Бӧляк

Бӧляк (огазеяськон, община; ӟуч: Боляк) — удмурт лулчеберетэз утёнъя, дышетонъя но азинтонъя огазеяськон. 1922-тӥ арын 30-тӥ шуркынмонысен 1928-тӥ арозь ужаз. Кивалтӥсьёссэ национализм но СССР-ысь потыны турттэмзы пумысен янгыше уськытонъёсын валче быдтэмын.

Кылдон историез

XX даурлэн кутсконаз революциен валче ӝутскем мылкыдын выжы калыкъёслэн асваланзы сайказ, йӧскалык движениос кылдыны ӧдъязы. Удмурт калык но палэнэ ӧз кыльы. Удмурт историез, лулчеберетэз, калыклэсь улэм-вылэмзэ дышетыны ӧтисьёс шедизы, вань та ужпумъёсты наука ласянь но юнматыны ӵектылӥзы, угось Удмуртиын эксэй вакытэ но, совето властьлэн нырысетӥ аръёсаз но нокыӵе наукая учреждениос ӧй вал. Удмуртъёсты наука ласянь ӵемысь энтузиастъёс гинэ эскерылӥзы.

Ватка шаерысь тодмо историкъёс, археологъёс но этнографъёс удмуртъёслэн историзылы но этнографизылы XIX даурлэн кыкетӥ люкетаз гинэ саклык висъяны ӧдъязы: Н. Г. Первухин, В. Кошурников, А. А. Спицын, П. Н. Луппов, Н. В. Никольский. XX даур кутсконын удмурт интеллигенция пӧлын нырысетӥ отряд кылдыны ӧдъяз. Удмурт лулчеберетъя центръёс Кузонын, Ваткаын усьтӥськизы, татчы ик удмурт калыклэн валтӥсь визьлыко кужымъёсыз люкаськизы. Удмурт лулчеберетэз дышетон понна трос лэсьтӥзы: Н. Н. Блинов, Г. Е. Верещагин, И. В. Яковлев, И. С. Михеев. Котьма ке но, таослэн ужъёссы ӧнерчиос пӧлын ӧжыт кинлы тодмоесь вал, улонын но интызэс ӧз шедьтэ. Школа но, Россиын огъя кылдэм мылкыд но удмуртъёс пӧлын асьсэ выжызылы, лулчеберетсылы адӟемпотостэм мылкыд пыӵатылӥзы.

Советъёслэн I улоскуспо ӧтчамзы (1921-тӥ арын пӧсьтолэзе) удмуртъёсты котыр ласянь эскерон-дышетонлэсь кулэлыксэ социалистической стройез ӝутонэн герӟаз.

Наукаен вырон понна вылӥ квалификациен ӧнерчиос кулэ вал. Удмуртъёс пӧлын вылӥ образованиен адямиос кӧня ке кузя гинэ лыдъяськизы. Со вакытэ таӵе югдурын Удмуртиын профессиональной образование сётонэз паськыт радъяны луонлык воксё ӧй вал. Вылӥ квалификациен йӧскалык кадръёсты РСФСР-ысь каръёсысь вузъёсын дасяллязы. 1923-тӥ арын Мускоын гинэ 63 удмуртъёс дышетскизы. 1926-тӥ—1927-тӥ аръёсы РСФСР-ысь вузъёсын 133 удмурт студентъёс визь люказы. Ӵапак кунлэн шор вузъёсысьтыз удмурт студентъёс ик удмурт лулчеберетлы сӥзем наукая общество кылдытӥзы. Со сярысь нырысьсэ 1922-тӥ арын 30-тӥ шуркынмонэ «Ижевская правда» газетын пичи заметкае гожтэмын вал, со ивортӥз, Мускоын вотской лулчеберетэз дышетонъя «Бӧляк» огазеяськон кылдытэмын шуыса.

