Вотка карлэн историезлы но лулчеберетэзлы сӥзем музей

РФ Лулчеберетъя министерство

Министерство культуры Российской Федерации

«Воткалэн историезъя но лулчеберетэзъя музей» нимаз ужась муниципал ужъюрт
Кылдытэмын	1967
Интыяськемын	Россия Россия, Удмуртия Удмуртия
Адресэз	427430, Росси Федерация, Удмурт Элькун, Вотка кар, Киров ульча, 5-тӥ юрт
Кивалтӥсез	Фонарькова Оксана Константиновна
Сайтэз	votmuseum.ru

Вотка карлэн историезлы но лулчеберетэзлы сӥзем музей (вакч. — «Воткалэн историезъя но лулчеберетэзъя музей» МАУ; ӟуч: Музей истории и культуры города Воткинска) — Удмуртиысь нимаз ужась муниципал ужъюрт. Кылдытӥсьёсыз — Ступишин Валериан Николаевич, Стрельцов Фёдор Васильевич, 1967-тӥ арын усьтэмын. Музейлэн валтӥсь фондаз 13 000-лэсь ятыр экспонатъёс утисько.

Вотка карысь Киров ульчаысь 5-тӥ юртын интыяськемын. XIX даур пумын эклектика амалъя ӝутэм юртын ужа.

Историез

1827-тӥ арын естественной наукаосъя нырысетӥ коллекциосты бичаны ӧдъязы. Предписание юнматэм бере, Вотка гурезь округ Гурезь но сылал ужъёсъя департаментлэсь округын минералогияя кабинет кылдытон сярысь указ басьтӥз. Инженер-генерал-майор Илья Петрович Чайковский (Пётр Ильич Чайковский композиторлэн атаез) 1848-тӥ арын Вотка заводэз сётон сярысь актын В. И. Романовлы гожтӥз, завод библиотекаын завод механизмъёслэн модельёссы, крич ӵыжатонъя пӧртэм стадиысь кортлэн образецъёсыз утисько шуыса.

1914-тӥ арысь «Россия» энциклопедилэн витетӥ томаз пусъемын вал, Воткаын Горнозаводской музей интыяськемын шуыса. Кӧня ке дыр ортчыса, музей пытсаськиз, нош экспонатъёссэ Сарапулысь Прикамье шаерысь музейлы сётэмын вал.

1940-тӥ арын Воткаын Пётр Чайковскийлы сӥзем музей усьтэмын вал, адӟытонын Воткалэн историезлы сӥзем материалъёсын но тодматӥзы. Быдӟым Атыкай ож кутскемен, музеез кылдытон ужъёс дугдытэмын вал.

1951-тӥ арын «Ленинский путь» интыысь газетын Н. Зельдинлэн «Дано аспалчиосмылэсь нимъёссэс весяклы кельтон» статьяез печатламын вал. Кичӧлтонэзлы дурбасьтӥзы: эмчи-шаерчи, промышленностьлэн, тазалыкез утёнлэн историезъя, Воткаысь но Ижкарысь заводъёсын кадръёсъя публикациослэн авторзы Стрельцов Фёдор Васильевич (1877—1966), Сарапулын музей кылдытонлы кичӧлтонэн потэм шаерчи Ступишин Валериан Николаевич (1900—1982). 1952-тӥ арын Валериан Ступишин 1902-тӥ арын Уралын пуромем Вотка забастовкалы 50 ар тырмонэн валче материалъёс утчаны ӧдъяз.

1959-тӥ арын Валериан Ступишин эскеронъёс ортчытӥз но Воткаысь машиностроительной заводын нырысетӥ вуз поттэм дырысен 200 ар тырмон юбилейлы адӟытон дасяз. 9 ар ортчыса, та экспозицилы луыса, кык музейёс усьтӥськизы: Шаертодонъя калык музей (али — Вотка карысь историяя но лулчеберетъя музей) но Заводлэн историезъя музей (1968-тӥ арын 23-тӥ тулыспалэ).

