Удмуртъёс

РАН экспертиза

Экспертизаез ортчытӥз
Россиысь Тодосъёсъя Академия

Пыр-поч лыдӟе

Экспертиза РАН

Экспертизаез ортытӥз
Россиысь Тодосъёсъя Академия

Поыр-поч лыдӟе

Удмуртъёс
Туала нимыз	удмурт (лымшор диалект), удморт (уйпал диалект)
Лыдыз но вӧлмемез
Ваньмыз: 581 000
Россия Россия: 386465 (2021-тӥ ар) (0.26%), 552299 (2010-тӥ ар) (0.38%), 636906 (2002-тӥ ар) (0.4 %) Удмуртия Удмуртия: 410584 (2010-тӥ ар), 460584 (2002-тӥ ар) (28 %) Татарстан Татарстан: 23454 (2010-тӥ ар), 24207 (2002-тӥ ар) (0,62 %) Башкортостан Башкортостан: 21477 (2010-тӥ ар), 22625 (2002-тӥ ар) (0,54 %) Пермь улосвыл Пермь улосвыл: 20819 (2010-тӥ ар), 26272 (2002-тӥ ар) (0,83 %) Свердловск улос Свердловск улос: 13789 (2010-тӥ ар), 17903 (2002-тӥ ар) (0,34 %) Киров улос Киров улос: 13639 (2010-тӥ ар), 17952 (2002-тӥ ар) (1,04 %) Тюмень улос Тюмень улос: 5093 (2010-тӥ ар) (0,16 %) Ханты-Манси автономи округ — Югра Ханты-Манси автономи округ — Югра: 3670 (2002-тӥ ар) (0,22 %) Челябинск улос Челябинск улос: 2422 (2010-тӥ ар) Ростов улос Ростов улос: 2411 (2010-тӥ ар) Краснодар улосвыл Краснодар улосвыл: 2382 (2010-тӥ ар) Волгоград улос Волгоград улос: 2150 (2010-тӥ ар) Красноярск улосвыл Красноярск улосвыл: 2026 (2010-тӥ ар) Марий Эл Марий Эл: 1900 (2010-тӥ ар) Москва Москва: 1814 (2010-тӥ ар) Республика Коми Республика Коми: 1593 (2010-тӥ ар) Курган улос Курган улос: 1579 (2010-тӥ ар) Самара улос Самара улос: 1236 (2010-тӥ ар) Оренбург улос Оренбург улос: 1042 (2010-тӥ ар) Нижний Новгород улос Нижний Новгород улос: 683 (2010-тӥ ар) Казахстан Казахстан: 5824 (перепись 2009 г.) 1989-тӥ арын ортчытэм лыдъян-чотанъя Казахстанын 15 855 удмуртъёс вал Украина Украина: 4712 (2001-тӥ арын ортчытэм лыдъян-чотан) Узбекистан Узбекистан: 4200 (2020-тӥ ар) Таджикистан Таджикистан: 635 (1989-тӥ ар) Туркменистан Туркменистан: 600 (2020-тӥ ар) Молдавия Молдавия: 600 (2020-тӥ ар) Белоруссия Белоруссия: 481 (2020-тӥ ар) США США: 400 (2015-тӥ ар) Киргизия Киргизия: 300 (2020-тӥ ар) Грузия Грузия: 209 (1989-тӥ ар) Латвия Латвия: 197 (2023-тӥ ар) Эстония Эстония: 180 (2021-тӥ ар) Азербайджан Азербайджан: 165 (1989-тӥ ар) Литва Литва: 71 (2011-тӥ ар) Армения Армения: 34 (1989-тӥ ар)
Огъя тодэтъёс
Кылыз	удмурт, ӟуч
Инмарлы осконэз	православие, гуртъёсын калык вӧсьбурлэн люкетъёсыз утисько на
Пыре	финн-угор калыкъёс
Выжы луись калыкъёс	коми, коми-пермякъёс, поръёс
Этнической группаос	бесермянъёс
Кылдэмын	перм калык
Медиафайлъёс РувикиМедиа пушкын

Удмуртъёс (ӟуч: удмурты, удморты, трос лыдын удмуртъёс; вашкала дыръя ӟуч сямен вотяк, отяк, воть, отяцкая чудь шуо вал) — финн-угор выжыё калык. Матысь выжы калыкъёс луо комиос (пермякъёс но зырянъёс). Ваньзы ӵош финн-угор кыл семьялэсь перм вайзэ кылдыто.

Огъя тодэтъёс

Удмуртъёс Россилэн европа люкетаз, Урал гурезь выжыын уло. Кам но Ватка (шур улланьын) шуръёс вискын. Калыклэн бадӟым люкетэз Удмурт Элькунын улэ но со улослэн выжы калыкез луэ. Кӧняез ке Башкириын, Татарстанын, Киров улосын, Пермь улосвылын но мукет улосъёсын улэ.

Вераськон кылзыя куинь бадӟым этнической группаослы люкисько: лымшор, уйпал но шор. Нимаз висъяське бесермян вераськет. Вераськон сяна, та группаос культураенызы но пӧртэмесь луо.

Антропологи ласянь удмуртъёс ас выжы калыкъёссылэсь пӧртэм луись вятско-камской типе огазеясько, со европеоидной но монголоидной расаослэн сураськеменызы кылдэмын. Туссыя тросгес европеоидноезлы кельшо, пӧлазы трос горд йырсиё муртъёс пумисько.

Валтӥсь вӧсьбурзы — православие, пыдлось гуртъёсын христианизацилэсь азьпал кутӥськись осконъёслэн кылем-мылемзы шӧдӥське на. 2021-тӥ арын ортчытэм калыкез лыдъян-чотанъя, Россиын 386 465 удмуртъёс уло вал.

Нимыз сярысь

«Удмурт» кыллэн кылдэмез сярысь пӧртэм пумо гипотезаос вань. Сергей Белыхлэн но Владимир Напольскихлэн малпамзыя, та кыл быдэсак иран кылысь (ant(a)-mart(a) пыремын но «человек окраины, житель пограничья» шуэмез возьматэ.

Зырянъёс но вотякъёс йӧскалык дӥськутэн 1862-тӥ ар.

Мукет версиез учконо ке, «удмурт» кык люкетлэсь пӧрме — уд- (валантэм пуштросэн) но -мурт «адями, пиосмурт» валатонэн (та мугъя куд-ог тодосчиос та этнонимез ӟуч кылэ «человек из племени уд; удский человек» шуыса берыкто).

Вашкала ӟуч нимыз — «вотяки́» (отяки, воть) — уд- кылвыжые вуттэ («удмурт» кылын сямен ик), но «о́до» мари кыл пыр («удмурт» шуэмез возьматэ).

«Удмурт» кыллэн вань на тюрк валатонэз — XIV даурысь ӟуч гожтосъёсын «аряне», «арские люди» шуыса гожтэмъёс пумисько. Документъёсъя, аръёс, ар князьёс но ар калык Камлэн шур улланяз — Кузон котырын но Чупчи улланьын интыяськемын вылэм. Отын арской но каринской (чепецкой) бигеръёс, Арск (Волжской Булгарилэн берлогес Кузон ханстволэн удельной центрез) карысь потэмъёс сярысь вераськон мынэ. Ар калык пӧлын удмуртъёс вань шуыса меӵак гожтэмъёс ӧвӧл.

Удмуртъёс сярысь огез тужгес вашкалаез веран араб мынӥсь-ветлӥсьлэн Абу-Хамид ал-Гарнатилэн XII дауре гожтэмъёсаз пумиське. Литератураын «удмурт», «удморт» кыл XVIII даурысен гинэ кутӥськыны кутскиз.

Антропология

Антропологи тодметъёсъя удмуртъёсты субуральской (вятско-камской) типъем урал расае пырто. Та типлэн яркыт адскымон луэ европеоидной тусыз, ӧжытак монголоидностез шӧдӥське. Удмуртилэн лымшор но шундыпуксён палысьтыз но Татарстанлэн уйпал но шундыпуксён палысьтыз вашкала шайгуосысь шедьтэм йыркобыосты эскеронъёс та сярысь малпанэз зэмато. XVII—XIX дауръёсы та интыосын вашкала удмуртъёслэн улэмзы сярысь азьмалпанъёс вань. Антропологи тодметъёсъя удмуртъёслы тужгес матын луо коми-пермякъёс.

Огъя удмурт вылтусъя висъяське на среднечепецкой группа. Таослэн тусбуйзы восточнобалтийской типлы (карел, ижора но коми-зырян) матын луэ. Вазенгес таос паськыт вӧлмемын вал Европалэн интывылаз. Уйпал удмуртъёс пӧлын но Чупчи лулчеберетлэн кылем-мылемез шӧдӥське шуыса, малпан вань.

