Борисов, Трофим Кузьмич

Википедиысь материал
Трокай Борисов
Трофим Кузьмич Борисов
Борисов Трофим Кузьмич.jpg
3-й Вотка автономной областьысь облисполкомлэн тӧроез СССРFlag of the Soviet Union.svg СССР
1925-тӥ арын 11-тӥ гудырикошконысен — 1928-тӥ арын толшорозь
Азьпалчиез Иосиф Алексеевич Наговицын
Бӧрысьчиез ?
Вордӥськемын 19-тӥ шуркынмонэ 1897({{padleft:1897|4|0}}-{{padleft:11|2|0}}-{{padleft:19|2|0}})
Кулэмын 4-тӥ инвожое 1943({{padleft:1943|4|0}}-{{padleft:6|2|0}}-{{padleft:4|2|0}}) (45 лет)
Дышетскемез Петербургысь императорской университет
Кузон университет
Ужез политика удысын ужась, публицист, этнограф

Трофи́м Кузьми́ч Бори́сов (19-тӥ шуркынмонэ 1897, Алнаш ёрос, Удмурт Автономной Советской Социалистической Республика — 4-тӥ инвожое 1943, Шымкент[d]) — СССР-ысь кун но политика удысын ужась, эмчи, публицист, филолог, этнограф. Удмуртлыкез кылдытӥсьёс пӧлысь одӥгез.

Улон сюресэз

Вордӥськиз 18-тӥ (30-тӥ) шуркынмонэ 1891-тӥ арын Алнаш ёросысь Кизекгуртын[1] Кузьма Карповичлэн но Меланья Фёдоровна Борисовъёслэн трос нылпиё семьяязы. Дышетскиз гуртысьтыз земской школаын. Тодон-валанзэ муромытӥз Алнаш черкогуртысь 2 классъем школаын, Алабгоысь но Кузонысь техникая училищеосын. 1912-тӥ-1913-тӥ аръёсы Вӧсьбуро Петыркарысь историяя но филологияя факультетын дышетскиз. 1914-тӥ-1916-тӥ аръёсы тодон-валанзэ будэтӥз Кузон университетысь эмтодосъя факультетын. 1916-тӥ арын тулыс дышетсконзэ йылпумъяса, удмуртъёс пӧлысь нырысетӥез вылӥ образованиен врач луиз[2][3][4]. Дышетскон висказ, каникулъёс дыръя, удмурт гуртъёстӥ филологияя вуоно эскеронъёсызлы материал люкаса ветлылӥз[5].

1917-тӥ арын, дышетсконзэ йылпумъямез бере, Борисовез Минской фронтэ келяло. Отысь госпитальын эмъясь луыса ужа, большевикъёс пала дурбасьтэ. Мыло-кыдо пыриське Совето властез кылдытонэ. 1917—1918-тӥ аръёсы В. А. Антонова-Овсеенко  [ӟуч] (удм. кивалтэм улсын полклэн валтӥсь эмчиез чотын Украинаын мынӥсь ожъёсы пыриськиз[6].

1918-тӥ арын куартолэзе Алабгое лыктэ. Отын со удмуртъёслэсь нырысетӥ огъяросси съездзэс радъясьёс пӧлысь одӥгез луэ[7]. Со арын ик сое депутатъёслэн кенешсылы тӧрое быръё но «Гудыри» газетлы редакторе юнмато[3][8]. Граждан ож вакытэ, 1818—1819-тӥ аръёсы со Алабгоын ревком но белочехъёсын  [ӟуч] (удм. ожмаськон вылысь партизан отряд кылдытэ[2][9][10].

1918-тӥ арын 31-тӥ коньывуонэ Борисов кивалтэм улсын «Гудыри» газетлэн нырысетӥ номерез потӥз. Со дырысен Трокай Борисов литература удысэ выже. Кылбуръёс, листовкаос, этнографилы сӥзем очеркъёс, брошюраос гожъя. 1921-тӥ арын «Грамматика вотского языка», 1929-тӥ арын «Песни южных вотяков» лыдзетъёссэ поттэ. Со сяна, «Удмурт стихотвореняос»,"Удморт кылбуръёс" (1919) антологиоссэ дася. 1921-тӥ арын, кылбурчиен Кузебай Гердэн валче кариськыса, Удмурт гожъяськисьёслэсь нырысетӥ съездзэс радъяло.