1967-тӥ арын 5-тӥ куарусёнэ Вотка карлэн историезлы но лулчеберетэзлы сӥзем музей Шаертодонъя калык музей сямен усьтӥськиз. 1968-тӥ арын 21-тӥ толсуре, интыысь улӥсьёс кичӧлтэмъя, музеез сӥё-дано усьтон радъяськиз. 1972-тӥ арын 1-тӥ тулыспалэ гинэ УАССР-ысь лулчеберетъя министрлэн Завойских Аркадий Фёдоровичлэн приказэныз ужъюрт пусъемын вал, со Элькунысь шаертодонъя музейлэн ёзэз луиз.

1987-тӥ арын музейлэн нырысетӥ этажаз «Вотка суредасьёслэн обществозылэн» возьматон залзы усьтӥськиз.

1992-тӥ арын 27-тӥ толсуре музей кар администрациысь лулчеберетъя ёзэ сётэмын но «Воткалэн историезъя но лулчеберетэзъя музей» нимамын вал.

2002-тӥ арын Удмуртиысь куинь музейёслэн «Промзона — лулчеберетысь территория» проектсы улсын «Вотка-кар-завод-лулчеберетъя кебит» адӟытон усьтэмын вал, со мерлыко но лулчеберетъя «Саратов — 2001» проектъёсъя округ ярмаркалэн грантэз чотын улонэ пыӵатэмын.

2006-тӥ арын Быдӟым Атыкай ожысь ветеран, «Совето Союзысь Геройёс» энциклопедилэн но «Книга Памятилэн» огез авторез Ф. Н. Абрамов музейлы Совето Союзысь Геройёслэсь ог-огзылы ыстэм ог 6000 гожтэтъёсты, туспуктэмъёсты, ужкагазъёсты сётӥз. Нош 2007-тӥ арын Воткаын улӥсь турк кылбурчилэн, прозаиклэн но сценаристлэн Назым Хикметлэн палкышноез Г. Г. Колесникова музейлы писательлэсь улоназ кутӥськем арбериоссэ, солэсь библиотеказэ сётӥз — ваньмыз ог 800 экспонат.

Музейын ялан ужась «Огсыр улон» экспозицилэн площадкаяз «Улон берганын» шулдыръяськонэз пусъё.

Музее арлы быдэ 30 000-лэсь ятыр куноос вуыло. Экспозициосъя но адӟытонъёсъя интылэн быдӟалаез — 299,3 м², огдырлы чаклам возьматонъёслэн — 149,3 м², утиськись фондлэн — 91,5 м².

Музейлэн кылдытӥсез Вотка карлэн администрациез луэ.

2017-тӥ арын коньывуонысен музейлэн директорез — Фонарькова Оксана Константиновна.

Музейлэн кивалтӥсьёсыз

• Липатов Борис Павлович — 1972-тӥ—1973-тӥ аръёс;
• Калинина Нина Николаевна — 1973-тӥ—1977-тӥ аръёс;
• Малкова Вера Ильинична — 1977-тӥ—1982-тӥ аръёс;
• Ткачук Тамара Алексеевна — 1982-тӥ—1987-тӥ аръёс;
• Владимирова Зоя Анатольевна — 1987-тӥ—1992-тӥ аръёс;
• Шуравина Лидия Ивановна — 1992-тӥ—2000-тӥ аръёс;
• Павлунина Людмила Фёдоровна — 2000-тӥ—2009-тӥ аръёс;
• Неганова Татьяна Николаевна — 2009-тӥ—2013-тӥ аръёс;
• Кавтя Анна Владимировна — 2014-тӥ ар;
• Соколов Алексей Сергеевич — 2015-тӥ—2017-тӥ аръёс.