Туала лымшор удмуртъёслы тупамонгес луэ уралоидной ватсэтэн европеоидной тус. Таӵе типъем воргоронъёс шоро-куспо ӝуждалаемесь луо, йыркобызы бадӟым, кузялэс но паськыт ымныро, ангессы кымыссылэсь шӧдскымон паськытгес, нырзы паськыт, ымдурзы шорор-куспо, ӵемгес гордмыт йырсиё. Быдэс дуннеысь калыкъёсын ӵошатыса, удмурт калык пӧлын тужгес трос горд йырсиё муртъёс, лыдзыя кельтъёслэсь но трос. Тушсы шоро-куспо будэ, син котыръёссы европеоидной тусо, бамлыоссы паськыт ӧвӧл.

Нылкышноослэн европеоидной туссы лябытгес адӟиське, шӧдскымонгес луэ субуральской (уралоидной) тусбуйзы. Соин сэрен золгес Волга но Кама котырын улӥсьёслы тупало: лапеггес мугоро, йыркобызы пичигес, ымныртуссы воштӥське («низколицесть»), йырси буёлзы пеймытгес, бамлыоссы адскымонэсьгес, нырвыжызы улынгес.

Удмуртъёслэн Волго-Уральской улосвылын интыяськемзы. Россиын 2010-тӥ арын ортчытэм калыкез лыдъян-чотанъя.

Историез

Удмурт йӧскалыклэн кылдон вакытэз I—II сюрсаръёслэн пумаз йылпумъяське. Азьмалпамъя, азинскон мынэтлэн интыез лымшор Прикамье лыдъяське. Али мутусын со туала Татарстанлэн уйпал но шундыпуксён палаз интыяськем ёросъёс, Киров улослэн лымшор но шундыӝужанпал ёросъёсыз но Удмуртилэн лымшор но шундыпуксён палыз. Со сярысь тодыны луэ вашкала удмурт выжыослэн (Дурга, Дукъя, Жикъя, Какся, Можга, Омга, Пельга, Пурга, Салья, Сюра, Тукля, Уча, Чабъя, Чола, Шудья, Эгра, Юмья) XVI даурлэсь азьпал Ватка но Кам шуръёс вискысь шаере интыяськемзыя. Озьы ик удмурт кылэ кылем вашкала славян асэстэм кылъёсъя. Соосъя ик валаны луэ, вашкала удмурт калыклэн вашкала славян калыкен кусыпъяськемез сярысь. Кам шур улланьын Именьковской археологической культурая синпелетъёс кылемын (IV—VII дауръёсы).

Асьме вапумысь II сюрсарлэн кутсконаз удмурт калыклэн ог люкетэз булгаръёсын матысь кусып тупатэмез, бесермян этно-сословной группа кылдонлы кутскон сётэм. Та малпанэз юнмато удмурт кылын трос пумиськись булгар асэстонъёс. Булгар улсысь Ару улос сярысь араб путешественник Абу Хамид ал-Гарнати но 1135/6-тӥ арын толалтэ Булгар музъеме вуылыкуз гожтыса кельтэм. Озьы ик пумисько талэсь вазьгес шедьтэм гожтосъёс, кудъёсаз та этнополитической кылдэт сярысь пусъемын. Кылсярысь, хазар каганлэн Иосифлэн 960-тӥ аръёсысь гожтэтъёсаз «Итиль шур дурын улӥсь» «ар» калык сярысь гожтэм чуръёсыз шедьтэмын. Ар музъем сярысь веранъёс 1379/80-тӥ аръёсысь ӟуч летописьёсын но пумиськыло. Кылсярысь, 1469-тӥ арысь летописьын Вотятской музъем Кузон ханстволэн пуш люкетэз луэ шуыса гожтэмын. Монголъёс Булгариез пазьгем бере, удмуртъёслэн Ватка но Кам шуръёс вискысь музъемъёсты киултонзы азинскиз. Нюлэсэз кораса, Кильмезь, Вала, Умяк, Тойма, Иж но соослэн вайшуръёссы кузя уйпала но уйпалэн шундыӝужан вискы кошкизы.

XV даурлэн шорысеныз «ватка» удмуртъёслэн территориальной группазы кылдыны кутске. Со Ватка музъем вылын улӥсь удмуртъёс (удмуртъёс-вятчанъёс), Улӥ Ваткаысь потэм Дурга, Сюра, Чабъя но Чола выжыысь калыкъёс луо. Удмуртъёсын валче Ваткае бесермянъёс но выжизы. Куд-ог историкъёслэн малпамзыя, 1462-тӥ арын Иван III Кара-беклы, Ватка но Слободское каръёслы матын луись музъемъёсты кузьмам, нош со музъем вылын ужаны «кунгож сьӧр» калыкез кутыны косэм (со вакытэ Казанской ханстволэн Ар палыз «кунгож сьӧр» шуыса лыдъяське вылэм).

XVI даурлэн кутсконаз удмуртъёс Чупчи котырез киултыны кутско. Чупчи археологи культура (IX—XIV дауръёсы) бырем бере, та музъемъёсы кык сю ар ӵоже нокин вуылымтэ. Чупчи котырысь музъемъёсты киултонэ бесермянъёсын валче «ватка» удмуртъёс, шур кузя вылань тубыса, Кильмезь котырысь Шор Чупчие вуэм «калмез» удмуртъёс пыриськизы. Кылем вашкала грамотаослы осконо ке, татын бадӟым тунсыксы каринской князьёслэн ― Кара-беклэн выжыосызлэн вылэм .

Ӟуч кунлэн пушпӧлаз, Ватка музъемъёсты валчеяса, уйпал удмуртъёс XV даурлэн пумаз (1489 арын) пыртэмын вал. Лымшор удмуртъёс — аръёс (Ар музъемъёсысь) — XVI даурлэн шорозяз булгаръёслы выт тырыса улӥзы на. XVI дауре гинэ лымшор удмуртъёс Казанской ханствоысь Ваткае выжыны кутско. Нош быдэсак Ӟуч государстволэн пушпӧлаз удмурт музъемъёс Казанской ханство куашкам бере гинэ, 1552-тӥ арын пыртэмын вал. Кузон ханствоез Ӟуч кун пӧлы пыртэм бере, удмуртъёс мукет пала кошкыны кутскизы— Буйско-Таныпской междуречье (башкир музъемъёсы).

Удмурт калыклэн вӧлскем-интыяськеменыз туала мутус XVIII даурлэн кутсконаз кылдытэмын. 1780-тӥ арын, Вятской, Казанской но Свияжской провинциослэсь ог люкетсэс басьтыса, Вятской наместничество кылдытэмын вал, 1796-тӥ арысен — Ватка губерния. Со дырысен удмурт калыклэн бадӟым люкетэз ог интыынгес улыны кутскиз. Ватка губерниысь удмуртъёс Елабуга, Глазов, Сарапул, Малмыж, Уржум но Вятка уездъёсын огазеяськыса улӥзы.

1897-тӥ арын ортчытэм Россиысь калыкез лыдъян-чотанъя, удмуртъёс (анай кылзы — вотяк), таӵе губерниосын улӥллям:

Губерния	Пиосмуртъёс	Нылкышноос	Ваньмыз
Ватка	185515	192378	377893
Уфа	11457	11050	22507
Кузон	4892	4787	9679
Пермь	3304	3201	6505
Самара	1028	1090	2118
Мукет губерниос	2179	89	2268
Быдэс империын	208375	212595	420970

Соос пӧлысь 2245 мурт каръёсын улӥз (со вань удмурт калыклэн 0,53%-эз луэ).

РСФСР-ысь ВЦИК-лэн 1920-тӥ арын 4 шуркынмонэ поттэм Декретэзъя Вотской автономной область кылдытэмын вал. Отчы Сарапул, Воткинск, Елабуга, Бондюга, Кизнер ёросъёс пыризы. Озьы ке но, Вотской автономилэн палэназ 100 сюрс пала удмуртъёс кылизы.

ВЦИК-лэн Президиумезлэн 1932-тӥ арын 1 толшоре кутэм Постановлениезъя Вотской автономной область Удмурт автономной область шуыса нимамын вал. Нош ВЦИК-лэн Президиумезлэн 1934-тӥ арын 28 толсуре кутэм Постановлениезъя, Удмурт автономной область Удмурт Автономной Советской Социалистической Республика (УАССР) нимамын. УАССР-ысь Вылӥ Кенешлэн 1991-тӥ арын 11 коньывуонэ кутэм решениезъя, Удмурт Автономной Советской Социалистической Республика Удмурт Элькун нимамын.

