Ижевск-Балезино чугун сюрес
РАН экспертиза
РАН экспертиза
Россиысь Тодосъёсъя Академиен
| Ижевск — Балезино линия | |
|---|---|
 | |
| Огъя тодэтъёс | |
| Кун | |
| Интыяськемын | Удмурт Элькун |
| Югдурез | али ужась |
| Пум станциос |
Ижевск станция Балезино станция[d] |
| Обслуживаниез | |
| Усьтэмын | 1943 |
| Улсатэмын | Горький чугун сюрес |
| Техникая тодэтъёсыз | |
| Кыстӥськемез | 146 иськем |
| Линилэн картаез | |
 |
|
 Медиафайлъёс РувикиМедиа пушкын | |
Ижевск-Балезино чугун сюрес — Удмуртиысь Ижкар — Балезино участокысь одӥг колеяё тепловоз тягаен чугун сюрес, лэсьтэмын Быдӟым Атыкай ож вакытэ. Пум станциез Балезино шуыса нимаське ке но, йылпумъяське Пибаньшур станциын.
Туала вакытэ Горький чугун сюреслэн Иж ёзэтэзлэн люкетэз луэ. Чугун сюрес Ижкар пушкытӥ, Дэри, Якшур-Бӧдья, Эгра но Балезино ёросъёс пыр ортче.
Историез
.svg)
Сюресэз лэсьтон кутскемын СССР-лэн Обороная кун комитетэзлэн 1941 арын 25-тӥ шуркынмонэ кутэм решениезъя но СССР-ысь Сюрес герӟетъя наркомлэн 1941 арын 30-тӥ шуркынмонэ гожтэм Косэтэзъя, 1942-тӥ арын 1-тӥ толшоре. Лэсьтӥськонлэн валтӥсь мугез: оборонной заводъёсы уйпалась музъем эгыр но пу вайылон дырез но сюресэз вакчиятон. Сюрес лэсьтонэз кутскыку, ваньмыз сямен, пиосмуртъёс Горд Армие басьтэмын вал, соин та лэсьтӥськонын нылкышноос но пиналъёс ужано луизы. Сюрес лэсьтонэ трудовой повинность чотын 12 сюрс мурт пыдын но 4 сюрсэз валын колхоз ужасьёс басьтэмын вал[1].
УАССР-ысь Совнаркомлэн но ВКП(б)-лэн Удмурт обкомезлэн бюроезлэн 1941-тӥ арын 25-тӥ толсуре кутэм Пуктэтэзъя, ВКП(б)-лэн ёрос комитетъёсызлэн нырысетӥ секретарьёсызлы но ёрос кенешъёсысь исполнительной комитетлэн тӧроосызлы ужась калыкез ужан интыяз вуттыны но соослы кулэ луись ужан тӥрлык (бычкыос, тӥръёс, лопатаос, ломъёс, киркаос но тулъёс), сиён-юон, шуныт дӥсь но валъёслы фураж дасяны косэмын вал.
150 иськем пала кыстӥськись линия Уйпал Уралэз Кузон чугун сюрес ёросъёсын, Поволжьеен но Лымшорен герӟаз. Озьы ик нюлэс, музъем эгыр, корт но мукет грузъёс нуыны-вайыны вакчи сюрес усьтӥз но элькунысь пӧртэм удысъёслы азинскыны луонлык кылдытӥз[2].
Лэсьтӥськон
Сюресэз лэсьтон 1942-тӥ арын толшоре кутскиз. Отчы Удмурт АССР-ысь 29 ёросъёсысь колхозын ужась калык пыриськиз. Ужъёсты киын быдэсъяно луылӥзы, быдэс лэсьтӥськонын 2 экскаватор сяна ӧй вал[3], вань секытэз валъёс вылэ усиз, соосты транспорт чотын ужатӥзы. Ужан туж секытэн сётӥськиз. Нырысь ик нюлэсэз коразы, лӥялъёссэ порылӥзы, кулэ интыосаз сюй ӝутказы. Лэсьтӥськон дыр куспын 3 миллионлэсь ятыр кубометр музъем ужъёс киын быдэстэмын вал.
Музъем ужъёсты но кулэ луись сооружениосты огдыре быдэс линия кузя быдэсъязы, рельсаосты ог-огзылы пумит уйпаласен лымшор пала золтыса мынӥзы. Лэсьтӥськонэ тужгес трос калык 1942-тӥ арын инвожое но пӧсьтолэзе поттэмын вал, соку сюрес вылын нуналлы быдэ ог 24 сюрс мурт но 7,5 сюрс подвод ужаз[4].