Сое кылдытон понна трос сюлмаськиз-бызьылӥз К. Герд (К. П. Чайников) — В. Я. Брюсов нимо литературая институтын дышетскись, дано удмурт поэт, тодосчи но дышетӥсь. Удмурт кылын «бӧляк» кыллэн пуштросэз бадӟым но паськыт. Та кыл бускель яке ӵыжы-выжыос, выжы шуэм луэ. Татын бускель сярысь вераськон мынӥз — удмуртъёс пӧлын вӧлмем юн кусыпъёс, улон-вылонысь аспӧртэм социальной ячейка, угось котькуд бадӟым ужез быдэстон-радъян понна ог-огедлэсь, бускеледлэсь но выжыедлэсь, юрттэт кулэ вал. Озьыен, «Бӧляк» удмурт калыкез выжы луэмысьтызы ог-огзылы юрттон вылысь огазеяськыны ӧтьылӥз.

Огазеяськонлэн ужез

Огазеяськонлэн ужпумъёсыз таӵеесь вал:

• вотякъёслэсь улон-вылонзэс, экономиказэс, историзэс, мерлыко движение пыриськемзэс но лулчеберетсэс котыр ласянь дышетон-эскерон;
• вотякъёс пӧлын эскерон ужъёсты радъян но паськытатон;
• вотякъёс сярысь литератураез люкан но печатлан.

Огазеяськонлэн устав пуктэм ужпумъёсты быдэстон вылысь валтӥсь сюресъёс возьматэмын вал:

• вань удмурт лулчеберет кужымъёсты Мускоын огазеян;
• наукая экспедициосты радъян;
• конференциосты но наукая кенешъёсты ӧтчан, практикъёсты люкан;
• наукая ужъёсты поттон;
• огазеяськонлэсь ёзъёссэ кылдытон но мукет.

Огазеяськонлэн правленияз огъя кенешын быръем муртъёс пыризы. Огазеяськонлэн коньдонэз ёзчиосызлэн взносъёсыз, кун субсидиос но мерлыко учреждениос, книгаосты поттэм, концертъёс радъям, калыклы лекциос лыдӟем чотысь люкаськылӥз. Нырысь-валысь огазеяськонэ Мускоысь 48 мурт но ёзъёсысьтыз 50 мурт пыриськиз. Огазеяськонысь ёзчиос паськыт юанъёсын тунсыкъяськылӥзы: удмурт кыл но литература, религия но улон-вылон, удмурт нылкышнолэн улонын интыез но нылпиосты будэтон, Вотобластльлэн экономикаез но удмуртъёсты югдытон, удмурт фольклор но мукетыз. Опытсы йылэмен, ужез радъян гинэ ӧз воля, солэн кужымез будӥз, вӧлскиз. Ленинградын, Ижын, Глазовын, Ваткаын, Кузонын, Шарканын ёзъёсыз кылдӥзы. Валтӥсь ужез наукая докладъёс дасян но соосты огазеяськонлэн огъя кенешъёсаз ёзчиосыз азьын лыдӟон но пуктэм ужпумъёс сярысь кенешон вал. Эскероно ужпумъёсты муромытон но паськытатон понна огазеяськон бордын кӧня ке секциос кылдытэмын вал. Огазеяськонлэн ёзчиосыз выжы луись калыкъёсын кусып тупатӥзы. 1925-тӥ ар пумын Мускоын финн-угор наукая обществоослэн огазеяськонзы кылдытэмын вал, отчы «Бӧляк», наукая коми кружок, наукая мордва ужасьёс, наукая эстон огазеяськон, «ЛОИКФУН» огазеяськон пыризы.«Бӧляк» огазеяськонлэн ёзчиосыз мукет шаертодонъя огазеяськонъёслэсь ужамзэс сак эскеризы, тужгес но Финляндиысь но Прибалтикаысь, куд-ог финн но эстон тодосчиосын тодмоесь вал, Финляндие мынонэз радъяны выризы. Огазеяськонлэн сяськаян вакытыз 20-тӥ аръёсы тупаз. Вакчи дыр куспын ёзчиосыз трос лэсьтыны быгатӥзы: ужзэс зол паськытатӥзы; Удмуртиысь но солэн палэнысьтыз каръёсын ёзъёс кылдытӥзы; шаерез археология, политика, этнография но экономика ласянь эскеронлы кутскон сётӥзы.