Кыл но гожъяськет

Валтӥсь статья: Удмурт кыл

Удму́рт кыл (ӟучез сямен ик) Удмурт Элькунлэн кун кылыз луэ. 1932-тӥ арозь официально вотяцкий яке вотский шуыса нимаськиз. Удмуртъёс, ваньмыз сямен, кык кылэз тодо. Ӵемысь пумиськыло удмурт но бигер кылъёсты тодӥсьёсе яке удмурт-бигер-ӟуч кылын вераськисьёс.

Туала литературной кылын уйпал но лымшор, озьы ик бесермян вераськетъёс сураськемын. Ог-огзылэсь пичияк висъясько ке но, ӵемгес фонетика ласянь, соос ваньмыз валамонэсь луо.

Мукет перм кылъёслэсь удмурт кыл ударениен висъяське. Татын берпум слогез котьку кужмогес вераське. Озьы ик пӧртэм луэ глаголлэн морфологиез но спряжениез ласянь, удмурт кылын со кык пумо. Туала литературной кылын 15 падеж: 8 субъектно-объектноез (синтаксической) но 7 интыян (локальной). Падежъёсъя вань нимкылъёс вошъясько (луло предметъёсты возьматӥсьёсыз интыян падежъя уг вошъясько). Удмурт кылын 7 гласной но 26 согласной куараос (ӟуч кылысь асэстэмъёссэ вератэк). Ваньмыз соос лад-лад верасько но кылӥсько. Солы луыса, кылэз дышетон капчия.

Гожъяськетлэн азинскемезъя, удмурт кылэз вашкала гожъяськето (старописьменной) кылъёс радэ пырто. Туала удмурт гожъяськетлы инъет луэ 1897-тӥ арын Казаньысь издательёсын кутэм гожпусо сӧзнэт. Со выльдэм ӟуч алфавитлэн инъетэз вылын лэсьтэмын вал, бордаз диакритикъёсын глифъёс ватсаса (ог люкетэз Ильминскийлэн гожъяськетысьтыз басьтэмын). Ф ф, Х х, Ц ц, Щ щ букваос удмурт алфавитэ 1930-тӥ аръёслэн кутсконаз гинэ пыртэмын, нош быдэсак юнматэмын 1937-тӥ арын кылъёслы сӥзем конференциын. Со дырысен удмурт алфавит ӧз вошъяськылы, орфографиез гинэ кӧня ке тупатъяськиз. Али удмурт алфавитын 38 буква — 33-ез ӟуч алфавитысь басьтэмын, бордаз диакритической пусэн «умлаут» (буква вылын кык точкаос): ӝ /d͡ʒ/, ӟ /d͡ʑ/, ӥ /i/, ӧ /ɘ/, ӵ /t͡ʃ/ вить буква ватсамын.

Антропонимика

Валтӥсь статья: Удмурт фамилиос

Валтӥсь статья: Удмурт нимъёс

Вашкала удмурт выжы нимъёс сярысь гожтэмъёс нырысьсэ пумисько XIX даурысь 80-тӥ аръёсы Г. Е. Верещагинлэн ужъёсаз. Со малпамъя, одӥг выжыысь потэмъёс ваньмыз одӥг выжы нимын пусйисько но выжызэс кылдытӥсьлэсь нимзэ нулло. Выжы нимъёс пӧртэм амалэн пӧрмыны быгато. Туала удмурт кылын висъяло:

• Ним борды «выжы» кылэз ватсаса — (Гондыр выжы, Олёш выжы);
• Ним борды «пи» кылэз ватсаса ― (Быдыпи, Андрейпи);
• Ним борды яке «пи» кылын кылдытэм выжыним борды трос лыдэз возьматӥсь -ос (-ёс) суффикс ватсаса ― (Гондыръёс, Быдыпиос);
• Огъя перм кылын вашкала дыръя трос лыдэз возьматӥсь эшшо куинь пумо люкетъёс вылӥллям на. Соос пӧлысь одӥгез -а али ке но коми-пермяк кылын огъясь значениен кутӥське (удмурт кылын уг кутӥськы). Та азьмалпанлы валэктон сёто куд-ог выжы нимъёслэн пӧрмемзы ― Юбера, Удэга но мукет.

Ваньбуро культура

Вашкала ӧнер ужъёс

Вашкала дырысен удмурт калык тросгес пудо вордонэн но бусы ужъёсын вырылӥз. Огъя вераса, ӟег, чабей, сезьы, йыды, сьӧдчабей, кӧжы, тари, пыш но етӥн будэтылӥз. Бакча ужъёсын вырыны дырзы сокем ик ӧй вал, соин ӵемгес кубиста, огреч, каляга но кушман мерттылӥзы. Со сяна, сямлы пӧрмем ужъёсын лыдъясько: пӧйшуран, чорыган но муш утён. Кема аръёс ӵоже турын-куар но, емыш бичаса улӥзы (емышъёс, турын-куар, турын выжыос).

Озьы ик пу кораллязы, сир пӧзьтылӥзы, эгыр сутылӥзы, пуллэсь лэсьтӥськизы, пызь изӥзы. Куд-огез валэн нуись-вайисьын медъяськыса ужалляз. Но палэнын медъяськыса ужан удмуртъёс пӧлын туж ик вӧлмемын ӧй вал. XVIII даурысен Удмуртиын корт поттон удыс азинскиз. Иж, Вотка но мукет заводъёс ӝутӥськизы.

Нылкышноос пӧлын тужгес вӧлмемын вал: черсӥськон, пужыятскон, керттӥськон, вуриськон но куиськон ужъёс. Ас киын куэм дэралэсь ог люкетсэ вузаллязы. XIX даурлэн пумысеныз кутскыса но XX даурлэн кутсконаз удмуртъёслэн куэм дэразы ― «вотской сукманина но пестрядь» туж вылӥ дунъяськылӥз, яркыт буёло, векчи но лад-лад куэмъя, но дунтэмезъя номырин воштонтэм-ӵошатонтэм вал. XIX даурысен пужы пуктыны дышетскизы. Дэра вылтӥ ыжгон шорт но буртчин сиӥньысъёсын пужыятскизы. Удмурт пужыос — геометрическоесь. Уйпал удмуртъёс тӧдьы вылын горд, курень но сьӧд буёлъёсты ӵемгес кутылӥзы. Лымшор палан — тюрк калыкен кусыпъяськыса, пужыоссы яркытэсьгес вал. Берлогес чильпаса куиськыны (ковёръёс, выжвалетъёс, валес шобретъёс), пужы пуктыса керттӥськыны (чулка, пыдвыл, пӧзь, йыре понон), пунӥськыны, пулэз чильпаса вандылыны, туй вылэ пужы шуккыны кутскизы. Пужы пуктыса керттӥськон али дыре но удмурт нылкышноос пӧлын тужгес яратоно киужен лыдъяське.

Удмурт культураын бадӟым инты басьтэ ӵыжы-выжы ласянь яке бускель ласян юрттэт ― веме (взаимопомощь). Веме ӧтчаллязы бадӟым секыт ужъёсты быдэстыку: корка ӝутыку, бакча гырыку-кизьку, пудо вандыку но мукет. Котьку сямен, веме бадӟым куноятонэн йылпумъяськылӥз.

Вазенысен удмуртъёс бӧляк дэменлыкъёсын улӥзы. Дэменлыке ӵемысь одӥг выжыысь потэм семьяос огазеяськылӥзы. Огъя вераса ― бадӟым семьяен. XIX даурлэн шорозяз бадӟым семьяысь люкиськыса, атай юрт котырегес ик люкенак пуктӥськылӥзы. Озьы ке но, ю бусыоссы но, итымъёссы но, мунчоосы но со вакытэ огъя вал на.

XIX даурлэн пумаз ульчаос кылдытъяны кутскизы. Кивалтэтлэн Пуктэтэзъя, табере ӵыжы-выжыос радэн-радэн пуктӥськыны кулэ вал. Озьы кылдӥзы гуртъёс, черкогуртъёс, починкаос. Ӵемысь соос ошмесъёс котырын, шуръёс кузя интыяськемын вал, малы ке шуоно, таӵе интыосын вуко пуктыны тупамонгес луэ. Инты быръён ласянь удмуртъёслэн нимысьтыз сямзы вылэм. Туно (вӧсясь) тӧдьы яке гордмыт ошлэн сюр висказ вӧсь сюмык пуктэ но ошез лэзе. Кытчы со дугдэ, отчы ик гурт пуктӥське. Со выллем сямъя ик куала пуктон инты утчаллязы.

Вотяк кышномурт. XVIII даурлэн пумыз.

