Граждан авиациын ужасьлэн нуналыз
| Граждан авиациын ужасьлэн нуналыз | |
|---|---|
 | |
| Типез | Ӧнер праздник |
| Дырыз | 9-тӥ тулыспалэ |
| Сям-йылолъёс | сӥё-дано люкаськон ужрадъёс, данъян, конференциос, ветеранъёсын пумиськонъёс, темая адӟытонъёс |
Граждан авиациын ужасьлэн нуналыз (ӟуч: День работника гражданской авиации) — Россиысь граждан авиациын вань ужасьёслэн ӧнер праздниксы. Праздниклэн нуналыз меӵак герӟаськемын Россиысь граждан омыр флотлэн кылдэменыз (1923-тӥ арын 9-тӥ тулыспалэ)[1].
Та ӧнер праздникез 98 номеро указэн юнматӥз 2013-тӥ арын 9-тӥ тулыспалэ Росси Федерациысь Президент В. В. Путин[2][3].
9-тӥ тулыспал нуналэз Россиысь граждан авиациын вань ужасьёс сӥё-дано пусъё, праздникез сӥлы каро лобась но кабинет экипаж яке авиация ужысь мукет ӧръёсын тыршисьёс но[4].
Граждан авиациын ужасьлэн нуналаз 2023-тӥ арын Россиысь граждан авиацилэн кылдэмез дырысен 100 ар тырмонэз пусйизы[5].
Праздниклэн историез
Граждан омыр флотлэн вордӥськем нуналэныз 1923-тӥ арын 9-тӥ тулыспал лыдъямын ке но, пассажиръёсты омыретӥ нуон-ваён кылдӥз ай эксэй Россия вакытэ. Росси империлэн историяз калыкез нырысьсэ омыретӥ вуттӥзы 1910-тӥ арын[6].
Нырысетӥ дунневыл ож йылпумъяськем бере 1920-тӥ аръёсы пассажиръёсты авиацияя нуллон выль сямен азинскиз, кылсярысь, трансграничной рейсъёс кылдӥзы, озьы ик почта келян рейсъёс. Та вакытысь граждан лобанъёслэсь бадӟым люкетсэ нимысьтыз лайнеръёсын быдэстэм интые, выльдэм-тупатэм ожгар самолётъёсты кутылӥзы[7].
СССР-ын нырысетӥ калыккуспо почта но пассажир нуллон ялан рейсъёс усьтӥськизы Муско — Кёнигсберг маршрутъя, лобӟон радъяськиз 1922-тӥ арын 1-тӥ куартолэзе. Кёнигсбергын лобанэз радъялляз Европаысь вашкалаез граждан аэропорт — Девау, Мускоын — Ходынка бусыысь аэродром. Лобанэз быдэстылӥз Дерулюфт компания[8].
Омыр флотлэн вордскем нуналыз
Историез учконо ке, 9-тӥ тулыспал лыдъяське СССР-ысь граждан авиацияя кенеш кылдытон вакытэн. Ӵапак та нуналэ 1923-тӥ арын РСФСР-ысьУжъя но Обороная Кенеш кутӥз «Омыр флотлэн валтӥсь управлениезлы омыр линиосты техникая эскеронэз оскон но Граждан авиацияя кенешез кылдытон сярысь» постановление. 9-тӥ тулыспал Совето Союзысь но отӥяз Россиысь граждан авиацилэн вордӥськем нуналэныз лыдъяське. Граждан авиациын ужасьёслы сӥзем нимаз праздниклэн кылдэмез сӥземын вал Россиысь граждан омыр флотлэн официальной кылдытэмезлы 90 ар тырмонэн[9].
Нырысетӥ маршрут
Граждан авиацияя Кенеш кылдэм бере нырысетӥез маршрут Мускоысь Нижний Новгородэ луиз. Со маршрутэтӥ нырысетӥ лобӟон указ юнматэм бере тулыспалэ ӧз радъяськы — шӧдскымон бергес — 15-тӥ пӧсьтолэзе, ӵапак соку быдэстэмын вал Муско — Нижний Новгород маршрутъя нырысетӥез пассажиръёсты нуллонъя ялан ужась рейс. Соку лобан сезонэн вал, 22-тӥ куарусёнозь гинэ радъяськылӥзы — Нижегородской ярмарка пытсаськытозь, отчы Мускоысен лобазы самолётъёс. Мускоын самолёт Ходынка бусы аэродромысен ӝутскылӥз, Нижний Новгородын пуксьылӥз ярмарка вӧзысь сузям тупась площадкае[10].
