Ижысь Е. Ф. Драгунов нимо индустри техникум

Ижысь Е. Ф. Драгунов нимо индустри техникум
Ужъюртлэн типез	техникум[d]
Кивалтӥсьёсыз
директор	Рычков Владимир Анатольевич
Кылдэмез
Кылдон дырыз	16-тӥ шуркынмонэ 1929
Сайтэз	ciur.ru/iit/default.aspx

Ижысь Е. Ф. Драгунов нимо индустри техникум (ӟуч: Ижевский индустриальный техникум имени Е.Ф. Драгунова) — Удмурт Элькунысь Ижкарысь шоро-куспо нимысьтыз дышетон учреждение. Валтӥсез дышетон радъяське «Нимысьтыз машинаос но устройствоос» (оружейникъёс) ӧнеръя.

Историез

1929-тӥ арын 16-тӥ шуркынмонэ Ижсталь завод бордын ужасьёслы ӝыт техникум сямен усьтэмын вал. Кык группа дышетскисьёсты люказы: кортъёсты кезьыт амалэн обработкая (механикая ёз) но пӧсь амалэн обработкая (металлургияя ёз). Со сяна, подготовительной группа усьтӥзы. Нырысетӥ араз дышетскыны кутӥзы 108 муртэ, соос пӧлын ужасьёс гинэ вал: токарьёс, слесарьёс, фрезеровщикъёс. Таос 1929-тӥ арын 28-тӥ толсуре визь люканы кутскизы. Котькуд нунал соос 8 час ужаллязы но 4-5 час дышетскылӥзы.

1930-тӥ арын Ужасьёслы ӝыт техникумлэсь нимзэ воштӥзы, со Ижысь механикая но металлургияя ӝыт техникум луиз. 1931-тӥ арын пӧсьтолэзе техникумысь 67 кузя нырысетӥ ӧнерчиос потӥзы: соос пӧлысь 58-эз — пиосмуртъёс, 9-эз — нылкышноос. Со аре ик шуркынмонэ дышетсконни Механикая но металлургияя техникум луиз.

1934-тӥ арын пӧсьтолэзе техникумлэн аслаз юртэз кылдӥз (талэсь азьвыл занятиос заводлэн юртаз радъяськылӥзы). Соку ик дышетсконни луиз Ижысь индустри техникум. СССР-ысь Секыт промышленностья наркомат чаклам улсын ужалляз, 1936-тӥ арысен — СССР-ысь Обороная промышленностья наркоматлэн бурд улаз.

1938-тӥ арын техникумлэсь нуназе ёзэтсэ йылпумъям 74 ӧнерчиос диплом басьтӥзы. Пӧлазы вал Евгений Драгунов — техникумысь устоез ыбылӥськись, солэсь нимзэ бератаз дышетон юртлы сётӥзы.

1940-тӥ арысен техникум Иж тыметлэн ярдураз пуктэм юртын интыяськылӥз. Отын со аръёсы кортъёсты вандылыса тупатӥсь технологъёсты, термической обработкая усточиосты, тӥрлык лэсьтӥсьёсты дышетылӥзы.

Быдӟым Атыкай ож вакытэ техникумын занятиос ӧз дугдылэ, юртэз ӧз шунтылэ ке но. Дышетсконниын радистъёсты но дасяны ӧдъязы. Со сяна, ыбылӥськонъя занятиос радъязы. Дышетсконзэс йылпумъямъёс но дышетӥсьёс фронтэ кошкизы, уноез ӧз берытске ни.

1962-тӥ арын Ижысь машиностроительной заводын техникумлэн ӝыт ёзэз усьтӥськиз.

2010-тӥ арын Ижысь индустри техникумез огазеязы 17 номеро политехникая лицеен.

2014-тӥ арын 85 ар тырмонэз улсын Индустри техникумлы сётӥзы оружейник Евгений Драгуновлэсь нимзэ. Калык транспорт дугдылон инты «Техникая училище» интые «Ижысь Е. Ф. Драгунов нимо индустри техникум» нимаськыны кутскиз.

Дасян ӧръёс

2024-тӥ арын гудырикошконэ ивортонъёсъя, Ижысь Е. Ф. Драгунов нимо индустри техникум таӵе удысъёсъя ӧнерчиосты дася:

9-тӥ класс бере

• Машиностроенилэн технологиез;
• Мехатроника но робототехника (удысъёсъя);
• Автомобиль но трактор лэсьтон;
• Нимысьтыз машинаос но устройствоос;
• Лобась аппаратъёсты поттон;
• ПУ станокъёсын ужанъя оператор;
• Сварщик (киын но оглюкетсэ механизированной амалэн ӵыжатӥсь);
• Электро тӥрлыкез тупатъянъя но чакланъя электромонтёр (удысъёсъя);
• Лэсьтӥськон, тупатъян но чеберъян ужъёсъя мастер;
• Пуэн, паркетэн, пиялаен ужанъя мастер;
• Делопроизводитель;
• Банк уж.

11-тӥ класс бере

• Банк уж;
• Делопроизводитель;
• ПУ станокъёсын ужанъя оператор;
• Машиностроенилэн технологиез.

Техникумын инъет луись ӧнер — со «Нимысьтыз машинаос но устройствоос» (оружейникъёс).

Студентъёсты бюджет чотын но, дунын но дышето.

Дано дышетскисьёсыз

• Е. Ф. Драгунов — тодмо СВД снайпер винтовкалэн конструкторез;
• Г. Н. Никонов — «Абакан» нимо АН-94 автоматлэн конструкторез;
• В. В. Богатырёв — Удмурт Элькун Кивалтэтлэн Тӧроезлэн нырысетӥ воштӥсез;
• А. Л. Кузнецов — Удмуртиысь дышетонъя но наукая министр, экономика наукаосъя доктор, профессор;
• И. Н. Валиахметов — Ижысь радиозаводлэн директорез;
• С. В. Васильев — «Купол» ЭМЗ-лэн директорез;
• В. В. Фарафошин — Ижысь пыӵалтӥрлык лэсьтон заводлэн техникая директорез;
• Н. И. Сапожников — Россиысь Кун Думаысь депутат;
• В. А. Злобин — Удмуртиысь печатья но ивор вӧлмытонъя министрлэн воштӥсез;
• А. Е. Калинников — техника наукаосъя доктор, ИжГТУ-ысь профессор;
• Ю. С. Перевозчиков — экономика наукаосъя доктор, УдГУ-ысь профессор;
• В. А. Умняшкин — техника наукаосъя доктор, ИжГТУ-ысь профессор но мукетъёсыз.

Валэктонъёс

Чӧлсконъёс

• БПОУ УР «Ижевский индустриальный техникум имени Е. Ф. Драгунова» [ӟуч]

• Здание «Ижевский индустриальный техникум» [ӟуч]