Фёдор Солнцев. Вотяк нылмурт. 1838-тӥ ар

Юртъер но гидкуа

Удмуртъёслэн гидкуа котырысь пуктӥськемъёсссы П-буква выллем сыло (гидкуазь). Паськыт азбар ульча ласянь корлэсь ӝутэм кенерен котыртэмын. Отын ик юн юбоосын пыкъям но кык пало липетэн ӟезьы сылэ. Вераны кулэ, ӟезьыын тунгонъёс но мукет ӵогаськонъёс ӧй вал.

Шоразгес ик улон корка но корказь, со бордын одно ик одӥг яке кык этажъем кӧлан кенос но ю кенос пуктэмын. Палэнынгес ― пудо гид, йӧгу, пу но ужан тӥрлык возьыны чаклам липет ул яке лапас, мунчо но куала.

XIX даурлэн кутсконаз удмурт коркаос фундаменттэк пуктӥськылӥзы. Улӥ коръёсты, сирен зыраса, му вылэ ик понылӥзы. Нырысь-валысь ӵын коркаосын улӥзы. Муръёез ӧй вал. XIX даурлэн пумаз коркаоссэс бугро ӵыпыса ӝутылӥзы ини. Улӥ коръёсты инъет интые пужым «пукон» вылэ пуктылӥзы. Фундамент вылэ XX даурлэн кутсконаз гинэ пуктӥськыны кутскизы, со но тужгес узыръёсызлэн гинэ вал. Коръёсты, сэрегъёссэ лусйыса, вылысьтыз вылаз ӝуйы вылэ выдтылӥзы. Котькытын сямен, коркаос кык пало липетэн, одӥг этажъемесь вал. Ӵемысь куроен яке беризь курен липылэмын. Уйпал но шор удмуртъёслэн, лымшорпалъёсын ӵошатыса, выжлёгетэз ӝужытгес. Со улын бакча сиён но мукет котыр возён инты ― гулбеч лэсьтэмын. Вӧлдэтэз но выжлёгетэз ӧс паласен кутскыса, тӧршор пала вӧлдо. Удмурт сямъёсын но огшоры улонын шӧдскымон инты басьтэ мумыкор. Корка ӝутыку мумыкор сэрегъёсы ыжгон но азвесь коньдон поно, сонябыдӟа секталаез возьыны капчигес, пе, мед луоз. Мумыкорлэн утись кужмызлы осконэн герӟаськем сям-нергеос али ке но кылемын на. Кылсярысь, мумыкор сьӧрын вӧсяськыны уг лэзё яке армие кошкыкуз некрут мумыкоре, мед утёз шуыса, туг шуккыса кельтэ.

Вазенгес укноос но туж пичесь гинэ вылэм, соос но одӥг радын ӧй вал. Пытсаллязы ӟустариен яке вандэм пудо ӝушен. Кезьыт куазен педласянь куро миндэрен ворсаллязы. Берлогес косяк янакъёс лэсьтылыны дышизы. Пырон ӧслэсь бурпалан шуккем гур сылӥз. Гур сьӧрын вӧлдэт улэ кӧлан полатьёс юнматъяллязы, борддор кузя паськыт ӟусъёс лэсьтылӥзы, ӟус йыр азе ӝажыос шуккылӥзы. Укно азьын ӝӧк но пукон сылӥз. Берлогес ини пу валесъёс но тусьты-пуньы возён шкафъёс кылдӥзы. Со сяна коркапуш тӥрлыксы ӧй вал. Ӵемысь коркан одӥг гинэ пукон вал, сое нимысьтыз корка кузёлэн шуыса, мукетъёслы со вылын пукыны ӧз лэзьылэ, уката но пиналъёсты. Нош ӝӧк вылын, ванё-буро луон понна, котьку сылал но нянь колдӥ возьыны косылӥзы.

Вашкала коркан висъетъёсыз ӧй вал, соин сэрегъёсаз ӵемысь кышнояськем паръёс интыяськылӥзы. Лымшор удмуртъёслэн коркалэн гур сьӧр люкетэз, висъямын ӧй вал ке но, кышно пал шуыса нимаськиз, татчы воргоронъёсты пыраны уггес лэзьыло вал. Уйпалъёслэн сыӵе сямзы уг пумиськы.

Ӧсэз вашкала удмуртъёс мукет дуннеен герӟась маке шуыса лыдъяллязы. Уйлы ӵогаськыса, кылчинзэс возьмамтэ куноослэсь, висёнъёслэсь но мукет убиръёслэсь утьыны курыса вӧсяськылӥзы. Вазенгес вордскем нунылэсь гогызэ но ӧслэн кужмыныз ӵошатыса, ӧс кусыпын ӵогылӥзы. Али дыре но, ог дышемъя, сюрес вылэ потон азьын, ӧс кусыпетӥ вамыштыкузы, удмуртъёс Инмарлы юрттэт курыса вазисько. Эшшо ӧс вамен номыре но сётыно но, басьтыно уг лэзё. Али ке но уг лэзё ӧс кусыпе лёгиськыны но ӧсэз йыггетыса пытсаны. Сое, пе, каньылэн, шыпытак гинэ ворсано.

Улон корказылэсь вылтуссэ чеберман сярысь вашкалаос ӧз ик сюлмаськылэ. Ӵемысь коръёслэн кузьдалазы но пӧртэм вал, укно наличникъёсты но ӧз чебермаллялэ. Со понна кенос азь юбоосты шукырмыт чебер карыны турттылӥзы. Вандылыса чебермам наличникъёс но ӟезьы капкаос XX дауре гинэ вуизы.

Удмурт кенос пуктӥськемезъя но кутӥськемезъя скандинав калыклэн пуктӥськемъёсызлы тупа, со эшшо огпол юнматэ на вашкала выжыосмылэсь скандинав калыкен кусыпъяськемзэ. Улон азинскемъя, вашкала кеносъёс алиеныз ӵошатыса, сокем ӧз ик воштӥське. Кеносын котыр возён сяна, солэн одӥг палыз гужем кӧлан интылы люкемын вал. Котлэсь но пӧйшуръёслэсь утиськон вылысь, кеносэз ӝужыт юбо вылэ пуктылӥзы. Борддор кузя ынэн возъям кӧлон инты ладъяллязы, мукет борддор кузяз ― дӥсь ошылон сюры. Пумен солэн улӥ люкетэз но кулэ луись интылы пӧрмиз. Кенос нылкышно палэн лыдъяськылӥз. Татын ӵемысь нылкышно уж тӥрлыкез возьылӥзы: куиськон станок, черсъёс, кубоос но мукет. Воргоронъёслы юаськытэк татчы пыраны уг яра вал.

Куа (куала) ― аспӧртэмлыко пуктӥськем: выжлёгеттэк, вӧлдэттэк, укнотэк. Котькуд семьялэн одно ик аслаз куалаез ― вӧсяськон интыез луыны кулэ вал. Гужем татын сиён пӧраллязы. Куалалэн шор интыяз изъёслэсь учог лэсьтэмын. Со азьын пу курик вылын пурты ошемын. Борддоръёс кузя ӟусъёс юнматэмын, паллянпал сэрегаз ― ӝӧк. Мудор сэргын вӧсяськон арбериосын но мудоръёсын пичияк ӝажы шуккемын, татын ик возьылӥзы вӧсяськыку кутӥськись посудаез. Лымшор удмуртъёс куала вӧзазы нимысьтыз сиён возён инты лэсьтыло на вылэм. XIV—XV даурозь куала удмуртъёслэн ялан улон интызы вал.

Йӧскалык дӥськут но чеберъяськон арбериос

Нырысьсэ удмурт дэрем сярысь веранъёс 1726-тӥ арын шедьтэмын. Удмурт йӧскалык дӥськут со ― удмурт калыклэсь аспӧрмосо но ужась луэмзэ возьматӥсь пус. Со сяна, удмурт дэремлэн туж юн шӧдӥське утись кужымез. Озьы ик нимаз басьтэм ёзлюкетъёсыз сое нуллӥсьлэн кин луэмез сярысь верало: кышнояськемын яке кышнояськымтэ, арлыдзэ, вӧсьбурзэ но мукет. Удмуртъёслэн улон интызыя висъяське дӥськутсы но. Кылсярысь, уйпал удмуртъёслэн лымшорпалъёслэсь бездытгес луэ. Ӵемысь соос куинь буёлэз куто: тӧдьы, горд но сьӧд. Озьы ик пӧртэм учыръёслы пӧртэм дӥськут чакламын: огшоры нуллон, ужан, вӧсяськонлы яке чеберлы (берлоез пӧлы ик пырто бызён но ватон дӥськутэз).

