Удмурт Элькунысь Кузебай Герд нимо йӧскалык музей
РАН экспертиза
Экспертиза РАН
Россиысь Тодосъёсъя Академия
РФ Лулчеберетъя министерство
| Удмурт Элькунысь Кузебай Герд нимо йӧскалык музей | |
|---|---|
 | |
| Кылдытэмын | 1920 |
| Интыяськемын | |
| Адресэз |
 Удмуртия,  Ижкар, Коммунаръёслэн урамзы, 287-тӥ номеро юрт |
| Кивалтӥсез | Волков Александр Фёдорович |
| Сайтэз | nmur.ru |
 |
|
 Медиафайлъёс РувикиМедиа пушкын | |
Удмурт Элькунысь Кузебай Герд нимо йӧскалык музей (ӟуч: Национа́льный музе́й Удму́ртской Респу́блики и́мени Кузеба́я Ге́рда) интыяськемын Ижкарысь Октябрь ёросын Коммунаръёслэн урамазы азьвыл ожтӥрлык поттон заводлэн Арсенал юртаз[1].
Историез
Музей Ижкарысь шаертодонъя музей шуыса кылдытэмын вал 1920-тӥ арын шуркынмон толэзе Ижысь Кар кенешлэн Исполкомезлэн Пуктэтэзъя. Сое кылдытӥз пудо эмъян амбулаториысь эмчи А. М. Филиппов, со ик музейлэн нырысетӥ директорез луиз[2][3].
Музейлэн нимыз трос пол вошъяськылӥз. 1929-тӥ арын со Вотской автономной областьысь Шаертодонъя улос музей шуыса нимаськиз. 1935-тӥ арын — УАССР-ысь Шаертодонъя музей. 1947-тӥ арын — Шаертодонъя Удмурт кун музей. 1995-тӥ арын Удмурт Элькун Кивалтэтлэн 1995-тӥ арын 17-тӥ пӧсьтолэзе кутэм 105-тӥ номеро Пуктэтэзъя Удмурт Элькунысь Йӧскалык музей шуыса нимазы, 2000-тӥ арын 24-тӥ оштолэзе Удмурт Элькун Кивалтэтлэн 427-тӥ номеро Пуктэтэзъя дано удмурт кылбурчилэсь, югдытӥсьлэсь но мер уж быдэсъясьлэсь — Кузебай Гердлэсь нимзэ понӥзы [4].
Нырысь-валысь музейлэн экспозициосыз пӧртэм интыосын возиськизы. 1921-тӥ арын пудо эмъян амбулаториысь национализировать карем немец кирхалэн юртаз выжтӥзы (Советской урам, 9-тӥ номеро юрт). Кылдытэм бере нырысь аръёсаз ик, музеез возён понна уксё висъмтэен, со ужамысь дугдӥз, шуыны луоз. 1922-тӥ — 1923-тӥ аръёсы музейын одӥг мурт гинэ тыршиз — со ик кивалтӥсь но, уйин возьмаськись но вал. 1924-тӥ арын 1-тӥ оштолэзе музеен кивалтыны П. А. Антоновез пуктӥзы. Ар куспын музее 27 329 мурт вуылӥз. 1925-тӥ арын 1-тӥ коньывуонэ музейлэн фондаз 1508 утиськись единица лыдъяськиз [5].
1926-тӥ арын южтолэзе музейлы директоре Кузебай Гердэз юнматӥзы. Со вакытэ Гердэз Москваысь Восточной научно-исследовательской институтлэн аспирантураысьтыз Ижкаре учебной командировкае ыстӥзы. Нош музеен ачиз А. П. Антонов ик кивалтӥз. 1926-тӥ арын куартолэзе музеез куашкан калэ вуэм кирхалэн юртысьтыз Новиков купецлэн азьвыл юртаз выжтӥзы. Берлогес — Ленин урамысь 7-тӥ номеро юртэ.
1926-тӥ — 1929-тӥ аръёсы музеен кивалтӥз М. И. Ильин[2][6][4].
1929-тӥ — 1932-тӥ аръёсы — Г. Ф. Сидоров. 1931-тӥ арын музеез Александро-Невской соборлэн юртаз выжтӥзы, 1932-тӥ арын — Михайловской соборлэн юртаз. Татын ик быдэс кунын нырысьсэ Фуколэн маятникеныз экспозиция кылдытэмын вал. 1933-тӥ — 1934-тӥ аръёсы кивалтӥсе Я. К. Кондратьевез пуктӥзы, 1934-тӥ — 1937-тӥ аръёсы — А. С. Четкарёвез. 1937-тӥ арын музеез Карл Маркс нимо урамысь 23-тӥ номеро юртэ выжтӥзы. 1937-тӥ — 1939-тӥ аръёсы музейлэн директорез вал Н. Г. Тимофеев. 1939-тӥ арын куартолэзе М. Е. Воронцовез пуктӥзы[2][4][7].
Быдӟым Атыкай ож кутскон азьын, 1939-тӥ арын музей экспонатъёсты Сарапулэ нуизы, Ижкаре пичияк ёзэтсэ гинэ— И. Д. Пастуховлэсь музей-юртсэ кельтӥзы. 1947-тӥ арын коллекциосты выльысь Ижкаре берентӥзы но З. О. Лятушевичлэн азьвыл юртаз интыязы. 1970-тӥ арысен али дырозь музей Ижысь пыӵал тӥрлык поттон заводлэн Арсенал юртаз интыяське. 1987-тӥ — 1994-тӥ аръёсы, юртэз тупатъян-выльдон ужъёс нуиськон вакытэ, музей огдырлы Удмуртской урамысь214-тӥ юртэ интыяськылӥз[4][2][8].
