Нылпи садъёсын ужасьёслэн нуналзы

Нылпи садын ужасьёслэн нуналзы
Типез	Совето вакытысь ӧнер нунал
Мукет сямен	ӟуч: Праздник работника дошкольных учреждений, ӟуч: День воспитателя и всех работников дошкольного образования
Валатонэз	Мерлыко огазеяськонъёслэсь но кунлэсь саклыксэс нылпи садъёсын герӟаськем ужпумъёс борды кыскон. Школа азьын нылпиосты дышетон удысын ужасьёсты данъетан но егитъёс пӧлын та ужудысэз вӧлмытон.
Юнматэмын	2003-тӥ арын 27-тӥ куарусёнэ
Кылдытӥсез	Россиысь педагогикая куд-ог изданиос
Пусъё	Россия Россия
Дырыз	27-тӥ куарусёнэ
Герӟаськемын	1863-тӥ арын 27-тӥ куарусёнэ Санкт-Петербургысь Васильевской островын Софья Андреевна Люгебиль карысь нырысетӥзэ нылпи садэз усьтӥз.

Нылпи садъёсын ужасьёслэн нуналзы (ӟуч: Де́нь воспита́теля и все́х дошко́льных рабо́тников) — дышетон удысын ужан ӧнерен герӟаськем совето вакытысь праздник нунал. Россиын пусйиське, 2004-тӥ арысен кутскыса, арлы быдэ 27-тӥ куарусёнэ. Кылдытэмын Россиысь педагогикая куд-ог изданиослэн кичӧлтэмзыя.

Историез

2003-тӥ арын 27-тӥ куарусёнэ «Детский сад со всех сторон» газетлэн но «Дошкольное образование» но «Обруч» журналъёслэн кичӧлтэмзыя «Нылпи садын ужасьёслэсь нуналзэс» кылдытыны дэмламын вал. Дырзэ 27-тӥ куарусёнэ юнматыны ӵектэмын:

• 1863-тӥ арын 27-тӥ куарусёнэ Санкт-Петербургысь Васильевской островын профессор К. Я. Люгебильлэнкузпалыз, немец педагоглэн Фридрих Фрёбельлэн бӧрысьчиез Софья Андреевна Люгебиль карысь нырысетӥзэ нылпи садэз усьтӥз.

2008-тӥ арын 31-тӥ южтолэзе РФ Наукая но дышетонъя министерстволэн «Нылпи садъёсын ужасьёслэсь нуналзэс пусъён сярысь» 03-584 номеро Косэтэзъя, Дышетон удысысь Кун политикая но нормативно-правовой регулирования департаментлэн кивалтӥсез И. М. Реморенко официально юнматэм ӧнер нуналэз умоен лыдъяз.

2016-тӥ арын 18-тӥ оштолэзе РФ Кивалтэтлэн 703-р номеро Распоряжениезъя, РФ Кивалтэтлэн тӧроез Д. А. Медведев «Нылпи садъёсын ужасьёслэсь нуналзэс» Россиысь официально пусйиськись ӧнер нуналъёс пӧлы пыртӥз (шутэтскон нуналэн уг лыдъяськы).

Юнматэм нуналлэн валтӥсь ужпумез — мерлыко огазеяськонъёслэсь но кунлэсь саклыксэс нылпи садъёсын герӟаськем ужпумъёс борды кыскон. Школа азьын нылпиосты дышетон удысын ужасьёсты данъетан но егитъёс пӧлын та ужудысэз вӧлмытон но та удысэ выль ӧнерчиосты кыскон.

Нылпи садын ужасьёслэн нуналзы нырысьсэ пусъемын вал 2004-тӥ арын 27-тӥ куарусёнэ.

Ужрадъёс

Нылпи садын ужасьёслэн нуналазы котьку сямен таӵе ужрадъёс ортчыло:

• Нылпи садъёсын тематической ужрадъёс;
• Школа азьын дышетон удысын ужасьёс куспын кенешонъёс, педагогической советъёс, семинаръёс;
• Ас удысазы ӟеч уженызы висъяськем ӧнерчиосты данъетан.

2004-тӥ арын Санкт-Петербургысь одӥгез газет карысь визнодасьёс понна нимысьтыз ужрад ортчытӥз.

