П. И. Чайковскийлэн музей-усадьбаез

Википедиысь материал
Gerb-icon.png

РФ Лулчеберетъя министерство

Arrow-Right.png
Gerb-big.png
Министерство культуры Российской Федерации
Чеберлыко инты
П. И. Чайковскийлэн музей-усадьбаез
Усадьба в Воткинске.jpg
57°03′13″ с. ш. 53°58′06″ в. д.GЯO
Кун РоссияFlag of Russia.svg Россия
Интыяськемез Удмуртиысь Вотка карысь Чайковскийлэн ульчаысьтыз 119-тӥ юрт
Кылдытэмын 1940
Валтӥсь датаос
1837 — Чайковскийёслэн семьязы улыны выжыяськиз
1840 — Пётр Чайковский вордӥськиз
1848 — Чайковскийёс Воткаысь кошкизы
1940 — мемориал музей усьтӥськиз
Сайтэз tchaikovskyhome.ru
Логотип РУВИКИ.Медиа Медиафайлъёс РувикиМедиа пушкын

П. И. Чайковскийлэн музей-усадьбаез — со мемориал музей-юрт, интыяськемын Удмуртиысь Вотка карын. Вотка заводлэн кивалтӥсезлэн чертёжъёсызъя 1940-тӥ арын кылдытэмын. Татын вордӥськиз но пинал дырзэ ортчытӥз композитор Пётр Ильич Чайковский. Чайковскийёс Воткаысь мукет азе улыны кошкемзы бере Господской ульчаысь усадьба кема дыр ӵоже я буш улӥз, я ӵемысь кузёоссэ вошъялляз. 1930-тӥ аръёсы куашкан калэ вуиз. 1940-тӥ арын сое выльдӥзы но отчы мемориал музей усьтӥзы. Отӥяз музей комплексэ котырысьтыз мукет юртъёсты но пыртӥзы[1].

Чайковский — Воткаын

Чайковскийёслэн семьязы. 1848-тӥ ар.

1837-тӥ арын композиторлэн атаез — гурезь ужъёсъя инженер Илья Петрович Чайковский — Сарапул уездысь Ватка губерниысь Камско-Воткинской корт ӵыжатон заводлы кивалтӥсе юнматэмын. Соин ӵош Воткае егит кузпалыз Александра Чайковская (ныл фамилиез — Ассиер) улыны выжиз[2]. Семья Господской ульчаысь (али — Чайковскийлэн ульчаез) юртэ интыяськиз. Урамысь вань пуктэм юртъёс заводысь инженеръёслы но кивалтӥсьёслы чакласа ӝутэмын вал. Котькуд коркалэн аслаз пыронэз вал, котькудӥзлэн «ымныр» палыз пруд шоры учкылӥз. 1 номеро юрт, кытчы Чайковскийёс каръяськизы, Кам заводлэн кивалтӥсезлы Андрей Дерябинлы чакласа 1806-тӥ арын пуктэмын вал. 30 ар ӵоже юртъер вужмиз, соин ик Илья Петрович ньыль ар пала сое выльдыны-сэзъяны выриз[3].

Воткаын Чайковскийёс дас одӥг ар улӥзы, та дыр ӵоже соослэн ньыль пиналзы вордӥськиз. Со сяна, Илья Петровичлэн нырысетӥ кышноезлэсь вордӥськем нылзы бордазы улӥз на[4]. 1840-тӥ арын вордӥськем Пётр Ильич начальной образование дораз басьтӥз, сое Фанни Дюрбах гувернантка дышетӥз. Куать аресказ пияш француз но немец кылъёсын вольыт вераське ни вал[5]. Бӧрысь ни, Воткаез тодаз вайылыкуз, композитор шуылӥз: «Мон бадӟым улонлэсь ышыгын будӥ, пичи дырысеным ӟуч калык крезьгурлэн вераны луонтэм чеберлыкез сюлэмам пыӵаз». Фанни Дюрбах но, дасо аръёс ортчыса но, визьнодам пиналэзлы гожъялляз: «Балконысен кылзылӥм ненег но ӝож гуръёсты... Тӥ соосты тодыны кулэ, соку нокудды но кӧлыны вазь ӧд выдылэ. Со гуръёс тодады лыкто ке, соос вылэ пыкиськыса, крезьгур гожтэ»[6].

