Быдӟым Атыкай ож

Материалъёс басьтэмын Б.Н. Ельцин нимо библиотекаысь

Та гожтосын Б.Н. Ельцин нимо Президент библиотекалэн фондысьтыз материалъёс кутэмын

Рос-прос учке

Быдӟым Атыкай ож
Валтӥсь конфликт: Кыкетӥ дунне ож
Паллянпал чур вылысен уллӥе: 1. Немец пехота Псков котырысь гуртын ӝуась юрт вӧзтӥ ортче (инвожо-пӧсьтолэзь 1941). 2. ЗиС-3 пушкалэн орудийной расчётэз тушмон шоры ыбылэ. Сталинград, сӥзьыл 1942. 3. Совето артиллеристъёс Берлин дорын. Оштолэзь 1945. Бурпал чур вылысен улӥе: 1. Мускоысь ополченецъёслы винтовка сётъяло (гужем 1941). 2. Керчь котырын ожмаськыку, санинструктор сӧсырмем ожгарчилэсь яраоссэ биньылэ. Крымез мозмытон, 1944. 3. Мускочиос Горд площадьын Вормонэз пусйыку. 9-тӥ куартолэзь 1945
Дырыз	22-тӥ инвожо 1941 — 9-тӥ куартолэзь 1945 (3 ар, 10 толэзь, 2 арня но 3 нунал)
Интыез	Шундыӝужанпал, Шор, Уйпал но Лымшор Европ ; Уйпал Йӧ океанлэн, балти, Сьӧд но Азов зарезьёслэн акваториоссы
Мугез	Нацист Германилэн урдӥськон экспансионист идеологиез "Шундыӝужан палась улон интыосты" киултыса, соосты немец колониослы пӧрмытыны чакла вал Нацизм но коммунизм идеологиослэн вачевуонзы: совето кун коммунист идеологилэн юн кужымез луэ шуыса, Гитлер сое быдтыны малпа вал Военно-стратегической расчёт: Великобританиез басьтыны быгатымтэез бере, немец командование шундыӝужан вылэ урдӥськыса, дуннеын кузё луон понна ожмаськонзэ СССР-лэн ресурсъёсыныз азьланьтыны малпаз
Йылпумъян	СССР-лэн вормонэз, Германилэн быдэсак капитуляциез
Воштӥськонъёс	Нацист Германиез быдтон Германиез кужмысь басьтыса, сое шундыпуксёнпал но шундыӝужанпал люкетъёслы люкон Шундыӝужанпал но Шор Европаысь куд-ог кунъёсын Совето власть понна дурбасьтӥсьёлэн кивалтэтэ вуэмзы Огазеям Йӧскалыкъёслэсь огазеяськонзэс кылдытон (ООН) Кык сверхдержава кылдытон
Тушмонъёс
СССР Тува (1941–1944) Польша (1943-тӥ арысен) Чехословакия Югославия (1943-тӥ арысен) Албания (с 1944) Ожмаськись Франция (1942-тӥ арысен) (пыриськонэз сюбегатэмын) Болгария (1944-тӥ арысен) Румыния (1944-тӥ арысен) Финляндия Финляндия (1944–1945) Пумит луон движение Совето партизанъёс (1941–1945) Югославиысь Народно-освободительной армия (НОАЮ) (1941–1945) Югослав армия ас шаераз (1941–1945) Албаниысь Национально-освободительная армия (НОАА) (1943–1944) Легалитети (1939–1944) Подпольной поляк государство]] • Польшалэн вормонэзлэн службаез (СПП) → Ожтӥрлыко нюръяськонъя огазеяськон (СВБ) → Крайова Армия • Ожтӥрлыко йӧскалык куджымъёс (НВС) • Крестьян батальон]`c (Батальоны Хлопске) Людова Гвардиез → Людовлэн Армиез (1942–1945) Пумитъяськон Движение (Чехословакия) Пумитъяськон Движение (Болгария) (1941–1944) • Народно-освободительной повстанческой армия (НОПА, Болгария) • БКП-лэн боевой группаосыз • Болгариысь Христо Ботева нимо партизан батальон Пумитъяськон Движение (Германия) • «Свободная Германия» Йӧскалык комитет (1943–1945) • Герман офицеръёслэн огазеяськонзы (1943—1945) Пумитъяськон Движение (Венгрия) но мукет. Нацист Германия • Нырысетӥ Словак республика • Асэриклыко Хорват кун Королевство Италия (1941–1943]]) → Венгрия • Королевство Венгрия (15-тӥ коньывуонозь 1944) • Венгриысь Йӧскалык огъялуонлэн Кивалтэтэз (16-тӥ коньывуонысен 1944) Королевство Румыния (1944-тӥ арозь) Финляндия Финляндия (1944-тӥ арозь) Коллаборационистской ожгар формированиос Ӟуч коллаборационистъёс • Ӟуч освободительной армия (РОА) • «Руссланд» дивизия • СС-лэн «РОНА» дивизиез Украин коллаборационистъёс • Украинаысь освободительной армия (УОА) • СС-лэн «Галиция» дивизиез Белорусс коллаборационистъёс • Белоруссиысь краевой оборона (БКА) • СС-лэн 1-тӥ белорус дивизиез Латыш коллаборационистъёс • Латыш легион • СС-лэн 1-тӥ латыш дивизиез Эстонские коллаборационистъёс • Эстон легион • СС-лэн 1-тӥ эстон дивизиез Литва коллаборационистъёс • Атыкай шаерез утись кужымъёс (Силы обороны отечества) Грузин коллаборационистъёс • Грузин легион • Уйпал Кавказысь легион Армян коллаборационистъёс • Армян легион • Уйпал Кавказысь легион Азербайджан коллаборационистъёс • Азербайджан легион • Уйпал Кавказысь легион Шор Азиысь коллаборационистъёс • Туркестан легион Волга котырысь коллаборационистъёс • Калмыкиысь кавалерийской корпус • Волжско-татарской «Идель-Урал» легион Крымско-татарской коллаборационистъёс • Крымысь боевой группа • СС-лэн горнопехотной бигер полкез Чех коллаборационистъёс • Правительственной войскоос • СС-лэн добровольческой чех ротаез Хорват коллаборационистъёс • Хорватиысь 369-тӥ пехотной полк • Хорватиысь 373-тӥ пехотной дивизия • СС-лэн «Кама» дивизиез Словен коллаборационистъёс • Словен домобранство • Добровольческой антикоммунистической милиция Серб коллаборационистъёс • Сербилэн кун стражаез • Добровольческой серб корпус Поляк коллаборационистъёс • Лыз полиция • Гуральской легион Болгар коллаборационистъёс • СС-лэн 1-тӥ болгар бригадаез Албан коллаборационистъёс • СС-лэн «Скандербег» дивизиез • «Косово» полк но мукет. «Осьлы» юрттэт сётэм кунъёс: Испания .  Швеция Болгария (1944-тӥ арозь)
Кивалтӥсьёс
СССР Иосиф Сталин Георгий Жуков Борис Шапошников  † Александр Василевский Константин Рокоссовский Иван Конев Алексей Антонов Иван Баграмян Семён Будённый Николай Ватутин  † Климент Ворошилов Леонид Говоров Андрей Ерёменко Василий Чуйков Дмитрий Павлов  † Михаил Кирпонос  † Родион Малиновский Кирилл Мерецков Иван Петров Михаил Ефремов  † Маркиан Попов Семён Тимошенко Иван Тюленев Фёдор Толбухин Иван Черняховский  † Югославия Иосип Броз Тито Милован Джилас Александр Ранкович Коста Надь Пеко Дапчевич Коча Попович Петар Драпшин Светозар Вукманович Арсо Йованович Сава Ковачевич Иван Гошняк Эдвард Кардель Салчак Тока Михал Жимерский Францишек Юзвяк Станислав Поплавский Войцех Ярузельский Людвик Свобода Отакар Ярош Энвер Ходжа Мехмет Шеху Пьер Пуйяд Луи Дельфино Дамян Велчев Владимир Стойчев Михай I Константин Василиу-Рэшкану Карл Маннергейм Аксель Айро Германия Адольф Гитлер † Генрих Гиммлер Герман Геринг   Вальтер фон Браухич Фёдор фон Бок  † Эрнст Буш Максимилиан фон Вейхс Хайнц Гудериан Герман Геринг Роберт фон Грейм Эвальд фон Клейст Гюнтер фон Клюге  † Георг фон Кюхлер Вильгельм фон Лееб Вильгельм Лист Эрих фон Манштейн Вальтер Модель  † Фридрих Паулюс   Вальтер фон Рейхенау  † Герд фон Рундштедт Фердинанд Шёрнер Лотар Рендулич Эрхард Раус Гельмут фон Паннвиц Эдгар Пюо Леон Дегрель Кристиан Крюссинг Кристиан Шальбург  † Кнуд Бёрге Мартинсен Агустин Муньос Грандес Эмилио Эстебан-Инфантес Андрей Власов Финляндия Ристо Рюти Карл Маннергейм Аксель Айро Карл Эш Эрик Хейнрихс Эрнст Линдер † Бенито Муссолини  † Джованни Мессе Итало Гарибольди Миклош Хорти Ференц Салаши Густав Яни Ференц Сомбатеи Ион Антонеску  # Петре Думитреску Константин Константинеску Йозеф Тисо Фердинанд Чатлош Анте Павелич Виктор Павичич  † Марко Месич   Леопольд Окулицкий Стефан Ровецкий  † Драголюб Михайлович
Пумит луись кужымъёс
РККА-е 1941-тӥ—1945-тӥ аръёсы мобилизовать каремъёслэн огъя лыдзы: 34 476 700 мурт ВФ-е 1941-тӥ—1945-тӥ аръёсы мобилизовать каремъёслэн огъя лыдзы:19 000 000 мурт пала
Ыштонъёс
26 600 000, соос пӧлын 8 668 400 военной. Берыктыны луонтэм ыштонъёс — 11 444 100 мурт 11 900 000, соос пӧлын 5 076 700 военной. Берыктыны луонтэм ыштонъёс — 8 649 200 мурт (1945-тӥ арын 9-тӥ куартолэзь бере 1,6 млн пленэ басьтэмъёсты лыдэ басьтытэк. Фольксштурмлэн, полицилэн, коллаборационистъёслэн ыштонъёссы тодмо ӧвӧл)
Огъя ыштонъёс
34 361 700 мурт
Медиафайлъёс РувикиМедиа пушкын

Быдӟым Атыкай ож (22-тӥ инвожое 1941 — 9-тӥ куартолэзе 1945) — нацизмо Германилэн но солэн Европаысь союзникъёсызлэн (Венгрия, Италия, Румыния, Словакия, Финляндия, Хорватия) урдскемзылы пумит СССР-лэн ожмаськонэз. Кыкетӥ дунне ожлэн (1939—1945) валтӥсь люкетэз луэ. Быдэс дуннелэн историяз тужгес лекез но бадӟымез вир кисьтон ож.

Францилэн 1940-тӥ арын сётӥськемез бере, нацист Германилэн кивалтэтэз Совето Союзлы пумит тылож дасян борды басьтӥськиз. СССР вылэ урдӥськон планзэ немец командование «Барбаросса» шуыса нимаз. Со Шундыӝужанпал Европаын азинлыко кутӥськем блицкриг стратеги («молниеносная война») вылэ инъяськыса дасямын. Со планъя Горд Армилэсь валтӥсь кужымъёссэ «одӥг вакчи ожын» быдэсак пазьгыны кулэ вал. Соин валлин «Генеральной план Ост» дасяськиз. Со планъя совето кунэз быдэсак быдтыны , отысь кылем ваньбурзэ киултыса, шундыпуксён пала поттыны, калыкез быдтыны, кужмысь мукет улон интые выжтыны, Уралозь быдэс интывылэз «германизировать» карыны чакламын вал.

Нападение лэсьтонтэм сярысь огкылэз тӥяса, 1941-тӥ арын 22-тӥ инвожое нацист Германилэн но солэн союзникъёсызлэн войскоосыз, ож кутскон сярысь ялытэк, кужмысь СССР-лэн интывылаз пыризы.

Ожлэн кутсконаз (22-тӥ инвожоысен 1941 — 18-тӥ шуркынмонозь 1942) Совето Союз трос калыксэ ыштӥз. Кунлэн шундыпуксён палаз тросэз улон интыос отысь ваньбурен валче киултэмын вал. Озьы ке но, Горд Армилэн геройлыко ожмаськеменыз, «вакчи ожен» вормыны малпам фашист план куашказ, Муско понна ожмаськонын вермахтлэн наступлениез дугдытэмын вал. Ожын кыдаса но экономикаез ожгар дыре выжтыса, Горд Армия оборонительной стратегизэ наступательной карыны быгатӥз.

Кыкетӥ этапаз (шуркынмонысен 1942 — толсурозь 1943) совето армия стратегической наступление потӥз. Сталинград но Курск котырын вормыса, трос мукет улон интыосты мозмытӥз. Соин валче тыложлэсь мынэмзэ чутрак воштӥз но Германилэсь стратеги ласянь кичӧлтонзэ быдтӥз.

Куинетӥ этапаз (толшорысен 1944 — куартолэзёзь 1945), СССР-ез быдэсак мозмытэмез бере, Горд Армия, вермахтлэсь валтӥсь кужымъёссэ пазьгыса, Шундыӝужанпал Европае но Балкан пала азинлыко азьланьскиз. 1945-тӥ арын тулыс совето войскоос Берлинэз басьтӥзы, Германия быдэсак сётӥськиз.

Ож вакытэ Совето Союз антигитлеровской коалицилэн пӧлэсаз Германилэн ожтӥрлыко кужымъёсызлы но солэн Европаысь союзникъёсызлы бадӟым изъян ваиз. Куинь ар ӵоже (1941—1944) Германилэн 90 % палаез кужымъёсыз СССР-лы пумит куштэмын вал. Антигитлеровской коалицияя союзной войскоослэн 1944-тӥ арын инвожо толэзе Нормандие пуксемзы бере, Шундыӝужанпал фронтын вань немец войскоос ⅔ кылемын на вал.

Нюрнберн трибуналын Советсо Союз вормись кунъёсын валче обвинени палан вал. Отын Германиен кутскем агрессиё ожмаськонлы, калыклы пумит лэсьтэм ожтӥрлыко йыружъёсызлы но валтӥсь нацист йыружчиослы пумкылъёс поттэмын.

Быдӟым Атыкай ожын совето калыклэн вормонэзлы сӥзьыса, СССР-ысь Вылӥ Кенешлэн Президиумезлэн Косэтэзъя 9-тӥ куартолэзь — вань калыклэн праздникез — Вормон Нунал шуыса ялэмын.

