Бесерман кыллэн но гожъяськетлэн нуналыз
| Бесерман кыллэн но гожъяськетлэн нуналыз | |
|---|---|
 | |
| Типез | Удмуртиын пусйиськись нунал |
| Валатонэз | Бесерман кылэз, историез но лулчеберетэз азинтон |
| Пусъё | Бесерман калык |
| Дырыз | 21-тӥ коньывуонэ |
| Пусъён ужрадъёс | бесерман калыклэн историеныз, лулчеберетэныз но гожъяськетэныз тодматон ужрадъёс |
| Герӟаськемын | Бесерман кылын гожтэм нырысетӥ книгалэн потэм нуналыныз |
Бесерман кыллэн но гожъяськетлэн нуналыз (ӟуч: День бесермянского языка и письменности) ― Удмуртиын пусйиськись нунал. Кун Кенешлэн 41-тӥ сессияз 7-тӥ инвожое 2022-тӥ арын «Удмурт Элькунысь праздникъёс но буре ваён нуналъёс сярысь» Катэ воштонъёсты умоен лыдъямен валче, элькунын юнматэмын Бесерман кыллэн но гожъяськетлэн нуналыз. Пусйиське 21-тӥ коньывуонэ[1]. Та нуналлэн валтӥсь ужпумез ― бесерман кылэз, лулчеберетэз но историез утён но азинтон.
Вакчияк историез сярысь
Бесерманъёс — ӧжыт лыдъем калык, интыяськемын Удмурт Элькунлэн уйпал но шундыпуксён палаз. Бесерманъёс пыртэмын Россиысь ӧжыт лыдъем выжыкалыкъёслэн огъя лыдметазы[2]. 2010-тӥ арын ортчытэм лыдъян-чотанъя, 2201 мурт пусъемын. Куд-огез бесерманъёсты удмурт калык пӧлы пыртэ, нош тросэз со нимаз калык шуыса оскытэ. Та малпанэз юнмато тодосчиослэн эскеронъёссы[3]. Удмурт Элькунысь Кун Кенешлэн наукая, дышетонъя, лулчеберетъя, туризмъя но йӧскалык политикая ялан ужась ӧрилэн тӧроезлэн, Татьяна Ишматовалэн верамезъя:
«Кыл вань ке — йӧскалык но вань. Бесерманъёс асьсэлэсь кылзэс нимаз кылын лыдъяло, бесерман кыл — со удмурт кыл ӧвӧл, со мукет кыл.»
2021-тӥ арын 21-тӥ коньывуонэ «Удмуртия» книгапоттонниын потӥз нырысетӥез бесерман кылын гожтэм книга ― «Вортча мадьёс» («Ворцинские сказы»). Солэн авторъёсыз Удмуртиысь Калык гожъяськись Вячеслав Ар-Серги но бесерман дэменлыклэн азьветлӥсез Рафаил Дюкин. Соин ик бесерман кыллэсь но гожъяськетлэсь нуналзэ пусйыны быръемын та нунал[4]. Толалтэ со арын ик поттэмын бесерман кылын дасям дырпус. Солэн бамъёсыз тодмато та аспӧртэмлыко калыклэн праздникъёсыныз но сям-йылолъёсыныз.
2023-тӥ арын бесерман кылэ берыктыса поттэмын Антуан де Сент-Экзюперилэн «Маленький принц» повесть-выжыкылэз. Со бордын тыршиз Рафаил Дюкин. «Пичи принц» — кыкетӥез бесерман кылын печатлам книга. Соин тодматскон ортчиз 2023-тӥ арын 18-тӥ оштолэзе Удмурт Йӧскалык библиотекаын[5].
Пусъён ужрадъёс
Та нунал азьын школаосын пиналъёсты бесерман калыклэн историеныз тодматон ужрадъёс ортчыло. Культура юртъёсын пӧртэм пумиськонъёс радъясько. Кылсярысь, 2025-тӥ арын 21-тӥ коньывуонэ Юкаменскысь школаын «Язык бесермян: вехи истории письменности» нимо ужрад ортчиз. Люкаськемъёс бесерман калыклэн клулчеберетэныз, алфавитэн но кыллюкамъёсын тодматкизы. Собере Киужъёсъя нылпи юртысь ӧнерчиос суйпоскес пуныны дышетӥзы[6].
Валэктонъёс
- ↑ В Международное десятилетие языков коренных народов мира в Удмуртии учредили День бесермянского языка и письменности
- ↑ В Удмуртии 21 октября будут отмечать День бесермянского языка и письменности
- ↑ День бесермянской письменности учредили в Удмуртии
- ↑ В Удмуртии учредили день бесермянской письменности
- ↑ Презентация перевода книги «Маленький принц» на бесермянский язык [ӟуч] Национальная библиотека УР. Эскеремын 30-10-2025 арын
- ↑ 21 октября в Удмуртии празднуют День бесермянского языка и письменности [ӟуч] ВК.Юкаменская Центральная Детская Библиотека (23-10-2025). Эскеремын 30-10-2025 арын
