Кузебай Герд

РАН экспертиза

Экспертизаез ортчытӥз
Россиысь Тодосъёсъя Академия

Пыр-поч лыдӟе

Экспертиза РАН

Экспертизаез ортытӥз
Россиысь Тодосъёсъя Академия

Поыр-поч лыдӟе

Кузебай Герд
Вордскыкуз сётэм нимыз	Кузьма Павлович Чайников
Кушемнимыз	В. Адями, Герд К. П., Гэрд К., И. Сюмори
Вордӥськем дырыз	2‑тӥ (14-тӥ) толшоре 1898
Вордӥськем интыез	Покчивуко, Малмыж утем, Ватка губерния, Росси империя[d]
Кулон дырыз	1-тӥ шуркынмонэ 1937({{padleft:1937|4|0}}-{{padleft:11|2|0}}-{{padleft:1|2|0}}) (39 лет)
Кулэмын	Сандармох[d], Повенец кар поселение[d], Межвежьегорск ёрос[d], Карел Автономной Советской Социалистической Республика[d], РСФСР, СССР
Кунмуртлыкез (подданство)	Росси империя[d]  СССР
Ужудысэз	кылбурчи, драматург, прозаез но драматургиез ӟуч кылысь удмурт кылэ берыктӥсь
Медиафайлъёс РувикиМедиа пушкын

Кузебай Герд (зэмос нимыз Кузьма́ Па́влович Ча́йников 2‑тӥ (14-тӥ) толшоре 1898, Покчивуко, Ватка губерния — 1-тӥ шуркынмонэ 1937, Сандармох^[d], Карел Автономной Советской Социалистической Республика^[d]) — удмурт кылбурчи, прозаик, драматург, кылысь кылэ берыктӥсь, этнограф, фольклорист, мер ужась. Удмурт литератураысь классик. Удмурт йӧскалык лулчеберетэз ӝутонэ мыло-кыдо пыриськем мурт.1932-тӥ арын репресси улэ шедемын. Удмурт националист но «Союз освобождения финских народностей» огазеяськонлэн ёзчиез луэ шуыса янгыше уськытэмын. «СОФИН ужъя» 1958-тӥ арын реабилитировать каремын;  1937-тӥ арын ӝутэм ужъя 1961-тӥ арын шонере поттэмын.

Мукет тодмо кушемнимъёсыз: В. Адями, Герд К. П., Гэрд К., И. Сюмори.

Улон сюресэз

Вордӥськиз 2-тӥ (14-тӥ) толшоре 1898-тӥ арын Вавож ёросысь Покчивуко гуртын, удмурт семьяын, витетӥ пинал вал. Сизьым арескысен атайтэк кылиз. Анаез земской начальной школае сётӥз, дышетӥсез пияшлэсь дышетскыны мыло-кыдо луэмзэ адӟыса, сое Вавожысь школае выжтӥз. Пинал дырысеныз ик котьмае тодыны тыршылӥз, книгаос борды кыстӥськиз. 1912-тӥ арын Кукаркаысь дышетӥсьёсты дасян семинарие дышетскыны пыриз. Эшъёсыз пӧлын туж гажамон вал. Математикаен сяна, вань предметъёсъя витьёслы дышетскиз. 1916-тӥ арын 3-тӥ куартолэзе сое йылпумъяз. Сӥзьыл Бадӟым Учаысь кык классъем школаен кивалтыны пуктӥзы.

Ижкарысь Кузебай Гердлы синпелет

1918-тӥ арын толшоре уездной учительской союзлэн правленияз ёзчие кутӥзы но Малмыжысь Калыкез дышетонъя Вотской областной ёзэтэн кивалтыны юнматӥзы. Малмыжын ужакуз уездысь удмурт калыкез дышетон борды мыло-кыдо басьтӥськиз: гуртъёсын драматической кружокъёс кылдытъяз, ачиз ик соослы пьесаос гожъяз, ӟуч драматургъёслэсь призведениоссэс удмурт кылэ берыкъяз. Со вакытэ ик удмурт кылын потӥсь «Гудыри» («Гром») большевик газетлэн корреспондентэз луиз. 1919-тӥ арын оштолэзьысен пӧсьтолэзёзь Москваын наркомпрослэн курсъёсаз дышетскиз. 1920-тӥ арын южтолэзе сое удмурт комиссариатэ издательской отделэн кивалтыны ӧтизы.