Нимыз

«Отечественная война» («Атыкай ож») шуыса веран нырысьсэ чузъяськиз кунгожсьӧр ужъёсъя наркомлэн В. М. Молотовлэн 1941-тӥ арын 22-тӥ инвожое радио пыр вераськоназ:

Ас вакытаз Наполеонлэн Россия вылэ урдӥськемезлы пумит, асьме калык Атыкай оже ӝутӥськыса, Наполеонэз пазьгиз. Сыӵе ик адӟон возьма асьме кунмы вылэ урдскем бадӟымъяськись Гитлерез. Горд Армия но вань калык ас шаерез, данлыкез но эрикез понна Атыкай ожын нош ик вормись луоз .

1941-тӥ арын 23—24-тӥ инвожое потэм «Правда» газетын со кылъёс нырысьсэ ӵош кутэмын.

Сталинлэн 1941-тӥ арын 3-тӥ пӧсьтолэзе радио пыр калыклы вазиськоназ «великая» но «отечественная» эпитетъёс нимаз кутэмын вал. Нырысь-валысь нимыз огшоры вераськонын кутӥськись кылтэчет выллем гинэ вал: «священная народная война», «священная отечественная народная война», «победоносная отечественная война». «Атыкай ож» («Отечественная война») термин юнматэмын Атыкай ожлэн орденэз кылдэм бере (1942-тӥ арын 20-тӥ куартолэзе СССР-ысь Вылӥ Кенешлэн Президиумезлэн Косэтэныз юнматэмын).

1914-тӥ—1915-тӥ аръёсы «Быдӟым Атыкай ож» терминэз куддыръя Нырысетӥ дунне ожлы сӥзем публикациосын но кутылӥзы ни вал. .

Англи историографиын Быдӟым Атыкай ож «Кыкетӥ дунне ожлэн Шундыӝужанпал фронтэз» шуыса гожъямын (англ. Eastern Front of World War II). Немец историографиын «германо-советской война» (нем. Deutsch-Sowjetischer Krieg), «Русский поход» (нем. Russlandfeldzug) яке «Восточный поход» шуыса кутӥське (нем. Ostfeldzug Ostfeldzug).

Война кутскон азьын Европаын кылдэм военно-политической югдур

1920-тӥ аръёсы, Рапалльской договор гожтэм дырысен, СССР Веймарской Германиен эшлыко кусыпъёс возиз. Озьы ке но, Германиын нацистъёслэн А. Гитлер кивалтэм улсын кивалтэтэ вуэмзы бере, советско-германской кусыпъёс сӥяны кутскизы, малы ке шуоно, национал-социалистической пропаганда солэсь азьпал ик антикоммунистической ӧръя лэземын вал. 1936-тӥ арын нацист Германия но милитарист Япония куспын Коммунистической интернационаллы но коммунизмез дуннеын вӧлмытонлы пумит Антикоминтерновской пакт юнматэмын вал.

Та учыръёс Совето Союзэз шундыпуксён палась кунъёсын матэктытӥзы. Кунсьӧр ужъёсъя нарком М. М. Литвинов, ог-огедлы юрттон сярысь тупанкылъёс вылэ пыкъяськыса, Европаын коллективной кышкыттэмлыкъя система кылдытон понна дурбасьтӥз. Та кичӧлтонлы британ но немец дипломатиос пумит луизы. Озьы ке но, 1935-тӥ арын СССР Франциен Но Чехословакиен ог-огзылы юрттон сярысь огкыл гожтыны быгатӥз.

1938-тӥ арын Германия Чехословакиысь Судет улос пумысен пумит луэмзэ возьматӥз. Огъяросси ожлэсь палэнскыны луонлы оскыса, Франция но Англия агрессорез буйгатон политика нуыны кутскизы: Судет улосэз Германиен огазеяны лэзьыса, Мюнхенын огкыл гожтэмын вал. Соин валче, отын мукет кунъёслэсь кунгожъёссэс утёно, шуыса пусъемын. Чехословакилэсь лябӟемзэ шӧдыса, Польша Тешин улосэз киултӥз. 1939-тӥ арын Германия, огкылэз тӥяса, быдэс Чехословакиез киултӥз.

Совето кивалтэт коллективной кышкыттэмлыкъя система кылдытонэз азьланьтыны, Англиен но Франциен ог-огзылы юрттон сярысь тупанкыл юнматыны но азьланяз Германилэсь агрессизэ палэнтон сярысь военной конвенция гожтыны тыршизы. Со сяна, 1939 -тӥ арын оштолэзьысен куартолэзёзь Мускоын куинь полэс англо-франко-советской вачевераськонъёс ортчизы.

Озьы ке но, 12-тӥ гудырикошконэ Англиысь но Франциысь Муское кенешонэ лыктэм муртъёслэн тупанкыл гожтыны правозы вылымтэ. Вачевераськонъёсын Совето Союз Европаын кылдэм агресси учыръёсы куинь кунъёслы ожгар кужымъёсынызы ог-огзылы юрттон сярысь план ӵектӥз. Та пумысен, Германия урдскиз ке, совето войскоосты Польша пыр поттонлы поляк кивалтэт пумит луиз. Великобритания но озьы ик СССР-ен пӧртэм огкылъёс гожтыны пумит луиз. Отысь премьер-министр Н. Чемберлен «Совето Союзэн огкыл гожтытозь, ӝоггес отставкае кошко» шуыса пусйиз. Солы луыса, шундыпуксёнпал кунъёслэн янгышенызы, вачевераськонъёсты азланьтыны ӧз луы.

Война бере, 1947-тӥ арын, Францилэн азьвыл премьерез П. Рейно тазьы шуиз вал: "Кинэн ми кулэ вал кусып тупатыны? Та юан пумысь милемлы шонер валэктон сётӥзы география, история но Гитлерлэн планъёсыз. Гитлерлэн Францилы „пунэмзэ берыктон“, но собере Россиез люкон сярысь малпанзэ шараяменыз, со ас киыныз асьме кунъёслы огазеяськыны дэмлаз. Но ми асьмеос сое палэнтӥм».

Озьыен, 1939-тӥ арын СССР но шундыпуксёнпал кунъёс куспын коллективной кышкыттэмлыкъя система кылдытон сярысь вераськонъёс куашказы. Агрессия кылдон азьын огназ кылемезлэсь кышкаса, 1939-тӥ арын 23-тӥ гудырикошконэ СССР Германиен ненападение сярысь огкыл гожтӥз, «Молотовлэн но Риббентроплэн пактсы» шуыса тодмо луэ. Со борды ватсамын вал лушкем луись протокол, кудӥзъя СССР но Германия Шундыӝужанпал Европаын ас влиянизэс люкыны кенешизы.

СССР но Германия куспын ненападение сярысь огкыл гожтэмен, Быдӟым Атыкай ожлэн вормонэн йылпумъяськемез сярысь азьвыл ик тодыны луэ ни вал. Со огкыллы луыса, СССР-лэн кык ар ӵоже агрессиез палэнтыны дасяськыны дырыз кылдӥз. Сотэк , вермахт асьмемыз капчиен вормысал.

Кыкетӥ дунне ож кутскем бере

Ненападение сярысь декларация шоры учкытэк, 1939-тӥ арын 1-тӥ куарусёнэ Германия Польша вылэ ожалскиз. Кутскиз Кыкетӥ дунне ож. Поляк кун куашкамен, совето кивалтэт войскооссэ Польшалэн шундыӝужан палаз пыртӥз (этнической украинецъёслэн но белорусъёслэн улон интызы). Шундыпуксёнпал Украина УССР-лэн пушпӧлаз пыриз, Шундыпуксёнпал Белоруссия-БССР-лэн пӧлэсаз, 1939-тӥ арын 28-тӥ куарусёнэ Германиен кунгож сярысь огкыл гожтэмын вал.

Коллективной кышкытлыклэсь утиськонъя политика куашкамен, СССР Германиен ожмаськонлэсь кутсконзэ быгатэмезъя ӝегатыны выриз, соин валче, ассэ кышкытлыклэсь утьыны тыршиз. 1939-тӥ арын совето дипломатия, Карел перешеекысь финн интывылэз совето Карелилэн кык поллы бадӟым музъеменыз воштыны турттыса, финн кивалтэтэн вачевераськонъёс нуиз. Озьы Ленинград дорысь уйпал кунгожез палэнтыны луысал. Финн кивалтэтлэн та ужпумъя вераськыны пумит луэмысьтыз, советско-финляндской ожмаськон кутскиз (1939-1940).

Кунлэн лымшор палъёсыз но юнмазы. 1940-тӥ арын СССР Румыниен Граждан ож вакытэ киултэм Бессарабиез но Уйпал Буковинаез берыктыны куриз. Румыния ас мылкыд каремезъя Бессарабиез но Уйпал Буковинаез СССР-лы сётӥз (Молдав ССР-лэн но УССР-лэн пӧлэсазы пыризы). Озьы ик 1940-тӥ арын СССР-лэн пушпӧлаз пыризы Прибалтикаысь кунъёс: Литва, Латвия но Эстония.

Нацист Германилэн СССР-лы пумит ожлы дасяськемез

Германия Франциез вормем бере, 1940-тӥ арын 31-тӥ пӧсьтолэзе Гитлер военной командованизэ СССР вылэ урдскон планэныз тодматӥз. Нападениез дасянын валтӥсь инты басьтӥз вермахтлэн музъемвыл кужымъёсызлэн генеральной штабез (ОКХ) , соин кивалтӥз генерал-полковник Ф. Халдер но Германиысь Ожтӥрлыко Кужымъёслэн Вылӥ Командованизылэн оперативной кивалтонъя штабез (OKW), соин кивалтӥз генерал А. Йодл. Нош солы косэтъёс сётъяз ачиз Гитлер.

«Вариант Барбаросса» — 21-тӥ номеро директива

1940-тӥ арын 18-тӥ толсуре Гитлер Вермахтлэсь Вылӥ Командованиезлэсь 21-тӥ номеро директивазэ гожтӥз, со «Вариант Барбаросса» шуыса нимаськиз но СССР-лы пумит ожмаськонын валтӥсь документ луиз. Германиысь ожтӥрлыко кужымъёс азьын «совето Россиез одӥг вакчи ожын быдэсак пазьгыны» ужпум пуктэмын вал. Сое быдэстон понна вань музъемвыл войскоосты, Европаын оккупационной функциосты быдэсъясьёсты лыдэ басьтытэк, озьы ик ВВС-лэсь ог кык куиньмоссэ но ВМС-лэсь пичи люкетсэ кутыны чакламын вал. Озьы ик танковой колоннаосын сэрыт азьланьскыса, СССР-лэсь шундыпуксён палаз интыяськем войскооссэ быдтыса, кылемезлы берен берытскыны сюрессэ вандыны но Совето Союзлэсь Куинетӥ Рейх пала лобан луонлыкъёссэ быдтыны чакламын вал. Кампанилэн валтӥсь ужпумез — Архангельск-Волга-Астрахань линиозь вуыса, ​​«Уралысь совето промышленной центръёсты киултон».

1941-тӥ арын 31-тӥ толшоре музъемвыл войскоосын кивалтӥсь, фельдмаршал В. фон Браухич, ОКХ-лэсь 050/41-тӥ номеро директивазэ гожтӥз. Отын 21-тӥ номеро директиваын гожтэм СССР-лы пумит ож нуон принципъёс но стратегиос пыр-поч валэктыса, паськытатыса сётэмын. Котькуд армилы, танковой группалы ужпумез быдэстонъя нимысьтыз задачаос пуктэмын: Днепрлэсь но Западной Двиналэсь шундыпуксён палагес интыяськем Горд Армилэсь войскооссэ быдтон.

Оперативно-стратегической планирование

Немец кивалтэт совето войскоосты быдэс фронт линия кузя пазьгыны малпаз. Солэн мапамезъя «висгож ожмаськон» бере СССР-ын 30-40 запасной дивизиосыз сяна кыльыны кулэ ӧй вал ни. Наступление быдэс фронт кузя потӥзы. Москва но Киев палась линиосты валтӥсьёсыз шуыса пусйизы. Отчы "Центр" армилэн группаосыз ( 500 иськем фронт линия кузя 48 дивизия пуктэмын) но "Юг" армилэн (1250 иськеме 40 немец дивизиос но союзникъёсызлэн валтӥсь кужымъёсыз). "Север" армилэн группаез (290 иськем фронтын 29 дивизия) "Центрлы" уйпал урдэс ласянь юрттыны, Прибалтикаез киултыса, финн войскоен огазеяськыны кулэ вал. Нырысетӥ стратегической эшелонысь дивизиослэн огъя лыдзы, финн, венгер но румын войскоосты лыдэ басьтыса, 157 дивизия люкаськиз, со пӧлысь 17-ез — танковой, 13-ез моторизованной но 18 бригада.

Планъя тямысэтӥ уй-нуналаз немец войскоос Каунас — Барановичи— Львов — Могилёв-Подольский линие потыны кулэ вал. Кызетӥ уй-нуналаз, интывылэз киултыса, Днепр шур дуре (Киевлэсь лымшор палагес) — Мозырь-Рогачёв — Орша-Витебск — Великие Луки — Псковлэсь лымшорегес— Пярну карлэсь лымшорегес потыны кулэ.

Со бӧрсьы соединениосты перегруппировать карыны, войскоослы шутэтскыны но пыӵалтӥрлыкез выльдыны кызь нунал ӵоже дыр висъямын вал. Ньыльдонэтӥ нуналаз ожлэсь кыкетӥ люкетсэ кутскыса, Мускоез, Ленинградэз но Донбассэз киултыны чакламын вал.

«Барбаросса» операцилэн шуак луэмез

СССР-лы пумит ожмаськыны дасяськыку, Германиысь военно-политической кивалтэт но вермахтлэн командованиез бадӟым саклык висъяз дезинформацилы, стратегической но оперативной маскировкалы. Германилэн Совето Союз вылэ урдскон дырыз пумысен СССР-ысь кивалтэтлы шонертэм тодэтъёс сётъялляз. Со ласянь валтӥсь ужрадъёсын Гитлер ачиз кивалтӥз, куд-огъёсаз пыриськылӥз но.

Политика удысын шонертэм иворъёс сётыса, Гитлер ненападение сярысь огкылэз чакла, Германилэн СССР-лы музъем пумысен пыкылонъёсыз ӧвӧл шуыса оскытыны тыршылӥзы, совето огмуртъёслы советско-германской кусыпъёс юнэсь шуыса возьматыны турттӥзы но со валлин Европаын антифашистской кунъёслэсь огазеяськонзэс кылдытонэз чакласа возизы.