«Бӧляк» огазеяськон «Черкасъёс» огазеяськонэн мыло-кыдо ужалляз (пыр-поч та пумысен тодмо ӧвӧл).

Огазеяськонэз быдтон

1925-тӥ ар пумын нырысетӥ шуг-секытъёс кылдӥзы. Удмурт облисполкомысь К. Гердлы, Удмуртие ужаны берытскыны косыса яке стипендия чот тырем 1 сюрс манетэз берыктыны курыса, лек гожтэт вуиз. 1925-тӥ арын 20-тӥ толшоре «Бӧляк» огазеяськонлэн Кузонысь ёзэзлэн правлениысьтыз дано удмурт югдытӥсь И. С. Михеев поттэмын вал. Огазеяськонысь ёзчиосты асьсэ выжы калыксэс гинэ ӝутэмзы понна янгыше уськытыны ӧдъязы, пӧртэм классъёсты санэ ӧз басьтылэ, таин валче огазеяськон шоры кырыж учкылыны ӧдъязы. Кунын та вакытэ буржуазной луись национализмен нюръяськон кутскиз, отын йӧскалык интеллигенция, йӧскалык лулчеберетэн тунсыкъяськисьёс но со понна сюлмаськисьёс вылэ но сьӧлыканы ӧдъязы. Шаертодонъя движениос чусомыны ӧдъязы. 1928-тӥ арын «Бӧляк» огазеяськон быдтэмын вал.

1932-тӥ—1933-тӥ аръёсы Нижегородской улосысь политикая валтӥсь управлениысь ёзъёс кыдёке дано луэм «СОФИН» ужез «пӧразы».

Ужлэн нимыз «Союз освобождения финских народностей» («Финн выжыысь калыкъёсты мозмытон союз») верамысь потэмын. 1933-тӥ арын куартолэзе янгыше уськытон заключение юнматэмын вал. Судэ 28 мурт сётэмын вал, нош «СОФИН»-эн герӟаськем нимысьтыз ужъёсъя — эшшо куинь адями. Та ужъя кыскамъёсты контрреволюционной йыружъёсты лэсьтэмзы понна янгыше уськытӥзы:

• контрреволюционной ужпумъёсъя кунгож сьӧрысь кунъёсын яке отысь нимысьтыз оскем муртъёсын кусып тупатон;
• шпионаж;
• террористической актъёсты радъян;
• контрреволюционной йыружъёсты дасян но быдэстон вылысь котькыӵе ужъёсты радъян но мукет.

Тужгес трос пунктъёсъя К. Герд, К. Яковлев, И. Бурдюков янгыше уськытэмын. Кузебай Герд но Трофим Борисов озьы ик шпионаж понна янгыше уськытэмын вал.

«Бӧляк» огазеяськонлэн кулэлыкез

Вакчи 6 ар ӵоже ужатозяз, удмурт лулчеберетэз дышетонъя огназ гинэ кылдытэм «Бӧляк» огазеяськон туж бадӟым уж лэсьтӥз. Солэн ёзчиосыз нырысетӥосыз пӧлысь удмурт интеллигенцилэсь кылдэм историзэ эскерон, удмуртъёслэсь историзэс вӧлмытон, сое дышетонлэн кулэлыкез сярысь веран борды басьтӥськизы, выжы луись огазеяськонъёсын матысь кусып тупатӥзы. Удмурт калыклэн улоназ та выллем огазеяськонэз кылдытонлэн кулэлыкез туж быдӟым вал.

Валэктонъёс

Чӧлсконъёс

• Дело «СОФИН». К. И. Куликов [рус.]