Кыстыбей
| Кыстыбей | |
|---|---|
 | |
|
|
|
| Кун | Россия |
| Ку кылдэмын | тодмотэм |
| Кылдытӥсез | тодмотэм |
| Малэсь пӧрамын | |
| Валтӥсьёсыз | ыльянянь, пушкес (картошка пунем яке тари ӝук) |
| Пӧлаз кутыны луэ | Нелькем мак, пыш кидыс |
| Ӝӧк вылэ пуктон | |
| Типез | Сяме пырем сиён |
| Кызьы сиёно | пӧсен |
| Со выллем пӧросъёс | |
| Матын луись | Кутаб, гёзлеме, чуду |
 Медиафайлъёс РувикиМедиа пушкын | |
Кыстыбей (озьы ик пуньмам, куарнянь сокам[1]; (баш. ҡыҫтыбай, биг. кыстыбый, кыстымбый, якмыш, күзикмәк[2], чув. хĕстнĕпай, ӟуч: кыстыбый) — юмал ыльняньлэсь пушкесэн лэсьтэм сяме пырем бигер, башкир, чуваш, удмурт сиён[3][4]. Пушкес чот дышем сямъя кутӥське тари ӝук, сьӧд чабей ӝук но картошка пунем.
Историез
Кыстыбей огез вашкалаез сиён пӧлы пыре, но кылдэм дырыз историысь источникъёсын рос-прос пусъемын ӧвӧл. Солэсь кылдэмзэ герӟало бигер но башкир калыкъёслэн кӧчылыса улэм-вылэменызы, интыысь интые выжыкузы угось огшоры но кӧттыро сиён кулэ вал.
Нырысь-валысь кыстыбейлы пушкес чот кутӥськылӥз тари ӝук, озьы ик нелькем мак но пыш кидыс[5]. Туала вакытэ данэ потэм картошка пунемлэсь пушкес берлогес пӧраськонэ пыӵаз. Историкъёс лыдъямъя, сое кыстыбее бинялтыны ӧдъязы XIX даур пумын—XX даур кутсконын Россиын картошка паськыт вӧлмем бере.
Этимологиез
Башкир, бигер[6] но чуваш[7]кылъёсты эскерись Рифкат Ахметьянов сиёнлэн нимызлы сӥзьыса «Татар теленең кыскача тарихи-этимологик сүзлеге» (Бигер кылъя вакчияк историяя но этимологияя кыллюкам, ӟуч: Краткий историко-этимологический словарь татарского языка) кыллюкамын статья гожтӥз. Со «кыстыбыйлэсь» биг. кыстымбый, баш. ҡыҫтыбай, чув. кӑстӑмпи диалект формазэ поттӥз, кыс- выжыысь («пачкатыны», «прищемить») но -мбый/-мбы суффикслэсь праформазэ кылдытыса. Нимыз «кыстыру» бигер яке башкир «баш. ҡыҫтырырға» глаголлэсь потэмын (пачкатыны, донгыны, туйнаны, сиёнэз лэсьтон амалэз вера: пушкес куарсам няньлэн огпалаз вӧлдӥське но мукет люкетэныз «пачкатӥське».
Тодметъёсыз
Юмал ыльняньлэсь кӧс таба вылын векчи сӥен пыжем табань выллем луэ[8]. Тусызъя пытсамтэ пирог яке сочень кадь адӟиське: пушкессэ куарняньлэн одӥг люкетаз пӧсь дыръяз ик вӧлдо но сое мукет люкетэнызы ӵоктало[8]. Дась кыстыбеез ӵыжатэм я нӧкы вӧйын таш-таш зырало[8]. Пушкес чот кутӥське ӝук (ӵемысь — тари ӝук), рагу, картошка пунем, озьы ик нелькем мак яке пыш кидыс. Удмуртиысь куд-ог ёросъёсын пушкессэ пыжос вылэ вӧлдо но сое рулетэ сямен бинялто.
Кыстыбеез пӧсь дыръяз сиё[9], ӵемысь — нимаз сиёнэз сямен пӧсь чаен гылтыса[9]. Ӝӧк вылэ пуктэмлэсь азьвыл куарнянь сокам медаз сӥя но небыт мед возиськоз шуыса, соосты люкен-люкен тыро но ӵоксэтэн я ӵушконэн шобырто[9]. Сӥям сиёнэз нӧкы вӧен зырам таба вылын яке духовкаын шунтыны луэ[9]. Дышем сямъя кыстыбеез пӧсен сиыны тупатэмын ке но, со сӥямен но мынэ[10]. Та сиёнэз озьы ик Быдӟым визян вакытэ но сиыны яра, пушкеслэсь рецептсэ кӧня ке воштыса.