Лобон вакыт 2,5-3 час кыстӥськылӥз но 250 метр ӝуждалаын ортчылӥз, трассалэн кузьдалаез 420 иськем вал, куд-ог учыръёсы лобон вакыт 4 часозь кыстӥськыны быгатылӥз. Та маршрутъя нырысетӥ лобӟонэз быдэстӥз «Добролёт» авиакомпаниысь пилот Яков Моисеев. Нырысетӥ рейслэн пассажиръёсыз луизы «Добролётлэн» директорез-распорядителез Александр Краснощёков, «Добролётлэн» правлениезлэн ёзчиез Игнатий Дзевалтовский но авиалинилэн кивалтӥсез Аникин[11].
1932-тӥ арын граждан авиацилэн куншетэз юнматэмын вал, вань персоналлы формаен дӥсь но тодмо пусъёс тупатэмын вал[12].
2023-тӥ арын, нырысетӥ пассажир рейслэн сю аръем юбилей араз, Нижний Новгородын 15-тӥ пӧсьтолэзе авиашоу ортчиз, сое Россиысь граждан авиацилы сю ар тырмонлы но омыретӥ нуллӥсь росси (совето) компаниен быдэстэм нырысетӥезлы официальной луись пассажиръёсты нуон-ваёнлы сӥземын вал. Юбилей авиашоу дыръя Нижний Новгородын «Русь» пилотаж группа концерт адӟытӥз. Со сяна, аэропортын Валерий Чкаловлы но росси авиацилэн историысьтыз нырысетӥ дас аръёсызлы сӥзем экспозиция адӟытэмын вал[13].
Аэрофлотэн герӟет
Граждан авиациын ужасьлэн нуналыз Аэрофлотлэн нуналыныз меӵак герӟаськемын, сое кема дыр ӵоже СССР-ын пусйылӥзы. Праздник 1979-тӥ арын юнматэмын вал, сое тулыспал толэзьлэн котькуд кыкетӥ арнянуналаз пусйылӥзы. Праздник официальной луись инлыксэ 1988-тӥ арозь утиз, отӥяз нимысьтыз указэн Омыр флотлэн нуналыныз огазеямын вал, со граждан, озьы ик ожгар лётчикъёс понна авиацияя огъя праздник вал[14].
2013-тӥ арын гинэ, Россиын граждан авиацилэн официально кылдэмез дырысен 90 аръем юбилей араз, граждан авиациын ужасьёс понна нимысьтыз праздник сямен пусйиськыны кутскиз[2][3].
Валэктонъёс
- ↑ 9 февраля в России отмечаются «День гражданской авиации» и «День Аэрофлота» [ӟуч] aex.ru. Эскеремын 10-02-2026 арын
- ↑ 1 2 Указ Президента РФ № 98 [ӟуч] kremlin.ru. Эскеремын 10-02-2026 арын
- ↑ 1 2 9 февраля — День работника гражданской авиации [ӟуч] centr.favt.ru. Эскеремын 10-02-2026 арын
- ↑ 9 февраля 1923 года Совет Труда и Обороны принял постановление об организации Совета по гражданской авиации при Главвоздухфлоте [ӟуч] Аэропорт Мурманск (11-02-2013). Эскеремын 10-02-2026 арын
- ↑ Торжественный вечер по случаю 100-летия гражданской авиации России [ӟуч] kremlin.ru. Эскеремын 10-02-2026 арын
- ↑ Василий Сычев (24-10-2018) Придут ли на смену Concorde и Ту-144 новые реактивные пассажирские самолеты [ӟуч] nplus1.ru. Эскеремын 10-02-2026 арын
- ↑ День рождения гражданской авиации в России [ӟуч] ria.ru (09-02-2023). Эскеремын 10-02-2026 арын
- ↑ Открыта первая в России международная воздушная линия Москва — Кёнигсберг [ӟуч] Российское информационное агентство Рустим. Эскеремын 10-02-2026 арын
- ↑ Светлана Заверняева (09-02-2021) 9 февраля в России отмечают День гражданской авиации [ӟуч] Парламентская газета. Эскеремын 10-02-2026 арын
- ↑ «Добролёт» приземлился в Нижнем [ӟуч] Крылья Родины. Эскеремын 10-02-2026 арын
- ↑ 99 лет назад был выполнен первый регулярный пассажирский рейс между Москвой и Нижним Новгородом [ӟуч] «Авиация России» (17-07-2022). Эскеремын 10-02-2026 арын
- ↑ В России отмечается День работника гражданской авиации [ӟуч] AviaPages (09-02-2020). Эскеремын 10-02-2026 арын
- ↑ Мария Сорокина (14-07-2023) Фигуры высшего пилотажа и дефиле стюардесс: Что увидят нижегородцы на авиашоу в Нижнем Новгороде [ӟуч] nnov.kp.ru. Эскеремын 10-02-2026 арын
- ↑ 20 августа — День Воздушного флота России [ӟуч] Вольская жизнь (20-08-2023). Эскеремын 10-02-2026 арын
Чӧлсконъёс
- Крылья страны Советов [ӟуч]
