Гербер
| Гербер | |
|---|---|
 Гербер шулдыръяськон | |
| Типез | Арлы быдэ ортчись элькун шулдыръяськон |
| Валатонэз | Тулыс бусы ужъёсты йылпумъян |
| Пусъё | Удмурт Элькунын, Татарстанын, Москваын |
| Пусъён ужрадъёс | Ӝук вӧсян, калык юмшан но шулдыръяськон, ӵошатсконъёс |
Гербе́р (Гершыд, геры бере, геры шыд, Гырон быдтон) — удмуртъёслэн тулыс бусы ужъёсты йылпумъянлы сӥзем йӧскалык шулдыръяськонзы [1]. Нимыз «геры» но «бере» кылъёсты огазеяса пӧрмемын.
Ортчытӥське Удмуртиын но Татарстанын. 2015-тӥ арысен (вис карылыса) Гербер Москваын улӥсь удмуртъёс пӧлын но ортчытъяське[2].
Историез
Революцилэсь азьпал Герберез тулыс, гырон-кизён ужъёсты йылпумъям бере яке гужем, турнан потон азьын ортчытъяло вал. Лымшор удмуртъёс пӧлын гыро́н быдто́н нимын тодмогес луэ (ӟуч: окончание пахоты).
Христиан календарез кутэм бере куд-ог интыосын Куарсурен огазеяськиз. Гербер ― музъемлэн берпум праздникез, со гужем шунды берытскон вакытэз йылпумъя но выльзэ вакытэз ― сӥзьыл вакытэз кутске. Гербер — календарной циклэз кык паларлы люкись вашкала аспӧртэмлыко тодмет нунал.
Тулыс но сӥзьыл циклъёслэсь пӧртэмлыксэс висъян понна, тулыс но сӥзьыл вӧсьёсты чылкак мукет интыосын ортчытъязы:тулыс Акашка сям-йылолэз ортчытыку, выжы-куалаын (ӟуч: семейно-родовое святилище) вӧсяськылӥзы; гужем — лудын. Вӧсясьёс лудысь бертэм бере, гурт юмшан ортчытъязы, нуназеозь кунояса, турнаны потылӥзы.
Герберез вашкалаысен сюан праздник шуыса лыдъяллязы. Турнан потонлэн нырысь нуналаз выль кенэз пылатон-сялтыман йылол ортчытъязы[1].
Удмуртиын ортчемез
1992-тӥ арысен Удмуртиын огъя элькун шулдыръяськон чотын ортче. Азьпал ик пусъем интые Гербере быдэс элькунысь вань ёросъёс люкасько, мукет улосъёсысь но каръёсысь куноос вуыло. Котьку сямен, куно пумитась ёрос ас сямъёсыныз, узырлыкеныз но улэм-вылэменыз тодматыны тырше. Арлы быдэ Гербер шулдыръяськон кыӵе ке но темалы сӥземын луэ.
Бадӟым утялтэм возь вылын тодмо киужчиослэн ужъёсынызы бадӟым вузкарон ортче. Вӧсясьёс пӧзьтэм ӝукез вӧсяло, Инмарлы, Кылдысинлы кизем юоссэз утьыны но юрттыны курыса вазисько. Собере лыктэм калыкез вӧсям ӝукен утялто. Юри праздник азелы тупатэм бадӟым сцена вылын тодмо но дано артистъёс калыкез шулдырто[3]. Нунал ӵоже пӧртэм ӵошатсконъёс, вожвылъяськонъёс радъясько.
Элькун Гербер пӧртэм аръёсы пӧртэм ёросъёсын ортчылӥз:
- 1992 — Алнаш ёрос;
- 1993 — Можга ёрос;
- 1994 — Кияса ёрос;
- 1995 — Шаркан ёрос;
- 1996 — Дэри ёрос;
- 1997 — Вотка ёрос;
- 1998 — Вавож ёрос;
- 1999 — Пичи Пурга ёрос;
- 2000 — Сьӧлта ёрос;
- 2001 — Глаз ёрос;
- 2002 — Якшур-Бӧдья ёрос;
- 2003 — Эгра ёрос;
- 2004 — Ува ёрос;
- 2005 — Кизнер ёрос;
- 2006 — Дэбес ёрос;
- 2007 — Сарапул ёрос;
- 2008 — Балезино ёрос;
- 2009 — Дэри ёрос;
- 2010-тӥ арысен Лудорвай (музей-заповедник)ын ортчытъяно шуыса малпамын вал. Озьы ке но, арлы быдэ интыез вошъяське.
- 2015 — Кез ёрос;
- 2016 — Сюмси ёрос (Бабьинской бамалын[4]);
- 2017 — Можга ёрос
- 2018 — Ува ёрос
- 2019 — Эгра ёрос (Нюнягурт)
- 2021 — Вавож ёрос
- 2022 — Пичи Пурга ёрос (Кӧтшур гурт)
- 2023 — Вотка ёрос (Пихтовка гурт)
- 2024 — Шаркан ёрос (Быгы гурт)
- 2025 — Якшур-Бӧдья ёрос; (Кӧкран гурт)
Валэктонъёс
Литература
- Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — 768 с. — 2200 экз. — ISBN 978-5-7659-0486-2.
Чӧлсконъёс
- Коробейников А. В., Сахарных Д. М. Гербер: о традиционном летнем празднике удмуртов
- Владыкин В. Е. Религиозно — мифологическая картина мира удмуртов. — Ижевск, 1994.проект «Воршуд» Национальной библиотеки Удмуртии