Ожлы дасяськыны умой условиос кылдытыса, Гитлер агрессивной малпанъёссэ дипломатической ужрадъёсын сайялляз. Та «ӟеч бускель» кусыпъёсты возьматон улсын, герман войскоосты пумен шундыпуксён палась шундыӝужан пала выжтӥзы. Ожтӥрлыкез, ожгар техникаез но мукет ожгар вузъёсты поттонэз будэтонэз но мобилизационной ужрадъёс ортчытонэз Великобританилы пумит ож нуонлэн кулэлыкеныз герӟаськемын шуыса валэктылӥзы. Лушкем дасяськемез вермахтлы ожез шӧдтэк шорысь кутскыны луонлык сётӥз.

СССР пумысь нацистъёслэн малпанъёссы

1930-тӥ аръёсысен Польшаен но СССР-ен ожмаськыны дасяськон улсын нацист Германиын СС-ысь рейхсфюрер Генрих Гиммлер «Ост» Генеральной план дасяны кутскиз. Со план «Шундыӝужан палан улон интыосты паськытатон понна", нацистской расовой теория вылэ пыкиськыса кылдытэмын. Со планын киултэм интыосысь 75-85%-сэ калыкез кужмысь улляно но отчы этнической немецъёсты улыны выжтоно шуыса гожтэмын. СССР-ез вормем бере ик кутскыса, пуктэм узжпумез 30 ар куспын быдэстыны чакламын вал.

Нацистъёслэн планъёсазы валтӥсь инты басьтӥз ӟуч калык пумысен политика. Шундыӝужан министерствоысь расово-политической ёзэтлэн кивалтӥсезлэн Э.Ветцельлэн 1942-тӥ арын 27-тӥ оштолэзе "Ост" генеральной планэ пыртэм "Валэктонъёс" люкетаз тазьы гожтэмын: «Муско шоркарен кунэз пазьгыса гинэ ужпумлэн быдэсмемез сярысь вераны уг луы. Ӟуч калыкез ог-огезлэсь висъяны, улон интыоссэ нимаз кивалтэтъёслы люкылыны ужпум пуктэмын... Кылсярысь, Горький генеральной комиссариатысь ӟуч адямилы, со Тула генеральной комитетын улӥсь ӟучлэсь висъяське шуыса пыӵатоно. Пусйыны кулэ, ӟуч музъем вылэ ляб азинскем полуеврей типьем калык гинэ кыльыны кулэ. Сюрес разметкаез но уноятон таблицаез 25-озь тодӥз ке тырмоз, нимтулзэ гожтыны гинэ мед быгатоз. Со сяна дышетскемез кулэ уз луы", шуыса гожтэмын "Валэктонъёсын".

"Ост" Генеральной план сяна, СССР-ен ожез кутскытозь, «Барбаросса» план улсын Совето Союзлэсь киултэм музъемъёссэ эксплуатировать каронъя экономикая «Ольденбург» план дасямын вал. Солэн авторез рейхсмаршал Герман Геринг. 1941-тӥ арын 29-тӥ оштолэзе юнматэм «Ольденбург» планъя, Совето Союзлэн киултэм интыосысьтыз вань промышленной предприятиосты Куинетӥ Рейх понна ужатыны, нош СССР-лэсь европа люкетсэ Германилэн аграрно-сырьевой придатокезлы пӧрмытыны чакламын.

СССР-лэсь территоризэ экономика ласянь эксплуатировать карон понна «Ольденбург» штаб кылдэмын вал. Штабен кивалтӥсь рейхсмаршал Геринглэн гожъямъёсысьтыз: "Шундыӝужан палась ваньбурез ваньзэ таланы дасяськисько. Маиз немецлы пайдаё луоз, соку ик ваньмыз Германие вуттэмын луоз".

Киултэм интыосысь сиён-юон бичанэз радъян понна нимысьтыз комиссия кылдытэмын вал, соин кивалтӥз сиён-юонъя но гурт удысъя Имперской министерстволэн статс-секретарез Герберт Бакке. Солы Германиысь ожтӥрлыко кужымъёсты быдэсак СССР-лэн ресурсъёсыз чотын сюдыны ужпум пуктэмын вал. Кылемзэ СССР-ын поттэм-будэтэм сиён-юонэз ваньзэ Германие поттоно, нош СССР-ысь «мултэс улӥсьсты» быдтоно («сютэм улонъя план», озьы ик «Баккелэн планэз»).

СССР пумысен вань малпанъёс лушкем возиськизы. 1941-тӥ арын 16-тӥ пӧсьтолэзе Шундыӝужанпал улосъёсты реорганизовать карон ужпумъёсъя кенешонын вераськыкуз, Гитлер тазьы вераз: «Зэмос ужпумъёсмес асьмеос шараяны кулэ ӧвӧл, но мар кулэ милемлы, сое, асьмеос рос-прос тодыны кулэ. Норвегиын, Даниын, Бельгиын но Голландиын кызьы ужамы, озьы ик ужано. Мар лэсьтӥськом — со ваньмыз калык понна, порядокез возён понна, тырмыт сиён-юон понна лэсьтӥськом шуыса ялом. Асьмеос асьмедыз "мозмытӥсьёс" тусын возьматыны кулэ. Нокин медаз шӧды, асьмеос кунэз выль сямен радъяськомы шуыса. Кулэ луиз ке, порядокез возён понна, виылом но, кужмысь уллялом но. Асьмеос татын огдырлы гинэ шуыса мед малпалозы, но та кунысь ноку ум ни кошке шуыса, асьмеос ӝот-ӝот валаны кулэ".

Германи палан ожмаськем кужымъёс

Вермахтлэн но СС-лэн войскоосыз борды пӧртэм кунъёсысь 1,8 миллионлэсь трос калык итӥськиз. Ож аръёсы соос пӧлысь 59 дивизия, 23 бригада, кӧня ке нимаз полкъёс, легионъёс но батальонъёс кылдытэмын вал. Тросэз соос пӧлысь интынимзыя яке йӧскалык луэмзыя нимамын: «Валлония», «Галичина», «Богемия но Моравия», «Викинг», «Данмарк», «Гембез», «Лангемарк», «Нордланд», «Недерланд», «Шарлемань» но мукет.

Европаын «Осе» пырем кунъёс 1941-тӥ арын инвожо толэзёзь

Германилэн союзникъёсыз чотын Совето Союзлы пумит ожмаськонэ пыриськизы — Италия, Венгрия, Румыния, Финляндия, Словакия, Хорватия.

1941-тӥ арын гужем, СССР-лы пумит ожмаськон вылысь, Италия 200 сюрсъем экспедиционной корпуссэ келяз, 1942-тӥ арын пӧсьтолэзе со огъявойсковой армилы пӧрмытэмын вал.

Румыния 200 сюрсъем армизэ келяз: охранной частьёс, авиаэскадрильяос, Черноморской флот но Дунайской военной флотилия. Бессарабиез но Уйпал Буковинаез басьтэм сяна, Румыния Дунай шур дурысен Днепр дорозь кыстӥськись Сьӧд зарезь дурез но Крым мукожез киултыны малпа вал.

Венгрилэн куинь полевой армиез но экспедиционной корпусэз вал. Отын 500 сюрслэсь ятыр ожгарчи лыдъяськиз. Вормем бере, Венгрия Карпат сьӧрез, Уйпал Трансильваниез но куд-ог югослав музъемъёсты киултыны дасяське вал.

1941-тӥ арын 25-тӥ инвожое Финляндия СССР-лы пумит кык армизэ, охранной частьёссэ, ВВС-сэ но ВМФ-сэ вырӟытӥз (войсколэн огъя лыдыз 450 сюрс пала).

СССР-лы пумит оже Словакиысь 2,5 дивизи тыр воинской частьёс пыриськизы (кык пехотной дивизия, одӥг гаубичной полк, одӥг противотанковой артиллериен полк, одӥг зенитно-артиллерийской полк, одӥг авиаполк но одӥг танковой батальон — огъя лыдзы: 42,5 сюрс ожгарчи,246 орудие но миномёт, 35 танк но 160 самолёт).

Франкист Испания 1941-тӥ арын одӥг пехотной дивизизэ («чагыр дивизия») но «Сальвадор» авиаэскадрильязэ келяз.

1941-тӥ арын, Германилы юрттыса, Хорватия куинь легион келяз — пехотной, воздушной но морской. Эшшо вермахтлэн куинь дивизиез но СС-лэн кык дивизиез (хорватъёс но боснийской мусульманъёс) Югославиез но Венгриез мозмытон ожъёсын Горд Армилы пумит ожмаськизы.

Озьы ик нацист Германия палан пӧртэм коллаборационистской воинской формированиос ожмаськизы, тужгес бадӟымез соос пӧлын тушмон пала выжем генераллэн Андрей Власовлэн Русской освободительной армиез (РОА).

Озьы ик пӧртэм националистической коллаборационистской формированиос,соос пӧлын — украин националистъёслэн  «Нахтигаль» но «Роланд» батальонъёссы. Берлогес украин батальонъёсты расформировать карыса, личной составез одӥг подразделение огазеямын — охранной полицилэн 201-тӥ батальонэз. Озьы ик нацистъёс палан ожмаськизы Уйпал Кавказысь но Кавказ сьӧрысь подразделениос — «Бергманн» батальон, Грузин легион, Азербайджан легион, Уйпал Кавказ легион но мукет.

Герман армилэн пӧлэсаз ожмаськиз генерал фон Паннвицлэн 15-тӥ кавалерийской казак корпуэз (СС) но мукет казак частьёс. Казакъёсты Германи пала кыскон понна, казакъёслэсь остгот выжыысь потэмзэс валэктыса, нимысьтыз теория кылдытэмын вал.

Германи палан озьы ик ожмаськиз Штейфон генераллэн Ӟуч корпусэз, Царской армиысь генерал-лейтенантлэн Пётр Красновлэн корпусэз но мукет тӧдьы эмигрантъёслэсь но СССР-ын улӥсьёслэсь кылдытэм нимаз частьёс.

СССР-лэн ожутиськонлы дась луэмез

Ож кутскон азьын промышленной производствоя, пятилеткаос улсын , СССР кыкетӥ интые потӥз (США бере). Оборонной кулэяськонъёслы кун коньдэтысь 32,5 % висъяськылӥз.80 %-эз промышленной продукци кунлэн шундыпуксён палаз поттӥськиз. Экономикаез быдэсак ожгар ӧре выжтыны 1942-тӥ арын гинэ луиз.

1927-тӥ—1937-тӥ аръёсы шундыпуксёнпал кунгож дурын 13 юнматэм ёросъёс ӝутэмын вал (Сталинлэн линиез), 1938-тӥ —1939-тӥ аръёсы аръёсы эшшо 8 укрепрайонъёс пуктыны кутскемын. 1940-тӥ — 1941-тӥ аръёсы, Шундыпуксёнпал Украинаез но Шундыпуксёнпал Белоруссиез огазеям бере, выль кылдэм кунгож дуре эшшо 20 укрепрайонъёс лэсьтыны кутскемын (Молотовлэн линиез). Выль кунгож дурысь лэсьтӥськонэз 1941-тӥ арын 1-тӥ пӧсьтолэзёзь йылпумъяны чакламын вал, азьвыл кунгож дурын 1-тӥ коньывуонозь. Озьы Германия ожалскон вакытэ тросэз укреплениос быдэсак дасесь ӧй вал на.

1941-тӥ арын 22-тӥ инвожоозь Горд Армиын 303 дивизия лыдъяськиз, войсколэн огъя лыдыз 5,3 млн мурт. Нош вермахт 1941-тӥ арын инвожо толэзёзь быдэсак мобилизовать каремын вал (7,3 млн мурт).

СССР-ысь Генеральной штаб 1940-тӥ арын куарусёнэ СССР-ысь ВС-лэн 1940-тӥ — 1941-тӥ аръёслы дась луэмез сярысь доклад лэсьтӥз. Озьы ке но, 5-тӥ коньывуонэ валтӥсь кужымъёсты Брестлэсь лымшорегес выжтыны решение кутэмын вал. Германия асьме вылэ омырскыку, сое Балкан кунъёслэсь висъяны но Люблин — Бреслау вылэ шуккет сётон вылысь. Чаклам планъя, Шундыпуксён фронтлэн 4-тӥ армиез юрттыны, собере валтӥсь кужымъёссэ Шундыӝужанпал Пруссие контрнаступление поттыны кулэ вал.

1940-тӥ арын пӧсьтолэзьысен 1941-тӥ арын куартолэзёзь стратегической планъёс ог вить пол вошъяськылӥзы. Генштаблэн 1941-тӥ арын 15-тӥ куартолэзе гожтэмаз Германилэн армиез быдэсак мобилизовать каремын шуыса пусъемын. Со асьме музъем вылэ кужмысь пыриз ке, асьме войскоос кык ласянь контрударен шуккет сётыны расчётъёс дасямын вал: одӥгзэ, валтӥсьсэ — Краков, Катовица вылэ, мукетсэ — Варшава, Дембшин вылэ. Операцилэн 30-тӥ нуналаз Лодзь, Оппельн висгож дуре потыны чакламын.

1941-тӥ арын 22-тӥ инвожоозь кылдэм югдур

Нацист Германия

Ож кутскон азьын СССР-лэн кунгожъёсыз дурын армиослэн 3 группазы интыямын вал, огъя лыдзы: 5,5 млн мурт, 3712 танк, 47 260 ожтӥрлык но миномётъёс, 4950 боевой самолёт.

• «Север» группа (29 дивизия, командующиез В. Лееб) — Гольдап дорысен Мемель дорозь. Солэн пӧлэсаз 16-тӥ но 18-тӥ армиос, 4-тӥ танковой группа. Ужпумез — Прибалтикаын РККА-лэсь кужымъёссэ быдтыса, портъёсты киултоно, Ленинградэз но Кронштадтэз басьтоно.
• «Центр» группа (50 дивизия, командующиез Ф. Бок) — Голдапысен Влодаваозь. Солэн пӧлэсаз 9-тӥ но 4-тӥ армиос, 2-тӥ но 3-тӥ танковой группаос. Ужпумез — Совето войскоосты Белоруссиын котретэ басьтоно, Смоленск доры потыса, «Север» группаен огазеяськоно.
• «Юг» группа (44 немец но 13 румын дивизия, 13 бригада, командующиез Г. Рундштедт) — Полесьеысен Сьӧд зарезёзь. Солэн пӧлэсаз 1-тӥ танковой группа, 6-тӥ, 11-тӥ, 17-тӥ армиос, румын но венгер частьёс. Валтӥсь шуккет — Киев палан, собере Днепр пала, лымшорен шундыӝужан вискы азьланьсконо.

Уйпал Финляндиын «Норвегия» армия кылдытэмын вал (командующиез Н. Фалькенхорст). Солы пуктэм ужпум — Мурманскез, Полярной но Киров чугун сюресъёсты басьтоно.

