Бесерманъёс

Википедиысь материал
Эскерем гожтос
Бесерманъёс
Ваньмыз 3 122
Вӧлскем * Flag of Udmurtia.svg Удмуртия

2 988

9

8

Кыл Удмурт кыл
Оскон Православие
Ӵыжы-выжы калыкъёс Удмуртъёс, Коми (Коми-зырянъёс, Коми-пермякъёс, Язьва коми)

Бесерманъёс (ӟуч: Бесермя́не) (аснимыз — бесерман; удм. бесерман, биг. бисермән, бечерман[1], устар. биг. керәшен[2]) — Россиысь ӧжыт лыдъем финн-угор калык, интыяськемын Удмуртилэн уйпал но шундыпуксён палаз (Юкаменск, Балезино, Глаз, Яр но куд-ог мукет ёросъёсын) 41 улон интыосын, соос пӧлысь 10 гуртъёсёсын — быдэсак бесерманъёс гинэ уло.

Верасько аспӧртэм улоскылын[3][4], Урал кыл семьялэн финн-угор группаяз пырись удмурт кыллэн вераськетэныз, морфологияя матын луэ уйпал удмуртъёслэн вераськетсылы, фонетикая — лымшор удмуртъёслы[5].

Осконзыя — православной христианъёс; калык вӧсьбурзы туж матын луэ удмуртъёслэн вӧсьбурзылы, озьы ке но шӧдӥське ислам вӧсьбурлэн пытьыез но.

1897-тӥ арын ортчытэм лыдъян-чотанъя Россиын 10,8 сюрс бесерман калык улэ вал[6], 1926-тӥ арын ортчытэмезъя — 10 сюрс адями, 2002-тӥ арын — 3,1 сюрс гинэ. Бесерманъёслэн сыӵе зол кулэсмемзэс валэктыны луэ та калыклэсь, 1930-тӥ аръёсы кутскыса, Совето Союз куашкан вакытозь, удмуртъёс пӧлы пыртэмен. Паспортын йӧскалык луэмзэс удмурт нимын пусъем сяна, озьы ик удмурт шуыса гожтылӥзы калыкез лыдъян-чотан ужкагазъёсын но. 1992-тӥ арын инвожо толэзе гинэ Удмурт Элькунысь Вылӥ Кенешлэн Президиумез «Бесерман калыклэсь азьвыл нимзэ берентон сярысь» Пуктэт кутӥз[7].

Кыллэн кылдэмез сярысь

Бесерман кыл (ӟуч сямен «басурманин» кыллы тупа), булгаръёсын кусыпъяськеменызы, араб кыл борды вуттэ, «мусульманин» шуэмез возьматэ. Та кыл волжской булгаръёс доры Шор Азиысь вуэмын (ӵошатэ «бесермини» кылэз, кудӥныз XIII дауре Хорезмын улӥсьёсты нимало вылэм). IX даурын исламе пырон вакытысен кутскыса, XV даурозь та нимын Волжской Булгариын но Казанской ханствоын улӥсь муртъёсты — Казань сьӧрысь мусульманъёсты (Арск кар котырын улӥсьёсты) нималлязы (XIV—XV дауръёсысь ӟуч источникъёсын «бесерменъёс» шуыса гожтэмын). Ӵапак отын удмуртъёс улӥзы со вакыт. XIV—XVI дауръёсы Зарни Ордалэсь пегӟыса, нош берлогес, XIV даурлэн пумаз, Тамерланлэн Волжской Булгариез пазьгемез бере, Ватка шур йылэ, Чупчи уллапала интыяськизы.

Бесермен калыклэн кӧня ке люкетэз каринской (чепецкой) татаръёс пӧлы пыриз. Со сярысь верало азьвыл вакытысь кылем ужкагазъёс но бигеръёслэн выжыоссы сярысь шежере выжымадёсъёссы. Соосын ӵош вуэм но чылкак мукет калык пӧлы шедем удмурт кылын вераськись калыклы выль асним кулэ луэм. Трос дауръёс ӵоже татын улӥсъёслэсь — уйпал удмуртъёслэсь висъяськыны турттыса, ас выжыоссылэсь Казань сьӧрысь луэмзэс (мусульман луэмзэс) но бесермен музъем вылысь вуэмзэс возьматыны тыршыса, асьсэды бесерман шуизы.

Малпан кылдэ, бесерман кылэз удмуртъёс — бесерман выжыослэсь асэстӥллям — соослэн тюрк бускельёссылэсь, Казань сьӧрын (Арск котырын) улон вакытазы[8][9].

Удмуртъёслэсь висъяськемзы

Антропологи ласянь бесерманъёс чепецкой татаръёслы тупало, удмуртъёслэсь пеймыт йырсиенызы висъясько, нырвылзы погылесгес, йырзы но ымнырзы кузялэс. Туала вакытэ бесерманъёсты туссыя волжско-камско-степной европеоидной типе пырто.[10] Пӧртэм ДНК-эскеронъёсъя, бесерманъёс генетикая Волго-Уральской улосчиослэсь висъясько но Лымшор Сибирьысь тюркоязычнй калыклы матын луо. [11]

Вераськон кылзыя бесерман вераськетын зол уг шӧдӥськы булгар кыллэн шӧмыз (вашкала чуваш кыллэн). Чепецкой татаръёсын кусыпъяськемысьтызы шӧдӥське бигер кыллэн кылем-мылемез[5]

Лыдзы но интыяськемзы

Бесерманъёслэн Удмурт Элькунын интыяськемзы ( %), 2010-тӥ арын ортчытэм лыдъян-чотанъя

Бесерманъёслэн лыдзы 2002-тӥ арын[12]:

Улон инты Лыдзы
Удмуртия:
Глазов кар 404
Юкаменск черкогурт 292
Ёжево черкогурт 235
Шамардан гурт 217
Ворца гурт 198
Юнда черкогурт 188
Турчино гурт 128

2010-тӥ арын ортчытэм лыдъян-чотанъя, Юкаменск ёросын улӥсьёс пӧлын 10,3 %-эз бесерманъёс лыдъясько вал. Озьы ик бесерманъёс уло Киров улосысь Карино черкогуртын но Слободской ёросысь улон интыосын.