Рекордъёс
Тужгес бадӟым кыстыбеез лэсьтонъя кӧня ке рекордъёс пусъемын:
- Гиннесслэн рекордъёсын книгаез: 2011-тӥ арын 3-тӥ куарусёнэ Уфаын ортчем «Йӧло кун» (ӟуч: Молочная страна) росси фестиваль улсын дуннеысь тужгес бадӟым кыстыбей пыжемын вал, со Гиннесслэн рекордъёсын книгаяз пыриз. Диаметрез 2 метр 10 сантиметр луиз[11][12];
- Россиысь рекорд: 2023-тӥ арын 12-тӥ инвожое Уфаын Карлэсь нуналзэ пусъён дыръя Россиысь рекорд пуктэмын вал. Пыжиськемлэн быдӟалаез кузьдалае 232 см, пасьталае 120 см луиз. Рекордэз Россиысь кулинаръёслэн ассоциацизылэн вице-президентэз кивалтэм улсын комиссия пусйиз[13][14];
- Официальной луисьтэм вормон: 2024-тӥ арын 12-тӥ тулыспалэ Минскын (Беларусь) «Куноятӥсь Башкортостан» (ӟуч: Башкортостан гостеприимный) фестиваль улсын пӧраськисьёс 3 метр диаметръем кыстыбей пыжизы[15]. Быдӟалаезъя та тужгес бадӟымез кыстыбей вал ке но, вормонэз рекордъёсъя книгаын официально пусъемын ӧй вал[16].
Туала лулчеберетын
Берло аръёсы кыстыбей гастрономиысь тренд сямен данэ потэ ни. 2025-тӥ арын пусъемын: экономикая бугырес вакытэ та пыжиськем валаса сиськонлэн тодметэз луэ[17].
Сиёнэн лулчеберетъя но гастрономияя ужрадъёсы ялан куноято. Кылсярысь, 2025-тӥ арын инвожое кыстыбей Шелковская чечен карын бигеръёслэн Сабантуй праздниказы возьматэмын вал[18], озьы ик сое пӧранлы сӥзем кулинарияя ужрадъёс ортчыло[19].
Калыкен яратымон сиён коммерци удысын но интызэ шедьтӥз. Озьы 2025-тӥ арын «Кыстыбый» нимо ресторанъёсын сеть «Миллиард. Татар» изданиен радъям «Арысь бигеръёс» рейтинг улсын «Бигер ресторан» номинациын вормись луиз. Данъян ужрад ортчиз Кузон кремльысь Присутственные места нимо интыын[20].
Кельышлы сиёнъёс
Пӧртэм выжы калыкъёслэн кыстыбей выллем пӧрам сиёнзы вань — пушкесэн тырмытэм но шори куасалтэм няньлэсь лепёшка[21];
- Кутаб — юмал ыльняньлэсь ӝыныё толэзь выллем пыжем азербайджан сиён. Кыстыбеен ӵошатыса, кутаблэсь дуръёссэ чепылляло, нош пушкесэз сӥльлэсь, вож турын-куарлэсь, тыквалэсь но сырлэсь луыны быгатэ[21];
- Гёзлеме — картошка, сыр, шпинат пушкесэн сяме пырем турк лепёшка. Кыстыбеез сямен ик, сое шори куасалто[21];
- Чуду — Дагестанысь калыкъёслэн сиёнзы — пӧртэм пумо ватсэтэн (сӥль, кузятэм, вож турын-куар, тыква) пытсам пирог-лепёшка[21];
- Кесадилья — мексика сиён, векчи куарсам няне ӵемысь сыр поно но пыжосэз шори куасалто. Валтӥсь пӧртэмлыкез — инъет чот кутӥське кукурузалэсь яке чабейлэсь тортилья[22];
- Паратха — пушкесэн лэсьтэм инди лепёшка. Кыстыбеен ӵошатыса, ватсэтэз (кылсярысь, специосын картошка) пыжон азьын ыльнянь пушкы понӥське[21];
- Баннок — шотланд лепёшка, дышем сямъя сое пушкесэн уг куасалто, но инъетэз юмал ыльнянь луэ[21].
Валэктонъёс
- ↑ Кыстыбей [ӟуч] Удмуртская кухня. Эскеремын 2026-03-05 арын
- ↑ Синонимы к слову «кыстыбый» [ӟуч] sinonim.org. Эскеремын 2026-03-05 арын
- ↑ Кыстыбый – интересные факты, история, особенности приготовления [ӟуч] Центральная библиотека г. Межгорье. Эскеремын 2026-03-05 арын
- ↑ Әхметьянов Р. Г. Татар теленең кыскача тарихи этимологик сүзлеге. — Казань: Татар. кит. нәшр, 2001. — С. 136. — 272 с.
