Благовещенской собор (Вотка)
| Православной черк | ||
| Инмар Анайлэн Благовещение нимо черкез | ||
|---|---|---|
 | ||
| 57°03′08″ с. ш. 53°59′12″ в. д.GЯO | ||
| Кун |
 Россия |
|
| Город | Вотка | |
| Конфессия | Православие | |
| Епархия | Ижысь | |
| Благочиние | Вотка | |
| Архитектурной стиль | Ӟуч классицизм | |
| Архитекторез | Александр Постников | |
| Кылдытэмын | 1764 | |
| Юртэз пуктэмын | 1817—1819 аръёс | |
| Инлыкез |
 ОКН № 1830036000 |
|
| Югдурез | Ужась | |
| Сайтэз | soborvb.cerkov.ru | |
|
|
||
 |
||
 Медиафайлъёс РувикиМедиа пушкын | ||
 | Россилэн лулчеберето кылёс лэсьтосъёсыз улос инлыкен рег. № 181410064720005 (ЕГРОКН) лэсьтос № 1830036000 (БД Викигида) |
Инмар Анайлэн Благовещение нимо черкез (Благовещенской собор) — Удмуртиысь Вотка карысь православной черк. Ӟуч православной черклэн Ижысь епархияз пыре. Удмурт Элькунысь архитектурая утёно синпелет луэ.
Историез
1759-тӥ арын 21-тӥ куарусёнэ Вотка заводэз усьтэм бере черк пуктонлы кулэяськон кылдӥз. Со аре ик 19-тӥ толсуре лэсьтӥськыны храмозданной грамота сётэмын вал. Черклэн нырысетӥ баӵкоез иерей Василий Содальский луиз. 1760-тӥ арын 5-тӥ коньывуонэ черкез святитель Димитрий Ростовский нимын вӧсязы. Ватка духовной консисторилэн 1764-тӥ арын 21-тӥ коньывуонэ юнматэм указэзъя Инмар Анайлэн Благовещениез нимо тол черк ӝутэмын. 1764-тӥ арын 24-тӥ инвожое Емельян Пугачёв кивалтэм улсын ожъёсы пыриськемъёс черкез сутӥзы, Василий Содальский баӵкоез виизы[1].
1775-тӥ арын 14-тӥ куартолэзе Благовещенской приделэн выль Димитриевской черк пуктэмын. 1811-тӥ арын 29-тӥ коньывуонэ солэн настоятелез протоиерей Василий Блинов луиз. 1815-тӥ арын пӧсьтолэзе Вотка заводысь мастеровойёс излэсь черк ӝутыны куризы. Фундамент лэсьтыны со аре ик кутскизы, но со умойтэм пӧрмиз. 1817-тӥ арын Александр Иванович Постниковлэн проектэзъя лэсьтӥськон ужъёс азинтэмын. 1818-тӥ арын толсуре, Ватка епископлэн бакель сётэмезъя, протоиерей Василий Блинов бур палысьтыз приделэз святитель Николай Чудотворецлэн нимыныз вӧсяз, нош 1919-тӥ арын 19-тӥ оштолэзе — паллян палысьтыз приделзэ святитель Димитрия Ростовскийлэй нимыныз. Пулэсь вашкала черкез Нагорной шайвылэ выжтӥзы, татын сое Кузё-Инмарлэн Преображениез нимын вӧсязы[1].
1819-тӥ арын черкез ӝутӥзы, но пуш ужъёсыз вуттэмын ӧй вал на. 1827-тӥ арын гинэ иконостас пуктон борды басьтӥськизы, мудоръёсты суредаз Кузонысь художник Алексей Тимофеевич Винокуров. 1828-тӥ арын 29-тӥ пӧсьтолэзе Вятской но Слободской архиепископ Кирилл Инмар Анайлэн Благовещениез нимын черкез вӧсяз. Гырлы жугон интызэ 1839-тӥ арын гинэ ай архитектор Василий Никифорович Петенкин йылаз-пумаз вуттӥз. 1840-тӥ арын 5-тӥ куартолэзе черкын Пётр Ильич Чайковский вуоно композиторез пылатӥзы. 1841-тӥ арын приделъёсысь иконостасъёс выльдэмын, таин валче соос выльысь вӧсямын. Паллян палыз озьы ик святитель Димитрий Ростовский нимын вӧсямын, нош бур палыз Инмар Анайлэн Владимирысь мудорлэн нимыныз вӧсямын[1]. 1845-тӥ арын 22-тӥ тулыспалэ черклэсь валтӥсь престолзэ, татысь иконостасэз выльдэмен, выльысь Инмар Анайлэн Благовещениез нимын вӧсямын[2]. 1846-тӥ арын 25-тӥ южтолэзе протоиерей Василий улонысь кошкиз, черклэн котыртэмаз ватэмын[1].
