Муско

Кар, Россия Федерациысь субъект
Муско
Флаг[d] Герб[d]
55°45′06″ с. ш. 37°37′04″ в. д.
Кун	Россия Россия
Тӧро	Сергей Семёнович Собянин[d]
Историез но географиез
Кылдытэмын	неизвестно
Быдӟалаез	2511 км²
Шор интылэн ӝуждалаез	156
Куазь	Умеренно-континентальный климат[d]
Часовой пояс	MSD, UTC+3:00[d] и Европа/Москва[d]
Улӥсез
Улӥсез	▲13 300 000 чел. (2025)
Улӥсь калыклэн ӵемлыкез	4823 адями/км²
Агломерация	15 512 000
Официальной кылъёс	Ӟуч кыл
Лыдпус тодметъёс
Телефон код	495, 499
101001–135999
Автомобиль код	77, 97, 99, 177, 197, 199, 777 и 799
mos.ru
Муско
Медиафайлъёс РувикиМедиа пушкын

Муско

Муско (ӟуч Москва) — Россилэн шоркарез, Россиысь бадӟым кар, Росси Федерациысь асмос.

Муско интыяськемын Ока но Волга шуръёс вискын — Смоленско-Московской выр музъемлэн, озьы ик Москворецко-Окской улыг музъемлэн огазеяськон интыязы. Карлэн площадез — 1 сюрс 91 квадрат иськем, со пӧлысь бадӟым люкетэз усе МКАДэ. Москва интыяськемын Москва шурлэн кыкпал ярдураз. Та шур сяна, картӥ бызё таӵе шуръёс: Сходня, Химка, Пресня, Неглинная, Яуза, Нищенка, Сетунь, Котловка, Городня. Тросэз та шуръёс бызё кар пушкытӥ — коркаос ултӥ мынӥсь гумыос кузя. Россиысь городъёс пӧлын Москва тужгес но узыр луэ нюлэсэн но будосъёсын. Отын утемын Измайлово, Тимирязев, Битца паркъёс, озьы ик Нескучный но Ботанической садъёс.

Россия понна Муско — номырин мертантэм инты: отын политикалэн но, культуралэн но, тодослэн, ужбергатонлэн но шорсюлмыз.

Улӥсьёслэн лыдзы — ог 10 миллион 382 сюрс 800 адями (2002). Муско висъямын 9 округъёслы. Шор округ интыяськемын городлэн вашкала люкетаз. Мукетъёсыз 8 округъёс Москвалэн котырын, МКАД котырын но со сьӧрын. Уйпал но шундыпуксёнпал округе пыро таӵе ёросъёс — Куркино, Митино; Уйпал но шундыӝужанпал округе — кар типъем Северный посёлок, Шундыӝужанпал округе — Выхино, Жулебино; Лымшор но шундыпуксёнпал округе — Уйпал но Лымшор округе — Бутово. Со сяна, Москва карэ чотэ пыро солэн котыраз интыяськем Зеленоград, Внуково, Толстопальцево, Рублёво, Некрасовка, Люберцы, Одинцово, Видное, Долгопрудный, Мытищи, Королёв, Балашиха, Реутов, Химки каръёс.

Муско карлэн тӧроез — мэр. Кат кылдытъянэн выре Карысь Дума. Отчы пыре 35 депутат, соосты быръё 4 арлы.

Мускоын ог сю театр. 94 пала вылӥ дышетсконниос (29-эз университетъёс), 1 сюрс 433 школаос, 147 училищеос но техникумъёс, 1 сюрс 820 нылпи садъёс. Мускоын ужало осконъя 807 пала огазеяськонъёс. 138 посольство, 35 сюрс кунгожсьӧр предприяти.

Тодос

Муско — Россиысь валтӥсь но дуннеысь огез бадӟымез тодос шоринты. Туннэ нуналлы Россилэн шорсюлмаз ядерной энергия, микроэлектроника, космонавтика но мукет ӧнеръёс азинско, кудъёсыз кунмылэсь гинэ ӧвӧл — быдэс дуннеысь наукалэсь азинскон сюрессэ юнмато.