1922—1926-тӥ аръёсы В. Я. Брюсов нимо вылӥ литературно-художественной институтын дышетскиз. . Сое йылпумъямез бере Ижкарысь Йӧскалык музейын ужаз. 1925-тӥ арын 19-тӥ толсуре «этнология» удысъя аспирантэ кутэмын. 1926-тӥ арын 18-тӥ южтолэзе Гердэн Трокай Борисовен ӵош Революционной гожъяськисьёслэсь Огъя удмурт ассоциацизэс кылыдытӥзы (ВУАРП). 1926-тӥ арын гужем Москвае берытскыса, СССР-ысь Шундыӝужан пал калыкъёслэн йӧскалык лулчеберетсыя институтын штатной аспирант луиз.

Тодос удысын

Студент дыръяз ик Герд удмурт лулчеберетэз дышетонъя дэменлык кылдытонлэн кичӧлтӥсез вал. Ас калыксэ дышетонъя но югдытонъя бадӟым уж нуиз. 1918-тӥ арын шуркынмонэ со удмурт кылын пӧртэм ужрадъёс, концертъёс но спектакльёс радъясь удмурт калыклэн лулчеберетэзлы сӥзем огазеяськон кылдытӥз. К. Герд малпамъя, котькуд калык аслаз вордскем кылыныз дышетскыны кулэ. Соин ик удмурт калыкез дышетон удмурт кыл но лулчеберет вылын инъямын луыны кулэ.

В. Я. Брюсов нимо институтын дышетскыкуз К. Герд удмурт калыклэсь улэм-вылэмзэ но солэсь фольклорзэ эскерон бордын ужаз. «Бӧляк» дэменлык кылдытонлэн кичӧлтӥсез луиз. Соин валче, солэсь кивалтӥсьёссэ но Гердэз СССР-лэсь висъяськыны турттэменызы но национализмен янгыше уськыто. Со вие шаертодон удыс лябоме. 1928-тӥ арын «Бӧляк» дэменлык быдтэмын вал.

Вакчи улонэз куспын Герд культуралы но наукалы сӥзем 120-лэсь трос статья печатласа вуттӥз (со пӧлысь 40 палаез ӟуч кылын гожтэмын, 5 — венгер, финн, немец кылъёсын), 20-лэсь трос книгаос поттӥз, со пӧлысь 3-ез кылбуръёсын но поэмаосын бичет, 3-ез калык кырӟанъёсын.

Герд совето удмурт нылпи литератураез инъясь луэ. Удмуртиысь инкуазь но мерлыко улон сярысь 80-лэсь трос кылбуръёс но 40 пала веросъёс печатлаз. Покчи классъёсын дышетскисьёслы удмурт кылын учебник кылдытӥз: «Шуныт зор» («Тёплый дождь») (1924), «Выль сюрес» («Новый путь») (1929), «Начальная геометрия» (1926), «Арифметика» (1925), «Окружающая нас природа» (1925). Аспирантураын 2 диссертация дасяз: фольклоръя «Удмуртская загадка» но этнографияя «Родильные обряды и восточнофинская колыбель». Кыкетӥез Хельсинкиысь (Финляндия) Финн-угор дээменлыклэн архиваз утиськиз, печатламын 1993-тӥ арын «Человек и его рождение у восточных финнов» нимын.