1863-тӥ арын черкез паськытатӥзы. 1882-тӥ арын черк бордын ужась приходской попечительство усьтэмын. 1896-тӥ арлы Благовещенской соборлэн приходаз, Вотка заводын улӥсьёс сяна, эшшо 52 ӟуч но 25 удмурт гуртъёсысь но починкаосысь улӥсьёс юнматэмын вал. XIX даурлэн пумаз черклы настоятель протоиерей Николай Кошурников луиз. Революция пуромемлэсь азьвыл соборын служба нуизы югдытӥсь Чернышёвъёслэн выжыысьтызы вотка баӵкоос[1]. 1913-тӥ арын Благовещенской черк борды куинь черкъёс (Преображенской шайвыл черк, Николаевской но Александровской вӧсяськон юрт) но 12 часовняос юнматэмын вал[2].
1918-тӥ арын толсуре Иж-Вотка восстание дыръя большевикъёс Николай Чернышёв баӵкоез но солэсь Варвара нылззэ ыбылӥзы. Александр Колчаклэн Сибирь армиез Воткае пыремез бере оштолэзе таослэн мугоръёссы шедьтэмын но люкиськон ужрад ортчытэмын вал. 1918-тӥ арын толсурысен 1920-тӥ арозь черк ӧз ужа, но бератаз службаос азинскизы. Черкысь дуно арбериосты совето власть талаз. Сарапулысь окружной исполкомлэн президиумезлэн 1929-тӥ арын 15-тӥ южтолэзе юнматэм постановлениезъя черк пытсамын. 1931-тӥ арын куартолэзёзь инженер Аронштам кивалтэм улсын юртлэсь архитектурая туссэ быдтыны выризы. Фрескаосты куашкатон вылысь комсомолецъёслэсь нимысьтыз бригадаос кылдытэмын вал, нош обросъёсты эстӥськон вылысь кутылӥзы. 1931-тӥ арын тупатъям юртын Ленин нимо лулчеберетъя юрт усьтӥськиз[1].
2001-тӥ арын 31-тӥ толшоре Вотка карысь дума черкез оскисьёслы берыктон сярысь пуктэт юнматӥз. 2001-тӥ арын 2-тӥ гудырикошконэ Ижысь но Удмуртиысь архиепископ Николай литургия но черкез вӧсян ужрад ортчытӥз. Настоятеле Валерий Белокрылов баӵкоез юнматӥзы. 2005-тӥ арын черкез архитектураысь вашкала туссэ берыктон проект дасямын. Со аре ик черк борды совето вакытэ пуктэм «Спутник» кинотеатрез куашкатӥзы, со урод ни вал[1]. 2006-тӥ арын мытэм выльдӥськон ужъёс 2014-тӥ арын дугдытэмын вал[3]. 2021-тӥ арын южтолэзе соборез тупатъян вылысь 2019-тӥ арын кылдытэм Попечительской кенешлэн заседаниезлэн йылпумъянъёсызъя, черкез 2023-тӥ арын выльысь усьтыны чакламын шуыса ялэмын вал. Выльдон ужъёс йылпумъяськытозь, улысь черкын вӧсяськизы[4]. 2023-тӥ арын коньывуонэ подрядчик собор котырысь участоклы планировка лэсьтон борды кутскиз[5]. 2024-тӥ арын 2-тӥ толшоре тупатъям соборын нырысетӥ молебен ортчиз[6]. 2025-тӥ арын куартолэзе соборез патриарх Кирилл вӧсяз[7].
XIX даурысь собор
Вотка тыметлэн но соборлэн тусъёссы
Гырлы жугон
Cоборлэн макетэз П. И. Чайковскийлэн музей-усадьбаяз утиське
Валэктонъёс
- ↑ 1 2 3 4 5 6 7 Александр Корамыслов История одного храма Православие.Ru. Эскеремын 2020-01-27 арын
- ↑ 1 2 Архивная служба Удмуртской Республики Архивная служба Удмуртской Республики. Эскеремын 2020-01-27 арын
- ↑ Боярко М. Глава Удмуртии станет сопредседателем Попечительского Совета Благовещенского собора Воткинска Известия Удмуртской Республики. Эскеремын 2020-01-27 арын
- ↑ Благовещенский собор в Воткинске откроется после реконструкции в 2023 году Сайт «Моя Удмуртия». Эскеремын 2021-03-09 арын
- ↑ Сейчас подрядчик занимается планировкой участка возле собора в Воткинске.
- ↑ Патриарх Кирилл освятил восстановленный Благовещенский собор Воткинска, в котором крестили Петра Чайковского - Православный журнал «Фома», Православный журнал «Фома» (19 куартолэзе 2025). Эскеремын: 20 куартолэзе 2025 арын.
- ↑ Патриарх Кирилл освятил Благовещенский собор в Воткинске