Крезьгуръя нырысетӥ дышетӥсен Чайковский лыдъялляз Мария Марковна Пальчиковаез, 1845-тӥ арын Воткае улыны выжыяськем нылмуртэ. Бератаз ни композитор со сярысь туж шунытэн тодаз вайылӥз. Ёрмыса улэмзэ тодыса, Пётр Ильич аслаз доходысьтыз солы пенсия но тыриз[7].

Ӝытъёсы ӵемысь тодам вайисько тӥ сярысь, Алапаиха сярысь, Вотка сярысь, тодам вайисько мусо Надежда Тимофеевнаез, кудӥз кемалась ӧвӧл ни. Но котырам сыӵе ик адямиос, кинъёс тӥ сямен ик Пётр Чайковскиез ярато[8].

— П. И. Чайковскийлэн атаезлы гожтэтысьтыз. Петербург, 1851-тӥ арын 20-тӥ пӧсьтолэзе

Музейлэн историез

1848-тӥ арын Илья Петрович отставкае потӥз но семьяеныз Воткаысь кошкиз. Чайковскийёс бере Господской ульчаысь 1 номеро усадьбаез уно пол тупатъязы [3], кузёосыз вошъяськемен, юрт аналмыны кутскиз. 1916-тӥ арозь татын заводысь кивалтӥсьёс улӥзы. Граждан ож вакытэ юртъерын белогвардейской штаб интыяськиз. Отӥяз татын механикая техникум, сизьым аръем школа, Металлистъёслэн юртсылэн сиськонниез ужаз[9]. 1939-тӥ арын «Удмуртская правда» газетлэн бамъёсаз куашканы кутскем юрт сярысь ивортон потӥз: «Чайковскийлэн юртысьтыз каминъёс пильылэмын. Тубатъёс, вӧлдэтэз возись мумыкоръёс, выжъёс тӥямын... Лошъяськись кирпичъёс но дускоос бордысь тузон но пурысьтам зын вӧлске». Озьы ик усадьбаез тупатон, интыяз Чайковскийлэн пичи дырызлы сӥзем музей усьтон пумысен юан ӝутӥськиз[10].

Музейлэн нырысетӥ директорез скульптор Михаил Харитонович Тутынин луиз, со ик реставрациен выриз. Музейлэсь ужзэ радъян вылысь Клинысь П. И. Чайковскийлэн музей-усадьбаысьтыз Воткае тодосчи Николай Константинович Рукавишников вуиз. Музеез 1940-тӥ арын оштолэзе, композиторлэн вордӥськем дырысен 100 ар тырмонэз котырын, сӥё-дано усьтӥзы. Нырысетӥ адӟытон бездытгес пӧрмиз: Воткае Клинысь ваемын Чайковскийлэн роялез но ӝӧкез; калык син шоры поттэмын Петр Ильичлы сӥзем картинаос но суредъёс. Ужрадэ нырысетӥ вуэмъёс дэмланъёсын книгае гожъяллязы, экскурсия кельшиз, но сое вашкала арбериосын узыргес кароно на шуыса. Со аре ик сӥзьыл музейлэн базаяз крезьгуръя школа ужаны кутскиз[10].

XXI дауре

Удмуртилэн Россие пыремез дырысен 450 ар тырмонэзлы сӥзем 3 манет борды шуккемын музей-усадьбалэн тусыз.