Татын нырысь тодос эскоронъёс кутскизы 1755-тӥ арын, Муско университет усьтӥськем бере. Озьы ик та вакытэ уксёё муртъёслэн мылкыдзыя ужаны кутскизы тодос лабораториос (кылсярысь, Я. В. Брюслэнэз). XIX даурлэн кутсконаз университет бордын кылдылӥзы наукалэн пӧртэм вайёсызъя сообществоос: вашкала историяя (1804), эмъянъя но физикая (1804), инкуазез эскерись сообщество (1805), кылэз эскеронъя (1811) но мукетъёсыз. XIX даурлэн шораз тодосъя эскоронъёс радъяськылӥзы ни мукет университетъёс бордын но.

Мусколэсь шоркар статуссэ берыктэмзы бере 1918-тӥ арысен выль тодос ӧръёс азинскыны кутскизы. Кылдӥз Центральной аэрогидродинамикая институт (ЦАГИ, 1918), Л. Я. Карпов нимо химия институт (1921), Электротехникая институт (1921) но мукетъёсыз. Ленинградын но Мускоын кутско ужаны пӧртэм академи институтъёс. 1929-тӥ арын ужаны кутске В. И. Ленин нимо гурт удысъя тодос академия. 1934-тӥ арын Ленинградысь Муское выжто СССР-ысь наукая академиез. 1940-тӥ арын кылдытэмын СССР-ысь Медициная академия, РСФСР-ысь педагогика наукосъя академия.

Мускоысь тужгес тодмо тодос ужъюртъёс: физикая, кристаллографияя, радиотехникая но электроникая, химия, органика химия, химико- физикая, биохимия инсьӧр эскеронъёсъя, археология, но мукет.

Тужгес тодмо тодос-эскерон институтъёс: Атом энергия Курчатов нимо институт, Теория но экспериментъя физика институт, Аэрогидродинамикая Жуковский нимо институт, Физикая но химия Карпов нимо институт но мукетъёсыз.

Совето вакытэ кылдэм коммунист идеологиез эскерись институтъёс туннэ ассьсэлэсь ужзэс история, экономика, политология но мер тодос ӧръёсын радъяло.

Архитектура

Росси Федерацилэн шорсюлмаз утемын архитектура синпелетъёс. Соос историмылэсь азинскон сюрессэ син азе пуктыны быгатымон возьмато. Тросэз вашкала юртъёс ЮНЕСКО огазеяськонэн утисько, соос пӧлын: Мускоысь Кремль, Горд площадь, Коломенскоеын Вознесение черк, монастыръёс (Андроников, Донской, Новодевичьей), усадьбаос (Кусково, Останкино, Царицыно, Кузьминки), Пашковлэн юртэз, Бадӟым театр но мукетъёсыз.

XII-XIV дауръёсы пулэсь лэсьтэм юртъёс

Пулэсь лэсьтэм юртъёсты туннэ нунналозь утьыны ӧз луы. Ӵем пуромылӥсь тылӝуос архитектурной синпелетъёсты весяклы быдтӥзы. Озьы ке но, пуэн лэсьтӥськон йылолъёс изэн лэсьтӥськон йылолъёслы азинскыны луонлык сётӥзы. Туннэ нуналлы Боровицкой вырйылын Дьяковской культураысь городищелэн люкетъёсыз кылемын ӧвӧл ке но, туала ӧнерчиосын куд-ог реконструкционной ужъёссы вашкала Мусколэсь вылтуссэ адӟытыны быгато ик.