Удмурт автономной областьын кылдэм югдур Гердлэн азьпал ужезлы туж юн пыкъет луиз. 1929-тӥ арын ВКП(б-лэн) Вотской обкоменыз кивалтӥсьёс Гердэз Ленинградысь пединститутлэн ӧжыт лыдъем калыкъёслэн ёзэтаз вотской секциен кивалтӥсе пуктонлы пумит луизы. Со дыре ик Герд СССР-ысь наукаосъя академилэн аспирантураяз ӵектэмын вал, но кивалтэт ӝоген сое Ижкаре берыктӥз но областной советско-партийной школае огшоры дышетӥсе пуктӥз. Берлогес, 1931-тӥ арын сӥзьыл, Гердэз Удмурт пединститутын дышетӥсе кутонлэсь но палэнтӥзы.

1932—1933-тӥ аръёсы Нижний Новгород улосысь Политикая валтӥсь управленилэн ёзэтъёсаз Гердэз паськыт тодмо «СОФИН» («Союз освобождения финских народностей») ужъя янгыше уськытӥзы. 1933-тӥ арын куартолэзе обвинительной заключение юнматэмын вал. Судэ 28 мурт кыскемын, «СОФИН-эн» герӟаськем нимаз ужъёсъя эшшо куинь мурт.

Литература удысын. Творчествоез

Герд удмурт но ӟуч кылъёсын гожъяськиз. Удмурт калык мадён-веранъёс, кырӟан-выжыкылъёс пӧлын будэменыз, 12 аресысен кылбур гожъяны кутскиз. 1915-тӥ арын, Дышетӥсьёсты дасян семинариын дышетскыкуз, «Семинарское перо» киын печатласькись журнал поттыны кутскиз, отын Такой-сякой, Не кто иной, Один из многих но мукет кушемнимъёсын аслэсьтыз веросъёссэ но кылбуръёссэ поттылӥз. Октябрь революцилэсь азьпал «Над Шошмой», «Ож» («Война»), «Керемет», «Бунтар Онтон» поэмаос гожтӥз.

Революци бере мыло-кыдо гожъяськиз, ачиз «Крезьчи» («Гусляр», Ижевск, 1922), «Сяськаяськись музъем» («Цветущая земля», Казань, 1927), «Лёгетъёс» («Ступени», Ижевск, 1931) бичетъёссэ поттыны вуиз. Кылбуръёсаз ужась калык, гурт улонэз капчиятон сярысь тросгес гожъялляз; «Гуртын буран» («Буран в деревне») кылбураз коллективизаци улсын кужмысь каронлы но радтэм улонлы пумит кылзэ вераз. «Чагыр ӵын» («Голубой дым», 1920), «Завод» (Ижевск, 1921), «Бригадиры» (1930) поэмаос, «Матӥ»—"Мотя" (1915, 1920-тӥ арын печатламын) повесть, «Шалтра Онтон» («Непутёвый Антон», 1916) комедия гожтӥз. 1919-тӥ арын «Югыт сюрес вылэ» («На светлый путь»), «Адӟисьёс» («Свидетели»), 1920-тӥ арын «Туно» («Ворожея») пьесаос кылдытӥз.

1919-тӥ арын Елабугаын нимаз изданиосын «Югыт сюрес вылэ» («На светлый путь», вылбамаз Чайников К. П. шуыса гожтэмын вал), но «Адӟисьёс» («Свидетели», таяз К. Герд шуыса гожтэмын вал ини) пьесаосыз поттэмын. «К. Герд» — К. Чайниковлэн трос пӧртэм кушемнимъёсыз пӧлысь одӥгез (озьы ик тодмо луо «К. Андан», «Адями», «Эмезь», «Ида Сюмори»), но таиз 1920-тӥ арысен валтӥсез луиз.

1919-тӥ арлэн кутсконаз Елабугаын «Сборник вотских стихотворений» («Удмурт стихотворенниос») бичет поттэмын, отын ик Кузебай Гердлэн кылбуръёсыз но интыямын вал.

1922-тӥ арын К. Гердлэн «Гусляр» нимо нырысетӥ бичетэз потӥз, отын юн шӧдӥсько умурт калык сямъёс. Солэн романтической поэзиез мерлыко воштӥськонъёс ортчон вакытэ адямилэсь дунне шӧдонзэ но мылкыдзэ возьматэ.

