Бырем гуртъёслы сӥзем музей
| Бырем гуртъёслы сӥзем музей | |
|---|---|
| Бырем гуртъёслы сӥзем калык музей | |
 | |
| Интыяськемын |
 Россия  Удмуртия |
| Адресэз | Удмуртия, Эгра ёрос, Сэп гурт |
| Кивалтӥсез | Мосова Татьяна Ксенофонтовна |
 |
|
Бырем гуртъёслы сӥзем калык музей (ӟуч: Народный музей исчезнувших деревень) — Удмурт Элькунысь Эгра ёросысь бырем гуртъёслы сӥзем музей. 2017-тӥ арын 23-тӥ куарусёнэ Эгра ёросысь Сэп гуртысь библиотекалэн юртаз усьтэмын[1].
Проектэз быдэстон вылысь ог 4 млн манет висъямын: та пӧлысь 3,3 млн манет — грант чотын, 700 сюрс манет ёрос администрация сётӥз[1].
Кылдон историез
Сэп гуртын улӥсьёс асьсэ ёросысьтызы 1970-тӥ аръёсы бырем гуртъёс сярысь уно аръёс ӵоже ивортонъёсты люкаллязы[2][3].
Милям гуртмы вӧзын азьло трос мукет гуртъёс вал, соос дыр ортчемъя быризы. Сизьымез сярысь — Бисар (ӟуч: Малый Пежвай), Ыжнюк (ӟуч: Верх-Палым), Пежвай Йыл (ӟуч: Верх-Пежвай), Лужаны, Выль гурт (Митроки но Троицкое), Николаевка но Палым — ивор люканы кутским.
Клублэн фойеяз ньыль кузь ӝӧк пуктӥмы, клубын ужасьёс но активистъёс гинэ ӧвӧл, вань мылкыд карисьёс альбомъёс лэсьтыны-дасяны кутскизы. Кин ке туспуктэмъёс люказ, кин ке архивъёсысь материал утчаз. Ӵошатскыны но кутскизы, кинлэн умойгес шуыса. Материалъёс шедьтонъя туж бадӟым уж лэсьтэмын вал, угось бырем гуртъёсысь потэмъёс быдэс Россие пазьгиськизы, соосты утчано вал.
2014-тӥ арын гужем Сэпын Гуртъёслэн шулдыръяськонзы ужрад нырысьсэ ортчиз. Отчы артысь гуртъёсысь улӥсьёсты но историенызы вань тунсыкъяськисьёсты ӧтизы. Ужрадэ лыктэмъёс пӧлын Нижний Новгородысь творчествоя «Рыба Морзе — Кама рекордз» огазеяськонысь команда но вал. Ӵапак соос бырем гуртъёслы сӥзем альбомъёслы саклык висъязы но калык музей кылдытыны ӵектӥзы, отчы вань ивортонъёсты, вашкалаысь арбериосты но утёно реликвиосты люканы дэмлазы[4].
Александр Юминов кивалтэм улсын проект гожтӥсь группа но Сэпысь мыло-кыдоос ужкагазъёсты дасязы но пӧртэм фондъёсы вазиськизы. Тыршемзылэн емышез кисьмаз — Владимир Потанинлэн благотворительной фондысьтыз 2 млн манет грант утӥзы, нош ар ортчыса — президент грантъёслэн операторзы луись «Перспектива» фондлэсь 1,3 млн манет. Озьы ик проектлы Эгра ёрос администрация дурбасьтӥз: со библиотекалэсь юртсэ тупатъяны-выльдыны коньдон висъяз но отын музей усьтыны лэзиз[3][4].
Малпанэз улонэ пыӵатонын волонтёръёс но спонсоръёс шӧдскымон инты басьтӥзы. Сэпын улӥсь 367 мурт пӧлысь 157-ез музей кылдытонэ озьы но, тазьы но пыриськизы: пересьёслэсь тодэ ваёнъёссэс, кырӟанъёссэс гожъязы, туспуктэмъёс, гожтэтъёс, архивысь документъёсты утчазы-люказы. Куд-ог активистъёс Туала искусствоя кун центрлэн Волго-Вятской филиалаз стажировкае вуылӥзы, отын соосты шаертодонъя уж нуыны, экскурсиос но мастер-классъёс радъяны дышетӥзы[4][3].
