Гурт удысын тыршисьёслэн но сиён-юон поттӥсьёслэн нуналзы

Гурт удысын тыршисьёслэн но сиён-юон поттӥсьёслэн нуналзы
Типез	Ӧнер праздник
Мукет сямен	Гурт удысын тыршисьёслэн нуналзы
Юнматэмын	Росси Федерацилэн президентэныз
Пусъё	Россия Россия
Дырыз	1999-тӥ арын 31-тӥ куартолэзе
Пусъён ужрадъёс	арлы быдэ коньывуонлэн кыкетӥ арнянуналаз
Сям-йылолъёс	гурт удысын ужасьёсты но сиён-юон поттон удысын тыршисьёсты сӥлы карон

Гурт удысын тыршисьёслэн но сиён-юон поттӥсьёслэн нуналзы (ӟуч: День работника сельского хозяйства и перерабатывающей промышленности)— Россиысь гурт удысын но сиён-юон поттон удысын тыршисьёслэн ӧнер нуналзы. Арлы быдэ коньывуонлэн кыкетӥ арнянуналаз пусйиське. 2025-тӥ арын 12-тӥ коньывуонэ тупа.

Историез

Та нуналлэн историез 1966-тӥ арысен кутске. Соку СССР-ысь Вылӥ Кенешлэн Президиумезлэн Косэтэныз быдэс союзысь гурт удысын тыршисьёслэн нуналзы кылдытэмын. Нуналыз меӵак пуктэмын ӧй вал, али сямен ик — коньывуонлэн кыкетӥ арнянуналаз. Со арын ик кылдытэмын Сиён-юон поттон удысын тыршисьёслэн нуналзы, таиз коньывуонлэн куинетӥ арнянуналаз пусйиськылӥз.

1986-тӥ арын та кык праздник нуналъёсты огазеязы но «Гурт удысын но сиён-юон поттон удысын тыршисьёслэн нуналзы» шуыса нимазы. Пусъён нуналыз Президиумлэн Косэтэныз шуркынмонлэн куинетӥ арнянуалаз юнматэмын вал. Белоруссиын но Казахстанын али но со дыре ик пусйиське.

СССР куашкам бере, Росси президентлэн 1999-тӥ арын 31-тӥ куартолэзе кутэм 679 номеро Косэтэзъя, Гурт удысын но сиён-юон поттон удысын тыршисьёслэн нуналзы коньывуон толэзьлэн кыкетӥ арнянуналаз юнматэмын. Со дырысен бысы ужъёсын вырисьёслэн, пудо вордӥсьёслэн, гурт возёсъёсын тыршись ӧнерчиослэн, тодосчи-аграрийёслэн, сиён-юон поттон удысын тыршисьёслэн праздник нуналзы арлы быдэ коньывуонлэн кыкетӥ арнянуналаз пусйиське.

Пусъён ужрадъёс

Та ӧнер нуналэн ӟечкыланы тыршо ваньзэс, кин герӟаськемын та удысэн: фермеръёсты, механизаторъёсты, агроинженеръёсты, профильной экологъёсты, биотехнологъёсты, селекционеръёсты но мукетъёссэ. Тужгес устооссэ данъян грамотаосын но дуно кузьымъёсын данъетало. Ас ӟечкыланъёсынызы но сӥзёнъёсынызы музъем ужасьёслы вазисько вылӥ кивалтӥсьёс но мукет дано адямиос.

Вань улосъёсын сӥё-дано ужрадъёс ортчыло. Кылсярысь, Москваын котькуд ар «Золотая осень» нимо гурт удыслы сӥзем адӟытон радъяське. 2025-тӥ арын со 8-тӥ коньывуонэ усьтӥськиз но 11-тӥ коньывуонозь ужалоз. Та ужрад улсын пӧртэм семинаръёс, котрес ӝӧкъёс но дискуссиос ортчыло.

Праздниклэн нуналыз юнматэмын ке но, куд-ог улосъёсын но улон интыосын удысысь тужгес ӟеч ужасьёсты данъян ужрадъёс вазьгес яке бергес ортчыло, ӵемысь со бусы ужъёсты йылпумъян дырен герӟаськемын луылэ.

Тунсыко лыдпусъёс

Гурт удысъя но сиён-юонъя министрлэн Оксана Лутлэн верамезъя, музъем ужъёсын но пудо вордонын 6,4 млн адями тырше. 2023-тӥ арын басьтэм тодэтъёсъя, быдэс дуннеын улӥсьёс пӧлысь 26%-эз гурт удысын ужа. 1991-тӥ арын — 43%-эз музъем ужен герӟаськемын вылэм. «Авито Работа» сервислэн тодэтъёсызъя, 2025-тӥ арлэн нырысетӥ палараз, гурт удысын ужась ӧнерчиослы кулэяськон, 2024-тӥ арен ӵошатыса, 68%-лы йылӥз. Уждун 22%-лы будӥз.

Валэктонъёс