1943-тӥ арын южтолэзе рабочей движение усьтӥськиз, нош быдэсак лэсьтӥськон ужъёс 1944-тӥ арын гинэ йылпумъяськизы. 1943-тӥ арысен 1944-тӥ арозь Ижевск-Балезино чугун сюрес кузя 1,6 миллион тонна пала пӧртэм груз нуэмын-ваемын[5][3].
Ужан луонлыкъёс
Ижевск — Балезино чугун сюресэз лэсьтӥсьёслэн, Удмурт АССР-ысь колхозникъёслэн И. В. Сталинлы 1943-тӥ арын 6-тӥ коньывуонэ келям раппортысьтызы:
… Уй но нунал вис карылытэк ужамы, 54-градус кезьытэн но, жобаськыку-пелляськыку, сӥзьыл зор-кот улын. Котькудӥзлэн одӥг малпанэз вал — фронт мышкысь гвардеецъёс сямен, Шаермылы туж кулэ луись сюресэз ӝегатскытэк быдэстоно…
М. Е. Сабуровалэн тодэ ваёнъёсысьтыз[3]:
… Гуртлы матын луись бадӟым нюке интыяським. Асьмелы огдырлы асьмелы землянка выллем улон инты ӝутӥм. Копам гутёосы юбо урдылӥм, соосты вылласянь пуӵъёсын юнматӥм но лысо ваен шобыртӥм. Пушласянь озьы ик мудэтъёс копаса ӝутӥм но лысэн шобыртӥм… Тём пеймыт луытозь ужам… Нокыӵе техникамы ӧй вал, ужаммы понна нянь юдэс сётъязы… огпол но мунчое ӧм пыре… дӥськутмы нуллыны ярантэм ӟустарилы пӧрмиз …
Тужгес секыт толалтэ йӧтылӥз, куке ӟон-ӟон кынмем музъемез ломъёсын мырдэмен копалляны луылӥз. Улон инты ӧвӧлэн, кот дӥсез куасьтыны нокытын вал. Ужамзы понна лэсьтӥськисьёслы нуналаз 800 грамм нянь люкылӥзы, уксё ӧз сётъялэ.
Туала югдур
Туала дыре чугун сюрес кузя Ижевск — Балезино одӥг пригородной поезд ветлэ. Калыкез нуись-ваись поездъёс: Пермь — Новороссийск, Пермь — Адлер, Ижевск — Санкт Петербург но мукет, озьы ик вуз нуллон составъёс[6].
Буре ваён
9-тӥ тулыспал ― Ижевск — Балезино чугун сюрес лэсьтонэз йылпумъян нунал ― Удмурт Элькунлэн буре ваён нуналъёсыз пӧлы пыртэмын[7]. Та нунал юнматэмын вал 2020-тӥ арын кутэм «Удмуртиысь праздникъёс но буре ваён нуналъёс сярысь» Катэн[8].
Валэктонъёс
- ↑ ЦДНИ Удмуртской Республики, ф. 16, оп. 1, д. 3281, л.7 — 11.
- ↑ Главная стройка военного времени. История железной дороги Ижевск–Балезино - udmurt.media
- ↑ 1 2 3 История Удмуртии: XX век / О. И. Васильева, П. Н. Дмитриев, К. И. Куликов, Л. Н. Бехтерева, И. К. Калинин, Н. А. Родионов, В. С. Воронцов, С. Л. Бехтерев — Ижевск: УИИЯЛ УрО РАН, 2005. — 544 с. — 3000 экз. — ISBN 5-7691-1649-8
- ↑ Ижевск-Балезино. Кто строил эту дорогу жизни? - Глазовская городская газета "Красное знамя"(ӟуч)
- ↑ Дорога, которую строили дети. Общество
- ↑ Юлия Ардашева Железная дорога Ижевск-Балезино: семейные истории рассказывают дети Удмуртская правда.
- ↑ 9 февраля отмечается памятная дата Удмуртской Республики — день окончания строительства и сдачи в эксплуатацию железной дороги «Ижевск-Балезино»
- ↑ ЗАКОН УДМУРТСКОЙ РЕСПУБЛИКИ от 14 декабря 2020 года N 81-РЗ О праздничных днях и памятных датах Удмуртской Республики
Чӧлсконъёс
- ЦДНИ Удмуртской Республики, ф. 16, оп. 1, д. 3281, л.7 — 11.