылалэн узыр Леденгское черкогуртэз азинтыны выриз, отын училище но духовой оркестр усьтӥз.

1825-тӥ арысен «Горный журналын» наукая статьяоссэ печатлаз, нош 1826-тӥ арысен 1831-тӥ арозь гурезь но сылал ужпумъёсъя тодосчиослэн комитетазы ёзчи вал.

1836-тӥ арын обер-бергмейстерлэсь чинзэ басьтӥз, нош вуоно араз подполковникозь ӝутскиз но Кам-Вотка гурезь заводэ кивалтӥсе юнматэмын вал, татын со корт поттон ужез радъяз-выльдӥз.

Со кивалтон вакытэ (1836—1848) Россиын нырысьсэ кортэз пудлинг амалъя чугунлэсь ӵыжатыны ӧдъязы, озьы ик нырысетӥ пароходъёсты лэсьтыны кутскизы, нырысетӥ бичамез «Астрабад» нимо луиз, сое англичан Карр кивалтэм улсын ӝутӥзы но Кам шуре лэзизы.

1842-тӥ арын ӟеч ужамез понна сое инженер-полковникозь ӝутӥзы.

1848-тӥ арын 6-тӥ тулыспалысен 1858-тӥ арозь инженер-генерал-майор чинын отставкаын вал, со вакытэ Пётр Яковлевлэн но Сергей Яковлевлэн наследникъёсызлэн частной луись Алапаевской но Невьянской заводъёсынызы кивалтӥз (Невьянскысь, Быньгиысь но Петрокаменскоеысь заводъёс).

1858-тӥ арын 10-тӥ коньывуонэ выльысь кун службае берытскиз — Петербургысь технологической институтлэн директорез луиз. Институтэз вылӥ дышетон заведенилы пӧрмытон ужпумен выриз.

1863-тӥ арын 8-тӥ южтолэзе отставкае потӥз.

1880-тӥ арын 9-тӥ толшоре Санкт-Петербургын улонысь кошкиз.

Данъетъёсыз но дано нимъёсыз

• 1859-тӥ арын 8-тӥ куарусёнэ инженер-генерал-майорозь ӝутэмын;
• 1840-тӥ арын Вӧсьлыко Станиславлэн 3-тӥ степенё орденэныз пусъемын;
• 1846-тӥ арын Вӧсьлыко Анналэн 2-тӥ степенё орденэныз сӥлы каремын;
• 1861-тӥ арын Вӧсьлыко Владимирлэн 3-тӥ степенё орденэныз пусъемын.

Семьяез

Атаез — Пётр Фёдорович Чайковский (1745—1818).

Анаез — Анастасия Степановна, вордскемезъя — Посохова (1751—?).

Агайёсыз но апай-сузэръёсыз:

• Василий (1777—?);
• Евдокия (1780—?);
• Екатерина (1783—?);
• Иван (1785—1813) — Петербургысь Кыкетӥ кадет корпусэз йылпумъямез бере артиллерияя кызетӥ бригадаын службазэ нуиз, тушмонлы пумит трос походъёсы пыриськиз. Прейсиш-Эйлау вӧзын ожмаськонъёсын кышкасьтэм луэмез понна Дун-чылкыт Георгийлэн 4-тӥ степенё орденэныз пусъемын вал. 1813-тӥ арын Монмартр (Париж) дорын виемын;
• Александра (1786—?);
• Владимир (1793—1850);
• Пётр (1789—1871) — Севастопольлэн комендантэз, отӥяз Кавказысь минерал вуосты лэсьтонъя комиссилэн директорез, генерал-майор;
• Олимпиада (1801—1874).

Чайковскийёслэн семьязы 1848-тӥ арын. Паллянысен бур пала: вуоно композитор П. И. Чайковский тямыс аресказ, солэн мумиз Александра Андреевна Чайковская, апаез — Александра, апаез — Зинаида (сылэ), агаез — Николай, выныз — Ипполит, бубиз — Илья Петрович Чайковский.

1827-тӥ арын Марья Карловна Кейзерен кузпалъяськиз, Зинаида нылзы вордӥськиз. 1831-тӥ арын пал кылиз, 1833-тӥ арын коньывуонэ кыкетӥзэ кышнояськиз, кузпалыз Александра Андреевна Ассиер луиз (1813—1854) — таможняысь чиновниклэн, ужась стат советниклэн Андрей Михайлович (Михаель-Генрих-Максимилиан) Ассиерлэн нылыз но Мейсен фарфор мануфактураысь (Саксония) француз скульпторлэн, моделистлэн Мишель-Виктор Асьелэн (Michel Victor Acier) внучкаез. Куать пинал вордӥзы, соос пӧлын композитор Пётр Чайковский но. Семьяен шудо улонзы 1854-тӥ арын инвожое Александра Андреевналэн холералэсь кулэменыз уриськиз. 11 ар ортчыса, 70 аресказ, Илья Петрович палкышно кылем Елизавета Михайловна Александроваен (вордскемезъя — Липпорт) кузпалъяськиз.