Герд нылпиослы сюлэсь трос кылбуръёс но, фольклор вылэ пыкиськыса, «Гондыръёс» («Медведи») поэма гожтӥз. Покчи классъёсын дышетскисьёс понна «Шуныт зор» («Тёплый дождь»), «Выль сюрес» («Новый путь») лыдӟон книгаос дасяз, ӟуч кылысь вить учебник но Л. Толстойлэсь «От ней все качества» пьесазэ, произведения П. Замойскийлэсь, В. Бианкилэсь произведениоссэс берыктӥз.

Совето вакытэ асьсэ коже огазеяськем коллективъёс гожъяськисьлэсь «Югыт сюрес вылэ» («На светлый путь»), «Адӟисьёс» («Свидетели»), «Туно» («Ворожея») пьесаоссэ пуктылӥзы. «Крезьчи» («Гусляр») книгаяз нырысетӥ кык люкетэз удмурт калыклэн вашкала улонэзлы сӥземын, мукетъёсаз данъямын революция. «Иж заводлы» («Ижевскому заводу»), «Карлы» («Городу») кылбуръёсаз, «Завод» поэмаяз данъя калыклэсь ужамзэ. «Сяськаяськись музъем» («Цветущая земля») бичетаз вордӥськем шаерезлэсь инкуазь чеберзэ но совето вакытэз ушъя. Куинетӥяз «Лёгетъёс» («Ступени») бичетаз совето улонлэсь удмурт гуртэ вуэмзэ, крестьян калыклэсь пушдуннеезлэсь воштӥськемзэ возьматэ, «Бадӟым ужын» («В большом труде») люкетаз рабочий класс сярысь малпанъёссэ азинтэ.

К. Герд ас калыкезлэсь фольклорзэ бичан бордын туж мыло-кыдо выриз, тужгес но яратылӥз кырӟанъёсты. «Малмыж удмуртъёслэн кырӟанъёссы» («Песни малмыжских удмуртов»), «Удмурт кырӟанъёс» («Удм. песни», 1924, 1927) кырӟанъёсын бичетъёс поттӥз.

Литературной институтын дышетскыкуз урыз-урыз фольклористикаез дышетӥз, фольклорлы сӥзем кӧня ке бичет поттӥз. Тодос ужзэ кылбурчи Москваысь Шундыӝужанпал калыкъёслэн йӧскалык лулчеберетъёссыя научно-исследовательской институтлэн аспирантураяз азьланьтӥз. Тужгес пайдалыко луиз 1920-тӥ аръёслэн кыкетӥ ӝыныез: со «Кузница» литературной группае итӥськиз но солэн йӧскалык секциеныз кивалтӥз; со аръёсы ик кылбуръёсын «Цветущая земля», «Ступени» — тужгес усто бичетъёсыз но «Завод» поэмаез потӥзы.

Аслаз поэтической творчествояз Герд лирической поэзилэсь вань амалъёссэ кутӥз — вакчи лирической кылбур бордысен кутскыса, романозь но балладаозь. Со удмурт кылбуретэ выль кылбур формаос пыртӥз: сонет, триолет но верлибрлэсь пӧртэмлыкъёссэ. Гердлэн произведениосыз вылӥ дунъямын но СССР-ысь калыкъёслэн кылъёсазы, венгер, финн, англи, немец кылъёсы берыктэмын. Солэн творчествоез вылэ пыкиськыса будӥзы но юнмазы егит удмурт гожъяськисьёс. Аслаз тужгес усто кылбуръёсыныз, поэмаосыныз но тодос ужъёсыныз дунне литератураез но культураез узырмытӥз.

