Ашальчи Окилэн музей-юртэз
| Ашальчи Окилэн музей-юртэз | |
|---|---|
 Музей-юрт | |
| Кылдытэмын | 1987 год |
| Тема | Литература |
| Адресэз |
Россия, Удмуртия, Алнаш черкогурт, Первомайской урам, 5-тӥ номеро юрт |
| Кивалтӥсез | Лилия Рыбакова |
 Медиафайлъёс РувикиМедиа пушкын | |
 | Россилэн лулчеберето кылёс лэсьтосъёсыз улос инлыкен рег. № 181310008400005 (ЕГРОКН) лэсьтос № 1800027000 (БД Викигида) |
Ашальчи Окилэн музей-юртэз — Удмуртиысь литературалы сӥзем музейёс пӧлысь одӥгез[1]. Интыяськемын Алнаш черкогуртын, нырысетӥ удмурт нылкышно-кылбурчилэн — Ашальчи Окилэн улон юртаз.
Историез
Та юртын Акилина Григорьевна Векшина (Ашальчи Оки) 1952-тӥ арлэн пумысеныз 1973-тӥ арозь улӥз. Литератураен со юрт герӟаськемын ӧвӧл: 1920-тӥ аръёсы тодмо луэм нылкышно-кылбурчи, син эмъясь луыса, тылож пыр ортчиз но со вакытэ эмчи луыса ужаз[2]:
Лина Григорьевна зэмзэ но сюлмысь тыршиз. Гуртысь эмъяськон юртын ик катарактаез быдтонъя но радужной оболочкаез воштонъя операциос лэсьтылӥз. Котырысь гуртъёсы толалтэтулупен шобыртӥськыса, вал дӧдьыен поталляз. Куд-ог дыръя, солань-талань ветлыны дыр ӧвӧлэн, пыдлось гуртъёсын арняосын улоно луылӥз. 1950-тӥ аръёсы Алнаш ёросын трахомаен висисьёслэн лыдзы ог 6 сюрс котыр вал, ваньзэс соосты эмъяны кулэ вал! Лина Григорьевна кулэм дырысен 40 ар ортчиз ини. Алнашчиос та дырозь тодазы возё ӝот-ӝот сямо сак эмчиез. 1960-тӥ аръёслэн шорысеныз гинэ Лина Григоревна Векшинаез Ашальчи Оки нимын тодӥзы. Калык ӧз но тодылы, со одӥг адями шуыса[3].
Векшина кулэм бере, 1974-тӥ арын улэм юртэзлэн борддораз буре ваён пул шуккемын. 1984-тӥ арын со юртын ик улэм кузпалыз, РСФСР-ысь сӥё-дано агроном Иван Иванович Карачев улонысь кошкем бере, соослэн пизы садзэс нылпи юртлы кузьмаз. Юртэз ёрос кенешлэн исполкемезлэн лулчеберет ёзэтэзлы сётэмын[4].
Нырысь-валысь музей котырез А. Г. Векшинаен ӵош ужам эмсузэр Н. М. Фадеева чаклалляз.
1987-тӥ арын 3-тӥ шуркынмонэ музей-юртэз сӥё-дано усьтон ужрад ортчиз. Со быдэс Удмуртиын нырысетӥез литератураен герӟаськем музей-юрт луиз[4].
Алнаш черкогуртысь музей-юртын пыраклы кылемын Ашальчи Окилэн югыт, чылкыт калыкез яратӥсь лулыз. Азяз пичияк ӟусэн шыпыт юрт котьку усьтэмын пырисьлы...
1986-тӥ арын Ашальчи Окилэн улэм юртэз улос инлыкен истори синпелетъёс пӧлы пыртэмын. 1988-тӥ арын Изобразительной искусствоосъя Удмурт кун музейлэн ёзэтэз каремын, 1990-тӥ арын Кузебай Герд нимо йӧскалык музейлэн ёзэтэз луиз. Берлогес Алнашысь историяя но литературая музейлэн подразделениез лдъяськыны кутскиз[4].
Музей-юртын 950-лэсь ятыр экспонат утиське, соос пӧлын — Акилина Векшиналэн аслаз арбериосыз сяна, 70-лэсь трос со сярысь тодэ ваёнъёсын гожтэт люкамын[6].
Та одӥг гинэ юрт, кудӥз герӟаськемын кылбурчиен: 1980-тӥ аръёслэн пумаз Ашальчи Окилэн вордӥськем гуртаз, Грах ёросысь Кузебай гуртын кыкетӥзэ музей-юрт усьтон сярысь ужпум ӝутэмын вал. Озьы ке но, вераськонъёсын гинэ кылиз, аръёс ортчемъя, гурт пумын сылӥсь юрт куашказ[7].
1965-тӥ арын гужем ми А. Н. Клабуковен Алнаш ёросэ лыдӟиськисьёсын пумиськонэ потам. Клабуковлэн туж потэ вал Ашальчи Окиен пумиськемез. Озьы дораз кожаны малпам. Милемыз пумитаз арлыдо йӧно кышномурт. Со вакыт гуртаз огназ вадьсаськем, картэз, И. И. Карачев, — аслаз агроном ужъёсызъя кошкемын. ивор сётытэк пыременымы, Ашальчи Оки кӧня ке возьдаськиз кадь, но солэн шумпотонэз но шӧдӥськиз.
— литературовед А. А. Ермолаев[8]
Валэктонъёс
- ↑ Мемориальный дом-музей первой удмуртской поэтессы Л. Г. Векшиной (Ашальчи Оки)
- ↑ Дом в котором жила поэтесса Ашальчи Оки // Материалы Свода памятников истории и культуры РСФСР. Удмуртская АССР / О. П. Точеный, Д. Б. Павлов, Е. Н. Чернявская — Научно-исследовательский институт культуры, 1986—116 с. — С. 71
- ↑ Светлана Стовбун — Поэтесса и врач Ашальчи Оки Архивная копия от 3 инвожое 2019 на Wayback Machine // Статья из газеты: Еженедельник «Аргументы и Факты», № 14, 3 апреля 2013
- ↑ 1 2 3 Мемориальный дом-музей первой удмуртской поэтессы Л.Г. Векшиной (Ашальчи Оки)(рус.) Алнашский историко-литературный музей муниципального образования «Алнашский район».
- ↑ Зоя Богомолова - Любовь и жизнь Ашальчи Оки // Памятники отечества: альманах Всероссийского общества охраны памятников истории и культуры, Выпуски 1-2 - Общество, 1995 - стр. 148-150
- ↑ Литературный дом-музей Ашальчи Оки(ӟуч) Культура.РФ.
- ↑ Зоя Алексеевна Богомолова — Как молния в ночи: К. Герд, жизнь, творчество, эпоха — Изд-во Удмуртского ун-та, 1998—750 с.
- ↑ Алексей Ермолаев «Чыртывесь» («Ожерелье») сборникысь
Чӧлсконъёс
- Мемориальный дом-музей первой удмуртской поэтессы Л. Г. Векшиной (Ашальчи Оки) // Официальный сайт Алнашского историко-литературного музея, 2019
- Дом, в котором жила и работала в 1969—1970 гг. удмуртская советская поэтесса Ашальчи Оки (Лина Григорьевна Векшина). // Единый государственный реестр объектов культурного наследия