Совето Союз

РККА-ын1941-тӥ арын 22-тӥ инвожоозь  303 дивизия лыдъяськиз, кунгож улосъёсын — 172 дивизия (со пӧлын 40 танковой), 3,3 млн мурт, 59 787 ожтӥрлык но миномётъёс, 12 782 танк (1475 выль Т-34 но КВ), 10 743 самолёт (20 % палаез — выль модельёс). Флотын — 220 сюрс мурт, 182 корабль, соос пӧлын 3 линкор, 7 крейсер, 45 эсминец но 127 вуул пыж.

Кунгож дурын сылӥсь частьёс но НКВД-лэн частьёсыз 100 сюрс пала лыдъяськизы. Кунгожъёсты утёнэ Ленинград, Прибалтийской, Шундыпуксёнпал, Киев но Одесса округъёс пыриськизы, соослы Уйпал, Балтино Сьӧд зарезь флотъёс юрттӥськизы.

• Прибалтийской округ (Ф. И. Кузнецов): 8-тӥ, 11-тӥ армиос, кылдытӥськиз 27-тӥез — Балтикаысен Литвалэн лымшор висгожозяз (300 иськем).
• Шундыпуксёнпал округ (Д. Г. Павлов): 3-тӥ, 4-тӥ, 10-тӥ армиос, кылдытӥськиз 13-тӥез. 44 дивизия (12 танковой) — Литвалэн лымшор висгожысеныз Припять дорозь (470 иськем).
• Киев округ (М. П. Кирпонос): 58 дивизия (16 танковой), 4,8 сюрс танк, 5-тӥ, 6-тӥ, 12-тӥ, 26-ӥ армиос — Припять дорысен Липкан дорозь (860 иськем).
• Одесса округ (Я. Т. Черевиченко): 9-тӥ армия (22 дивизия, 4 танковой) — Липкан дорысен Дунай дурозь (480 иськем).
• Ленинград округ (М. М. Попов): 7-тӥ, 14-тӥ, 23-тӥ армиос, Уйпал флот — 1300 иськем музъем вылтӥ но 380 иськем зарезь висгож кузя.

РККА-лэн кыкетӥ стратегической эшелоназ 7 арми пыртэмын вал (77 дивизия). 22-тӥ инвожое 32 дивизия пӧлысь 16-ез вуиз.

Кужымъёслэн пӧртэмлыксы

Ожгарчиослэн лыдзыя немецлэн «Центр» группаез асьме Шундыпуксёнпал фронтлэсь кык поллы тросгес вал, нош танкъёсъя но авиация ӧжытгес. Лымшор-Шундыпуксён фронт техникая «Юг» группалэсь юнгес вал: танкъёсъя 7 пол, самолётъёсъя — 2,6 пол, артиллерия — 1,7 пол.

Техникалэн огъя лыдызъя СССР юнгес ке но вал, валтӥсь направлениосын Германия улэп кужымъя но ожмаськыны дась луэмезъя трослы ӟечгес вал. СССР-лы пумит ог 70%-эз люфтваффе поттэмын вал. Германиын пилотъёсты дасян понна 450 час висъяськылӥз, СССР-ын шорлыдын — 30-180 час сяна ӧз сётӥськылы, соин сэрен, омырын ожмаськонлы немец ӟечгес дасяськемын вал.

1941-тӥ арын 22-тӥ инвожое Шундыпуксёнпал ТВД-ын кужымъёслэн пӧртэмлыксы

	Вермахт	Горд Армия	Пӧртэмлыксы
Дивизиос	166	190	1: 1,1
Личной состав	4 329 500	3 262 851	1,3: 1
Ожтӥрлык но миномётъёс	42 601	59 787	1: 1,4
Танкъёс но штурмовой ожтӥрлык	4364	15 687	1: 3,6
Самолётъёс	4795	10 743	1: 2,2

СССР-ысь Ожтӥрлыко кужымъёслэн боевой но численной составзы Быдӟым Атыкай ож вакытэ (1941-тӥ ар).

	Личной состав	Стрелковой пыӵалтӥрлык	Арт. вооруж.	Танкъёс	Самолётъёс	Боевой корабльёс	Мех. транспорт
Ваньмыз	5 434 729	7 983 119	117 581	23 106	24 488	910	528 571
Ужась				18 691	21 030

Быдӟым Атыкай ожлэн валтӥсь вадесъёсыз

Историографиын Быдӟым Атыкай ожлэсь куинь валтӥсь вадессэ висъяло:

• Нырысетӥез вадес (1941-тӥ арын 22-тӥ инвожоысен — 1942-тӥ арын 18-тӥ шуркынмонозь). Германилэн СССР вылэ ожалскемез. Ожлэн кутсконэз. Блицкриглэн куашкамез. Муско понна ожмаськон. 1942-тӥ арын гужем кылдэм секыт югдур но ыштонъёс.
• Кыкетӥез (1942-тӥ арын 19-тӥ шуркынмонысен — 1943-тӥ арын толсурозь). Ожлэн чутрак воштӥськемез. Горд Армилэн Сталинград, Курск но Днепр котырын ожмаськонъёсын вормонъёсыз.
• Куинетӥез (1944-тӥ арын толшорысен — 1945-тӥ арын 9-тӥ куартолэзёзь). Тушмонэз СССР-лэн интывылысьтыз уллян. Европа кунъёсты мозмытон. Фашист блокез куашкатон. Берлин операция. Германилэн быдэсак сётӥськемез.

Советско-японской ожмаськон — Быдӟым Атыкай ожлэн азинскемез луэ, шуыса лыдъяське.

Ожмаськонлэн нырысетӥ вадесэз (1941-тӥ арын 22-тӥ инвожоысен — 1942-тӥ арын 18-тӥ шуркынмонозь)

СССР-ысь кунгож котырысь куд-ог военной округъёс 1941-тӥ арын 8-тӥ инвожое ожмаськыны дасесь вал. 13-тӥ — 15-тӥ инвожое шундыпуксёнпал округъёсы Обороная калык комиссариатлэн но Генеральной штаблэн, нырысетӥ но кыкетӥ эшелонъёслэсь частьёссэ, «учениос» ортчытон улсын, кунгож доры поттон сярысь директиваос ыстэмын вал. Со директиваосъя нырысетӥ эшелонлэн округъёсысьтыз стрелковой частьёс кунгожлэсь 5-10 иськемын оборонаез возьыны кулэ вал; кыкетӥ эшелонлэн частьёсыз, стрелковой но механизированной корпусъёс — кунгожлэсь 30-40 иськемын.

Совето пехотинецъёс фронтэ кошко, 1941-тӥ арын 23-тӥ инвожое, ожлэн кыкетӥ нуналыз.

1941-тӥ арын 21-тӥ инвожое ӝыт, Балти флотлэсь луонлыкъёссэ сюбегатон вылысь, немецъёс Финн сюме миннаос тыризы.

1941-тӥ арын 22-тӥ инвожое ӵукнапал 3 час 6 минутэ Сьӧд зарезьысь флотлэн штабеныз кивалтӥсь контр-адмирал Иван Елисеев СССР-лэн омыр вӧлметаз кужмысь пырем немец самолётъёсты ыбылыны косӥз: Быдӟым Атыкай ожын асьме музъем вылэ ожалскем тушмонлы пезьдэт сётонын со нырысетӥез боевой приказ вал.

1941-тӥ арын 22-тӥ инвожое 3 час 7 минутэ маршал Г. К. Жуков боевой действиослэн кутскемзы сярысь нырысетӥ ивортон сётӥз. Ӝоген, артиллерийской но авиационной подготовка ортчытэм бере, ӵукна 4 час котырын немец войскоос СССР-лэн музъем вылаз кужмысь пыризы.

5 час 30 минутэ Германилэн СССР-ысь посолэз В.Шуленбург М. Молотовлы кагаз сётӥз. Отын СССР «Германилы пумит луись политика ортчытэ, соин кунгож дуре ожалскыны дась луэм войскооссэ пуктылӥз» шуыса гожтэмын вал. 23-тӥ инвожое Италия, Румыния но Словакия СССР-лы ож ялӥзы.

Ожмаськонлэн нырысетӥ нуналаз немецко-румынской войско, Прут вамен потыса, Дунай шурез выжыны малпа вал, но совето войскоос соосты огдырлы дугдытыны быгатӥзы.

22-тӥ инвожое нуназе шорын В. М. Молотов радио пыр вераськиз но Германия Совето Союз вылэ ожалскиз шуыса ивортӥз. СССР-ысь Вылӥ Кенешлэн Президиумезлэн 22-тӥ инвожое гожтэм Косэтэзъя 23-тӥ инвожоысен 14 военной округъёсын 1905-тӥ —1918-тӥ аръёсы вордскем военнообязаннойёсты армие басьтон кутскиз.

23- тӥ инвожое Валтӥсь Командованилэн Ставкаез кылдытэмын (8- тӥ гудырикошконысен— Вылӥ Главнокомандованилэн Ставкаез), нош 30-тӥ инвожое — обороная Кун комитет (ГКО), соин кивалтӥз И. В. Сталин. Инвожоысен калык ополчениез кылдытон кутскиз. 26-тӥ инвожое нырысьсэ чузъяськиз «Священная война» кырӟан, берлогес со Быдӟым Атыкай ожлэн гимнэзлы пӧрмиз.

1941-тӥ арлэн пумозяз армие 14 млн ятыр калык басьтэмын вал.

Со дыре немец войскоос стратеги ласянь кичӧлтонэз но омырын кузёяськонэз киултӥзы но кунгож дурын ожмаськонъёсын совето войскоосты пазьгизы, тужгес но шундыпуксён палан (Прибалтика но Белоруссия). Лымшор-шундыпуксён палан (Украина) но уйпал-шундыпуксён палан (Ленинград) блицкриг ӧз удалты.

1941-тӥ арын гужем-сӥзьыл кампания

Войналэн кутскон вакытаз, 1941-тӥ арын 22-тӥ инвожоысен 29-тӥ инвожоозь, СССР-лэн кунгож дуръёсы интыяськем ёросъёсаз, Литвалэн, Латвилэн лымшор люкетаз, Белоруссиын но шундыпуксёнпал Украинаын пограничной но прикрытиысь войскоос ожмаськизы (приграничной ожмаськонъёслэн йылпумъяськон дырзы эсэпаса сётэмын). Соос куинь стратегической оборонительной операцилэн люкетэз луизы: Прибалтийской (22-тӥ инвожоысен 9-тӥ пӧсьтолэзёзь), Белорусской (22-тӥ инвожоысен 9-тӥ пӧсьтолэзёзь) но Львовско-Черновицкой (22-тӥ инвожоысен 6-тӥ пӧсьтолэзёзь).

• 

  Герман войскоос СССР-лэн музъем вылаз пыро

• 

  Родина-мать зовёт! — почта марка. Быдӟым Атыкай ожлэсь нырысетӥ нуналъёссэ возьматӥсь плакат (авторез — Ираклий Тоидзе)

• 

  Бакуын ожлэн кутскемез сярысь ялон. 1941-тӥ арын 22-тӥ инвожое

1941-тӥ арын сӥзьыл вермахтлэн наступление потэмез

Тылож кутскыку, Горд Армия азьвыл кылдытэм правилоосъя ожмаськиз. Со правилоосын тушмонэз кунгож дурын дугдытыса, контрнаступление выжоно но солэн интывылаз ожмаськонэз азьланьтоно, шуыса пусъемын. Но со гожъямъёс ожмаськонлэн нырысетӥ нуналъёсаз ик, вермахтлэн совето оборонаез пазьгемез бере, кулэлыксэс ыштӥзы. Нимаз кунгожъёсты утён но куспазы тупатымтэ контрударъёс тушмонлэн кужмысь пыронэзлы ӧз люкетэ , шуыны луоз. Брест крепостьлэн гарнизонэз оборонаез толэзь ӵоже возиз (22-тӥ инвожоысен 23-тӥ пӧсьтолэзёзь). Со героизмлэн но юнлыклэн тодметэз луиз.

9-тӥ—10-тӥ пӧсьтолэзе кунгождур ожлэн люкетэз Луга, Смоленск, Киев но Кишинёв котырысь лек ожъёсын йылпумъяськиз. Со дырысен кутскизы выль стратегической оборонительной операциос. Отчы кыкетӥ стратегической эшелонлэн огазеяськонъёсыз пыриськизы. Заполярьеын но Карелиын стратегической оборонительной операция 29 -тӥ инвожоысен 10-тӥ коньывуонозь кыстӥськиз, соку ик Мурманск, Кандалакша но Петрозаводск пала мынонын ожмаськонъёс ортчизы.

Куинь арня куспын немец войскоос Прибалтикаез, Белорус ССР-ез, Украин но Молдаван ССР-лэсь бадӟым люкетсэ киултӥзы, асьме шаерлэн пушказ 600 иськеме азьланьскизы. Уй-нунал куспын шорлыдын 15-30 иськемез ортчылӥзы. РККА-лэн 28 дивизиез кунгож дурын но утиськон ожъёсын быдэсак пазьгемын вал, 70-лэсь уноез дивизиос 50%-лэсь ятыр ыштонъёс адӟоно луизы. 30-тӥ пӧсьтолэзёзь Горд Армилэн таӵе ыштонъёсыз пусъемын: 651 сюрс 65 мурт (447 сюрс 15-ез берыктонтэм, 204 сюрс 50-эз санитарной), ог 6 сюрс танк, 9,5 сюрс ожтӥрлык, 12 сюрс миномёт, 3 сюрс 468 самолёт. Техникалэн бадӟым люкетэз сӧриськыса но горючей ӧвӧлэн быремын. Заводъёсты эвакуировать каремен но трос ыштонъёсын сэрен, техникалэн тырмымтэез зол шӧдӥськиз.

Пӧсьтолэзьысен Ставка фронтъёсын группаослэсь обороная операциоссэс радъялляз, отчы кӧня ке фронтовой огазеяськонъёс, авиация, ПВО, нош зарезь дур палъёсын — флот пыриськиз. Со вакытэ валтӥсьёсыз операциос: Ленинград (10 -тӥ пӧсьтолэзьысен 30-тӥ куарусёнозь), Смоленск (10-тӥ пӧсьтолэзьысен 10-тӥ куарусёнозь), Киев (7- тӥ пӧсьтолэзьысен 26-тӥ куарусёнозь), Донбасско-Ростовской (29-тӥ пӧсьтолэзьысен 16-тӥ шуркынмонозь), Москва (30-тӥ куарусёнысен 5-тӥ толсурозь) но Тула (24-тӥ коньывуонысен 5-тӥ толсурозь) обороная операциос.