1919-тӥ арын Сарапул карын со Вань удмурт крестьянъёслэсь съездзэс радъяз. Та съездын ик сое Центральной комиссариатысь удмуртъёсын герӟаськем ужпумъёсты сэрттон-пертчон вылысь комиссаре бырйизы[11][10]. 1919-тӥ арын коньывуон толэзьысен комиссарлэн воштӥсез луыса тыршиз, со арын ик толсуре Сарапулэ улыны выжиз. 1921-тӥ арын толшорысен Калыкез дышетонъя областной ёзэтэн кивалтӥз[12][13].

1920-тӥ арын инвожо толэзе Борисов удмурт коммунистъёслэсь 1-тӥ огъяросси конференцизэс радъяз. Отын ик Вотка автономной орбласть кылдытон сярысь решение кутэмын вал. Кутэм решениез быдэстон понна, Трокай Владимир Ленинэн пумиськылӥз но со арын ик 4-тӥ шуркынмонэ ВЦИК-лэн декретэныз автономия кылдытэмын вал[14][2].

1921-тӥ арын Кузебай Гердэн ӵош «Гудыри» газетлэн редакциез улсын литературной студия кылдытӥз но удмурт гожъяськисьёслэсь 1-тӥ съездзэс дасян борды басьтӥськиз. Борисов трос кужымзэ, визьзэ сётӥз «Кенеш» журналэз кылдытонлы. Озьы ик революци мылкыдо гожъяськисьёслэсь огъяудмурт ассоциацизэс (ВУАРП) кылдытонлэн кичӧлтӥсез луиз[12][15].

1922-тӥ арын сепаратизм мылкыдъёсыз понна сое янгыше уськыто. Ужысьтыз палэнтыса, областной музъем управлениен кивалтыны пукто. 1923-тӥ арын южтолэзе РКП(б)-лэн 5-тӥ областной конференцияз партиысь но вань интыужъёсысьтыз кушто. 1923—1925-тӥ аръёсы РКП(б)-лэн Калмык ОК-лэн нырысетӥ секретарез луыса ужаз[2][10]. 1925-тӥ арын выльысь Удмуртие ӧтё но 11-тӥ гудырикошконэ Вотка автономной областьлэн исполкомаз тӧрое юнмато[12][16].

1928-тӥ арын толшоре РСФСР-лэн Верховной судэз Борисовез вить арлы пытсэтан сярысь решение кутэ. Озьы сое Усть-Сысольске келяло. 8 толэзь ортчыса, судимостьсэ палэнто. Кыкетсэ Москваын но Кузонын дышетскемез бере эмъясь чотын Новокузнецке комсомольской стройкае кошке. Тазалыкез утёнъя калык комиссариатлэн косэмезъя Борисовез Коми автономной областе келяло[17].

1929—1932-тӥ аръёсы облздравотделэн кивалтэ. 1932-тӥ арын Мускоысь Броннер нимо институтэ аспирантурае дышетскыны пыре[12][10]. Со арын ик солэн дасям Удмурт кыллюкамез потэ. Отын 15 сюрс пала кылъёс люкамын вал[2].

Репрессиос

1933-тӥ арын 14-тӥ толшоре пытсэт улэ басьтэмын, со арын ик инвожо толэзе «СОФИН» ужъя янгыше уськытэмын но Дальлаге келямын вал. 1936-тӥ арын Алма-Атае выжтэмын, 1938-тӥ арысен — Кустанайын[14]. 1940-тӥ арын выльысь янгыш каремын но условной срок сётэмын. 1942-тӥ арын 26-тӥ южтолэзе выльысь 8 арлы пытсэтамын[18] но Малгобекысь свинец поттон руднике келямын. Кулӥз НКВД-лэн Кентауской лагеряз (мукет тодэтъёсъя — Актюбинской лагерьын[14][2]) 1943-тӥ арын 4-тӥ инвожое[12][19][10].

Кулэмез бере СССР-ысь Верховной судлэн Пленумезлэн 1989-тӥ арын 20-тӥ куарусёнэ гожтэм постановлениенызвань судимостьёсызъя реабилитировать каремын[12].