Туала тусыз
Музейын али дыре пӧртэм коллекциосын 200 сюрс экспонат лыдъяське: пыӵал тӥрлык (вандӥсь-бышкись но ыбылӥсь), письменной источникъёс но туспуктэмъёс, историяя, археологияя но этнографияя синпелетъёс — йӧскалык дӥськут, крестьян корка котыръёс но мукет. Экспозициослы но адӟытонъёслы чаклам интылэн быдӟалаез 2107 м²[4]. Арлы быдэ музее 200 сюрс мурт вуылэ. Музейын дасям адӟытонъёс лыктэм калыкез Удмуртилэн инкуазеныз но татын улӥсь калыклэн улэм-вылэменыз тодмато. Татын 5700 экземпляр шер пумиськись книгаос но бичетъёс люкамын[9].
|
|
Музейлэн шундыӝужанпал пырон азяз Кузебай Гердлы пуктэм синпелет
Музейлэн уйпал азьыз
Музейлэн лымшор азьыз
Музей азбарысь якорь
Арсеналлэн юртэз
Музейлэн али юртэз XIX даурысь архитектурая синпелет шуыса лыдъяське. Вазен Ижысь пыӵал тӥрлык поттон заводлэн Арсеналэз вал. Лэсьтэмезъя со П буква выллем луэ, усьтэм люкетэз лымшор пала потэ. Огъя быдӟалаез 3000 м².
Арсенал юртлэн архитекторезС. Е. Дудин. Пуктыны кутскемын 1823-тӥ арын, вань лэсьтӥськон ужъёс 1827-тӥ арын гинэ йылпумъямын вал. Император Александр I, Ижысь заводэ но Арсеналэ вуылыкуз, Дудинэз Вӧсьлыко Владимирлэн 4-тӥ степенё орденэныз данъетаз. Нырысь-валысь со пыӵал тӥрлык возён интылы чакламын вал, ваньзэ-ӧвӧлзэ отчы 75 сюрс единица ыбылӥськон тӥрлык тэре. Солэн одӥгаз люкетаз пыӵал тӥрлыклэн эталон образецъёсыз, соосты лэсьтон заготовкаос но нимаз ёзрадъёсыз но заводской механизмъёслэн модельёссы но тупатъян тӥрлык интыямын вал[10][11].
1914-тӥ арын Арсенал юртэ ложевой мастерскоез выжтӥзы, солэсь азьпал со пыӵал тӥрлык лэсьтон завод котырын интыяськемын вал. 1975-тӥ арын Арсенал юрт федерал инлыкен синпелетъёс пӧлы пыртэмын. 1987-тӥ — 1994-тӥ аръёсы Арсенал тупатъямын-выльдэмын.
Галерея
- Музейлэн экспозициосыз
Валэктонъёс
- ↑ Бюджетное учреждение культуры Удмуртской Республики "Национальный музей Удмуртской Республики имени Кузебая Герда"
- ↑ 1 2 3 4 Мартынова Р. Ф. Два века Национального музея // Достояние Республики: каталог коллекций Национального музея Удмуртской Республики имени Кузебая Герда: к 95-летию основания музея / отв. за выпуск Р. Ф. Мартынова; ред. совет: Е. П. Шемякина и др.. — Ижевск, 2015. — С. 6—20. — 248 с. — 500 экз.
- ↑ Перевертайло, Валова, 2015, с. 19.
- ↑ 1 2 3 4 5 6 Загребин, 2012, с. 322.
- ↑ Перевертайло, Валова, 2015, с. 19—20.
- ↑ Перевертайло, Валова, 2015, с. 20—21.
- ↑ Перевертайло, Валова, 2015, с. 23—28.
- ↑ Перевертайло, Валова, 2015, с. 29—30.
- ↑ Национальный музей Удмуртской Республики [ӟуч] Российская государственная библиотека. Эскеремын 2013-05-26 арын
- ↑ Туганаев, 2008, с. 309.
- ↑ Главный корпус Ижевского оружейного завода [ӟуч] Эскеремын 2014-12-02 арын
Литература
- Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — 768 с. — 2200 экз. — ISBN 978-5-7659-0486-2.
- Удмуртская Республика : Культура и искусство : Энциклопедия / гл. ред. А. Е. Загребин. — Ижевск : Удмуртский институт истории, языка и литературы УрО РАН, 2012. — 540 с. — 300 экз. — ISBN 978-5-901304-62-4.
- Листая прошлого страницы… (История Национального музея УР им. Кузебая Герда 1920—1940 гг.) / Перевертайло Н. М., Валова Н. В. // Музейные чтения в Арсенале: материалы Всероссийской научно-практической конференции / под общ. ред. Р. Ф. Мартыновой. — Ижевск : Удмуртский издательский дом, 2015. — 200 с. — 250 экз.
Чӧлсконъёс
- История музея [ӟуч] Национальный музей Удмуртской Республики. Эскеремын 2013-05-26 арын
- Национальный музей Удмуртской Республики имени Кузебая Герда [ӟуч] Музеи России. Эскеремын 2013-05-26 арын