Перевощиков, Юрий Семёнович
| Юрий Семёнович Перевощиков | |
|---|---|
 | |
| Вордӥськем нуналыз | 13-тӥ толшоре 1928 (98 лет) |
| Вордӥськем интыез | |
| Кун | |
| Ужудысэз | экономист, декан, кивалтӥсь |
Ю́рий Семёнович Перево́щиков (ворд. 13-тӥ толшоре 1928, Сепож[d]) — совето но росси дышетӥсь, экономист, экономикая метрологиез кылдытӥсь. Экономика наукаосъя доктор, профессор. Удмурт Элькунысь Экономистъёслэн огазеяськонзылэн вице-президентэз, Удмурт кун университетысь Экономикая но кивалтонъя институтысь аспирантуралэн координаторез[1].
УдГУ-ысь экономикая факультетэз кылдытӥсь но солэн нырысетӥ деканэз. Удмуртиысь экономика ӧнеръёсъя нырысетӥ диссертацияя кенешез кылдытӥсь[2].
Улон сюресэз
Вордӥськиз 1928-тӥ арын 13-тӥ толшоре Удмурт АССР-ысь Эгра ёросысь Сепож гуртысь крестьян семьяын. Покчи классъёсын гуртысьтыз ик школаын дышетскиз, нош сое пытсамзы бере тодон-валан басьтонзэ азинтӥз Чутырьысь сизьым аръем школаын. Сизьыметӥ класс бере Эгралась шор ёзо школае выжыны медэ вал, но Быдӟым Атыкай ож кутскиз. Юрий Перевощиков тодаз вайылӥз:
Дышетскыны ӧдъяй гинэ, воргоронъёсты войнае басьтӥзы, егитъёсты — Ижысь ремесленной училищее, нылкышноосты — Иж—Балезино сюресэз лэсьтонэ. Монэ ремесленной училищее ысто вал, но мон ӧй мыны. Гуртэ бертӥ, нош меми ӧвӧл: сое но чугун сюрес лэсьтонэ нуиллям. Ар пала выныным ӵошен гинэ улӥмы[3].
Ар ӵоже Юрий Перевощиков колхозын ужаз, отӥяз Эгра но Чутырь МТС-ын пӧртэм интыосын тыршиз. Собере Ижысь индустри техникуме пыӵалтӥрлык системаосты поттонъя техник-механиклы дышетскыны пыриз. 1951-тӥ арын сое йылпумъяса, Ижысь машиностроительной заводэ интыяськиз, бератаз Ижысь механикая заводэ сменалы мастере кутӥзы[4].
1958-тӥ арын Ижысь механикая институтэз «Машина лэсьтон» ӧнеръя йылпумъямез бере партилэн косэмезъя кивалтон удысъёсын тыршиз, нош 1966-тӥ арысен Ижысь наукая но эскеронъя технологияя институтын ужаз. 1964-тӥ—1966-тӥ аръёсы Мускоысь Вылӥ партшколаын «Промышленностьысь экономика» ӧнеръя дышетскиз, 1967-тӥ—1970-тӥ аръёсы ВЦСПС-лэн профсоюз движения вылӥ школаысь аспирантураын тодон-валанзэ муромытӥз[5].
1952-тӥ арын Совето Союзысь изобретательёслэсь но рационализаторъёслэсь Удмурт кенешсэс кылдытӥз[6].
1970-тӥ арын Юрий Перевощиков кандидат диссертацизэ утиз, 1988-тӥ арын — доктор диссертацизэ. Удмуртиын со ужысь экономикая нырысетӥез наукаосъя кандидат луиз[6]. Кыксэ ик диссертациоссэ со сӥзиз ужан интыысь тыриськонъёсты-ыштонъёсты но вормонъёсты мертанлы, озьы выль наука ӧрлы — экономикая метрологилы — кутскон сётӥз[4].
1994-тӥ арын Информатизацияя калыккуспо академилэн улосысь ёзэзлэн тӧроез, озьы ик академиысь академик-секретарь луиз[3].
2023-тӥ арын толшоре ивортонъёсъя, Юрий Перевощиков Удмурт Элькунысь Экономистъёслэн огазеяськонзылэн тӧроезлэн воштӥсез но Удмурт кун университетысь Экономикая но кивалтонъя институтысь аспирантуралэн координаторез луэ[1].
Удмурт кун университетын
1974-тӥ арысен Юрий Перевощиков Удмурт кун университетысь политэкономикая кафедраын быдӟымез дышетӥсь луыса ужаны ӧдъяз, та вузэн ик со улонзэ герӟаз. УдГУ-ын кылдытӥз экономикая факультет (1974) но экономика ӧнеръёсъя диссертацияя кенеш (1992). Экономикая факультетлэн нырысетӥ деканэз вал[2]. Со квалификациен уно экономистъёсты дасяз. Солэн сюлмаськеменыз Удмурт кун университетлэн Коми-Пермяк округысь Кудымкарын ёзэз кылдӥз (1996), со нырысетӥез филиал луиз. Солы кивалтӥсе ассэ Перевощиковез ик юнматӥзы[6].
Экономикая факультет кылдытэмез бере Юрий Перевощиков факультет бордын ужась плановой расчётъёсъя автоматизировать карем системая (АСПР) лабораториен но кивалтӥз. Лабораториын квалиметрия теорилэсь принципъёссэ но амалъёссэ производствоын пыӵатон, экономика ласянь ыштонъёсты но пайдаез чотан ужпумъёсты чаклаз, со эскеронъёс Ижысь, Сарапулысь, Санкт-Петербургысь, Мускоысь, Екатеринбургысь, Тулаысь, Ковровысь 40-лэсь трос предприятиосын кутӥсько[4]. Перевощиковлэн квалиметрилы сӥзем наукая ужез ООН-лэн но США-ысь Конгресслэн библиотекаосазы утисько[1].
