Алнашысь историяя но литературая музей
РФ Лулчеберетъя министерство
| «Алнаш ёрос» муниципал кылдытэтлэн Алнашысь историяя но литературая музей | |
|---|---|
 | |
| Кылдытэмын | 1986 |
| Интыяськемын |
 Россия,  Удмуртия |
| Адресэз | 427880, Росси Федерация, Удмуртия, Алнаш черкогурт, Комсомольской ульча, 3-тӥ юрт |
| Кивалтӥсез | Еремеева Анна Николаевна |
| Сайтэз | alnashimuseum.udm.muzkult.ru |
 |
|
Алнашысь историяя но литературая огазеям музей (вакч. — «Алнашысь историяя но литературая огазеям музей» МБУК; ӟуч: Алнашский историко-литературный музей) — Удмурт Элькунысь лулчеберетъя муниципал бюджет ужъюрт. 1986-тӥ арын усьтэмын. Музейлэн валтӥсь фондаз 2500-лэсь ятыр экспонатъёс утисько[1].
Алнаш ёросысь Алнаш черкогуртысь Комсомольской ульчаысь 3-тӥ юртын интыяське[2]. Музей 2002-тӥ арын пуктэм Лулчеберетъя но искусствоосъя центрын ужа[3].
Историез
1986-тӥ арын Алнашын нырысетӥез кун музей кылдытэмын вал. Музейын радъям нырысетӥез экспозиция Удмурт АССР-ысь калык суредасьлы, этнографлы, дышетӥсьлы Семён Николаевич Виноградовлы сӥземын вал, ужрад 50 аръем юбилеез улсын ортчиз. Музеез усьтон бордысен утчаськон, люкан, эскерон уж кутскиз. Музейлэн фондъёсаз этнографияя, историяя, литературая экспонатъёс кылдӥзы. Музей адӟытон зал сямен ужаз, 1988-тӥ арын 6-тӥ куартолэзьысен со Удмурт Элькунысь изобразительной искусствоосъя музейлэн ёзэз вал. Та ужъюртлэн нырысетӥ кивалтӥсез В. И. Колесников вал. Алнашысь историяя но литературая музей мерлыко амалъя ужалляз. Экскурсиосты библиотекарьёс, В. И. Колесников яке Н. М. Фадеева ортчытъязы[1].
1990-тӥ—1997-тӥ аръёсы музеен В. М. Булдаков кивалтӥз. 1991-тӥ арын музей бордын фольклоръя но драмая «Даур» коллектив кылдытэмын вал. Коллективлэн репертуараз удмуртъёслэн калык кырӟанъёссы пыризы. Фольклор коллектив удмурт телевиденилэн «Лымшор удмуртъёслэн сюанзы» фильмез лэсьтонэ, фольклор коллективъёслэн «Трокай» ёрос смотръёсазы пыриськылӥз, ёросысь но элькунысь школаосын удмурт йылолъёсты возьматъяз, Мускоын, Кузонын, Ижкарын гастрольёсы потаз[1].
Алнашысь историяя но литературая огазеям музейлэн кык ёзэз: Алнашысь Первомайской ульчаысь 5 а номеро коркан интыяськем Ашальчи Окилэн музей-юртэз но Алнашысь Красильниковлэн ульчаысьтыз 16 номеро коркась Геннадий Красильниковлэн музей-юртэз[4].
1991-тӥ арын Алнашысь историяя но литературая музей ёзъёсыныз валче Удмурт Элькунысь шаертодонъя музейлэн бурд улаз пыриз но Алнашысь историяя но литературая огазеям музей луиз[1].
2005-тӥ арын музей Алнаш муниципалитет кие выжиз. 2008-тӥ арысен «Алнаш ёрос» муниципал кылдытэтлэн Алнашысь историяя но литературая музеез" лулчеберетъя муниципал ужъюрт луиз[1].
Музейысь ӧнерчиос удмурт калыклэн сямъёсызъя но йылолъёсызъя, ёрослэн историезъя, шаертодонъя, Кузебай гуртысь удмуртъёслэн языческой вӧсяськонъёссыя материал люканэз азинто[5].
Алнашысь историяя но литературая музейын арлы быдэ 4-5 адӟытонъёс радъясько[4].