Музей ар ӵоже кылдӥз[5]. Усьтон ужрад бере ик сое мукет ёросысь турмаршрутъёсы шедем учкымон интыос пӧлы пыртӥзы[2]. Табере музее араз ог 10 сюрс туристъёс вуыло[6].
Усьтон ужрад
Музеез сӥё-дано усьтон ужрад 2017-тӥ арын 23-тӥ куарусёнэ ортчиз[1]. Гуртын улӥсьёс «Гуртъёслэн нуналзы» шулдыръяськон фестиваль радъязы, со улсын кӧня ке азбаръёс ужазы: «Вормонъёслы сӥзем аллея», «Усточиослэн гуртсы», «Нылпи азбар», «Выжы калыклэн пужыез». Лулчеберет удысын ужасьёс понна «Интыосысь лулчеберетъя кичӧлтонъёс — котыр улосэз азинтонъя тӥрлык кадь» семинар ортчытэмын вал[7].
Ужез
Милемлы йӧтэ: музей — со азьланяз быдэстоно проектъёслэн шорсюлэмзы кадь. Кылсярысь, горд сюйлэсь арбериос лэсьтон сярысь Выль гуртысь усточилэн Кулябин Никандр Игнатьевичлэн историез пыр трос тодӥмы. XIX даурлэн пумаз со горшокъёс лэсьтылӥз, аслаз юртъерез котырысь ик горд сюй поттылӥз. Музеймылэн бурд улаз табере горд сюйлэсь арбериос лэсьтыны вань кулэ тӥрлыкен рос-прос мастерской ужа, вашкала амалъёсты но уже кутыны луэ.
— Татьяна Мосова, Сэп лулчеберетъя юртлэн кивалтӥсез[3]
Пӧртэм мастер-классъёс радъян сяна, соос пӧлын горд сюен вырон но, музейысь ужасьёс экспедициос дыръя люкам материалъёсты ялан эскеро: аудио но видео форматэ гожтэмъёсты бумага вылэ выжто, ужкагазъёсты чаклало. Куд-огезъя нимысьтыз экспозициос дасяло. 2021-тӥ арын музейын «Сэпысь мадёсъёс» адӟытон радъяськиз. Сое ортчытон понна экспедициосысь материал уже кутэмын вал. Сэпысь мыло-кыдо адямиос удмурт мадёсъёсъя но выжыкылъёсъя вакчиесь роликъёс ватсаса лэсьтӥзы. Видеоосты музее вань вуэм куноос учкыны быгатӥзы[6][8].
Нош 2023-тӥ арлэн пумаз ож вакытысь гожтэтъёслы сӥзем адӟытон ужаз, уно гожтэтъёс пӧлын отын эгра фронтовиклэн Семён Иванович Тихоновлэн кышноезлы гожтэтъёсыз поттэмын вал. Война вылтӥ со 100 гожтэт гожтӥз но соосты гуртаз келяз, отын ожмаськемез сярысь ӧз вералля — кузпалзэ яратэмез сярысь гожъяз. Музейын но лулчеберетъя юртын ужасьёс, та гожтэтъёс вылэ пыкиськыса, спектакль пуктыны малпазы[3].
Вань аудио- но видеоматериалъёс, соос пӧлын Сэп гуртысь калыкен лэсьтэм удмурт но ӟуч кырӟанъёсъя гуртысь куараосын аудиоспектакль но, Museumboxset каталоге пыртэмын — та каталоге музейысь вань материалъёс сюремын. Арлы быдэ со выльдӥське[4].
Экспозициосыз
Бырем гуртъёслы сӥзем музейлэсь дизайн-концепцизэ Самараысь студентъёс малпазы. Солы инъет пушйись италмас сяська луиз (ӟуч: купальница европейская) — Удмуртилэн пусэз-тодметэз. Сизьым бырем гуртъёс — сизьым сяська бурдъёс кадь, соос огъя историез огазеяло[7][5]. Калык огазеяське ке, сяська усьтӥське, калык пазьгиське ке, сяська ворсаське[3].
