Мынам Удмуртие
«Мынам Удмуртие» (ӟуч: Моя́ Удму́ртия) — Удмурт Элькунысь тужгес егитэз телерадиокомпани. Передачаоссэ возьматыны кутскиз 2002 арын 2 коньывуонэ. Телепрограммаос эфире потыло дециметровой диапазонын (аслаз программаосызлы нуналлы быдэ 3 час висъямын), радиопрограммаосыз — FM-диапазонын (аслаз программаосызлы — 18 час). ТРК «Удмуртия» — кун унитарной предприяти, солэн учредителез — Удмурт Элькун Кивалтэт.
Тросэз телепрограммаос удмурт кылын пото, ӵемысь — ӟуч титръёсын. Тужгес но тодмоез проект луэ «По соседству мы живём» («Бускель луыса ми улӥськом») реалити-шоу. Пиналъёслы нимаз передача — «Шудон корка» программа 2006-тӥ арын «Тэффи» премиен пусъемын. Сое нуисез – Малыок (Ольга Ардашева) но мунё Моко. «Моя Удмуртия»-ысь режиссёр Лев Вахитов трос тунсыко фильмъёслэн авторзы, «Солнечный зайчик» фильмез понна «Тэффи» премия басьтӥз (2005). Отын вераськон мынэ тодмо суредась но удмурт выжыкылъёсын книгаослы иллюстрациос лэсьтӥсь Менсадык Гарипов сярысь. Трос проектъёс дасяз но нуиз Светлана Кибордина. Учкисьёс вылӥ дунъязы солэсь «Витисько тонэ» программазэ. Трос аръёс ӵоже Светлана котькуд кӧснунал ӵукнаосы меӵак эфирын потӥсь «Шундыберганъёс» программалэн нуисез вал.
Ӟуч кылын потӥсь авторской программаос пӧлысь уката тодмо луэ «Шурики» нимо проект (потэ 1996 арысен). Нырысетӥ выпускез потӥз Ижысь «Новый регион» нимо телекомпанилэн эфираз, али дыре мынэ «Моя Удмуртия» каналын. Та проектлэн жанрез пумысен солэн кивалтӥсез Юрий Широбоков, комикс луэ шуыса оскытэ. Геройес пӧртэм серемес учыръесы шедё; ӵемысь уже кутӥсько пӧртэм звукоподражаниос но междометиос. «Моя Удмуртия» каналын бигер кылын редакция ужа.