Эгра ёрос

**Эгра ёрос**
Герб	Флаг
Центр	Эгра
Улӥсьёс
- ваньмыз	42 400
- плотность	18,7 адями/км²
Территория
- ваньмыз	2267,4 км²

Эгра ёрос — Удмуртиысь ёрос. Центрез — Эгра.

Интыяськемез

Эгра ёрос Чупчи, Кильмезь но Иж шуръёслэн огазеяськон интыязы пуксемын. Та интыын вашкала дауръёсы улӥсьёслы сюдӥсь но сектась чотын вал Чупчие усись Ита но Лоза шуръёс.

Историез

Нырысьсэ Эгра гурт сярысь тодэ ваёнъёс кылемын Фёдор Звенигнордский но Василий Жемчужников воеводаослэн 1615-тӥ арын пусъем книгаоссазы.

Удмуртилэн уйпал ёросъёсыныз ӵош Эгра но 1489-тӥ арын пыриз Москва княжествое. 1798-тӥ арын Ватка губерниысь Глаз уездын кылдӥз Эгра волость.

18-тӥ даурлэн кутсконаз Сибирен кусып тупатон вылысь кутске татысь трактэз ӝутон. Нош та сюрес быдэс ёросэз пырпотэ: шунды пуксён палысеныз шунды ӝужан палозяз. Ёрослэн азинсконаз но со туж бадӟым инты басьтэ.

1937-тӥ арын Эрга луэ ёрослэн шорсюлмыз. Быдӟым ож дыръя Эгра бадӟым роль басьтэ Ижевск-Балезино чугун сюресэз лэсьтонын. Та сюресэз ӝутӥзы нылкышноослэн но быдэ вуымтэ нылпиослэн киоссы. Нош Эгра ёросысь 4 сюрс 700 пала мурт аслэсьтыз улонзэ сётӥз, Родинамес утьыса.

Ӵапак война дыре Эгра ёросын туж зол азинске нюлэс дасян удыс, пул пилён. Бӧрысь Эгра леспромхоз Удмуртиысь та удысысь тужгес валтӥсь предприятие луэ — солэн дасям вузъёсыз Россиысь пӧртэм сэрегъёсы вуылӥзы.

Ёрослэн туала историез матысь герӟаськемын мувӧй поттонэн. 1973-тӥ арын татын нырысетӥ тонна му вӧй кыскизы.

Улӥсьёсыз

Татын улэ 42 сюрс 383 адями (2009-тӥ ар). Со пӧлысь 22 сюрс 260-эз Эгра посёлокын. Улӥсьёс пӧлысь 61 процентэз — удмуртъёс, 36 процентэз — ӟучъёс, 1,5 процентэз — бигеръёс.

Мерлыко удыс

Татын тодон-валан сётэ 19 школа, со пӧлысь 15-ез шор ёзо луэ. Со сяна, вань 23 нылпи сад, сирота нылпиослы интернат, ляб визьем пиналъёслы школа-интернат. Тазалыкез эмъян удысын тырше ёрос больница, со сяна, Факел посёлокын, Зура, Чутыр черкогуртъёсын но Леспромхоз посёлокын вань асьсэ больницаоссы. Озьы ик ёросын ужа 36 фельдшер-акушер пункт.

Со сяна, ёросын ужа культурая 32 юрт, 29 библиотека, 2 нылпи санаторий.

Сундур гуртын интыяськемын Удмурт культурая центр. Ӟуч культуралы сӥзем центр ужа Факел посёлокын.

2017-тӥ арын 23-тӥ куарусёнэ Сэп гуртысь библиотекалэн юртаз усьтэмын Бырем гуртъёслы сӥзем калык музей (ӟуч Народный музей исчезнувших деревень).

2023-тӥ арын 29-тӥ пӧсьтолэзьысен ёросысь Мувырын быремысь выльысь ӝутэм гуртъёслы сӥзем «Гурт — Россилэн лулыз» улоскуспо фестиваль радъяське.

Тодмо муртъёс

Перевощиков Генрих Ксенофонтович — тодмо удмурт гожъяськись, Россиысь Гожъяськисьёслэн огазеяськонзылэн ёзчиез, Удмурт Элькунысь калык гожъяськись. Россиысь культура удысысь дано ужась, Эшъяськон Орденлэн кавалерез;
Перевощиков Юрий Семёнович — совето но росси дышетӥсь, экономист, экономикая метрологиез кылдытӥсь. Экономика наукаосъя доктор, профессор. Удмурт Элькунысь Экономистъёслэн огазеяськонзылэн вице-президентэз, Удмурт кун университетысь Экономикая но кивалтонъя институтысь аспирантуралэн координаторез.
Поздеев Пётр Кириллович — удмурт гожъяськись, прозаик но кылбурчи, фольклорист, кылысь кылэ берыктӥсь, литературовед, журналист. СССР-ысь гожъяськисьёслэн огазеяськонзылэн ёзчиез. УАССР-ысь Кун премилэн лауреатэз. РСФСР-ысь лулчеберет удысысь дано ужась.

Чӧлсконъёс