2022-тӥ арын РФ Калыкез дышетонъя министерство арлы быдэ ортчись «СкажиСпасибоПедагогу» акциез радъяз. Со акция улсын мерлыко вотэсъёсын дышетӥсьёслы но визьнодасьёслы сӥзем туспуктэмъёс но кылбуръёсын видеоос поттасько.

2023-тӥ арын Самара улосвылысь Борское черкогуртын «Большая учительская неделя» ужрад улсын, школа азьын нылпиосты дышетон удысысь ӧнерчиос улос конференцие люкаськылӥзы. Озьы ик сӥё-дано церемониын тужгес устооссэ визьнодасьёсты данъетазы, ДЮСШ-ысь джигитовкаен вырись «Борская крепость» группае ветлӥсь нылпиос люкаськемъёс азьын ас быгатонлыкъёссэс возьматӥзы. Отрадный карысь «Россия» культура юртын нылпи садын ужасьёслэн «Всё начинается с детства» нимо улос фестивальзы ортчиз.

2024-тӥ арын Дышетонъя министр но солэн воштӥсез ас удысазы тужгес ӟеч ужасьёсты «РФ нылпиосты но егитъёсты визьнодан удысысь сӥё-дано ужась», «Дано наставник» нимъёсын, «РФ дышетон удысысь отличник» дано гадьпусэн но мукет данъетъёсын пусйизы.

Со арын ик Татарстанысь Кукмор ёросын Туембаш гурт библиотекаын «Нылпи садын ужасьёслэн нуналзы» нимо книгаосын адӟытон радъязы, отчы пӧртэм методической но мукет юрттӥсь литература поттэмын вал.

Озьы ик бадӟым ужрадъёс радъямын вал Вологда улосысь Пожарской Культура юртын, Грозный карысь Лулчеберетъя но устолыкъя элькун центрлэн актовой залаз, Чувашиысь нылпи садъёсын но мукет улон интыосын.

Нылпи садысь визьнодась покчи нылпиосын ӵош

Мерлыко эскерон

2008-тӥ арын Москваысь социологияя колледж но кӧня ке газетъёс Россиысь дас улосвылъёсын мерлыко эскерон ортчытӥзы: нылпи садъёсысь ввизьнодасьёслы таӵе юан сётӥзы: Нылпи садын ужасьёслэсь ӧнер нуналзэс кулэ-а пыртыны календаре? Та праздникез кылдытон понна 81,6 % визьнодасьёс куаразэс сётӥзы. Таӵе юан ик мукет ӧнерчиослы но сётэмын вал, тросэз сое (66,7 %) кулэен лыдъязы.

Визьнодась покчи группаысь нылпиосын занятие ортчытэ

Тунсыко зэмослыкъёс

• «Нылпи сад» валатонэз кылдытӥз немец педагог Фридрих Фрёбель. Солэн теориезъя, визьнодась — со сад будэтӥсь, нош нылпиос — сяськаос но инмарлэн будосъёсыз;
• 1859-тӥ арын Росси империын Гельсингфорсын (Хельсинки) нырысетӥез нылпи сад усьтэмын;
• 1917-тӥ арын 20-тӥ толсуре Школа азьын дышетонъя декларация кутэмын, отын солэн валтӥсь принципъёсыз пусъемын — со ваньмызлы тупамон но дунтэк луыны кулэ;
• 1930-тӥ аръёсы «Дошкольное воспитание» журнал потӥз. Солэн тодэтъёсызъя, со вакытэ нылпи садъёсы 2 млн пала нылпиос ветлӥзы;
• 1959-тӥ арын нырысьсэ кылдытэмын ясельной группаос, отчы кык толэзьем нылпиосты кутылӥзы;
• Росстатлэн тодэтъёсызъя 2025-тӥ арын быдэс кунын 45 сюрслэсь трос нылпи садъёс ужало;
• РФ ГК 575-тӥ номеро статьяезъя дышетон удысын ужась 3000 манетлэсь дуно кузьым басьтыны кулэ ӧвӧл.

Валэктонъёс

Чӧлсконъёс

• Российская академия образования. Виртуальная выставка ко Дню воспитателя и всех дошкольных работников, 2025 год