30-тӥ куарусёнэ тушмон армиослэн «Центр» группазы Москва вылэ наступление потӥз («Тайфун» операция). Лек ожмаськонъёс бере немецъёс Вязьма, Брянск, Орёл, Ржев, Можайск но мукет каръёсты басьтӥзы. 10-тӥ коньывуонэ Г. К. Жуков Шундыпуксёнпал но Резервной фронтъёсты огазеяз. Можайской обороная линиез юнматон борды басьтӥськиз но резерв луись частьёсты ӝегатскытэк фронтэ вуттыны косӥз. 30-тӥ коньывуонозь тушмонлэн Муско пала мынонэз дугдытэмын вал.

Фронтлэн лымшор люкетаз кылдэм югдурен огдыре Горд Армия Молдавиын, Одессаын (5-тӥ гудырикошконысен 16-тӥ коньывуонозь), Крымын (18-тӥ коньывуонысен) обороная операциос нуиз, 30-тӥ коньывуонысен Севастополез мозмытон кутскиз.

1941-тӥ арын гужем-сӥзьыл кампанилы луыса, вермахт «Барбаросса» планын пуктэм стратегической ужпумъёсты быдэстыны ӧз быгаты, Киев дорын тактической вормонзэ лыдэ басьтытэк. Немец генераллэн Х. Гудерианлэн верамезъя, Мускоез басьтонлы висъям дыр ыштэмын вал. Толсур толэзёзь герман войскоос 850-1200 иськеме азьланьскизы, но вермахтлы берыктыны луонтэм ыштонъёс вайизы (740 сюрс мурт пӧлысь 230 сюрсэз виемын). РККА-лэн берыктонтэм ыштонъёсыз 3,1 миллионлэсь ортчизы.

СССР тужгес кулэлыко промышленной ёросъёссэ но каръёссэ ыштӥз — Минск, Киев, Харьков, Смоленск, Одесса, Днепропетровск. Ленинград блокадае сюриз. Миллион тыр улӥсьёсын улон интыос киултэмын вал, сю сюрсъёсын калык бырыны шедиз. Тросэз Германие кужмысь келямын вал.

1941-тӥ—1942-тӥ аръёсы тол кампания

1941-тӥ арын 15-тӥ-16-тӥ шуркынмонэ герман войскоос кыкетсэ Муско вылэ потӥзы. Шоркарез уйпал-шундыпуксён паласен но лымшор-шундыпуксён паласен котыртыны малпазы. Дмитровской направлениын соос Москва-Волга каналозь вуизы, Клинэз, Солнечногорскез но Красная Поляна каръёсты киултӥзы; лымшор-шундыпуксён палан 2-тӥ танковой армия Кашира доры потӥз. Озьы ке но, шуркынмон пумын наступление кыкналасянь дугдытэмын вал.

1941-тӥ арын 5-тӥ толсуре Муско дорын Шундыпуксёнпал (Г.К. Жуков), Калинин (И. С. Конев) но Лымшор-Шундыпуксёнпал (С. К. Тимошенко) фронтъёслэн кужымъёсынызы совето войскоос контрнаступление потӥзы. 1942-тӥ арын 7-тӥ толшорозь тушмон 80-250 иськеме чигнатэмын вал. Муско, Тула, Калинин но Смоленск улосъёслэн бадӟым люкетэз мозмытэмын. Шоркарлы кышкытлык палэнтэмын вал.

Муско дорын ортчем операциен огдыре 10-тӥ шуркынмонысен 30-тӥ толсурозь Тихвинской стратегической наступательной операция ортчытӥськиз. Горд Арми немец войскоосты палэнтыны, Тихвинэз мозмытыны но Ленинградэн герӟась чугун сюресэз выльдыны быгатӥз. Озьы уйпал-шундыпуксён палась кичӧлтонзэ тушмон быдэсак ыштӥз.

17-тӥ коньывуонэ немец Ростов-на-Дону кар пала вырӟиз. 21-тӥ шуркынмонэ карез басьтӥз, 29-тӥ шуркынмонэ совето войскоос сое мозмытӥзы. Тушмонэз 60-80 иськеме чигнатӥзы, Миус котырын фронт юнмаз.

Озьы, 1941-тӥ арлэн пумаз, «Барбаросса» планлэн стратегической ужпумъёсыз быдэстэмын ӧвӧл шуыса валамон луиз. Вермахт Москваез но, Ленинградэз но, Кавказэз но киултыны ӧз быгаты. Немец историк К. Рейнгардт гожтэмъя, Муско дорын Гитлерлэн стратегиез куашказ, 1941/42-тӥ арын толалтэ герман командовани ожмаськонлэн кема кыстӥськонэз сярысь валатскиз.

1942-тӥ арын 5-тӥ толшоре ВГК-лэн Ставкаяз совещание ортчиз, отын вань фронтъёсын паськытатэм наступленилы план юнматэмын вал. Л. П. Берия но Г. М. Маленков сое умоен лыдъязы. Техника, транспорт но дышетэм резервъёс тырмымтэен К. Жуков но Н. А. Вознесенский пумит луизы. Озьы ке но, Сталин планэз юнматӥз, тушмонэз тулысозь пазьгоно шуиз.

16-тӥ армиен кивалтӥсь генерал-лейтенант К. К. Рокоссовский (паллянысен кыкетӥез), Военной Советлэн ёзчиез А. А. Лобачёв но гожъяськись В. П. Ставский совето войскоосын киултэм немец техникаез эскеро. Туспуктэмез А. Капустянскийлэн, 1941-тӥ арын 10-тӥ толсуре

1942-тӥ арын толшорысен оштолэзёзь Горд Армия Ржевско-Вяземской стратегической наступательной но Керченско-Феодосийской десантной операциосты ортчытӥз. Горд Армилэн нимаз басьтэм вормонъёсыз шоры учкытэк, немец войскоос позициоссэс возьыны быгатӥзы. Совето войскоослы тужгес секыт йӧтӥз Ржев дорын. Отын 1943-тӥ арын южтолэзёзь бадӟым ыштонъёс чидано луиз. 20-тӥ оштолэзе Горд Армия оборонае выжиз.

18-тӥ толшоре Барвенково-Лозовской операция кутскиз. Лек ожъёс пыр совето войскоос немец оборонаез пасьталаезъя 100 иськемозь пазьгизы но 90-100 иськеме азьланьскизы, Северской Донецлэн бурпал ярдурысьтыз бадӟым плацдармез киултыса, Харьков пала тулыс наступление выжыны инъет кылыдтӥзы.

1942-тӥ арын гужем-сӥзьыл

Совето командование тушмонэз 1942-тӥ арын гужем быдэсак пазьгыны но СССР-лэсь музъемъёссэ мозмытыны малпа вал. Но вермахтлэсь кужымзэ умойтэм дунъямен, секыт югдуре вуиз. Куартолэзе Харьковской операциын совето войско пазьгемын вал, Крымской фронт но куашкатэмын.

Немец командование «Блау» план улсын Кавказэз, Донбассэз, Кубанез, Сталинградэз киултыны но Волга шур доры потыны ужпумъёс пуктӥз. «Юг» армиослэн группазы «А» (Кавказ пала) но «Б» (Сталинград пала) группаослы люкемын вал. 28-тӥ инвожоысен Воронежско-Ворошиловградской оборонительной операция кутскиз.

Немец войскоос 500-650 иськеме азьланьскизы но Волга дуре потӥзы. 1942-тӥ арын 28-тӥ пӧсьтолэзе Ссталин «Ни шагу назад» 227-тӥ номеро косэт поттӥз. Дисциплинаез ӝутон вылысь кылдытэмын вал штрафной подразделениос но заградотрядъёс.

Совето солдатъёс Сталинград дорын ожмасько. 1942-тӥ арын гужем

17-тӥ пӧсьтолэзьысен Сталинградэз утёнъя стратегической оборонительной операция кутскиз. Толэзь ӵоже 62-тӥ (В.И. Чуйков) но 64-тӥ (М. С. Шумилов) армиос Дон шурлэн котырскем интыяз утиськыны выризы. 23-тӥ гудырикошконэ Паулюслэн 6-тӥ армиез Волга дуре вуиз. Со нуналэ ик Сталинградэз котыр ласянь туж зол пушкытъязы. 13-тӥ куарусёнэ урам ожъёс кутскизы но шуркынмон толэзёзь кыстӥськизы.

Кавказын немец войскоос кӧня ке гурезь вискытӥ потон интыосты куиултыны быгатӥзы ке но, мувӧй поттон интыос дорозь ӧз вуэ.

Шор но уйпал-шундыпуксёнпал направлениосын озьы ик паськытатэм операциос нуиськизы. Ржевско — Сычёвской (30-тӥ пӧсьтолэзьысен 23-тӥ гудырикошконозь) но Сухиничи но Козельск ёросын (22-тӥ гудырикошконысен 29-тӥ гудырикошконозь) ортчем операциосын оглом 228 сюрс адями бырыны шедиз. Любань операциын (толшорысен пӧсьтолэзёзь) но 2-тӥ ударной армиез котыртэмысь поттыку 403 сюрс мурт быриз.

Сӥзьылпал Германилэн югдурез шугомиз. РККА-ен ӵошатыса, ыштонъёсыз ӧжытгес ке но вал, бырем техниказэ выленыз воштыны ӧз вуы. Сталинград палан вермахтлэн боевой ротаосаз 30-лэсь ӧжыт ожгарчи лыдъяськиз, штатнойёсаз — 180 пала. Восточной фронт нюжтӥськемен, обороналэн ӵемлыкез кулэсмиз.

Фронтлэсь бадӟым люкетъёссэ Германилэн союзной армиосыз воштӥзы — румын, венгер, итальян (ляб дышетэм но ӧжыт лыдъем).

1942-тӥ арын кылдэм ож югдур

Со вакытлэн пумаз нацист агрессилы пумит луись калыккуспо валчеяськон кужмояз: 1941-тӥ — 1942-тӥ аръёсы антигитлеровской коалицилэн шорсюлмыз кылдӥз — СССР, Великобритания но США.

Экономикалэн пумит луэмез

Тыложлэн нырысетӥ нуналъёсысеныз ик СССР-ын калыкез, предприятиосты, ужъюртъёсты но ваньбурез эвакуировать карон ужрадъёс кутскизы. 1941-тӥ ар пумозь кунлэн шундыӝужан палаз 2 сюрс 600 пала предприятиос но 2,3 млн йыр пудо поттэмын вал. 1942-тӥ арын СССР 5,91 млн ыбылӥськон пыӵалтӥрлык поттӥз (пистолетъёсты но револьверъёсты лыдэ басьтытэк), 287 сюрс ожтӥрлык но миномётъёс, 24,5 сюрс танк но САУ, 25,4 сюрс самолёт (со пӧлысь 21,7 сюрсэз боевой). Кыкетӥ паларын техникаез поттон шӧдскымон будӥз. 1942-тӥ арын гужемозь СССР-лэн экономикаез быдэсак ож дыре выжтэмын вал.

1941-тӥ арысь совето плакат

Ленд-лизъя ваем вузъёс Совето Союзын поттэмезлэсь 4% луиз, танкъёсъя но самолётъёсъя — 10% но 12%; асьме дорын поттэмъёсыныз ӵошатыса, тужгес бадӟым лыдзы кунсьӧрын поттэм автомобильёслэн вал. Ленд-лиз амалэн радъям вузъёс асьме кунэ фронтын югдур воштӥськем бере гинэ вуыны кутскизы.

Совето экономика ассэ туж юн милитаризировать каремын шуыса возьматӥз. Кылсярысь, 1943-тӥ арын, андан ӵыжатонъя Германилэсь 4 поллы бере кыльыса но, СССР-ын 2,5 поллы тросгес танк поттэмын.

Оккупационной режим но солы пумит луон

Ож вакытэ немец оккупаци улэ Белорусс, Украин, Эстон, Латви, Литва ССР-ъёслэн интывылъёссы но РСФСР-лэн 13 улосъёсыз шедизы.

Молдаван ССР-ын но Украин ССР-лэн куд-ог лымшорпал ёросъёсаз (Транснистрия) Румыния кузёяськиз, Карело-Финской ССР-лэн оглюкетэз финн войскоен киултэмын вал.

Тросэн быдтэмын оккупацие шедем калык . 1941-тӥ арын 13-тӥ куартолэзе Гитлерлэн косэтэзъя вермахт огшоры калыкез тросэн быдтэм понна кылкутытонлэсь мозмытӥз. Кужмысь карон —СССР- лэсь ожгар кужымзэ куашкатон гинэ ӧвӧл, совето калыклы пумит, нырысь ик, еврейёслы но славянъёслы, «улӥ расаен» лыдъям муртъёслы пумит чакламын вал. Оккупировать карем музъемъёсын выль административной структураос, интыысь аскивалтон но полиция кылдытэмын. Быдэс кунын идеологиез воштон политика, калыкез мукет сямен дышетонъя ужрадъёс нуиськыны кутскизы. Солы луыса, историез дышетон алэмын, тросэз книгаос быдтэмын.

Оккупантъёс 18-45 аресъем муртъёслы (еврейёслы — 60 аресозь) ужан повинность юнматӥзы, ужан нунал 16 часозь кыстӥськиз. куанер калык пичи янгышъёс но кылзӥськымтэос понна репрессие шедьылӥз. Нуналлы быдэ калыкез тросэн виылон огшоры ужрадлы пӧрмиз. Бабий Ярын гинэ 100 сюрслэсь трос адями ыбылыса быдтэмын вал. Тылож вакытэ Белоруссиысь котькуд 4-тӥез адями бырыны шедиз. Оккупировать карем улон интыосын оглом 7,4 млн огшоры муртъёс быдтэмын.

1941-тӥ арын куартолэзе совето партизанъёсты ыбылон

5,2 миллионлэсь ятыр совето гражданъёс кужмысь Германие секыт ужъёсы келямын. Война бере ог 2,65 млн адямиез берыктыны луиз; 451 сюрсэз кунгож сьӧры кылиз, 2,1 миллионлэсь уноез сьӧлтэтын кулӥз.

Тылож кутскем бере, нырысетӥ арняысеныз ик СССР-лэн кивалтӥсьёсыз фронт мышкын совето подпольеез кылдытыны кутскиз. Но немецъёслэн ӝог азьланьскемзы со вотэсэз пумозяз дасяны люкетӥз. Тросэз подпольной группаос малпамтэ шорысь кылдылӥзы. Кылсярысь, Краснодонын егитъёсын радъям «Молодая гвардия» антифашистской огазеяськон лушкем ожмаськонлэн одӥгез валтӥсез тодметэз луиз. Подпольщикъёс разведкаосы потаса, кулэ иворъёс вуттылӥзы, фашистъёслы пумит листовкаос вӧлмытъязы, диверсиос радъяллязы, коллаборационистъёсты быдтылӥзы.

