Кожушковъёслэн Ижысь мотомузейзы
| Кожушковъёслэн Ижысь мотомузейзы | |
|---|---|
 | |
| Кылдытэмын | 2022 |
| Интыяськемын | |
| Адресэз | Удмурт Элькун, Ижкар, Советской урам, 9-тӥ номеро юрт |
| Кивалтӥсез | Кожушков Павел Артёмович |
| Сайтэз | motomuseum.su. |
 |
|
 Медиафайлъёс РувикиМедиа пушкын | |
Кожушковъёслэн Ижысь мотомузейзы (ӟуч: Ижевский мотомузей Кожушковых) — мотоциклъёслы но мототехникалы сӥзем нырысетӥез частной музей. Усьтэмын 2022-тӥ арын. Музейлэн экспозициез Артём но Павел Кожушковъёслэн коллекцизы вылэ пыкиськыса кылдытэмын. Отчы Ижкарын но кунгож сьӧрын поттэм техника люкамын[1]. Музейысь адӟыны луэ калыкын пӧртэм аръёсы паськыт вӧлмем но шер пумиськылӥсь модельёсты.
Историез
Музей кылдытэмын 2022-тӥ арын, итыяськемын Ижкарлэн шор люкетаз. Атаезлэн Артём Кожушковлэн коллекциез вылэ пыкиськыса, Павел мототехникалэн историеныз герӟаськем музей кылдытӥз, соин валче, атаезлэсь быдэсмымтэ малпанзэ быдэстӥз. Артём юн тунсыкъяськылӥз техникаен, вань улытозяз Россиын но дуннеын поттэм мотоциклъёсты люказ но аслаз мастерскояз ачиз ик соосты тупатъялляз. Музейлэн валтӥсь ужпумез — дуннеысь но СССР-ысь мотостроенилэн историеныз тодматон, ижкарчиослы но татчы лыктэм куноослы карлэсь дунлыксэ возьматон но ӝутон. Со элькунын но Ижкарын нырысетӥез музей, кудӥз быдэсак мототехникалы сӥземын[2]. «Вокруг света» журналлэн эскеронъёсызъя, Мотомузей нырысь араз ик Россиысь 10 тужгес аспӧртэмлыко музейёс пӧлы пыртэмын (Москваысь но Санкт-Петербургысь музейёсты лыдэ басьтытэк). 2023-тӥ арын tutu.ru сервислэн тодэтъёсызъя музей Удмуртиысь 3 тужгес тунсыко но учкымон интыос пӧлы пыртэмын[3].
Мотомузей мыло-кыдо пыриськылэ Удмуртиын но солэн палэназ ортчылӥсь фестивальёсы но пӧртэм ужрадъёсы. Кылсярысь, музей Нырысетӥ каналын мынӥсь «Повар на колесах» но «Поехали!», Россия 1-ысь «По секрету всему свету» но НТВ-ысь «Поедем, поедим!» передачаосты кылдытонэ пыриськиз.
Татын быдэс ар ӵоже ас кожазы но огинэ люкаськыса лыктэм муртъёслы экскурсиос ортчытъяло. Азьпал ик гожтӥськыса лыктэмъёслы экскурсия ортчытыку, музей ог 40 минутлы ворсаськылэ. Удмурт Элькунысь сяна, татчы мототехникаен тодматскыны вуыло Россилэн пӧртэм сэрегъёсысьтыз, Владивостокысен кутскыса Калининградозь но сьӧрлысь: Америкаысь, Швециысь, Италиысь, Турциысь, Франциысь, Англиысь, Германиысь, Кореяысь, Япониысь но мукет кунъёсысь туристъёс[3].
Экспозициез
Музее люкамын Ижысь мотозаводын поттэм аспӧртэмлыко мотоциклъёс. Татын меӵак тодматскыны луэ «Иж» мотоциклэз поттонлэн историеныз. Кылсярысь, татысь адӟыны луэ быдэсак комплектациеныз валче «Иж-49» мотоциклэз яке шер пумиськись «ИЖ Планета-Спорт» мотоциклэз, малы ке шуоно, таиз модель, со аръёсы ик потӥсь «Иж Планета-3» но «Иж Юпитер-3» модельёслэсь сизьым поллы ӧжытгес поттӥськиз. Кожушковъёслэн тужгес вашкалаез экспонатъёссы пӧлысь —Москва поннэ ожмаськонэ пыриськем DKW RT-100 мотоцикл (1938-тӥ арын поттэмын), озьы ик BMW R35 и Wanderer 1Sp (Sport) немец мотоциклъёс.
Музей кӧня ке люкетъёслы висъямын[4]:
- военной мотоциклъёс;
- калыкын кутӥськись модельёс;
- спортивной мотоциклъёс;
- малокубатурной техника.
Галерея
- Мотомузейлэн экспозициосыз
Валэктонъёс
- ↑ Мотомузей Кожушковых: первый частный музей мотоциклов в Ижевске [ӟуч] Деловая репутация (8 января 2022). Эскеремын 18.07.2025 арын
- ↑ Ижевский мотомузей Кожушковых [ӟуч] Культура РФ. Эскеремын 18.07.2025 арын
- ↑ 1 2 О музее [ӟуч] Ижевский мотомузей Кожушковых. Эскеремын 18.07.2025 арын
- ↑ Ижевский мотомузей Кожушковых [ӟуч] Ассоциация частных и народных музеев России. Эскеремын 18.07.2025 арын