Юрт

Музей ХIХ даур пумын нырысетӥ этажаз вузкарон лавкаен улоно купеч корка кадь пуктэм юртын интыяське. ХХ даурлэн кутсконаз кыкетӥ этажын Нырысетӥ нылкышно земской училищелэн классъёсыз интыяськылӥзы. 1926-тӥ арысен 1966-тӥ арозь нырысетӥ этажаз промтоварен вузкарись магазин ужалляз, кыкетӥ этажаз — карысь типография.

Музей юрт XIX даур пумын со вакытысь эклектика амалъя пуктэм прямоугольник выллем улыно-вылыно кирпич юрт луэ. Нырысетӥ этажаз бадӟымесь циркулен ӝыныё суредам кадь укноос вандылэмын, нош кыкетӥ этажаз укноосыз кокошникъёсын чеберъямын. Укноос вадьсын паськыт карниз юнматэмын, сое чеберъям кронштейнъёс возё. Нырысетӥ этажысь но гулбечысь пуш вӧлдэтъёс сводъёс выллем лэсьтэмын.

Экспозициосыз

Музейын ваньзэ-ӧвӧлзэ кык экспозициос ялан ужало:

• «Огсыр улон» (интыысь инкуазь но этнография сярысь);
• «Кар-завод» (Вотка карлэн кылдэм дырысеныз но ХХ даур кутсконозь историез, йылолъёсыз, праздникъёсыз, тунсыкъяськонъёсыз, вотка ужасьёслэн, купечъёслэн, карысь интеллигенцилэн улэм-вылэмез сярысь. Экспонатъёс пӧлын: Вотка казённой заводлэн макетэз, со крич цехысь мастерлэн Василий Фёдорович Бердниковлэн (1844—1913) чертёжъёсызъя лэсьтэмын).

Нырысетӥ этажын суредан, киуж искусствоосысь адӟытонъёс радъяськыло, озьы ик историысь экспозициос.

Коллекциосыз

Музей фондын ваньмыз-ӧвӧлэз — 13 252 утиськись единица, таос пӧлысь 11 948 арбериос — валтӥсь фондысь.

Музейысь тужгес дуно коллекциос: Вотка заводын XIX даур пумысь—ХХ даур кутсконысь судноос лэсьтонысь туспуктэмъёсын коллекция; УАССР-ысь Вотка суредасьёслэн огазеяськонзылэн ёзчиезлэн В. В. Башегуровлэн (1932—2008) суредъёсын коллекциез; Вотка суредасьёслэн огазеяськонзылэн суредъёсын коллекция — 55 произведение; XIX даур пумысь—ХХ даур кутсконысь открыткаосын коллекция — 80 утёно единица; XVIII даур пумысь—XX даур кутсконысь уксё коллекция — 760 утёно единица; Самоваръёсын коллекция — 43 утёно единица; Вотка заводлэн историезъя туспуктэмъёсын коллекция — 350 утёно единица; Ф. В. Стрельцовлэн книга коллекциез — 369 утёно единица; Вотка заводын ӵыжатэм арбериосын коллекция — 40 утёно единица.

Дуно экспонатъёс пӧлын: ХIХ даур пумысь—ХХ даур кутсконысь невьян сандык (музейлы Игорь Анатолиевич Богодайко но Елена Ивановна Богодайко кузьмазы); ХIХ даур пумысь Нижний Тагилысь пирдан сандык (2006-тӥ арын музейлы Тамара Александровна Шишова кузьмаз); ХIХ даур пумысь—ХХ даур кутсконысь чеберъям ватка сандык (2016-тӥ арын музейлы Воткаысь Тамара Петровна Курышкина кузьмаз); 1887-тӥ арын Вотка заводлы 125 ар тырмонэн валче казналы ӵыжатэм-кисьтэм посуда (ваньзэ-ӧвӧлзэ со аре 50 сыӵе посуда ӵыжатэмын вал).