Уйпал удмурт нылкышно дэрем перм калыкъёс пӧлысь тужгес вашкалаез лыдъяське. Комплектын одно ик луыны кулэ шортдэрем (ӟуч сямен распашной кафтан), дэрем яке пестросаес (ӟуч сямен рубаха). «Пестросаес» кыл гордэн-тӧдьыен пужыятыса куэм саес бордысь пӧрмемын, малы ке шуоно, быдэсыз дэрем тӧдьы дэралэсь вуриське. Чырты пасез котрес, сӧзулаз гордэн-тӧдыен сюбег чур вурӟемын, куддыръя со пужыятэмын луэ. Бордаз одно ик луэ на азькышет (ӟуч сямен фартук без грудки). Сое пӧртэм чильтэръёсын, пужыосын но лентаосын чебермаллязы. Шулдыръяськон нуналъёсы азькышет интые пужыятэм кускерттон борды чебер ӵушкон яке кышет ошылӥзы ― урдэс кышет. Озьы ик одно муресазь яке кабачи (ӟуч сямен нагрудник) нуллылӥзы. Кабачи быдэсак буртчин сӥньысэн пужыятэмын вал, нош XIX даур пумын сое воштӥз турлы буёло басма юдэсъёслэсь вурем муресазь.

Паськыт вӧлмемын вал нылкышно йыре понон ― такъя. Ӵемысь сое пӧртэм лентаосын но манетъёсын чебермаллязы. 10-12 аресъем нылашъёс котрес такъя нуллӥзы, 14-15 аресъемъёсыз — кузялэс такъя. Выль кен сюан нуналаз кыксэ ик вылысьтыз вылаз дӥсялляз. Такъя сяна егит нылашъёс йыр керттэтъёс, лентаос тӧдьы кышет, праздник нуналъёсы — кашемир но буртчин кышет керттылӥзы. Бызем нылкышнолы одно ик йырӵушкон (весяк кышет, йыр котыр) керттыны кулэ вал, солэн пумъёсыз горд куэм лентаосын но пӧртэм пужыосын чебермамын.

Толалтэлы кечато дэралэсь кильымо шортдэрем вурылӥзы. Кусказ кильымаса, кузь саесэн. Вылаз озьы ик азькышет керттылӥзы. Толалтэ шуныт ньыль сэрего кышет нуллӥзы (гужем куиньсэрего кышет нуллылӥзы). Вылдӥсь огшоры ыж кулэсь вурылӥзы.

Лымшор удмурт нылкышнолэн дӥськут комплектаз одно ик луыны кулэ: шортдэрем (ӟуч сямен рубаха), айшет (зуч. фартук), кыкрак (ӟуч. нагрудник), кызьпу туйлэсь лэсьтэм ӝужыт йыре понон ― айшон, йыр ӵушкон ― чалма, йыркерттэт (ӟуч. налобная повязка), сюлык (ӟуч.платок-покрывало), гужемлы векчи куэм дэралэсь вылдӥсь, саестэм (ӟуч.кафтан-безрукавка), зыбын (ӟуч.кафтан из полушерстяной домотканины), дукес (ӟуч.кафтана из шерстяного домашнего или фабричного сукна), пась (ӟуч. шуба). XIX даурлэн пумаз — XX даурлэн кутсконаз уйпал удмурт дэремен ӵошатыса, лымшор дэрем куӵо дэралэсь, кык ласянь кильымо, паськыт саесо но пичияк сылӥсь сиресо вурылӥзы. Муресшетэз (мурескышет яке кыкрак) дэрем улын нуллӥзы, пырак гадь вылэ дӥсяса. Дэрем сӧзые 12-15 см пасьта итэт вурӟылӥзы, соос вискы пужыятэм чур. Айшетсы (ашшет), гадез шобыртӥсь, сӧзулаз озьы ик кильым вурӟылӥзы.

XVIII—XIX дауръёсы чеберъяськон арбериос ӵемысь азвесь манетъёслэсь лэсьтылӥзы (царской яке векечи азвесь манетъёс), корт бычыос, бирдыос но мукет чыры-пыры макеос вурӟылыса. Бисерез но пияла весь мульыосты туж шер кутылӥзы.

Пельугыос но ӵемысь векчи манетъёслэсь лэсьтылӥзы. Соос ангес ултӥ кыскем сӥньысэн герӟаськылӥзы. Поскесъёс (ӟуч. браслет) но суйпосъёс (ӟуч. браслет на запястье) озьы ик кортлэсь лэсьтылӥзы. Соос кык пӧртэмесь вал: пушказ лякем изъёсын паськыт поскес но сюлэг поскес. Чыртывесьёс пӧлысь тужгес вӧлмемын вал качек но лага. (Качек — векчи манетъёсын, весь мульыен но тӧдьы куалемъёсын чебермам, чырты борды тач-тач керттэм юдэс).

Озьы ик вал на быдэс чыртыез но гадез кускозь шобыртӥсь чигвесьёс. Таиз ӵемысь бадӟым манетъёсты вурӟылыса лэсьтэмын луэ вал. Берлогес кутӥськыны кутскиз кироскал (ӟуч. шнурок для креста), сӥньысэ сузьем весьёсын валче векчи манетъёс, шораз ыргон кирос. Христианизацилэсь азьпал кирос интые дэмдорзэс (ӟуч.воршуд пус) думыса нуллӥзы. Нылкышно чеберъяськон арбериос пӧлын нимаз радын сыло пӧртэм пумо калъёс, кудъёсыз палллян пельпум вылтӥ бур ки улэ дӥсясько — камали (ӟуч. чересплечное украшение из серебряных монет). Лымшор удмуртъёслэн — бутьмар.

Пыдазы нылкышноос котьку сямен чуглэс (ӟуч.чулки) дӥсяллязы. Вурылӥзы соосты зӧк куэм тӧдьы яке куӵо дэралэсь яке ыжгон сӥньыслэсь керттылӥзы. Чуглэсъёсты пыдес ултӥ калъёсын керттылӥзы. Толалтэ чуглэс улэ ыжгон, гужем — дэра бинялтонъёс дӥсяллязы. Чуглэс вылтӥ пыдзэс тӧдьы дэра пужбинялтонэн котыръязы. собере гинэ кут кутчаллязы. Удмуртъёслэн кутъёссы, ӟучъёслэсь пӧртэмесьгес вал, пунэмзыя но, кабзыя но, йылос ныроесь.

Воргорон дӥськут ӟуч дӥськут выллемгес ик луэ: тӧдьы дэралэсь, нош берлогес куӵо дэралэсь вурем дэрем (ӟуч. косоворотка), кузьдалаезъя пыдесозь, пунэм яке куэм кускерттон. Дэрем пужыос озьы ик вераллязы кузёезлэн ужез но быгатонлыкъёсыз сярысь. Вӧсяськон но праздник нуналъёсы нимысьтыз чебермам паськыт кускерттон ― путо керттылӥзы, паськыт вамышо штани, ӵемысь лызэн-тӧдьыен куэм дэралэсь вурылӥзы. Толалтэ дукес, огшоры ужан нуналъёсы кильымтэк, праздник нуналъёслы нимысьтыз кусказ кильымо вурылӥзы. Йыразы дэралэсь ик вурем яке гындэм йылсо шляпа. Толалтэ — ыж кулэсь вурем изьы. Пыдазы пужпинялтонэн (ӟуч. онучи) кут, праздник нуналэ — сапег, (толалтэ гынсапег).

Сиён-юон

Удмуртъёслэн ӝӧк вылазы котьку сямен сӥльлэсь но будосъёслэсь пӧраськем сиёнъёс луо. Малы ке шуоно, та калык вашкала дырысен нюлэскын бичаськыса кӧтсэ тырылӥз (емыш, турын-куар, губи, пӧртэм будос выжыос). Туала вакытэ но пӧраськоназы со бадӟым инты басьтэ. Кылсярысь, шыдэз ик пӧртэм пумо пӧрало: ныгылиен, губиен, кеньырен, кубистаен, чорыглым, кушманэн но киренен сюкась, колыс но мукет.

Йӧллэсь пӧрамъёс пӧлын тужгес вӧлмемын чырсатэм йӧл (ряженка), йӧлпыд (простокваша), аръян но кузятэм (творог). Сӥлез пырсато, пыжо, ӵемгес пӧзьто. Озьы ик куалекьясь (студень) пӧзьто но виртырем (кровяные колбасы) лэсьто. Озьы ик удмурт йӧскалык сиёнэн лыдъяське пельнянь. Пӧртэм пушкесэн тырмытыса пӧрало: сӥлен, кубистаен, картофкаен, губиен, пешникен, чорыген. (Пельнянь кылэз ӟучъёс коми кылысь асэстӥллям), зыретэн табань (лепёшки с яичной подливкой), перепеч, мильым (блины), кыстыбей. Юонъёс пӧлын ӵемгес горд кушманэн сюкась, емыш ву (морс), сур (пиво), мусур (медовуха), кумышка (самогон), уйпал ёросъёсын варсен вина пӧзьто.