1941-тӥ-1944-тӥ аръёсы оккупированной территориын ог 6,2 сюрс партизан отрядъёс но соединениос пусъемын вал, отчы 1 млн пала адями пыриськиз. 1942-тӥ арын партизан движенилэн Шор штабез кылдытэмын (кивалтӥсез П. К. Пономаренко). Партизанъёс 10 % палазэ тушмон кужымез ас вылазы басьязы. Тужгес но пайдаё ортчизы 1943-тӥ арын «Рельсовой война» но «Концерт» операциос. Партизанъёслэн но подпольщикъёслэн ужзы совето интывылэз оккупантъёслэсь мозмытонын шӧдскымон пытьы кельтӥз.

Тыложлэн кыкетӥ люкетэз (чутрак воштӥськон)

1942-тӥ—1943-тӥ аръёсы тол кампания

1942 -тӥ арын 19-тӥ шуркынмонэ «Уран» операция улсын совето войскоос контрнаступление потӥзы, 23-тӥ шуркынмонэ Сталинград (командующиез — А. И.Ерёменко) но Лымшор-шундыпуксён (командующиез-Н. Ф. Ватутин) фронтъёслэн люкетъёссы Калач-на-Дону кар дорын огазеяськизы но 22 тушмон дивизиосты котыртӥзы. 16-тӥ толсуре кутскем «Малый Сатурн» операциын пазьгемын вал «Дон» группа. (Со Манштейн кивалтэм улсын Сталинградын котыртэм немец группировкаез мозмытыны турттэ вал).

«Кольцо» операция улсын (1943-тӥ арын 10 -тӥ толшорысен 2-тӥ тулыспалозь) Дон фронтлэн кужымъёсыныз (командующиез К.К. Рокоссовский) котыртэм 6-тӥ немец армиез быдтыны кутскизы. 1943-тӥ арын 31-тӥ толшоре со немец армиен кивалтӥсь генерал-фельдмаршал Ф.Паулюс 38-тӥ мотострелковой бригадаысь старшой лейтенантлы Ф. Ильченколы пленэ сётӥськиз. Со быдэс Кыкетӥ дунне ож ӵоже нырысетӥез учыр, куке немец офицер пленэ сётӥськиз. 2-тӥ тулыспалэ 6-тӥ немец армилэн кылем-мылемез капитулировать кариз. 90 сюрс пала немец солдатъёс но офицеръёс пленэ басьтэмын вал.

Совето-герман фронтлэн шор люкетаз («Марс» операция) ӝутэм наступательной операциос умойтэм йылпумъяськизы ке но, лымшор палан совето войскоослэн азинскемзы огъя тол кампаниын вормон сётӥз — Германилэн одӥг армиез но солэн союзникъёсызлэн ньылез армиез быдтэмын вал.

1942 -тӥ арын шуркынмонысен 1943-тӥ арын южтолэзёзь Горд Армилэн азьлане донгиськемез

Толалтэ кампанилэн мукет бадӟым вормонъёсыз — Уйпал Кавказын наступательной операция но Ленинград блокадаез пазьгон (1943-тӥ арын 18-тӥ толшоре).

1943-тӥ арын 13-тӥ толшорысен 3-тӥ южтолэзёзь совето войскоос Воронежско-Харьковской стратегической наступательной операциез быдэстӥзы. Та операциын немец армиослэн «Б» группазы пазьгемын вал. Озьы ик быдэсак пазьгемын со группае пырись 8-тӥ итальян но 2-тӥ венгер армиос. Мозмытэмын Воронеж, Курск, Белгород, Харьков.

1943-тӥ арын 19-тӥ тулыспалэ Манштейнлэн кивалтэм улсын немец армиослэн «Юг» группазы лымшор палан контрнаступление выжиз но выльысь Харьковез киултӥз, соин валче, совето войскоослэсь вормонзэс огдырлы талаз но соосты шундыӝужан пала (нимаз направлениосын 150-200 иськемлы) палэнтӥз. Озьы ке но, совето командованиен юнматэм ужпумъёс южтолэзь пумын быдэстэмын вал: немец войскоослэн азьлане мынонзы дугдытэмын, фронт юнматэмын.

1943-тӥ арын толалтэ Вальтер Модельлэн 9-тӥ немец армиез Ржевско-Вяземской выступысь чигнано луиз («Бюффель» операция ). Калинин (Максим Пуркаев) но Шундыпуксён (Василий Соколовский) фронтъёсысь ожгарчиос тушмонэз уйыса мынӥзы. Ржевско-Вяземской операцилы луыса, (1943-тӥ арын 2 -тӥ южтолэзьысен 31-тӥ южтолэзёзь ) совето войскоос фронт линиез Мусколэсь эшшо 130-160 иськемлы палэнтӥзы, Ржевез но Вязьмаез мозмытӥзы.

1943-тӥ арын тулыспалысен оштолэзёзь Уйпал-Шундыпуксён фронтысь войскоос, генерал-полковниклэн М. С. Хозинлэн нимазъям группаез, Ленинград но Волховской фронтъёсысь войскоос, немец армиослэсь «Север» группазэс быдэсак пазьгон, Ленинград улосэз мозмытон но Прибалтикае выжыны дасяськон вылысь, «Полярная звезда» операциез быдэстӥзы. Но со операциын пуктэм ужпумъёс одӥгез но быдэстэмын ӧй вал.

1943-тӥ арын гужем-сӥзьыл кампания

1942-тӥ-1943-тӥ аръёсы тол кампанилэн операциосыз йылпумъяськем бере, пичияк стратегической пауза гужем ожмаськонъёслы дасяськыны луонлык сётӥз. 12-тӥ оштолэзе ВГК-лэн Ставкаяз фронтъёсысь военной советъёслэн но Генеральной штаблэн ӵектонъёссы эскеремын но 1943-тӥ арын гужем- сӥзьыл кампанилы план кылдытэмын. Валтӥсь ужрадъёс Курск стратегической плацдарм (курск выступ) котырын чакламын вал, со бордысен тушмонлэн орловской но белгородско-харьковской группировкаоссыслы урдэс ласянь шуккет сётыны кулэ. Курск выступысен ожалскыса но Киев пала потыса, «Юг» немец группаез пазьгыны луонлык кылдэ. Озьы Левобережной Украинаез мозмытыны луэ.

1943-гужем-сӥзьыл кампанилэн валтӥсь ожмаськонъёсыз: Курск но Днепр понна ожмаськонъёс. Курск ож мыныку, вермахт, кичӧлтонэз киултыны турттыса, Шундыӝужан фронтын берпуметӥ стратегической наступательной операцизэ ортчытӥз (кодовой нимыз «Цитадель») . Озьы ке но, Курск выступез вандыны но совето войскоосты котыртыны ӧз быгатэ, совето контрнаступление немец войскоосты быдэсак пазьгиз. Курск ожмаськонын 1943-тӥ арын 12-тӥ пӧсьтолэзе Прохоровка дорын быдэс дунне историын нырысетӥез одӥг нуналъем бадӟым танк ожмаськон ортчиз.

Совето армилэн 1943-тӥ арын гужем-сӥзьыл азьлане донгиськемез

«Кутузов» но «Полководец Румянцев» операциос улсын 5-тӥ гудырикошконэ Горд Армия Орёлэз но Белгородэз мозмытӥз, 23-тӥ гудырикошконэ —Харьковез.

1943-тӥ арын 7-тӥ гудырикошконысен 2-тӥ коньывуонозь совето войскоос Смоленской стратегической наступательной операциез быдэстӥзы («Суворов» операция), 25-тӥ куарусёнэ Смоленскез мозмытыса, шундыпуксён пала 200-250 иськеме азьланьскизы.

1943-тӥ арын 13-тӥ гудырикошконысен 22-тӥ куарусёнозь совето войскоос Донбас операциез быдэстӥзы, со улсын быдэсак мозмытӥзы Донецкысь угольной басейнэз.

Горд Арми, азьпала донгиськеменыз, Днепрлэсь шундыӝужан палагес интыяськем интывылъёсты мозмытыны быгатӥз. Днепрлэн шундыпуксёнпал ярдураз ожъёсын потыса, 1943-тӥ арын 6-тӥ шуркынмонэ Киевез мозмытӥз.

1943-тӥ арын 9-тӥ куарусёнысен 9-тӥ коньывуонозь озьы ик Новороссийско-Таманской операция быдэстэмын. Со операци улсын мозмытэмын вал Таман мукож. Озьы совето войскоослы Крым мукож пала потыны сюрес усьтӥськиз. Мелитопольской (1943-тӥ арын 26-тӥ куарусёнысен 5-тӥ шуркынмонозь) но Керченско-Эльтигенской десантной (1943-тӥ арын 31-тӥ коньывуонысен 11-тӥ шуркынмонозь) операциос улсын совето войскоос Перекоп перешеекын Турок мудэтлэсь юнматэм интыоссэ пазьгизы, Сивашлэн лымшор ярдурысьтыз но Керчь мукожысь плацдармъёсты киултӥзы, озьы ке но, кужым тырмыт луымтэен, Крымез соку ик мозмытыны ӧз луы.

1943-тӥ арын 1-тӥ пӧсьтолэзе Ил-2 штурмовикъёс тушмон колоннаез пушкытъяло, Воронеж фронт,

Гужем-сӥзьыл кампания РККА-лэн шундыпуксён пала 500-ысен 1 сюрс 300 иськемозь азьлане донгиськеменыз йылпумъяськиз. Тушмонэн киултэм музъемлэсь 2/3 люкетсэ, со пӧлысь тужгес кулэлыко экономической (Донбасс, Харьков) но мерлыко (Черноземье, Кубань, Украиналэн шундыӝужан палаз) ёросъёсты мозмытӥз.

1943-тӥ арын гужем-сӥзьыл кампанилэн пумаз Германилэн но СССР-лэн кужымъёссы огвыллемесь ик кылизы, со дыре ик танкъёсъя но САУОС-ъя Горд Армия бере кылиз. 1943-тӥ арлэн кыкетӥ ӝыныяз РККА 18 000 танксэ но САУ-оссэ ыштӥз, солы пумит, вермахт 3 000-лэсь ятыргес танксэ но штурмовой ожтӥрлыксэ, со понна самолётъёсын совето ыштонъёс нырысьсэ война понна ӧжытгес луизы, Совето Союзлэн — ог 6 500, немецлэн ог 10 000 пала.

28-тӥ шуркынмонысен 1-тӥ толсурозь И. Сталинлэн, У. Черчилльлэн но Ф. Т. Рузвельтлэн Тегеран конференцизы ортчиз. Конференциын 2-тӥ фронтэз усьтон сярысь кенешизы.

Тыложлэн куинетӥ люкетэз

Тыложлэн куинетӥ люкетаз (1944 -тӥ— 1945-тӥ арлэн кутсконэз) герман ожтӥрлыко кужымъёс шӧдскымон йылӥзы, тужгес но техника ласянь. Немец промышленностьлэн мобилизациезлы луыса, 1945-тӥ арын 1-тӥ толшорозь вермахтлэн танкъёсызлэн но САУОС-ызлэн лыдзы 12 сюрс 990-озь вуиз, кылемаз арын 9 сюрс 149 гинэ вал. Озьы ке но, Шундыӝужанпал фронтын ыштонъёсын но топливо тырмыт луымтэен, войскоослэн ӟечлыксы кулэсмиз. Солы пумит, Горд Армия кужмо ожмаськон опыт басьтӥз.

1944-тӥ арын тол-тулыс кампания

Тол-тулыс кампания Правобережной Украинаын наступлениен кутскиз (1943-тӥ арын 24-тӥ толсурысен — 1944-тӥ арын 17-тӥ оштолэзёзь). Со кампания улсын Житомирско-Бердичевской, Кировоградской, Корсунь-Шевченковской, Луцко-Ровненской, Никопольско-Криворожской, Проскуровско-Черновицкой, Уманско-Ботошанской, Березнеговато-Снигирёвской но Одесской операциос ортчытэмын. «Юг» но «А» армиослэн группаоссы быдэсак пазьгемын. Мозмытэмын Правобережной Украина. Асьме войскоос Карпат гурезьёс доры но Румынилэн музъем вылаз потӥзы. Со кампание 1-тӥ но 4-тӥ Украин, 2-тӥ Белорусс фронтъёсысь войскоос, Черноморской флот, Азовской флотилия но партизанъёс пыриськизы. Тушмонэз 250-450 иськеме чигнатӥзы. Озьы ке но, Горд Армилэн ыштонъёсыз 1,1 млн пала луизы, со пӧлысь 270 сюрслэсь ятырез берыктонтэм.

Соин огдыре Ленинградско — Новгородской операция ортчытэмын (14-тӥ толшорысен 1-тӥ южтолэзёзь). Отчы Ленинградысь, Волховысь, 2-тӥ Прибалтийской фронтлэн частьёсыз, Балтийской флот, кыдёке лобась авиация но партизанъёс пыриськизы. Операция дыръя Ленинград блокадалэсь мозмытэмын (1944-тӥ арын 27-тӥ январе), озьы ик быдэсак мозмытэмын Ленинград, Новгород улосъёс, Калинин улослэн но Эстонилэн оглюкетэз. Совето войскоос 220-280 иськемлы азьпала донгиськизы. Ыштонъёс — 300 сюрслэсь ятыр мурт, со пӧлысь берыктонтэмъёсыз — 75 сюрслэсь ятыр.

Оштолэзьысен куартолэзёзь Крымысь наступательной операция ортчытэмын (8- тӥ оштолэзьысен 12-тӥ куартолэзёзь). Перекопско-Севастопольской но Керченско-Севастопольской операциос дыръя 17-тӥ немец армия пазьгемын но быдэсак мозмытэмын Крым. Сьӧд зарезь флот Севастополе, флотлэн базаяз берытскиз. Операцие 4-тӥ Украин фронт, Нимаз Приморской армия, Черноморской флот но Азовской флотилия пыриськиз. Ыштонъёс — 85 сюрслэсь ӧжыт, берыктыны луонтэмъёсыз —17 сюрс пала.

Шор направлениын 1943-тӥ арын сӥзьылысен 1944-тӥ арын тулысозь совето войскоос Витебскез но Оршаез киултыны тыршизы, ке но, вормыны ӧз быгатэ — немец Белоруссиез юн возиз.