Дунъет сётон

1920-тӥ аръёслэн пумысеныз кутскыса, Удмуртиысь прессаын Герд но солэн литературной творчествоез сярысь чурыт кылъёс но курланъёс потылыны кутскизы. Художественной творчество быдэсак кивалтӥсь партилэн позициезъя дунъямын вал, партилэн идеологиезъя литература нырысь ик классовой нюръяськонлэн но социалистической лэсьтӥськонлэн инструментэз луыны кулэ. 1928-тӥ арын пӧсьтолэзе, ассэ утьыны турттыса, Вотской автономной обласьтьлэн прокурорезлы заявленияз Герд тазьы гожтӥз: «…„Гудыри“ газетын ӝикыттэм статьяос потыло, отын монэ меӵак национализмен яке литературной безграмотностен янгыш каро отын ик йӧскалык мылкыды ӧвӧл шуыса пыкыло… Монэ, вотяк кырӟанъёсты диалектической аспӧртэмлыкъёсынызы печатламе понна (озьы кулэ каре наука), национализмен янгыш каризы , „огъя литературной кыллы пумит луисько шуыса“ но мукет…» 1929-тӥ арын толсуре Кузебай Герд Вотской областной рабоче-крестьянской инспекцие заявление гожтӥз: «…„Ижевская правда“ газетлэн статьяосаз авторъёс монэ сантэмаса, олокыӵе но ӧвӧлтэм ярлыкъёс малпаллязы: „национал-демократической вождь“, „идеолог наиболее реакционного кулачества“, „человек с претензией на научность“» но мукет.

1930-тӥ арын толшоре Революционой писательёслэн Огъя удмурт ассоциацизылэн 1-тӥ конференцияз Гердлэсь творчествозэ удмурт литератураысь «буржуазно-националистической» секторен герӟазы. 1932-тӥ арын Гердэз курланъёс уката юнмазы. Тулыспал толэзе 2-тӥ авторской конференциын кылбурчиез «национальной буржуазилэн идеологез» шуыса ялӥзы, нош кылбуръёсын но поэмаосын «Лёгетёс» («Вамышъёс») берпуметӥ бичетэз — «контрреволюционной уж» луэ шуизы. Удмурт литератураез азинтонын валтӥсь интые потӥз «Гердовщинаен» нюръяськон.

1932-тӥ арын 15-тӥ тулыспалэ конференциысь делегатъёслэн зӥбемзы улсын Герд ВКП(б-лэн) советско-партийной школаезлэн ячейкаяз заявление гожтӥз, отын «куд-ог литературно-политической янгышъёсы» вань шуыса пусйиз.

Берпум аръёсыз

1932-тӥ арын тулыспалэ Гердэз нырысьсэ «вераськыны» ӧтизы Горькийысь вуэм следователь доры — Горький улосвылъя ОО ПП ОГПУ-лэн 2-тӥ отделэзлэн киваллтӥсез А. Д. Антоновский доры, со ик Гердэз Горький каре нуиз. 1932-тӥ арын 22-тӥ южтолэзе Герд Ижкаре берытскиз, кузпалзэ, ваньмыз умой луоз, ОГПУ сое семьяеныз Финляндие потыны лэзе шуыса буйгатӥз. Озьы ке но, куартолэзе сое нош ик Горький каре ӧтизы но 1932-тӥ арын 13-тӥ куартолэзе контрреволюционной огазеяськонэн кивалтэ шуыса, пытсэт улэ басьтӥзы: ОГПУ-лэн малпамезъя «Бӧляк» дэменлык СОФИН ужлы инъет луиз, со дэменлык, пе, Удмурт АО-ез но мукет автономиосты (Пор АО, Мордва АО, Карел АССР, Коми АССР) СССР-лэсь висъяськыса, «Финляндилэн кивалтэмез улсын Огъя финн-угор федерация» кылдытон бордын тырше (со ужъя озьы ик ӝегатэмын вал Д. А. Батиев, В. И. Лыткин, В. П. Налимов, С. А. Попов, А. А. Чеусов). Эстон но финн дипломатъёсын кусыпъяськеменыз, со кунъёслэн шпионзы но терактъёс дасян бордын ужамен янгыш каризы. Следствие Гердэз вань малпам янгышез ас вылаз басьтытыны быгатӥз. 1933-тӥ арын 9-тӥ пӧсьтолэзе  СССР-ысь ОГПУ-лэн Коллегиез кужмысь виён сярысь пумкыл поттӥз (статьяез пусъемын ӧвӧл). Вань малпан, Максим Горькийлэн дурбасьтэменыз, ОГПУ-лэн Коллегиез 1933-тӥ арын 4-тӥ шуркынмонэ приговорез 10 арлы Исправительно-трудовой лагерен воштон сярысь постановление гожтӥз. 1933-тӥ арын 16-тӥ толсурысен Кемь карысь СорокЛаге выжтэмын.