- ↑ Кыстыбый [ӟуч] Республиканский центр развития традиционной культуры. Эскеремын 2026-03-05 арын
- ↑ Ахметьянов Рифкат Газизянович [ӟуч] Башкирская энциклопедия. Эскеремын 2026-03-05 арын
- ↑ Ахметьянов Рифкат Газизянович [ӟуч] Чувашская энциклопедия. Эскеремын 2026-03-05 арын
- ↑ 1 2 3 Кыстыбый с картофелем [ӟуч] ЕдимДома.ру. Эскеремын 2026-03-05 арын
- ↑ 1 2 3 4 Как приготовить вкусные татарские лепешки кыстыбы [ӟуч] Гастрономъ. Эскеремын 2026-03-05 арын
- ↑ Не будь как кыстыбый! – Как готовят национальную татарскую пресную лепешку [ӟуч] permokrug.ru. Эскеремын 2026-03-05 арын
- ↑ Башкирия: самый большой в мире кыстыбый диаметром 2 метра 10 см [ӟуч] u7a.ru (03-09-2011). Эскеремын 2026-03-05 арын
- ↑ Айрат Назипов (12-06-2023) В Уфе приготовили самые большие в России эчпочмак и кыстыбый — побит рекорд Татарстана [ӟуч] Реальное время. Эскеремын 2026-03-05 арын
- ↑ Самый большой в России учпочмак и кыстыбый в мире: в Уфе зафиксированы два кулинарных рекорда [ӟуч] ufatime.ru (12-06-2023). Эскеремын 2026-03-05 арын
- ↑ В Беларуси башкирские повара приготовили гигантский кыстыбый [ӟуч] ufa.bezformata.com (12-02-2024). Эскеремын 2026-03-05 арын
- ↑ Айгуль Нургалеева (12-02-24) Повара из Башкирии испекли в Минске кыстыбый на 500 человек [ӟуч] resbash.ru. Эскеремын 2026-03-05 арын
- ↑ Ольга Флоренко (29-10-2025) Культура бережливости: как татарские лепешки кыстыбый становятся трендом [ӟуч] kubnews.ru. Эскеремын 2026-03-05 арын
- ↑ В чеченском городе Шелковская проходит татарский праздник Сабантуй [ӟуч] ГТРК «Вайнах» (21-06-2025). Эскеремын 2026-03-05 арын
- ↑ Вкусное путешествие в мир татарской кухни: «Кыстыбый» [ӟуч] sobes.tatarstan.ru. Эскеремын 2026-03-05 арын
- ↑ «Татары года – 2025»: главный приз – в Челябинск, награды Калимуллиной и Гатиятулину [ӟуч] Миллиард.Татар (4-12-2025). Эскеремын 2026-03-05 арын
- ↑ 1 2 3 4 5 6 Кесадилья, кальцоне, кыстыбый [ӟуч] ovkuse.ru. Эскеремын 2026-03-05 арын
- ↑ Алексей Пестов Кесадилья или кесадия? [ӟуч] cookingman.ru. Эскеремын 2026-03-05 арын
Литература
- Ахметзянов Ю. А. Татарские блюда. — Казань: Таткнигоиздат, 1970. — 272 с.
- Баязитова Ф. С. Аш-су һәм халык традицияләре лексикасы. — Казань: Дом печати, 2007. — 480 с.
- Әхметьянов Р. Г. Татар теленең кыскача тарихи этимологик сүзлеге. — Казань: Татар. кит. нәшр, 2001. — С. 136. — 272 с.
- Нурмөхәммәтова Р. С. Кайбер татар ризык атамаларына лингвомәдәни күзәтү // Язык — культура — этнос: сборник научных трудов, посвящённый 10-летию со дня основания кафедры общей лингвистики и лингвокультурологии КФУ. — Казань: Отечество, 2013. — С. 192—198. — 312 с.
- Арсланова И. А. Кухни народов Башкортостана. — Уфа: Китап, 2017. — 336 с. — ISBN ISBN 978-5-295-06573-6.
- Блюда башкирской кухни. Комплект из 15 открыток / сост. И. А. Арсланова. — М.: Планета, 1985. — 15 с.
Чӧлсконъёс
- Мигранова Э. В. Кыстыбей // Башкирская энциклопедия / гл. ред. М. А. Ильгамов. — Уфа : ГАУН «Башкирская энциклопедия», 2015—2020. — ISBN 978-5-88185-306-8.