Кезысь О. А. Поскрёбышев нимо шаертодонъя ёрос музей

РФ Лулчеберетъя министерство

Министерство культуры Российской Федерации

‭«Кезысь Олег Алексеевич Поскрёбышев нимо шаертодонъя ёрос музей‭» лулчеберетъя муниципал бюджет ужъюрт
Та юртын Кезысь О. А. Поскрёбышев нимо шаертодонъя ёрос музей интыяське
Кылдытэмын	1968
Интыяськемын	Удмуртия Удмуртия Россия Россия
Адресэз	427580, Росси Федерация, Удмурт Элькун, Кез ёрос, Кез каргурт, Киров ульча, 12-тӥ юрт
Кивалтӥсез	Селивёрстова Наталья Вениаминовна
Сайтэз	кезмузей.рф

Кезысь Олег Алексеевич Поскрёбышев нимо шаертодонъя ёрос музей (вакч. — «Кезысь РКМ» МБУК; ӟуч: Кезский районный краеведческий музей имени О. А. Поскрёбышева) — Удмурт Элькунысь лулчеберетъя муниципал бюджет ужъюрт. Кез ёросысь Кез каргуртысь Киров ульчаысь 12-тӥ юртын интыяське.

Музей 1968-тӥ арын усьтэмын.

Историез

1960-тӥ аръёслэн шоразы Кез ёросын «Горд следопытъёс» нимо отрядъёс ужзэс мытӥзы. Походъёсын шаертодонъя арбериос шедьтӥзы. КПСС-лэн РК-езлэн ӵектэмезъя, Кезын ожгар но уж данлыкъя висъет кылдытыны огкылэ вуизы. Интыысь журналистъёс Ганина Майя Михайловна но Сидорова Анетта Петровна музей кылдытонэз радъянэ но отӥяз ужпумез быдэстыны юрттонэ пыриськизы, «Звезда» газет сямен ик, ВЛКСМ-лэн ёрос комитетэз, Пионеръёслэн но школьникъёслэн юртазы ужасьёс, военной комиссариат, калык огазеяськонъёс валче ужазы.

1968-тӥ арын 23-тӥ тулыспалэ КПСС-лэн РК-езлэн бюроез пуктэмъя, Ожгар но уж данлыкъя калык ёрос музей усьтӥськиз, сое элькунысь шаертодонъя музейын пусйизы. Киров ульчаысь лулчеберетъя ёрос юртын музей куинь висъетын интыяськиз, со ёросысь шаертодонъя калык музей нимаськылӥз.

1970-тӥ аръёсы музеез Удмуртиысь калык кылбурчилэн, Удмурт АССР-ысь Кун премилэн лауреатэзлэн, Удмурт Элькунысь дано муртлэн Олег Алексеевич Поскрёбышевлэн семьяез улэм юртъере выжтӥзы. Та корка Ломоносовлэн но Гогольлэн вожазы интыяськылӥз. 1976-тӥ арын Киров ульчае кирпичлэсь выль лулчеберетъя элькун юрт ӝутӥзы, 12-тӥ юртын озьы музейлы кык висъет сётӥзы.

1999-тӥ арын Кез ёрос администрацилэн йырызлэн пуктэтэзъя музейлы муниципал инлык сётӥзы.

2007-тӥ арын 7-тӥ шуркынмонэ «Кез ёрос» муниципал кылдытэтысь администрацилэн йырызлэн «Кез ёрос муниципал музейлы выль ним сётон сярысь» 839 номеро пуктэтэз потӥз, соя музей Кез ёросысь шаертодонъя музей нимаськиз.

2008-тӥ арын 22-тӥ толсуре Кез ёрос администрацилэн йырызлэн пуктэтэзъя шаертодонъя музейлы Олег Алексеевич Поскрёбышевлэсь нимзэ сётӥзы.

2009-тӥ арын 6-тӥ гудырикошконэ юридической луись юрт пусъемын вал — лулчеберетъя «Кез ёросысь О. А. Поскрёбышев нимо шаертодонъя музей» муниципал ужъюрт («Кезысь РКМ» МУК), валтӥсь музей Кез каргуртын интыяськиз, нош Кулигаысь «Истоки» шаертодонъя музей нимо ёзэз — Кулига черкогуртын.

2011-тӥ арын 14-тӥ толсуре «Кез ёрос» муниципал кылдытэтысь администарцилэн йырызлэн 1958 номеро пуктэтэзъя, 2010-тӥ арын 8-тӥ куартолэзе юнматэм 83 номеро федерал закон вылэ пыкиськыса, музей «Кезысь О. А. Поскрёбышев нимо шаертодонъя ёрос музей» лулчеберетъя муниципал ужъюрт луиз.