Музейын огдырлы чаклам адӟытонъёслы но инты сюре, архивысь но туала гуртысь туспуктэмъёсын «вал/луиз» форматэн сэрег но ужа, озьы ик мультимедияя сэрег усьтэмын. Куинетӥез сэрег арлыдоосын интервьюосты учкыны, тодэ ваёнъёссэс кылыны луонлык сётэ (удмурт кылын гожтэмъёсыз субтитръёсын лэсьтэмын)[8][3].
Юртлэн мукет люкетаз азьвыл сямен ик Сэп библиотека ужа[3].
Лулчеберет квартал
Музей усьтӥськем бере ар ортчыса, Сэпын Президент грантъёсъя фондлэн коньдонэз чотын лулчеберетъя квартал кылдытэмын вал. Нырысь-валысь отчы нимысьтыз юбоос вылэ пуктэм югдытэм уробо, дӧдьы но геры, озьы ик турлы тӥрлык но улонын кутӥськись арбериос пырылӥзы. Но аръёс ортчемъя квартал выль экспонатъёсын узырме. Озьы ик радъясьёс шур дурзэс шулдыртон, транспорт дугдылон инты лэсьтон, пӧртэм арт-объектъёс но «сэпоскоп» — телескопен гуртысь обсерватория — пуктон сярысь малпасько[9].
Кварталэз усьтон дыръя сяме пырем горд лента вандонэз корез бычкыен вандонлы воштӥзы. Гуртысь творчествоя коллективъёс куноосты удмурт кырӟанъёсын но эктонъёсын пумитазы, йылолэ пырем ӝукен но табанен куноятӥзы, горд сюйлэсь арбериос лэсьтыны но ыжгон сапег гындыны дышетӥзы[9].
Данъетъёсыз
2018 — ӵектос «Музей гид» калыккуспо форумын тужгес ӟеч стартапен лыдъямын, Владимир Потанинлэн благотворительной фондэныз «Туала дуннеын воштӥськись музей» программая радъям XIII вожвылъяськонлэн куать устоосыз улонэ пыӵатэм ӵектосъёс — 2016-тӥ арын вормисьёс — пӧлы пыриз[10][11];
2018 — Россиысь VI калык форумлэн «Котыр улосэз азинтонъя лулчеберетъя ӵектосъёс» сессиын устоез проект луиз[10];
2019 — Йӧскалык «Калык ӵектос» премилэн «Вашкалаысь узырлык» номинациын вормись луиз[10].
Валэктонъёс
- ↑ 1 2 3 Яна Шамаева Музей исчезнувших деревень Музей исчезнувших деревень.
- ↑ 1 2 3 Мария Векшина Сэпын усьтӥськоз бырем гуртъёслы сӥзем музей Удмурт дунне.
- ↑ 1 2 3 4 5 6 7 8 9 Юля Пчела "Жители исчезнувших деревень приезжают сюда как домой" Фонд "Общественное мнение".
- ↑ 1 2 3 4 Елена Сердечнова. Как Музей исчезнувших деревень возродил реальную деревню // Культура. — 2021. — 28 коньывуонэ (№ 10).
- ↑ 1 2 Яна Шамаева В Удмуртии открыли первый в России музей исчезнувших деревень Российская газета.
- ↑ 1 2 6 населенных пунктов Игринского района стали участниками акселерационной программы «Деревня будущего» ТРК "Удмуртия".
- ↑ 1 2 В Удмуртии открыли народный музей исчезнувших деревень АСИ-Ижевск.
- ↑ 1 2 Мария Векшина Малы сэпъёс люкало ишанъёсты? [удм.] Удмурт дунне.
- ↑ 1 2 Михаил Красильников Сепская жизнь: как небольшая деревня в Удмуртии становится культурным центром Реальное время.
- ↑ 1 2 3 Музей исчезнувших деревень - лауреат Национальной премии СамГТУ.
- ↑ Марина Цветухина Народный музей исчезнувших деревень из Игринского района Удмуртии стал одним из самых удачных стартапов Известия Удмуртской Республики.