Мифология

Бесерманъёслэн мифологической тодон-валанъёссы Шундыӝужанпал Европаысь музъем ужёсын вырись калыкъёслэн лулчеберетсылы тупало но удмуртъёслэсь туж ӧжыт висъясько. Инмарез сяна бесерманъёс пӧртэм интыкузёосты сӥлы каро:

  • Коркакузё — ӟуч: Хозяин дома. Выль урожайлы сӥзем сӥзьыл нуналэ гулбече солы пыжем ӟазег поныса кельто но пи поттыкузы ӟазегъёсты утьыны куро.
  • Гидькузё — ӟуч: Хозяин двора. Пукро кӧснуналэ солы така вандыса курбон сёто.
  • Бакчакузё — ӟуч: Хозяин огорода.
  • Чашшакузе / Лудкузё / Нюлэс бабам — ӟуч: Хозяин леса, луд вылэ поттэм пудоез чакласа возе. Ас кузёяськон интыоссэ нуназе шорын эскерыса ветлэ, соку ик адямилы кышкытлык кылдытэ. Интызэ тӧлпери луыса вошъя. Солэсь нимзэ шара верамлэсь ало. Лудкузёлэсь писпузэ коралтэм мурт одно ик висьыны усёз, шуо. Кузьмалэн но Демьянлэн нуналзы азьын (Кузьминки) солы тэле ӟазег нуыса кельто. Ӵемысь сое Кузьма-Демьянэн но Илья-пророкен сурало.
  • Межакузё / Межамумы — ӟуч: Хозяин поля. Кузёяськон интыостӥз нуназе шорын ортче, пе. Кизён вакыт кутскемлэсь азьпал солы муэ буям курегпуз сого, нош юос шепаськыку ― нянь но сур поныса кельто. Валтэс юосты кизем бере, утьыны курыса, солы така вандо. Аран-кутсан йылпумъяськем бере, берпуметӥ культо улэ вӧйын нянь поныса кельто.
  • Вукузё — ӟуч: Хозяин воды. Пукро азьын матысь шуре ӟаӟег сётыло.

Йылол

Бесерман калыклэн йылолъёсыз пӧлысь валтӥсез шулдыръяськон — Кӧрбан (бес. Көрбан ), музъемлы йыбырттон, курбон сётон, калыкен вӧсяськон, вӧсь ӝук пӧзьтон, шулдыръяськон нунал. Удмуртиысь уйпал ёросъёсын тулыс бусы ужъёс йылпумъяськем бере пусйиське, ӵапак та палан бесерманъёс уло.

Озьы ик учке

Чӧлсконъёс

  1. ↑ Максимов С. А. Самоназвания удмуртов и бесермян, их варианты, названия соседних народов в языке удмуртов и бесермян // Linguistica Uralica. XLIV. 2008. № 2. С. 115.
  2. ↑

    Крещеными татарами считают бесермян их соседи — чепецкие татары… Они называют бесермян кряшен (крещеные), однако ныне термин бытует в качестве экзоэтнонима преимущественно среди чепецких татар старшего поколения. Вместе с тем, он достаточно широко использовался ещё в первой половине XX столетия.

    — Попова Е. В. Семейные обычаи и обряды бесермян. Ижевск: УдмИИЯЛ, 1998. С. 9.
  3. ↑ Тепляшина Т. И. Язык бесермян. — М.: Наука, 1970. — 288 с.
  4. ↑ Бесермяне - Язык бесермян [ӟуч] narodudm.unatlib.ru.
  5. ↑ 1 2 Идрисов Р. И. Тюркские заимствования разных периодов в бесермянском диалекте удмуртского языка. Дипломная работа. М., 2013.
  6. ↑ Алфавитный список народов, обитающих в Российской Империи www.demoscope.ru.
  7. ↑ Постановление Совета Министров Удмуртской Республики «О восстановлении исторического имени бесермянского народа» www.kodeks.ru.
  8. ↑ Напольских В. В. «Бисермины» // О бесермянах : Сборник статей / Под ред. Г. К. Шкляева. — Ижевск: Удмуртский институт истории, языка и литературы УрО РАН, 1997. — С. 50—54.
  9. ↑ Белых С. К. К вопросу о происхождении самоназвания бесермян // VIII Петряевские чтения : Материалы научной конференции. — Киров: Кировская государственная универсальная областная научная библиотека имени А. И. Герцена, 2005. — С. 130—135. Архивировано 28 куарусёнэ 2007 арын.
  10. ↑ Аксянова Г. А. Антропология бесермян // Этнографическое обозрение. 2012. № 2. С. 100—117.
  11. ↑ Грошева А. Н., Шнейдер Ю. В., Морозова И. Ю., Жукова О. В., Рычков С. Ю. Генетическое разнообразие бесермян по данным о полиморфизме митохондриальной ДНК // Генетика. 2013. № 11. С. 1337—1344.
  12. ↑ База микроданных Всероссийской переписи населения 2002 года
«https://udm.ruwiki.ru/w/index.php?title=Бесерманъёс&oldid=427504»-ысь басьтэмын