Лулпушлыко культура

Калык праздникъёс но юмшанъёс

Калыклэн улоназ бадӟым инты басьто ар ӵоже ортчись сям-нергеос. Тросэз бадӟым юмшанлы пӧрмемын. Сыӵе шулдыръяськонъёсы ӵемысь быдэс гуртэн пыриськылӥзы. Таӵе ужрадъёс калык устолыкез шараясь яркыт адӟытонлы укшаллязы: устно-поэтической, музыкально- хореографической, прикладной но театральной. Шулдыръяськем сяна, соос пыр егит калык улонэз валаны, калыклэсь трос аръёс ӵоже люкам мур визьзэ тодыны но улон дунлыкез шӧдыны дышетскылӥз. Калык сямъёс, ваньмыз сямен, музъем ужъёсын герӟаськемын: гырон-кизёнэн, пӧйшуранэн, чорыганэн. Осконъёсын, кылан-веранъёсын, чаклам тодметъёсын но кырӟанъёсын.

Тулыс но гужем сямъёслы инъет луэ гырон-кизён, Кылдысинлы куриськон но Музъем-мумылы тау карон. Паска (Быдӟым нунал, Великтэм, ӟуч сямен Пасха) тулыс вуонэз но ар понна нырысьсэ бусые потонэз пусъёнлы сӥземын. Со бӧрсьы кыкетӥез нунал кизьыны потонлы сӥземын (мукет нимъёсыз: Кизьыны потон, Кидыс поттон, Геры поттон, Акашка, Акаяшка). Кизён ужъёс йылпумъяськем бере Гербер шулдыръяськон ортчытъяло (мукет нимъёсыз: Гырон быдтон, Ю Вӧсь, Бусы Вӧсь) но Тройча (яке Куар басьтон, Куар вӧсян, Трочинь). Та праздникъёс котьку гужем нунал берытскон азьын ортылӥзы.

Сӥзьыл но толалтэ ортчисьёсыз герӟаськемын ю-нянь утялтонэз йылпумъямен но Музъем-мумылы тау каронэн. Та вакытэ ортчись калык сям сузьетэз усьтэ Виль (ӟуч сямен Ильин день) праздник. Та нуналысен выль бакча сиёнэз веръяны луэ ини, нош ӵуказеяз бусые араны пото. Таиз цикл Сӥзьыл юон шулдыръяськонэн йылпумъяськылӥз.

Тол сям-йылолъёсын сузьетэз усьтэ Вожодыр. Котьку сямен ик со толалтэ нунал берытскон вакытлы тупа. Вашкалаослэн оскемзыя, та дыре, сьӧд кужымъёс кузёясько. Соин ик Вожодыре уг лэзё секыт ужез быдэсъяны, черсӥськыны но дӥськут миськыны. Удмуртъёс пӧлын христианизаци ортчем бере, Выль ар но Рождество шулдыръяськонъёсын сураськыса, Вожодыр Ымусьтонысен (Рождество) кутскыса, Йӧвылэсултонозь (Крещение) кыстӥськылӥз.

Ӵемысь тол йылолъёс семья куспын возиськись сямъёсын но шунды берытсконэн герӟаськемын. Кылсярысь, Йыр-пыд сётон (кулэм ӵыжы-выжыез буре ваён) яке тулыс/сӥзьыл кисьтонъёс. Толалтэез Вӧй юмшанэн келяло (мукет нимъёсыз: Вӧй, Вӧйдыр, Вӧй пырон-потон, Вӧй келян, Масленча). Со быдэс арня кыстӥстӥске, гурезьын нискыласа, лымы букосын погылляськыса, ог-огзы доры куное ветлыса, тулыслэн вуэмезлы шумпото.

Та сям-йылолъёс, калыклэн улоназ юн выжыяськыса, туала вакытэ но кудо-ог интыосын возисько но пичияк выльдӥськыса мыло-кыдо пусйисько.

Фольклор

Йӧскалык устолык но чеберлык калык пӧлын висъяськытэк кутӥське: калык быгатонлык, калык тодон-валан, калык визь но сюбеггес валатонэн: калык кылос, калык кылбурет.

Фольклорлэсь улонын интызэ но кулэлыксэ яркыт возьмато одӥг кылвыжыем терминъёс: мадь, мадькыл, мадиськон. Mo кылвыжы ваньмаз сямен финн-угор кылъёсын «сказывать, рассказывать, славить, петь, загадывать, передавать тайное, учить, советовать, передавать опыт, познавать мир» валатонэн кутӥське.

Вашкалаос кыллэн кужмызлы юн оскылӥзы. Кылсярысь, котькуд бадӟым ужез, секыт малпанэз быдэстон азьын нырысь-валысь одно ик кылчинъёслы юрттэт курыса тункылын вазиськылӥзы. Тункыл куриськон кыллы но пелляськон кыллы матын луэ. Ӵемысь кутӥське пеллян кыл (висись муртэ йӧнатыку), кыжкыл (кин ке вылэ юриськыса), виркыл , тылкыл но яратон вылэ тупатон кылъёс. Огъя ужъёсын герӟаськем куриськонъёсын Инмарлы Быдӟым вӧсьёсын туноос яке вӧсясьёс вазиськылӥзы.

Удмурт калыкез кемаласен кырӟась калык шуо. Малы ке шуоно, калык ужакуз но, шулдыръяськыкуз но, кайгырыкуз но сюлмаськон-веранъёссэ кырӟан пыр кисьтылӥз. Уйпал удмуртъёслэн крезьгуро творчествозы кык пӧртэм луэ: крезь (кылтэк кырӟан) но мадь (кылъёсын кырӟан). Пумиськыло быдэсак междометиослэсь гинэ пӧрмем кырӟанъёс: э, ялэ, я, яй, дон ке нимаз кыл сочетаниосын. Егит нылашез атай юртысь, яке пияшез армие нимысьтыз келян гуръёсын келяло. Озьы ик паськыт вӧлмемын шудон гуръёс но эктон гуръёс. Лымшор удмуртъёслэн но пӧртэм пумо гуръёсссы пусъемын. Вань финн-угор калыкъёс сямен ик удмуртъёс асьсэ кырӟан гуръёссэс «мае адӟисько, сое ик кырӟасько» принципъя кылдытъяло.

Фольклорлэсь необрядовой люкетсэ мадёсъёс, былинаос, быличкаос но выжыкылъёс кылдыто. Пиналъёсты дышетон но визьман понна пӧртэм жанръёсын нимысьтыз группа кылдытэмын. Отчы пыро: калык чакланъёс , дышетон поверкаос но алонъёс, лэчыт веранъёс, кыл шудонъёс. Юри пиналъёс понна нимысьтыз исаськонъёс кылдытэмын.

Удмурт фольклор лулчеберетлэн висъянтэм люкетэз но чеберлыко литературалэн инъетэз луэ.

Литература

Удмурт литератураез тужгес егитъёсыз литератураос пӧлы пырто. Куд-ог тодосчиослэн малпамзыя, удмурт литературалэн азинскон сюресэз туж ӝоглыко ортчиз. Кылсярысь, Петер Домокош удмурт литературалэсь азинскмзэ таӵе вакытъёсъя радъя:

• 1767-1889-тӥ аръёсы — удмурт литературалэн кылдон инъетэз;
• 1889-1918-тӥ аръёсы — удмурт литературалэн кутскон вакытэз;
• 1918-1938-тӥ аръёсы — удмурт литературалэн юнмамез;
• 1938-1956-тӥ аръёсы — удмурт литература тоталитаризм вакытэ;
• 1957-тӥ арысен — удмурт литература демократизаци вакытэ.

Тужгес нырысьёсыз удмурт кылын гожтэм кылбуръёс ― со ӟуч кылысь берыктэм императрицаез данъян кылбуръёс. Соос кылдытэмын Вениамин Пуцек-Григорович кивалтэм улсын, 1767-тӥ арын Екатерина II Казане вуылэмезлы но 1778-тӥ арын Казань наместничествоез усьтонлы сӥзьыса. Удмурт литературалэн вордӥськон ареныз 1889-тӥ арез лыдъяло. Ӵапак соку поттэмын нырысетӥ удмурт тодосчилэн Григорий Верещагинлэн «Вотяки Сарапульского уезда Вятской губернии» ужез но «Чагыр, чагыр, дыдыке» («Сизый, сизый, голубок») ― нуны веттан кырӟанэз.