Нылпиосыз:

• Зинаида (1829—1878);
• Николай (1838—1910);
• Пётр (1840—1893);
• Александра (1842—1891);
• Ипполит (1843—1927);
• Анатолий (1850—1915);
• Модест (1850—1916) (Модест но Анатолий — эгызоос).

Кышнозэ ватон нуналэ Илья Петрович но холераен висьыны усиз. Кӧня ке нунал ӵоже со улон но кулон вискын вал, но бурмиз. Александра Андреевна кулэм бере квартираязы улыны Чайковскийёслэн семьязылы секыт но чидантэм вал. Сӥзьыл пал Илья Петрович выль квартира шедьтӥз — Васильевской шормуӵлэн 4-тӥ линиысьтыз Гак юртын. Та дырлы Ипполитэз Зарезь корпусэ юнматӥзы, нош Саша сузэрзэ Смольной институтэ сётӥзы.
Кышнотэк Илья Петровичлы секыт вал, уката ик кык пичи пиосыныз: нылпиоссэ утялтыны чик дышымтэ. Мӧзмонзэ, куректонзэ басылатон понна Пётр Петрович агаезлы семьяосынызы Шор проспект но Кадет линия сэргысь Остерловлэн корказ (25-тӥ юрт) пумиськыны ӵектӥз, соиз шумпотыса соглаш луиз. Ар пумын пичиосын, Модестэн но Анатолиен ӵош, Илья Петрович Кадет линие выжиз. Пётр Петровичез, отставкаысь генералэз но витьтон кык ожмаськонэ пыриськем муртэ, бадӟым чудак шуыса нималлязы, семьяяз солэн вить нылыз но куинь пиез будӥзы, агай-вынъёслэн семьяоссы огазе люкаськыку, квартираез ӟоскыт луылӥз. Нош егитъёслы дырзэс огазьын ортчытыны кельшылӥз, ӵемысь шумприч кенешон сямен уйшорозь но нылпиос пукылӥзы, таин сэрен бадӟымъёс йыркуръяськылӥзы.
Агаеныз куинь ар ӵош улыса, Илья Петрович эшшо огпол эскероно нимаз висъяськоно кариськиз, таяз рад со «Крепостной Россилэн югдурез сярысь» рос-прос эскеронъёслэн авторзылэн но «Земледельческая газета»-лэн редакторезлэн А. П. Заблоцкий-Десятовскийлэн юртаз (39-тӥ юрт, Васильевской шормуӵлэн 8-тӥ линияз) квартирае пыриз. Выль квартиралэн укноосыз азбаре учкылӥзы, квартира кык этаж тыр интыяськылӥз — куинетӥ но ньылетӥ. Хозяйствоез возён но, кыктоосты утялтон но институтысь дырызлэсь вазь басьтэм 14 аресъем Александра вылэ усиз. Шутэтскон нуналъёсы гинэ соос доры артэ интыяськем Гурезь но Зарезь корпусъёсысь Николай но Ипполит вуылӥзы, нош Пётр Фонтанкаысен ӵемгес извозчикен лыктылӥз.

—

Цитата

Илья Петрович Чайковский улонэзлэн шунды пуксён вакытаз пиезлэсь быдэс Россиын дано луыны кутскемзэ адӟыса вуттӥз на. Пётр Ильич Чайковский атаез сярысь тазьы гожъялляз:

«Юстицияя министерствоысь Консерваторие пегӟеме понна атаелэсь мылкыдъёссэ сюлмы тымиськытэк тодам вайыны уг быгатӥськы. Службаын азинсконэлы солэсь осконъёссэ ӧй быдэсты шуыса, солы вӧсь ке но вал, крезьгурчи луон понна ас мылкыд каремея курадӟыса улэмме адӟыса, солы ӝож ке но вал, со ноку но, одӥг кылын но мыным йыркуръяськонъёссэ ӧз возьматы. Котьку шуныт мылкыдын азьланяз малпанъёсы но планъёсы сярысь тунсыкъяськылӥз но котьку бурдъяны тыршиз. Кыӵе луысал мыным, уно крезьгурчиослы сямен ик, тиран кадь самодур атай кузьмасал ке мыным адӟон».

Валэктонъёс

Чӧлсконъёс

• Чайковский Илья Петрович [ӟуч]