Трокай Борисовлы Ижкарын пуктэм синпелет
Трокай Борисовлы Алнашын пуктэм синпелет

Семьяез

Трофим Борисов кык пол кышнояськылэмын. Нырысетӥ кузпалыныз, Александра Морозоваен, Роза но Клара нылъёсыз вордӥськизы. Кыкетӥеныз, Елизавета Соковиковаен, Нина нылзы вордӥськиз[20].

Буре ваён

  • Трокай Борисовлы нырысетӥез синпелет пуктэмын Алнаш черкогуртын. 2006-тӥ арын сое сӥё-дано усьтон ужрад ортчиз[14].
  • Кыкетӥез синпелет пуктэмын 2012-тӥ арын 5-тӥ коньывуонэ Ижкарысь Коммунаръёслэн ульчаязы — Трокай Борисовлы синпелет[2].
  • 2017-тӥ арын Президент грантлэн коньдонэныз Кучырангуртын совето вакытысь гуртлы сӥзем «Кучыран» (азьвыл нимыз — «Советской гурт») туризмъя комплекс усьтӥськиз. Татын покчиосты дышетонъя 1911-тӥ арын пуктэм школалэн юртэз тупатъямын, кунокуа но кафе лэсьтэмын вал. Ӵапрак Кучыран школаын ас дыраз дышетскиз вал Трофим Борисов. Татын солэн дышетскем классаз пыраны, парта сьӧраз пукыны луэ.

Библиография

  • Мае партия шуо? Кычё партиос вань? (1918);
  • Удмурт кылбуръёс (1919);
  • Удмурт стихотворенняос (1919);
  • Удмурт ваньбур: Этнографический очерк (1920);
  • Электричество кужым — гурт калыклы кузьым (1920);
  • Грамматика вотского языка (1921);
  • Песни южных вотяков (1929);
  • Удмурт кыллюкам (1932);
  • За пять лет революции вотяков. К пятой годовщине пролетарской революции в Прикамье (1922);
  • Калмыкия: историко-политический и социально-экономический очерк. — М.; Л.: Гос. изд-во, 1926. — 97 с.[15].

Валэктонъёс

  1. ↑ 1 2 Куликов, 1991, с. 17.
  2. ↑ 1 2 3 4 5 6 7 Шубин Л. Л., Савельев В. Н., Шабардин А. М. Врач Борисов Т. К. — общественный и государственный деятель Удмуртии (посвящается 125-летию со дня рождения) // Вестник Калмыцкого университета : журнал. — 2016. — № 4. — С. 50—55. — ISSN 1995-0713.
  3. ↑ 1 2 Туганаев, 2008, с. 215.
  4. ↑ Уваров, 1989, с. 57.
  5. ↑ Куликов, 1991, с. 43.
  6. ↑ Куликов, 1991, с. 46.
  7. ↑ Куликов, 1991, с. 55.
  8. ↑ Куликов, 1991, с. 60.
  9. ↑ Куликов, 1991, с. 64—67.
  10. ↑ 1 2 3 4 5 Уваров, 1989, с. 58.
  11. ↑ Куликов, 1991, с. 67—68.
  12. ↑ 1 2 3 4 5 6 Туганаев, 2008, с. 216.
  13. ↑ Куликов, 1991, с. 98.
  14. ↑ 1 2 3 4 Памятник Трокаю (Трофиму) Борисову [ӟуч] Информационно-аналитическоe управление Администрации города Ижевска. Эскеремын 2019-08-13 арын
  15. ↑ 1 2 Уваров, 1989, с. 59.
  16. ↑ Куликов, 1991, с. 155.
  17. ↑ Куликов, 1991, с. 183—184.
  18. ↑ Куликов, 1991, с. 309.
  19. ↑ Куликов, 1991, с. 276.
  20. ↑ Т.К.Борисов. У истоков Удмуртской автономии [рус.] Алнашский историко-литературный музей муниципального образования «Алнашский район».

Литература

Чӧлсконъёс

«https://udm.ruwiki.ru/w/index.php?title=Борисов,_Трофим_Кузьмич&oldid=426344»-ысь басьтэмын