ЛО УНКВД-лэн Тройкаезлэн 1937-тӥ арын 10-тӥ коньывуонэ гожтэм протоколэзъя, наказанилэн вылӥ мераез пуктэмын (статьяез пусъемын ӧвӧл). Ыбемын 1937-тӥ арын 1-тӥ шуркынмонэ (мукет тодэтъёсъя — 2-тӥ шуркынмонэ) Сандармох интыын, Быдӟым октябрь Революцилэн 20 ар тырмонэныз вачлче, 1111 муртэн ӵош. Вань на Гердлэн быронэз сярысь юнматымтэ тодэтъёс — 1942-тӥ арын быремын шуыса. «СОФИН ужъя» 1958-тӥ арын реабилитировать каремын; 1937-тӥ арын ӝутэм ужъя — 1961-тӥ арын.

Буре ваён

Ижкарысь Советской урамысь буре ваён пул

• 1958-тӥ арын, официально реабилитировать карем бере но, но 1960-тӥ-1970-тӥ аръёсы Удмуртиысь партиен кивалтӥсьёслэн идеологической догмаоссыя, Герд шоры кырыжак учкылӥзы. Кузебай Гердлэн улонэзлэсь но творчествоезлэсь кулэлыксэ валан, солы объективной дунъет сётон 1980-тӥ-1990-тӥ аръёсы гинэ кутскиз.

• Гердлэн нимыныз Ижкарысь одӥгез ульча нимамын. Кузебай Герд нимо йӧскалык гимназия кылдытэмын.

• Кузебай Гердлэсь произведениоссэ ӟуч кылэ берыктылӥзы А. Смольников, О. Хлебников, В. Емельянов, В. Новикова, В. Данько, Г. Иванцов но мукетъёсыз.

• 1992-тӥ арын «Удмурт Кенеш» огазеяськон Кузебай Герд нимо премия кылдытӥз, со арлы быдэ Удмуртъёслэн нырысетӥ огъя союзной съездзылы сӥзьыса сётӥське.

• 1998-тӥ арын, кылбурчилэн вордӥськем дырысеныз 100 ар тырмонэн валче, Вавож ёросысь Гурезь-Пудга гуртын Кузебай Гердлэн музей-юртэз усьтэмын, вордӥськем коркаез интыын стела пуктэмын.

• 2000-тӥ арын Удмурт Элькунысь йӧскалык музейлы Кузебай Гердлэн нимыз сётэмын. 2005-тӥ арын 2-тӥ шуркынмонэ музеен артэ Гердлы синпелет усьтэмын.

• 2013-тӥ арын Вавож черкогуртын синпелет пуктэмын.

Валэктонъёс

Литература

• Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — 768 с. — 2200 экз. — ISBN 978-5-7659-0486-2.
• Кузебай Герд // Писатели Удмуртии : Библиографический справочник / сост. А. Н. Уваров. — Ижевск : Издательство «Удмуртия», 1989. — 464 с. — 5000 экз. — ISBN 5-7659-0131-X.

Чӧлсконъёс

• Кузебай Герд. Краткая биографическая справка [ӟуч] Эскеремын 04.08.2025 арын

• Е.Шумилов. Вавож.Утоли мои печали: история православного села и его святынь : 1751-1999/Кузебай Герд и Вавож. — Ижевск: Удмуртия, 1999. — 245 с. — 5000 экз. — ISBN 5-7659-022-4.