Нырысетӥез удмурт кылын гожтэм поэтической произведение — Михаил Можгинлэн «Беглой» балладаез. Со поттэмын вал 1910-тӥ арын. Нырысетӥез кылбурен гожтэм трагедия — Кедра Митрейлэн (Дмитрий Иванович Корепановлэн) «Эш-Терекез». Поттэмын 1915-тӥ арын. Нырысетӥез роман — Кедра Митрейлэн ик «Секыт зӥбет» («Тяжкое иго»). Поттэмын 1929-тӥ арын.

1930-1950-тӥ аръёсы ӝот-ӝот азинскыны кутско литературалэн пӧртэм жанръёсыз. Тодмо луо выль нимъёс (П. Блинов, А. Лужанин, Т. Архипов, М. Коновалов, И. Гаврилов, Ф. Кедров). Та вакытысь произведениослэн валтӥсь темазы луэ социализмез лэсьтон но выль адямиез дышетон.

1950-1980-тӥ аръёсы удмурт гожъяськисьёслэн творчествоязы юн шӧдӥське калык кусыпъёсты эскерон. Кылдо приключенческой но детективной повестьёс. Нылкышно лирикалэн ӧрыз висъяське.

1990-2000-тӥ аръёсы удмурт литератураын кылдэ документально-художественной, мемуарно-биографической проза. Та вакытысь авторъёс (Н.Куликов, А.Волков, В.Шибанов, Л.Емельянов) выль ӧрез усьто: этнофутуризм, религиозно-христианской направление, «массовой» литературалэн эстетикаез.

Удмурт нылпи литературалы кутскон сётӥз Кузебай Герд (Кузьма Павлович Чайников, 1898—1937), 20-тӥ аръёсы туж быгатӥсь кылбурчи, прозаик, фольклорист, драматург, музыковед, кылысь кылэ берыктӥсь но мер ужчи шуыса тодмо луэ. Со юри нылпиослы чаклам 80 пала кылбур но 50-лэсь трос верос гожтӥз.

Театр

Театральной устолык удмурт культураын тужгес вашкалаез но тужгес азинскемез ӧр луэ. Удмурт Элькун ― быдэс дуннелы тодмо луэм крезьгурчилэн Петр Ильич Чайковскийлэн но СССР-ысь калык артисткалэн Ольга Леонардовна Книппер-Чеховалэн вордскем шаерзы.

Туала вакытэ Удмуртиысь театрал устолыкез возьмато:

• Удмурт Элькунысь Драмая ӟуч кун театр,
• Удмурт Элькунысь Операя но балетъя П. И. Чайковский нимо театр (1958-тӥ арысен),
• Удмурт Элькунысь Йӧскалык кун театр (1931-тӥ арысен),
• Удмурт Республикаысь мунё кун театр (1935-тӥ арысен),
• Кырӟанъя но эктонъя Айкай фольклор теар (1990-тӥ арысен),
• Муниципал театр «Молодой человек» (1991-тӥ арысен),
• Сарапулысь Драмая театр (1911-тӥ арысен),
• Глазовысь Драмая «Парафраз» театр (1983-тӥ арысен),
• Ижысь Покчи учкисьлэн театрез,
• Театр «Точка»,
• Театр «Птица» (1988-тӥ арысен),
• «Балаганчик» нылпи театр (1991-тӥ арысен),
• Интерактивной нылпи театр «7 чудес» (2014-тӥ арысен).

Быдэс удмурт калыклэн историяз нырысьсэ удмурт кылын спектакль возьматэмын вал 1918-тӥ арын 2 гудырикошконэ Глазов уездысь Ягошур гуртын. Со вал нырысетӥез аспӧрмосо но ас мылкыдъя кылдытэм калык театр. Режиссёр интыын но рольёсты шудӥсь артистъёс интыын огшоры дышетӥсьёс вал. Драмая удмурт театр усьтэмын вал 1931-тӥ арын 7-тӥ тулыспалэ И.Гавриловлэн «Вало ӧр куашетэ» пьесаезъя пуктэм спектаклен. 1996-тӥ арысен Удмурт Элькунысь Йӧскалык кун театр шуыса нимамын.

1961-тӥ арын потэмын Г. А. Корепановлэн «Наталь» операез — нырысетӥез удмурт кылын гожтэм опера. 1962-тӥ арын кылдытэмын нырысетӥез удмурт балет «Италмас». Солэн авторез Г. М. Корепанов-Камский.

Дышетон удыс

Удмуртъёс пӧлын ӟуч но церквнославянской кылъёсын дышетон христианизаци вуэмен, XVIII дурлэн кутсконаз вӧлмиз. Христианизациен валче удмурт (вотской кыл) но азинскиз: кылдылӥзы выль функциональной стильёс, узырмиз вераськонын кутӥськись кыл. Соку ик кылдӥзы дышетонэз анай кылын радъян сярысь малпанъёс. XIX даурлэн пумаз — ХХ даурлэн кутсконаз нырысетӥ удмурт дышетӥсьёс но югдытӥсьёс висъяськизы : Г. Е. Верещагин, К. А. Андреев, И. В. Васильев, И. С. Михеев но мукетъёс. Миссионерской школаос сярысь 1902-тӥ ар понна ведомостьын укмыс удмурт но куать суро дышетскисьёсын школаос пусъемын. Ватка губерниысь куинь уездъёсысь миссионер школаосын 359 удмурт пиналъёс дышетскизы.

Совето тӧрлык вакытэ йӧскалык дышетон азе, нырысь ик кык кыллы дышетон но вань калыкез дышетон ужпум пуктэмын вал. XX даурлэн кыкетӥ палараз дышетон удыс огъя политической программалэн люкетэзлы пӧрмиз но «совето калыкез» будэтон улсын радъяськиз. РСФСР-ысь Просвещения Наркоматлэн нырысетӥ документъёсыз пӧлын вал 1918-тӥ арын 31-тӥ коньывуонэ поттэм «Ӧжыт лыдъем йӧскалыкъёслэн школаоссы сярысь» Постановление. Отын йӧскалыкъёслы анай кылынызы дышетонэз радъяно шуыса пусъемын вал.

1920-тӥ арозь улон интыосын, кытын тросгес удмуртъёс пусъемын вал (Сарапул, Елабуга, Глазов, Малмыж, Вятка губерниосын) 176 удмурт школа усьтӥськиз. Удмурт нылпиослы учебникъёс дасян ужъёс кутскизы, поттэмын «Букварь», «Лыдӟон книга», «Удмурт кыллэн грамматикаез» но методической пособиос. Озьы ке но, арлыдзыя школаын дышетсконлы тупась пиналъёс пӧлысь 40%-эз школае ветлытэк кылизы. 500 сюрс удмуртъёс грамотаез ӧз тодылэ, дышетон удысын ужасьёс тырмыт ӧй вал. Удмурт кылэз тодӥсь дышетӥсьёсты дасян понна 1920-тӥ аръёсы Ижын, Можгаын, Глазовын, Выль Мултанын педтехникумъёс усьтӥськизы 15, вань уездъёсын педагогикая курсъёс радъямын вал.

1941-1942-тӥ дышетон аръёсы шаерын 330 удмурт начальной школа (1338 класс), 52 тыр луисьтэм шор ёзо школа (348 класс), 4 шор ёзо школа (45 класс) вал. Начальной классъёсын дышетон быдэсак удмурт кылын мынӥз, кылемаз — удмурт но ӟуч кылъёсын, 9-10-тӥ классъёсын — ӟуч кылын гинэ. Война бере йӧскалык школалэн ужан удысэз сюбегаз, 1950-тӥ арозь Удмуртиын одӥг но тыр луисьтэм удмурт шор ёзо школа ӧз кыльы.

1980-1990-тӥ аръёслэн кутсконазы шаерын общественной но социально-экономической ужпумъёс чутрак воштӥсько . Шӧдскымон воштӥськонъёс ортчо дышетон удысын но: анай кылъёслэсь но лулчеберетъёслэсь кулэлыксэс берентон но соосты дышетон удысэ пыртон процесс кутске. Кыл но дышетон политика удысын инъет луизы «РСФСР-ысь калыкъёслэн кылъёссы сярысь» (1991) но «Дышетон сярысь» (1992) федерал катъёс. «Дышетон сярысь» катын Росси Федерациысь вань кунмуртъёс анай кылынызы инъет луись огъя тодон-валан басьтыны быгато шуыса пусъемын. 1990-тӥ аръёсы удмурт кылэз дышетонъя йӧскалык дышетон учреждениослэн лыдзы будӥз, 1997-1998-тӥ аръёсы сыӵе школаослэн лыдзы 425-ёзь вуиз. 2012-2013-тӥ аръёсы 251 йӧскалык школа ужаз, отын удмурт кылэз 16 сюрс 189 пинал дышетӥз. Тросэз соос пӧлысь — 231-ез (92%-эз) — гуртъёсын интыяськемын вал; соос пӧлын 14 сюрс 611-ез студентъёс (90,3 %). Элькунысьтымы каръёсын удмурт кылэз 20 школаын 1578 пинал дышетӥз, со пӧлысь 553-ез — Ижкарысь Кузебай Герд нимо гимназиын но 45-ез — Италмас каргуртысь Кун лицей-интернатын.