Семьяез
Юрий Перевощиков кышнояськемын. Лидия кузпалыныз студент вакытаз тодматскиз. Ныл но пи будэтӥзы[3].
Данъетъёсыз но дано нимъёсыз
- Ужысь Горд Знамя орден;
- СССР-ысь ВДНХ-лэн азьвесь медалез;
- РСФСР-ысь наука но техника удысысь дано ужась;
- Удмурт Элькунысь наука но техника удысысь дано ужась;
- Удмурт Элькунысь дано экономист;
- Информатизацияя калыккуспо академилэн зэмос ёзчиез;
- Удмурт Элькунысь Экономистъёслэн огазеяськонзылэн дано тӧроез;
- СССР-ысь Кун премилэн лауреатэз;
- М. Т. Калашников нимо премилэн лауреатэз;
- Трокай Борисов нимо премилэн лауреатэз;
- «Фёрс фондлэн» данъян грамотаез.
2019-тӥ арын Юрий Перевощиковлэн нимыз Удмурт Элькунысь Данъян пул вылэ пыртэмын вал[2].
Наукая ужъёсыз но эскеронъёсыз
- Перевощиков Ю. С. НОТ: критерии, организация, оценка. — Ижевск: Удмуртия, 1969. — 100 с.
- Перевощиков Ю. С. Трудовой процесс. — Ижевск: Удмуртия, 1974. — 224 с.
- Перевощиков Ю. С. Прогноз и план развития предприятия. — Ижевск: Удмуртия, 1975. — 48 с.
- Перевощиков Ю. С. Труд и его норма. — Ижевск: Удмуртия, 1977. — 164 с.
- Перевощиков Ю. С. Методологические проблемы комплексного (системного) исследования единичного процесса труда. — Ижевск: УдГУ, 1982. — 39 с.
- Перевощиков Ю. С. Квалиметрическая экономика предприятия (швейное производство). — М, Ижевск: ВЦУЖ; изд-во ИЭиУ УдГУ, 2005. — 21 с. — ISBN ISBN 5-87227-029-1.
- Перевощиков Ю. С. Расчет сложности конструкции деталей и сборочных единиц. — Ижевск, 1988. — 91 с.
- Перевощиков Ю. С., Сиськов В. И., Губанов С. С. Проблемы исследования и измерения потребительной стоимости продукции. — Ижевск: Изд-во Удм. ун-та, 1989. — 63 с.
- Перевощиков Ю. С., Орефков В. В., Алексеев Б. П. Количественная оценка тяжести трудовых процессов: Учеб. пособие. — Ижевск: Изд-во Удм. ун-та, 1992. — 74 с.
- Перевощиков Ю. С. Экономическая метрология: Поиск меры справедливости Ч. 1. Философия будничной жизни. — М., Ижевск: ИПК «Изд-во стандартов»; Персей, 1996. — 138 с.
- Перевощиков Ю. С., Макарова Л. Л. Концепция современного естествознания: Учеб. пособие / Науч. ред. С. М. Решетников, В. Е. Шудегов. — М.: Из-во ВЦУЖ, 1998. — 298 с.
- Перевощиков Ю. С. Экономическая метрология: Ч. 2. Процесс труда социальная — «молекула». — М.: Из-во ВЦУЖ, 1999. — 296 с.
Валэктонъёс
- ↑ 1 2 3 Вера Краснова (13.01.2023) Наука как судьба [ӟуч] Удмуртская правда. Эскеремын 14-10-2025 арын
- ↑ 1 2 3 Перевощиков Юрий Семёнович [ӟуч] services.unatlib.ru. Эскеремын 14-10-2025 арын
- ↑ 1 2 3 Елена Миннигараева (30.04.2002) Перевощиков Юрий Семёнович [удм.] Воршуд. Эскеремын 14-10-2025 арын
- ↑ 1 2 3 Л. М. Васильева Перевощиков Юрий Семёнович: К 75-летию со дня рождения [ӟуч] lib.udsu.ru. Эскеремын 14-10-2025 арын
- ↑ Е. А. Горбунов (23.01.2023) 20 января 2023 года открылась выставка, приурочённая к 95-летию доктора экономических наук, профессора, заслуженного деятеля науки и техники УР Перевощикова Юрия Семёновича [ӟуч] Архивная служба Удмуртской Республики. Эскеремын 14-10-2025 арын
- ↑ 1 2 3 Перевощиков Ю. С. [ӟуч] finno-ugry.ru. Эскеремын 14-10-2025 арын
Литература
- Курганов Н. Г. Дружеские беседы по поводу…. — Ижевск: Шелест, 2014. — С. 92—109. — 121 с.
- Шишкин М. И. Перевощикову Юрию Семёновичу — 80 лет // Менеджмент: теория и практика : жур. — 2008. — Т. 1, № 1/2. — С. 11—92.
- Удмуртская Республика: энциклопедия / Туганаев В. В.. — Ижевск: Удмуртия, 2008. — С. 534. — 767 с. — ISBN 978-5-7659-0486-2.
- Шишкин М. И. Самый сильный Почётный Президент Союза экономистов Удмуртии // Наука Удмуртии : жур. — 2008. — № 1. — С. 14.