2017-тӥ арысен музейысь арбериосты Росси Федерациысь Музей фондъя кун каталоге пыртон уж нуиське. 2022-тӥ арын 1-тӥ толшорлы каталоге 1252 арбериос интыямын вал.

Музее арлы быдэ 8615 адями вуылэ. Экспозициосъя но адӟытонъёсъя интыезлэн быдӟалаез — 88,2 м².

«Удмурт Элькунысь Кез ёрос муниципал округ» муниципал кылдытэтысь администрацилэн 2021-тӥ арын 30-тӥ толсуре юнматэм 14 номеро пуктэтэзъя, музеез кылдытӥсь «Удмурт Элькунысь Кез ёрос муниципал округ» муниципал кылдытэтлэн администрациысьтыз лулчеберетъя, туризмъя, спортъя но егитъёсын ужан политикая ёз луэ.

Музейлэн директорез — Селивёрстова Наталья Вениаминовна.

Музеен кивалтӥсьёс

• 1968-тӥ—1986-тӥ аръёсы — Майя Михайловна Ганина, Галина Ивановна Главатских;
• 1987-тӥ—1990-тӥ аръёсы — Валентина Ивановна Слюсарь;
• 1991-тӥ—1993-тӥ аръёсы — Олимпиада Арсентьевна Ардашева;
• 1994-тӥ—1997-тӥ аръёсы — Борис Иванович Русских;
• 1997-тӥ—1999-тӥ аръёсы, 2001-тӥ—2008-тӥ аръёсы — Лариса Геннадьевна Жигалова;
• 2000-тӥ арын — Валентина Фёдоровна Агеева;
• 2009-тӥ арысен али дырозь — Наталья Вениаминовна Селивёрстова.

Экспозициосыз

Валтӥсь музейын ялан ужась «Кез ёрослэн историез» экспозиция таӵе возьматонъёслы люкылэмын:

• «Соосын данъяське ёрос»;
• «Кез ёрослэн ожгар данъяськонэз»;
• «XIX даур пумысь—XX даур кутсконысь уйпал удмуртъёслэн улон-вылонзы»;
• «Удмуртиысь калык кылбурчилэн О. А. Поскрёбышевлэн мемориал кабинетэз».

Коллекциосыз

2022-тӥ арын 1-тӥ толшоре музейысь огъя фондын 4694 арбериос лыдъяськизы: валтӥсь фондын 3124 — экспонат, наукая но юрттэт сётӥсь фондын — 1570 экспонат.

Ужан вакытыз

• Пуксён: 8:00 — 17:00;
• Вирнунал: 8:00 — 17:00;
• Покчиарня: 10:00 — 19:00;
• Удмуртарня: 8:00 — 16:00;
• Кӧснунал: 9:00 — 15:00;
• Арнянунал, вордӥськон — шутэтскон нунал;
• Санитар нунал: котькуд толэзьысь берпуметӥ удмуртарня;
• Котькуд толэзьысь покчиарняе: быдэ вуымтэослы музее дунтэк пырон нунал.

Ужез

Музейын таӵе экскурсиос ортчыло:

• «Тодмо аспалчиосмылэн Н. А. Косолапов суредасьлэн, В. К. Семакин, В. Н. Ившин, Л. М. Сорока, Р. С. Игнатьева-Лаптева, З. А. Трухина, Г. Г. Касимов кылбурчиослэн, Г. Е. Верещагин, В. Е. Владыкин этнографъёслэн улонзы но творчествозы сярысь»;
• «Кез ёрос Быдӟым Атыкай ож вакытэ»;
• «Совето Союзлэн Геройёсыз — милям аспалчиосмы»;
• «Госпитальёслэн историзы»;
• «46-тӥ нимысьтыз стрелковой»;
• «361 ЗАП: Совето Заполярьеез утёнын»;
• «Удмурт калык дӥсьлэн историез»;
• «Етӥн — уйпал буртчин»;
• «Удмурт корка: пуктон но улон»;
• «Кез каргурт: ма бордысен кутскиз…».

Ужъюрт арлы быдэ Поскрёбышев но Верещагин лыдӟонъёс, «Музейёслы сӥзем уй», «Искусствоосъя уй» акциос радъялля. Музейын ӵошатскон-шудон программаос, мастер-классъёс, тодон-валанэз муромытӥсь ужрадъёс ортчыло.

Валэктонъёс