1944-тӥ арын гужем-сӥзьыл кампания

1944-тӥ арын инвожое союзникъёс Европаын кыкетӥ фронт усьтэмен, Германилэн югдурез секыт луиз. СССР бадӟым наступательной операциос ортчытӥз: Белорусс, Выборгско-Петрозаводской, Львовско-Сандомирской, Ясско-Кишинёвской, Прибалтийской. Белоруссиез, Украинаез, Прибалтикалэсь бадӟым люкетсэ, Чехословакилэсь люкетъёссэ, уйпал Заполярьеез но Норвегилэсь уйпал люкетсэ мозмытӥзы. Румыния но Болгария капитулировать каризы. 5-тӥ куарусёнэ СССР Болгарилы ож ялӥз но нокыӵе пумитъяськонъёстэк солэн музъем вылаз пыриз.

Озьы ик совето войскоос Польшалэн музъем вылаз пыризы. Шундыпуксён Украинаын, Белоруссиын но Литваын соос поляк эмигрант кивалтэтлы пыриськись Крайова Армиен (АК) пумиськизы. Горд Армия вуытозь, АК мозмытэм ёросъёсты чакласа возьыны тыршиз. Нырысь со РККА-ен ӵош операциосы пыриськылӥз, но ӝоген совето властьёс поляк офицеръёсты пытсэталляны но отрядъёсты быдтылыны кутскизы. 21-тӥ пӧсьтолэзе Йӧскалык мозмытонъя просоветской поляк комитет кылдытэмын.

1-тӥ гудырикошконэ АК Варшавской восстание ӝутӥз. Ожгарчиос кык толэзь ӵоже немец войскоосын ожмаськизы, но 2-тӥ коньывуонэ капитулировать каризы. Кужмо пумитъяськемез пумитаса но Варшава дорын оборонае выжыса,1-Тӥ Белорусс фронт юрттэт сётыны ӧз быгаты.

30-тӥ гудырикошконэ Словакиын Йӧскалык восстание ӝутскиз. 8-тӥ куарусёнэ совето войскоос Карпат-Дукельской операциез кутскизы, но шуркынмон кутсконозь восстаниез зӥбизы. 25-тӥ коньывуонэ 1927-тӥ арын вордӥськемъёс пӧлын берпуметӥез ожгар призыв ялэмын вал — 1,16 млн адями.

Коньывуонэ Дебрецен операциез быдэстэм бере, Будапешт операция кутскиз. 1944-тӥ арын 28-тӥ толсуре Венгриын Огдырлыко Кивалтэт кылдытэмын. 1945-тӥ арын 20-тӥ толшоре огдырлы тупан юнматэмын. Будапешт быдэсак 1945-тӥ арын 13-тӥ тулыспалэ гинэ сётӥськиз.

1945-тӥ арын тол-тулыс кампания

Рейхстаг йылын Вормон Знамя (туспуктэмез Халдейлэн)

Восточно-прусской операция (1945-тӥ арын 13-тӥ толшорысен 25-тӥ оштолэзёзь )

1945-тӥ арын толшоре совето войскоос выльысь шундыпуксён пала азланьскизы. Кутскиз Восточно-Прусской операция.Солэн валтӥсь ужпумез— тушмонлэсь Млава палась группировказэ пазьгон но Восточной Пруссиын ожмаськись «Центр» группалэсь мукет армиосын огазеяськонзэ ӵогон. Совето войскоос ожъёсын Шундыӝужан Пруссилэсь оглюкетсэ басьтӥзы, Уйпал Польшалэсь интывылзэ мозмытӥзы но, тушмонлэсь шундыпуксён но лымшор-шундыпуксён палась восточно-прусской группировказэ борӟазы, озьы азьланяз сое пазьгонлы луонлыкъёс кылдытӥзы (млавско-Эльбингской операция). 3-тӥ Белорусс фронтлэн войскоосыз (командующийёсыз: И.Т. Черняховский, 18-тӥ тулыспалэ быремез бере—А. М. Василевский) немец войскоослэн тильзит-инстербург группировказылы пумит наступательной операция кутскизы. 130 иськемозь азьлане мыныса, тушмонлэсь валтӥсь кужымзэ пазьгизы, 2-тӥ Белорусс фронтэн огазеяськыса, (командующиез К.К. Рокоссовский) Восточно-Прусской операциез йылпумъяны луонлыкъёс кылдытӥзы (учке: Инстербургско-Кёнигсбергской операция).

12-тӥ толшоре Польшаын Висло-Одерской операция кутскиз. Со улсын, 1-тӥ Белорусс (командующиез— Г.К. Жуков) но 1- тӥ Украин (командующиез-И. С. Конев) фронтъёслэн войскооссы 3-тӥ пӧсьтолэззёзь Польшалэсь шундыпуксён палзэ немец войскоослэсь мозмытӥзы но Одерлэн бурпал ярдураз Кюстринской плацдармез киултӥзы.

Совето солдатъёс Будапештлэн ульчаосаз (Венгрия), 1945-тӥ арын 1-тӥ толшоре

Лымшор Польшаын но Чехословакиын 4-тӥ Украин фронтлэн войскоосыз Шундыпуксёнпал Карпатъёслэсь бадӟым люкетсэ ортчизы, 18-тӥ тулыспалозь Висла шурлэн вылӥ бызён котыраз потӥзы. Солы луыса, 1-тӥ Украин фронтлы Силезия пала азьланьскыны юрттӥзы.

10-тӥ южтолэзе совето войскоос Чехословакиын Моравско-Остравской наступательной операциез кутскизы. Та дырозь Куинетӥ рейх кие кылем одӥг гинэ угольной бассейнэз утьыны турттыса, 1945-тӥ арын оштолэзе вермахтлэн командованиез фронтлэн та люкетаз ватсаса кужымъёссэ келяз. Острава карез совето войскоос 30-тӥ оштолэзе гинэ басьтыны быгатӥзы.

Балатон ты котырысь лек наступлениез палэнтэм бере, 16-тӥ южтолэзе, Вена карез киултон вылысь, Венской наступательной операция кутскиз. Вена пала мыныкузы СС-лэсь 6-тӥ танковой армизэ пазьгизы. Оштолэзьлэн кутсконаз совето войскоос Чехословакилэн музъем вылаз лек ожъёсын шундыпуксён пала азьланьскизы. 7-тӥ куартолэзе Вена доры матэктыса, немецъёслэн ӟырдыт пумитъяськонзы шоры ӝимизы. Венаез секыт ожъёсын 13-тӥ оштолэзе гинэ киултыны быгатӥзы.

10-тӥ тулыспалысен 4-тӥ оштолэзёзь 1-тӥ но 2-тӥ Белорусс фронтъёслэн войскоосынызы «Висла» (командующий Г.Гиммлер) армиослэн группазылы пумит азинлыко ортчытэмын Восточно-Померанской операция. Солы луыса, Кюстринской плацдарм палась немецлэн шуккет сётонэз палэнтэмын вал.

Союзникъёслэн Эльбаын пумиськонзы. 2-тӥ лейтенант У. Робертсон но лейтенант А. С. Сильвашко «Восток встречается с Западом» гожтэм азьын

Со вакытэ ик Шундыӝужан Прусиын Кёнигсберг понна ожмаськонъёс кутскизы (Кёнигсбергской операция ) Совето войскоос иськем бӧрсьы иськем бызьыса, урам ожъёсы пыриськизы. Со операци улсын немецлэн восточнопрусской группировкаысьтыз валтӥсь кужымъёс пазьгемын вал. Уйпалан чигнам «Север» армиослэн группазылэн оглюкетэз Курляндской котельын котретэ басьтэмын вал, озьы ке но, Германия капитулировать карытозь ик пумитъяскыса улӥз.

1945-тӥ арын южтолэзёзь 1-тӥ Белорусс но 1-тӥ Украин фронтъёслэн войскооссы Одер но Нейсе шуръёс дуре потӥзы. Кюстринской плацдарм дорысен Берлинозь вакчи сюресъя 60 иськем кылиз. Оштолэзьлэн шорозяз американ но британ войскоослэн азьмынӥсь войскооссы, немец войскоослэсь рурской группировказэс быдтыса, Эльба доры потӥзы. Германилэсь тужгес кулэ луись сырьё поттон ёросъёссэ киултэмен, Германиылэн промышленной производствоез куашказ, 1944-тӥ—1945-тӥ аръёсы берыктонтэм ыштонъёсыныз сэрен, войскоосыз кылэсмизы. Озьы ке но, Германилэн ожтӥрлыко кужымъёсыз юн возиськизы. Горд Армилэн Генштабезлэн разведуправлениезлэн ивортэмезъя, оштолэзьлэн шорозяз 223 дивизия но бригада лыдъяське на вал.

1945-тӥ арын 16-тӥ оштолэзе совето войскоослэн Берлинской наступательной операцизы кутскиз. 25-тӥ оштолэзёзь 1-тӥ Белорусс (командующиез Г.К. Жуков) но 1-тӥ Украин (командующиез И. С. Конев) фронтъёслэн войскооссы Берлинэз быдэсак котыртӥзы. 1945-тӥ арын 25-тӥ оштолэзе совето войскоос Эльба шур дурын нырысьсэ пумиськизы Шундыпуксён палась вуись американ войскоосын. 30-тӥ оштолэзе быдэсак котыртэм Берлинын Германилэн фюререз Адольф Гитлер ассэ быдтӥз.

1945-тӥ арын 2-тӥ куартолэзе Берлинлэн гарнизонэз капитулировать кариз. 1-тӥ куартолэзе выжон уе 150-тӥ стрелковой дивизиысь боецъёс Алексей Берест, Михаил Егоров но Мелитон Кантария рейхстаг вадьсы Вормон Знамя юнматӥзы.

1945-тӥ арын 15-тӥ оштолэзе 3-тӥ Украин фронт Грак-Амштеттенской наступательной операциез кутскиз, 8-тӥ куартолэзе совето войскоос Австрие шундыпуксён паласен пырем американецъёсын пумиськизы.

Берлинэз басьтэм бере совето войскоос Пражской операциез ортчытӥзы —Быдӟым ожысь берпуметӥзэ стратегической операциез. 6-тӥ куартолэзьысен 11-тӥ куартолэзёзь совето войскоос немец армилэсь "Центр" группазэ пазьгизы, 800 сюрс пала немец солдатъёсты но офицеръёсты пленэ басьтӥзы.

9-тӥ куартолэзе Даниысь Борнхольм шормуӵе совето десант лэзькиз, отысь немец войско пумитъяськытэк сётӥськиз, 10-тӥ куартолэзе Курляндской котельысь немец группировка но капитулировать кариз.

Ялтаын ортчем конференция

1945-тӥ арын 4-тӥ тулыспалысен 11-тӥ тулыспалозь  Ялтаын Сталинлэн, Черчилльлэн но Рузвельтлэн пумиськонзы ортчиз, со конференциын ож бере кылдэм политикалэн валтӥсь принципъёсыз эскериськизы.

Ожлэн йылпумъяськемез

Генерал-фельдмаршал Вильгельм Кейтель 5-тӥ ударной армилэн штабаз герман вермахтлэн пумитъяськытэк сётӥськемез сярысь акт гожтэ. Карлсхорст, Берлин

Европаын ож Германиысь ожтӥрлыко кужымъёсызлэн 8-тӥ куартолэзе 22 час 43 минутэ (центрально-европейской дыръя, 9-тӥ куартолэзе 0 час 43 минутэ муско дыръя) пумитъяськытэк сётӥськеменыз йылпумъяськиз. Ожмаськон 1 сюрс 418 нунал кыстӥськиз. Озьы ке но, капитуляци сярысь акт гожтэмез бере, Совето Союз Германиен тупанкыл ӧз гожты, формально Германиен ож кусыпъёсын ик кылиз. Германиен ож формально йылпумъяськиз 1955-тӥ арын 25-тӥ толшоре, СССР-ысь Вылӥ Кенешлэн Президиумезлэн «Совето Союз но Германия куспын ожмаськонэз дугдытон сярысь» косэт гожтэмен.

24-тӥ инвожое Мускоын Вормон парад ортчиз. 1945-тӥ арын пӧсьтолэзьысен гудырикошконозь ортчем Потсдамской конференциын СССР-лэн, Великобританилэн но США-лэн кивалтӥсьёсыз куспын Европалэн ож бере кылдэм югдурен герӟаськем ужпумъёс эскеремын вал.

Ожъёс, операциос (тужгес бадӟымъёсыз)

• Заполярьеез ожутён (1941-тӥ ар 29-тӥ инвожо — 1944-тӥ ар 1-тӥ шуркынмон)
• Москва понна ожмаськон (1941-тӥ ар 30-тӥ куарусён — 1942-тӥ ар 20-тӥ оштолэзь)
• Ленинградэз котретын возён (1941-тӥ ар 8-тӥ куарусён — 1944-тӥ ар 27-тӥ толшор)
• Ржев ожмаськон (1942-тӥ ар 8-тӥ толшор — 1943-тӥ ар 31-тӥ южтолэзь)
• Сталинград ож(1942-тӥ ар 17-тӥ пӧсьтолэзь — 1943-тӥ ар 2-тӥ тулыспал)
• Кавказ понна ожмаськон (1942-тӥ ар 25-тӥ пӧсьтолэзь — 1943-тӥ ар 9-тӥ коньывуон)
• Курск ожмаськон (1943-тӥ арын 5-тӥ пӧсьтолэзьысен 23-тӥ гудырикошконозь)
• Украина понна ожмаськон (1943-тӥ ар 24-тӥ толсур — 1944-тӥ ар 17-тӥ оштолэзь)
• Белорусс операция (1944-тӥ арын 23-тӥ инвожоысен 29-тӥ гудырикошконозь)
• Прибалтийской операция (1944-тӥ арын 14-тӥ куарусёнысен 24-тӥ шуркынмонозь)
• Будапешт операция (1944-тӥ ар 29-тӥ коньывуон — 1945-тӥ ар 13-тӥ тулыспал)
• Висло-Одерской операция (1945-тӥ арын 12-тӥ толшорысен 3-тӥ тулыспалозь)
• Восточно-Прусской операция (1945-тӥ арын 13-тӥ толшорысен 25-тӥ оштолэзёзь)
• Берлин понна ожмаськон (1945-тӥ арын 16-тӥ оштолэзьысен 8-тӥ куартолэзёзь)

Быдӟым Атыкай ожлэн йылпумъянъёсыз

Совето маркаен военно-пропагандистской почтовой карточка, 1941-тӥ ар толсур. Открытка вылын лымыен согем шайвыл, немец каскаосын киросъёс возьматэмын. Вылаз: «Lebensraum im Osten» («Шундыӝужан палась улон инты» шуыса гожтэмын)

Россиысь но шундыпуксён палась историкъёслэн Кыкетӥ дунневыл ожын СССР-лэн интыез сярысь пӧртэм дунъетъёс, ваньмыз сямен, Быдӟым Атыкай ожын Совето Союзлэн быдэсак военно-политической, экономической но идеологической вормонэныз йылпумъяськиз шуыса, огкылысь луо. Войналэн валтӥсь ужпумез — нацистской Германиез пазьгон но оккупировать карем интыосты но Европаысь кунъёсты нацизмлэсь мозмытон быдэстэмын вал.