XIV-XV дауръёсы излэсь лэсьтэм юртъёс

Мускоын излэсь лэсьтэм нырысетӥ юрт Успенской собор луэ (1326). 1367-тӥ арын Дмитрий Донской кивалтон дырья тӧдьы излэсь Кремлез лэсьтыны ӧдъязы. 1485-тӥ арын Иван III Кремльлэсь вылтуссэ но планировказэ воштон уж борды кутӥськиз. Горд кирпичлэсь Кремлен ӵош ӝутӥськизы Благовещенской собор, Грановитой палата, Архангельской собор, кудъёсыз огинын Мускоысь Кремльлэсь аспӧртэмлыко ансамбльзэ кылдыто.

Совето союз дыръя лэсьтӥськон

1930-тӥ аръёсы трос православной юртъёс тӥямын вал. Соос пӧлы пыриз Христослэн Храмез но. 1960-тӥ аръёсы урамъёсты паськытатон ужъёс весяклы ӵушизы Мусколэн вылтусыз вылысь тодмо муртъёслэсь улон коркаоссэс (шуом, Хомяков кылбурчилэсь, Римский-Корскаовлэсь но мукетъёсызлэсь). Ленинградэн ӵошатыса, Мускоын трос исторической юртъёс быдтэмын вал, малы ке шуоно, со вакытысь куронъёсъя, Совето Союзлэн шорсюлмыз совето историен гинэ герӟаськыны кулэ вал.

Туала архитектура

Куд-ог эскерисьёслэн лыдъян-чотанзыя Мускоын 1990-тӥ арысен эшшо ог 700 архитектурной синпелетъёс быдтэмын вал (Москва гостиница, Шуныт вузкарон радъёс, Военторг…). Соос интыын туннэ туала модерн стилен лэсьтэм юртъёс сыло. Нимысьтыз «Лужковский стиль» термин но кылдӥз, татын огазеямын постмодернизм, историзм но эклетика: "Наутилус "вузкарон центр, «Пушкин но Натали» фонтан, «Самсунг» офисной центр но мукетъёсыз.

Культура

Муско — культурая но туризмъя Европаысь но дуннеысь огез бадӟымез центр луэ. Кунооосты паймыто вашкала, совето но туала Россилэсь историзэ возьматӥсь синпелетъёс. Городын туризмез азинтон инфраструтура умой радъямын — трос отельёс но гостиницаос, шутэтскон клубъёс но мукет ваньмон дырез ортчытон интыос.

Театръёс

Мускоын ваньзэ ӧвӧлзэ 121 театр. Тужгес тодмоосыз — Бадӟым театр, Покчи театр, Чехов нимо МХТ, Современник, Ленком, Таганка, Пётр Фоменколэн театрез но мукетъёсыз.

Музейёс

Мускоысь кун университетлэн тыршеменыз усьтэмын вал таӵе музейёс: Политехнической, Исторической, Зоологической, Антропологической, Пушкин нимо суредаськон искусствоя музей, Ботанической, Зоологической сад но мукетъёсыз. Тужгес тодмо луэ Третьяковской галерея, кудӥз кылдытэмын Третьяков меценатлэн уксёеныз. Ужало адӟытон павильонъёс — Суредаськисьлэн шоръюртэз, Манеж но мукетъёсыз.

Мускоын кун музейёсын одӥг радын ужало частной музейёс но.

Кинотеатръёс

Татын уно кинотеатръёс, кудъёсыз пӧртэм форматъёсын адӟытыны быгато. Тросэз кинотеатръёс мультикомплексной луо: учкыны луэ одӥг интыын одӥг дыре пӧртэм кинолентаосты.

Транспорт

• Муско метрополитен
• Домодедово аэропорт
• Шереметьево аэропорт
• Внуково аэропорт
• Казанской железнодорожной вокзал
• Ленинградской железнодорожной вокзал
• Белорусской железнодорожной вокзал
• Курской железнодорожной вокзал
• Киевской железнодорожной вокзал
• Рижской железнодорожной вокзал
• Ярославской железнодорожной вокзал
• Павелецкой железнодорожной вокзал
• Восточной железнодорожной вокзал
• Савёловской железнодорожной вокзал

Валэктонъёс