Вӧсьбур

Нырысьсэ удмуртъёслэн вӧсьбуро йылолъёссы сярысь XVIII дауре гожтэмын вал. Христианствое выжытозь удмуртъёс трос пумо инмаръёссылы, кылчинъёссылы но утисьёссылы вӧсяськылӥзы. Ваньмыз-ӧвӧлэз ― 40 пала. Ваньмызлы нимысьтыз вӧсь кылъёс, куриськонъёс, курбон сётон йылолъёс чакламын вал

Соос пӧлын валтӥсьёсыз луо Инмар, Кылдысин (Му-Кылчин) но Куазь. Сьӧд кужымо кылчин ― Керемет яке Шайтан. Вашкала удмурт Олимплэн куинь радо луэмез дуннелэсь куиньлы люкиськемзэ возьматэ: 1) югыт инбам но солэн инъюгдытӥсьёсыз; 2) музъем но со вылын улӥсьёс; 3) вань явлениос, кудъёсыз ин но му вискын ортчо.

Асьсэ инмаръёссылы удмуртъёс жалятэк сётылӥзы асьсэ узырлыкъёссэс. Кылсярысь, Инмарлы курбон сётыку, вандэм пудо вирез, лы-сьӧмез но сӥль юдэсъёсты сутылӥзы, ӵыныныз валче, пе, Инмар дорозь куриськонъёссы мед вуозы. Кылдысинлы курбон сётыкузы музъеме согылӥзы — «кузьмаллязы», Куазьлы ке — кузэ кыз йылэ ошылӥзы.

1894-тӥ арын Вуж Мултан калык адями виыса курбон сётонын янгыше уськытэмын вал. Берло со Мултан уж шуыса тодмо луиз. Юнме мыскыллянэз шараянын удмуртъёслы В. Г. Короленко дурбасьтӥз. Мултан ужлы сӥзем гожтосъёссэ «Русское богатство» газетын печатлаз (солэн валтӥсь редакторез, но, корреспондентэз но ачиз ик В. Г. Короленко вал).

Удмурт калык пӧлы выль вӧсьбур пыӵамен но мукет калыкен кусыпъяськемен, пумен языческой инмаръёсты ӟуч вӧсьчиослы укшатыны кутскизы, кылдӥзы аспӧртэмлыко образъёс (религиозной синкретизм). Кылсярысь, Николай Чудотворец удмурт Нюлэсмуртэн валчеяське, Кылчин ангел-хранительлы пӧрме но мукет.

Демография

Удмурт калыклэн демографической культураез юн азинскемын. Кылсярысь, вашкала мер эсэпъёсъя умойтэмен лыдъяське пиналвиён, вирсураськон но трос кышно возён. Озьы ик курлаллязы мурт кышно-картэн дусымъяськемез, нылпи куштонэз, кӧтояськемлэсь утиськонэз, кузпалъяськытэк улэмез, люкиськонэз но пиналтэм луонэз. Огъя вераса, сӥлы карылӥзы бадӟым семьяосты.

Калык юн оскыса улӥз, кузпалъяськон — со улонлэн валтӥсь катэз шуыса. Соин ик кузпалтэк кылёнлэсь кышкаллязы, уката нылашъёс. Бызьылӥзы-кышнояськылӥзы 16-17, 20-22 арескысен. Ӵемысь пияшъёслы кузпал асьсэлэсь мӧйызэгес бырйылӥзы. Удмуртъёслэн мукет йӧскалыкъёсын артэ улэмзы семья кылдытон вылын но шӧдӥськиз. Озьы, мурт калыкен кузпалъяськон учыръёс XVIII даурлэн кутсконаз ик пумиськыло ни вал. Христианизациен валче, мукет калыкен сураськем кузпалъяськон учыръёс уката ӵемгес луизы.

Удмуртъёс бадӟым семьяен улӥзы, ӵемысь одӥг липет улэ куинь но тросгес паръёс интыяськылӥзы. Кылсярысь, 1885-тӥ арын Сарапул уездысь Сосновка гуртысь С.Семёновлэн семьяяз 33 воргорон но 38 нылкышно вылэм. Соос пӧлын ― 19 кузпалъёс [Государственный архив Кировской области (ГАКО). Ф.176. Оп. 1. Д. 2779. 6, л. 46об.-50].

Демографи культуралэн но асутён радлыклэн бадӟым люкетэз калык йӧнатонлы висьямын. Со герӟа адями но инкуазь, адями но мерлык кусыпъёсты. Удмурт калыклэн религиозно-мифологической, «иррациональной» йӧнатон амалъёсыз туж паськыт вӧлмемын. Огшоры улонын но соос ялан кутӥськылӥзы. К. Юнглэн верамезъя, йӧскалык сям-йылолъёс, осконъёс котькуд культураын религиозной сяна, психопрофилактической функциез быдэсто но йӧскалыклэсь психика ласянь тазалыксэ юнмато.

Инкуазь луонлыкъёсты, секыт ужбыдэсъянэз, огъя социально-экономической но социально-политической югдурез лыдэ басьтыса, адямилэн улон гумырез 50-60 аресозь кулэсмиз. XX—XXI дауръёсы но демографи югдур умой пала ӧз воштӥсьскы. Тужгес но гуртын улӥсь калык понна.

2023-тӥ арез басьтыса, толшор-оштолэзь куспын Удмуртиын улӥсь калыклэн лыдыз 2 сюрс пала адямилы кулэсмиз. Росстатлэн ивортэмезъя, 2023-тӥ арын толшор толэзе улӥсь калыклэн лыдыз 299 874 адями вал, нош 2010-тӥ арын ― 410,584 адями

2022-тӥ арен ӵошатыса, кулэм муртъёслэн лыдзы 11,4 %-лы кулэсмиз (оглом Россиын — 17,9%-лы, ПФО — 14,2%-лы). Бырем муртъёслэсь огъя коэфициентсэ басьтоно ке, 1000 адямилы 12,6 кулэм мурт лыдъяське.

2023-тӥ арын ньыль толэзь куспын Удмурт Элькунын 1706 кузпалъяськон но 1842 люкиськон учыр пусъемын. 2022-тӥ арен ӵошатыса, кузпалъяськисьёслэн лыдзы 3,7%-лы кулэсмиз, люкиськисьёслэн — 10%-лы йылӥз.

Арысь аре удмурт кылын вераськисьёслэн лыдзы кулэсме. ЮНЕСКО-лэн пусъемезъя, удмурт кыл бырон калэ вуэмын.

Валэктонъёс

Литература

• Бехтерев В. Вотяки, их история и современное состояние [ӟуч] виктор-белов.рф. Эскеремын 14.08.2025 арын

• Верещагин Г. Е. Вотяки Сосновского края [ӟуч] Государственная публичная историческая библиотека. Эскеремын 14.08.2025 арын

• Удмурты: историко-этнографические очерки [ӟуч] elibrary. Эскеремын 14.08.2025 арын

• Пименов В. В., Христолюбова Л. С. Удмурты: Этносоциологические очерки. — Ижевск, 1976.
• Пименов В. В. Удмурты: Опыт компонентного анализа этноса. — Ижевск, 1977.
• Народы России: Энциклопедия / Тишков В.А.. — Москва, 1994.
• Народы России: Живописный альбом. — Санкт-Петербург: типография Товарищества «Общественная Польза», 1877. — 141 с.
• Удмурты/Народы России. Атлас культур и религий. — Москва: Дизайн. — 320 с. — ISBN 978-5-287-00718-8.
• Владыкин В. Е., Христолюбова Л. С. Этнография удмуртов: учебное пособие по краеведению. — Ижевск: Удмуртия, 1997. — 245 с.
• Шутова Н. И. Дерево в традиционном удмуртском мировоззрении // Ежегодник финно-угорских исследований. — 2011. — № 2.

Чӧлсконъёс

• Вотяки // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1892. — Т. VII. — С. 324—328.
• Вотяки // Энциклопедический лексикон: В 17 т. — СПб.: Тип. А. Плюшара, 1838. — Т. XII: ВОО—ВЯЗ. — С. 116—117.
• Фотокаталог Музея антропологии и этнографии им. Петра Великого (Кунсткамера) [ӟуч] РАН. Эскеремын 14.08.2025 арын