XXI дауре музей-усадьба аспӧртэм ансамбльлы пӧрмиз. Татчы горной кивалтӥсьлэн юртэз сяна («Чайковскийлэн пичи дыр вакытыз» экспозиция ), котырысьтыз мукет пуктӥськемъёс но пыризы. Кылсярысь, артэ сылӥсь 2 номеро юртын ас вакытаз заводлэн управителез улӥз, 1840-тӥ арын отчы валтӥсь заводлэн контораезлэн кивалтӥсез М. С. Вилегжанин выжыяськиз. Отӥяз та юртын пӧртэм ужъюртъёс интыяськизы, соос пӧлын нылкышно школа, заводлэн профилакториез. 1984-тӥ арын юрт музейлэн фондаз сётэмын вал. 3 номеро юрт но кузёоссэ ялан вошъяз. Чайковский улэм вакытъёсы татын заводлэн музеез но библиотека ужаз. XIX даурлэн кыкетӥ палараз отын интыысь эмчи улӥз. Со кошкем бере ни бушам юртэз Воткаысь калык собранилы сётӥзы. Али татын музейлэн крезьгуро салонэз интыяське[9][11].

Господской ульчаысь мукет коркаос дасо аръёс ӵоже заводысь кивалтӥсьёслы казённой квартираос чот сётъямын вал. «Полицмейстерлэн коркаез» али выльдэмын, отын «Чайковский композитор» но «Чайковский но туала крезьгуро театр» адӟытонъёс ялан ужало. Нош «Людской изба» нимаськись юртын «XIX дауре Вотка завод котыре интыяськем калыклэн улон-вылонэз но культураез» адӟытон ужа. Ваньмаз сямен юртъёс 1840-тӥ аръёслы укшамон лэсьтэмын[11].

Галерея

  • Усадьбалэн тусыз
  • Каретаосын сарай

    Каретаосын сарай

  • Крезьгуро салон

    Крезьгуро салон

  • Адӟытонъёсын зал

    Адӟытонъёсын зал

  • Валтӥсь юрт (азбарысен)

    Валтӥсь юрт (азбарысен)

  • Валтӥсь юрт (ульчаысен)

    Валтӥсь юрт (ульчаысен)

  • Валтӥсь юртлэн пушкыз
  • Пыронэз

    Пыронэз

  • Вестибюль

    Вестибюль

  • Вводной зал

    Вводной зал

  • Калыкез пумитан

    Калыкез пумитан

  • Зал

    Зал

  • Атаезлэн кабинетэз

    Атаезлэн кабинетэз

  • Сиськонни

    Сиськонни

  • Чагыр гостиной

    Чагыр гостиной

  • Липет улысь нылпиослэн висъетсы

    Липет улысь нылпиослэн висъетсы

  • Липет улысь дышетскон висъет

    Липет улысь дышетскон висъет

  • Анай-атаезлэн кӧлон интызы

    Анай-атаезлэн кӧлон интызы

  • Нылпиез кутэтан висъет

    Нылпиез кутэтан висъет

  • Нылпиослы висъет

    Нылпиослы висъет

  • Нылкышноослы висъет

    Нылкышноослы висъет

Валэктонъёс

Литература

  • Альшванг А. А. П. И. Чайковский. — М.: Музыка, 1970. — 816 с.
  • Овчинникова Т. И., Саранча М. А. Из истории становления музея-усадьбы П. И. Чайковского // Современные проблемы сервиса и туризма. — 2016. — Т. 10, № 2. — С. 126—131.
  • Российская музейная энциклопедия. В двух томах / В. Л. Янин. — М.: «Прогресс», «Рипол Классик», 2001. — Т. 2. — 436 с.
  • Стояк Ю. А. Архитектура города-завода Воткинска второй половины XIX — начала XX в. // Вестник Томский государственный архитектурно-строительный университет. — Томск, 2013. — № 3. — С. 29—46.
  • Чайковский П. И. Письма к родным. — М.: Государственное музыкальное издательство, 1940. — Т. 1. — 757 с.
«https://udm.ruwiki.ru/w/index.php?title=П._И._Чайковскийлэн_музей-усадьбаез&oldid=498039»-ысь басьтэмын