Музей Вотка заводлэн но каргуртлэн 1886-тӥ—1968-тӥ аръёсысь историзыя фотодокументъёсты, ужасьёслэсь но служащийёслэсь, гимназиосын дышетскисьёслэсь но карысь дано муртъёслэсь туспуктэмъёссэс уте. Наукая но техникая ужкагазъёс пӧлын — Емельян Иванович Пугачёв кивалтэм улсын 1775-тӥ арын пуромем Крестьян ожен герӟаськем картаез но Удмуртиысь гыбед поттон нюр интыослэн 1932-тӥ арысь картазы. Быдӟым Атыкай ож вакыт таӵе фронтовикъёслэн данъян документъёсынызы, командованилэн таукаронъёсыныз, справкаосын, фронтысь гожтэтъёсынызы, тодэ ваёнъёсынызы, туспуктэмъёсынызы возьматэмын: Котов Анатолий Дмитриевич, Инна Васильевна Механошина, С. П. Березин, Совето Союзлэн Героез Виктор Михайлович Михайлов.

Ужан вакытыз

Вотка карлэн историезлы но лулчеберетэзлы сӥзем музейын экскурсиос азьвыл кельтэм куриськонъя радъясько. Ужан часъёсыз:

• вордӥськон: 9:00—17:00;
• пуксён, вирнунал, удмуртарня: 9:00—18:00;
• покчиарня: 9:00—20:00;
• кӧснунал: 10:00—16:00;
• арнянунал: 10:00—15:00.

Кызьы вуоно

«Центр» автобус дугдылонни. Музей пала 26 но 9 номеро автобусъёс нуо.

Котырысьтыз лулчеберетъя объектъёс

Воткалэн историезъя но лулчеберетэзъя музей котырын пыдын ортчымон объектъёс интыяськемын:

• Спасо-Преображенской черк, XIX дауре ӝутэмын, интыяськем адресэз: Вотка, Пионеръёслэн ульчазы, 3-тӥ юрт;
• Благовещенской собор, улосэн утёно архитектурая синпелет, татын композитор Пётр Ильич Чайковский вӧсямын вал, Вотка, Киров ульча, 1-тӥ юрт;
• Владимир Ильич Ленинлы синпелет, лулчеберетысь улосэн утёно объектъёс пӧлы пыре, интыяськем адресэз: Вотка, Шор площадь;
• «Калашниковлэн юртэз», 1904-тӥ арын пуктэмын — лулчеберетысь улосэн утёно объектъёс пӧлы пыре, интыяськем адресэз: Вотка, Киров ульча, 10-тӥ юрт;
• Эмъянлы сӥзем музейлэн интыяськем адресэз: Вотка, Киров ульча, 8-тӥ юрт.

Вормонъёсыз но данъетъёсыз

• 2011-тӥ арын музейлэн коллективез карысь Данъян пулэ пыртэмын вал;
• 2025-тӥ арын «Шаертодонъя духовной школа» проектэз Президент фондлэн лулчеберетысь кичӧлтонъёсъя конкурсын грант вормиз .

Ужез

Музей таӵе дышетон услугаос радъя: карлэн но ёрослэн историезъя, улон-вылонэзъя, лулчеберетэзъя, этнографиезъя, инкуазезъя, суредаськонъя но киуж искусствоя лекторийёслэн но ужрадъёслэн циклъёссы, семинаръёс. Ужъюртын озьы ик экскурсиос ялан ортчыло: «Кар-завод» но «Огсыр улон». Музейын крезьгуро ӝытъёс, фольклор шулдыръяськонъёс, пумиськонъёс радъяськыло, озьы ик арлы быдэ таӵе праздникъёсты пусъё: Вормон Нунал, Музейёслэн калыккуспо нуналзы, Татьяналэн нуналыз, Ымусьтон, Васильев ӝыт но мукетъёсыз.

Валэктонъёс