СССР-лэн, Шундыӝужан Европаысь кунъёслэн но Германилэн немец войскоослэсь мозмытэм интывылъёсаз СССР тупаса улонэз радъянъя паськыт ужрадъёс ортчытъяз: калыклэсь сиён-юонэн вузпӧрзэ выльдон, производственной кужымъёсты выльдон, лушкем ужась немец но пӧртэм националистической огазеяськонъёсын, мародерствоен, пӧртэм уголовной йыружъёсын жалятэк нюръяськон.

Совето Союзлэн интывыл воштӥськонъёсыз

1944-тӥ арын коньывуонэ Тува Калык Республикаын ортчытэм референдумлэн йылпумъянъёсызъя, со ас мылкыд каремезъя РСФСР-лэн пушпӧлаз Тува автономи область чотын пыриз (1961-тӥ арын Тува АССР-лы пӧрмытэмын).

1944-тӥ арын куарусёнэ Финляндиен перемирие гожтэмын, со условиосъя СССР-лэн пушпӧлаз пыртэмын Петсамо ёрос (Мурманск улосысь Печенга ёрос), озьы Совето Союзлэн Норвегиен огъя кунгожез кылдӥз.

Союзникъёсын тупанкылъёс Прибалтика, Западной Украина но Западной Белоруссия, Бессарабия, Северной Буковина улосвылъёсын Быдӟым Атыкай ож азьын СССР борды огазеям кунъёсын СССР-лэсь эрикрадъёссэ юнматӥзы.

1945-тӥ арын Потсдамской конференцилэн решениезъя немец провинцилэн уйпал люкетэз Восточной Пруссия, аслаз шоркареныз Кёнигсберген ӵош, СССР-лы сётэмын (РСФСР-ысь Калининград улос луиз). Клайпеда Литва ССР-ен огазеяськиз.

1945-тӥ арын инвожое СССР-лы Подкарпатской Русез сётон сярысь Чехословакиен огкыл гожтэмын (Украин ССР-лэн Закарпатской улосэз луиз).

Калыклэн быремез

Совето солдат анайзэ ыштэм нылпиез сюдэ. 1943-тӥ ар 1-тӥ коньывуон

1993-тӥ арын официально шараям версияя, СССР-лэн берыктонтэм луись ыштонъёсыз 11 444 100 мурт: кулэм ожгарчиос — 8 668 400 мурт (6 818 300 мурт ожъёсын, госпитальёсын но мукет учыръёсын быремын, 1 850 100 мурт пленысь ӧвӧл берытскемын), оккупировать крем интыосын огшоры калык пӧлын — 13 684 700 мурт (соос пӧлын: кужмысь быдтэмын — 7 420 400 мурт, Германиын секыт ужъёсын быремын— 2 164 300 мурт, сютэк улыса, висьыса— 4 100 000 мурт).

Та лыдметэ каръёсын но гуртъёсын ожъёс мыныку но блокадае шедем улон интыосын огшоры бырем калык ӧвӧл пыртэмын. Ленинградэз котыртэмын возён дыре 658 сюрс мурт быриз. Сталинградэз пушкытъяку — 40 сюрслэсь трос. Дасо сюрсъёсын быремын Севастополез, Одессаез, Керчез, Новороссийскез, Смоленскез, Тулаез, Харьковез, Минскез но Мурманскез пушкытъяку. Гитлерлэн Сютэм улон планэзъя киултэм улон интыосысь ог 30 млн адямиез быдтыны чакламын вал, тужгес но бадӟым каръёсысь.

2015-тӥ арын Росси Федерациысь Обороная министерство таӵе лыдпусъёсты шараяз: берыктыны луонтэм ыштонъёс — 12 млн пала, СССР-ысь бырем калыклэн огъя лыдыз— ожгарчиос но огшоры калык — 26,6 млн мурт. СССР-ын улӥсь калыклэн лыдыз (ӧжыт вордӥськемез лыдэ басьтыса) 42 млн муртлы кулэсмиз.

Росси Федерациысь Ожтӥрлыко кужымъёслэн дунъет сётонъя комиссилэн тодэтъёсызъя вермахтлэн, СС войскоослэн но Германиысь мукет ожгарчиослэн берыктыны луонтэм ыштонъёсыз 7 181 100 мурт. Германилэн союзникъёсызлэн берыктонтэм ыштонъёсыз 1 468 145 мурт. Бырем ожгарчиослэн лыдзы 4 270 700 но 806 000 мурт огшоры калык. Германилэн, Венгрилэн, Италилэн, Румынилэн, Финляндилэн но Словакилэн демографи ласянь огъя ыштонъёсыз 11,9 млн мурт.

СССР-ысь Ожтӥрлыко кужымъёслэн но Осе пырись кунъёслэн Шундыӝужанпал фронтын берыктыны луонтэм ыштонъёсыз — 11 444 100 ожгарчи но 8 649 200 мурт огшоры калык. Нюръяськись кужымъёслэн берыктоннтэм ыштонъёссылэн кусыпъёссы 1,3:1пала. Берыктыны луонтэм ыштонъёс пӧлы пыртэмын пленысь берытскымтэ ожгарчиос: ож аръёсы огмында военно пленнойёс пӧлысь (4 559 000 совето солдатъёс но 4 376 300 немец солдатъёс) совето пленысь ас шаеразы 90,4 %-эз яке 3 956 300 солдат, немец пленысь — 45,2 %-эз яке 2 059 000 солдат берытскиз.

Ваньбурез ыштон

СССР-лэн йӧскалык ваньбуретэз пӧлысь одӥг куиньмосэз быдтэмын вал. Ожъёсын 1710 совето кар, 70 сюрслэсь трос гуртъёс но улон интыос, 32 сюрс пала заводъёс но фабрикаос, 84 сюрс школа но мукет дышетсконниос, 65 сюрс иськем чугун сюресъёс, 16 сюрс пала паровоз но 428 сюрс вагон быдтэмын; 36,8 млн га гырон-кизён бусыос, 267 сюрс пала гурт техника , дасо миллион йыр гурт пудо но тылобурдо быдтэмын.

Со сяна киултэм интыосын берыктыны луонтэм ыштэмын лулчеберет синпелетъёс. 1 млн 177 сюрс синпелет куашкатэмын яке Германие поттэмын, соос пӧлын: 427 музей таркамын; 1670 черк, 44 сюрс культура дворец но лыдӟиськони куашкатэмын; 564 сюрс пала чеберлыко призведени ыштэмын. Тужгес вӧлмемез нацистъёсын талан учыр — янтарной комната, 1941-тӥ арын коньывуонэ со Царской Селоысь Екатериниской дворецысь быдэсак поттыса, Германие нуэмын вал.

Мозмытон понна ожмаськон

Быдӟым Атыкай ож — со мозмытон ож луэ шуыса, таӵе тодметъёс возьмато:

• Совето калык быдэс дуннеын кышкытлык кылдытӥсь герман нацизмез быдтонын бадӟым инты басьтӥз;
• Совето калык аслэсьтыз асэриклыко азинсконзэ утиз;
• Горд Армилэн СССР-лэн сьӧраз ожмаськемез Европаысь кунъёсты фашизмлэсь но миллион пала калыкез быронлэсь утиз ;
• Вормонлэн йылпумыз — Ялтинско-Потсдамской системаез но Огазеям Нациослэсь Огазеяськонзэс кылдытон. Со дуннеез ожмаськонлэсь мозмытонлэн но мукет калыкъёсын ваче кусыпъёсты тупатонлэн тодметэз.

Ож кутскем бере ик солэн валтӥсь ужпумез - со калыкез фашизмлэсь мозмытон вал. Сталинлэн 1941-тӥ арын 3-тӥ пӧсьтолэзе радио пыр вераськоназ таьы шуэмын:

Огъя калыклэн фашистъёслы пумит Атыкай ожын валтӥсь ужпумез - со асьме кунысь гинэ ӧвӧл, быдэс Европаысь фашизмен пачкатэм калыклы юрттон. Та мозмытон ожын асьмеос огнамы ум луэ. <…> Асьме кунлэн эрикез понна ожмаськон Европаысь но Америкаысь калыклэн асэрикез понна нюръяськонэн валчеяськоз. Со Гитлерлэн фашист армиосызлы пумит асэриклык понна нюръяськись огъя фронтлы пӧрмоз.

Берло со ужпум сярысь Обороная кун комитетлэн пуктэтъёсаз но Вылӥ главнокомандующийлэн директиваосаз но косэтъёсаз рос-прос гожъямын вал.

Дуннеез нацизмлэсь мозмытон XX даурлэн валтӥсь военно-политической ужпкмез луиз. Нюрнбергской трибунал 19 муртэз военной йыруж лэсьтэмен янгыш кариз (соос пӧлысь 12-ез виыса быдтонлы пумкылъямын, 3-ез кулытозяз пытсэтанлы).

СССР но антигитлеровской коалиция

1941-тӥ арын 22-тӥ инвожое Великобританилэн премьер-министрез Уинстон Черчилль ивортӥз:

Росси понна кылдэм кышкытлык, — со асьмеос но США понна кылдэм кышкытлык. Со ас шаерез но юртэз понна ожмаськись котькуд ӟуч адямилэн сямен ик асьмелэн но, быдэс дуннеысь котькуд эрико муртлэн ужез…

12-тӥ пӧсьтолэзе СССР Великобританиен валче Германилы пумит ожмаськон сярысь тупанкыл гожтӥз. 18-тӥ пӧсьтолэзе Чехословакилэн эмигрировать карем кивалтэтэныз со выллем тупанкыл гожтэмын. 30-тӥ пӧсьтолэзе —Польшалэн эмигрировать карем кивалтэтэныз (Соглашение Сикорского-Майского). 14-тӥ гудырикошконэ СССР-ын совето пленэ шедем поляк гражданъёслэсь арми кылдытон сярысь поляк эмигрант кивалтэтэн тупанкыл гожтэмын. (12-тӥ гудырикошконэ ик соосты амнистировать карон сярысь косэт гожтэмын).

«Ӟуч. Со адями — тынад эшед. Со эрик понна ожмаське», США-лэн плакатэз, 1942

1941-тӥ арын 24-тӥ куарусёнэ СССР Атлантической хартиен огазеяськиз. 29-тӥ куарусёнысен 1-тӥ коньывуонозь Мускоын СССР-лэн, США-лэн но Великобританилэн огмуртъёсызлэн кенешозы ортчиз. Со пумиськон взаимной поставкаос сярысь протокол гожтонэн йылпумъяськиз. СССР-е Британиысь военной вузъёсын нырысетӥез партиясолэсь азьпал ик вуиз , 1941-тӥ арын 31-тӥ гудырикошконэ, Архангельске. Военной грузъёсын лымшор маршрутэз радъян понна, 1941-тӥ арын гудырикошкон толэзе Иранэ совето но британ войскоос пыртэмын вал.

Великобританилэн Королевской Военно-воздушной кужымъёсызлэн 151-тӥ истребительной авиакрылоез 1941-тӥ арын куарусёнлэн кутсконаз Мурманск дорысь Ваенгае вуиз но коньывуон толэзьлэн шорозяз, британ истребительёсты СССР-лы сётытозь боевой лобанъёсы потаз.

«Ми ноку ӧм малпаллялэ, Шундыӝужан фронтын Гитлер армиез вормонын милям ленд-лизъя радъям юрттэтмы валтӥсез луоз шуыса. Со вормон ӟуч армилэн героизменыз но кисьтэм вирыныз быдэстэмын»

— Гарри Гопкинс, президентлэн Ф. Рузвельтлэн советникез но оскем муртэз.

Кун секретарь Э. Стеттиниус пусйылӥз: «Та юрттэт понна ӟуч калык дунзэ берыктӥз ини. Солэн дуныз долларен но, тоннаосын но уг мертаськы. Со миллион пала быдтэм яке пленэ басьтэм нацист ожгарчиос, ож лудысь чигнась герман армиен кельтэм но куштэм кортлы пӧрмытэм нацист танкъёс, пушкаос но грузовикъёс».

Ленд-лиз амалэн радъям юрттэтлэн быдӟалаез: 1941-тӥ арын сӥзьылысен толалтэозь — ож вакытэ СССР-е келям огъя поставкаослэн 0,5 %-эз, 1941-тӥ—1942-тӥ аръёсы — 7 %-эз, тужгес трос 1944-тӥ—1945-тӥ аръёсы

Америкаысь официальной тодэтъёсъя, 1945-тӥ арын куарусён пумозь ленд-лиз амалэн США-ысь СССР-е ваем вузъёслэн огъя лыдзы: 14 795 самолёт, 7056 танк, 8218 зенитной ожтӥрлык, 131 600 пулемёт; Великобританиысь (1944-тӥ арын 30-тӥ оштолэзёзь) — 3384 самолёт но 4292 танк; Канадаысь — 1188 танк. Ожтӥрлык сяна, США-ысь ленд-лиз амалэн ваемын: автомобильёс, тракторъёс, мотоциклъёс, ву вылтӥ уясь судноос, локомотивъёс, вагонъёс, сиён-юон но мукет вузъёс. Озьы ке но, транспорт конвойёслэн оглюкетэз герман военно-морской флотэн быдтэмын вал (кригсмарине).

Шӧдскымон юрттэт СССР-лы сётӥз Монголия. Со 500 сюрс пала вал вайиз (быдэс Горд Армиысь валъёслэн огъя лыдзылэсь 20 %-эз), 30 сюрсэз огшоры калыклы келямын вал. Озьы ик Монголиысь трос сӥль (500 сюрс т), ыжгон, вакчи шубаос но мукет вузъёс ваемын.

1944-тӥ арын инвожоысен куарусёнозь Германиысь объектъёсты пушкытонъя (Англия — Италия — Полтава треуголникъя) совето-американской операция быдэстэмын вал.

Валэктонъёс

Комментарийёс

Литература

Чӧлсконъёс

• Бобров, М. М. Моё участие в Великой Отечественной войне: встреча с почетным гражданином Санкт-Петербурга М. М. Бобровым, 4 мая 2017 г.: [видеолекция] / Президентская библиотека, [Научно-образовательный отдел]. — Электронные данные (1 видеофайл). -Санкт-Петербург: Президентская библиотека, 2017.
• Дьяконова, Т. И. Народное ополчение в Великой Отечественной войне 1941—1945 гг. : [фрагменты кинохроники / реж. монтажа Т. И. Дьяконова]. — Электрон. дан. (1 видеофайл). — Санкт-Петербург: Президентская библиотека им. Б. Н. Ельцина, 2010.