Музее арлы быдэ ог 8000 куноос вуыло[4]. Огдырлы чаклам возьматонъёслэн интызы — 117 м2, утёно фондъёслэн — 28 м2.
Музеез кылдытӥсь Удмурт Элькунысь «Алнаш ёрос» муниципал кылдытэт луэ.
Музейлэн директорез — Еремеева Анна Николаевна[2].
Г. Д. Красильниковлэн музей-юртэз
Геннадий Дмитриевич Красильниковлэн музей-юртэз 1991-тӥ арын усьтэмын. Музей удмурт литератураысь классиклы, прозаиклы, публицистлы, журналистлы, УАССР-ысь Кун премилэн лауреатэзлы, Удмуртиысь Гожъяськисьёслэн огазеяськонзылэн тӧроезлы Геннадий Красильниковлы сӥземын. Музей писателен пуктэм юртын интыяське. Семьяеныз ӵош та корка со 1959-тӥ арын выжиз. Юртъер «Вуж юрт» повестьсэ поттэмез понна басьтэм гонорарлы ӝутэмын вал. 1963-тӥ арын Г. Д. Красильников Удмуртиысь Гожъяськисьёслэн огазеяськонзылэн тӧрое быръемын вал. Геннадий Красильников Иже кошкиз. 1965-тӥ арын юртэз вузамын вал, 1990-тӥ арозь та коркан КПСС-лэн РК-мысьтыз кыкетӥ секретарьлэн Токаревлэн семьяез улӥз. 1978-тӥ арын юрт бордаз мемориал пул юнматӥзы. Отӥяз Свобода ульчаез, писательлы сӥзьыса, Красильниковлэн ульчаез нимазы[6].
Музеез но экспозициоссэ кылдытыны Удмурт Элькунысь шаертодонъя музейысь ӧнерчиос юрттӥзы. Музей Удмурт Элькунысь шаертодонъя музейлэн ёзэз луиз. Отӥяз музей-юрт «Алнаш ёрос» муниципал кылдытэтлэн Алнашысь историяя но литературая музеез" лулчеберетъя муниципал ужъюртлэн ёзэтэз луиз. Ужъюртын школаын дышетскисьёс понна Удмуртиысь гожъяськисьёслы сӥзем урокъёс, наукая конференциос, пумиськонъёс, семинаръёс ортчыло[6].
Ашальчи Окилэн мемориал музей-юртэз
Та юртын нырысетӥез удмурт кылбурчи, Удмурт АССР-ысь дано эмчи Акилина Григорьевна Векшина 1952-тӥ ар пумысен 1973-тӥ арозь улӥз. 1974-тӥ арын корка борды мемориал пул юнматӥзы. 1985-тӥ арын 29-тӥ куартолэзе Алнаш ёросысь УАССР-ысь Калык депутатъёслэн кенешсылэн быдэсъясь комитетлэн кенешоназ 5 номеро протоколъя Алнашысь Первомайской ульчаысь Карачев Валерий Ивановичлэсь (Ашальчи Окилэн пиез) ваньбуре кылем корказэ 1986-тӥ арын ёрос кенешысь быдэсъясь комитетлэн лулчеберетъя ёзэз кие сётон сярысь решение кутэмын вал. Юртэз улосэн утёно историысь синпелетъёс пӧлы пыртӥзы, нырысь-валысь Алнаш ёрос кенешысь быдэсъясь комитетлэн лулчеберетъя ёзэз, УАССР-ысь Лулчеберетъя министерство бордын ужаз[7][8].
1987-тӥ арын 3-тӥ шуркынмонэ музей-юртэз усьтон ужрад ортчиз, со Удмуртиысь нырысетӥез литературая музей-юрт луиз. 1988-тӥ арын Удмурт Элькунысь изобразительной искусствоосъя музейлэн ёзэз луиз, нош 1990-тӥ арын — Удмурт Элькунысь Кузебай Герд нимо йӧскалык музейлэн ёзэз. Бератаз Алнашысь историяя но литературая музейлэн ёзэз луиз. Музей-юртын 950-лэсь ятыр экспонатъёс утисько, соос пӧлын: киын гожъямъёсыз, ужкагазъёсыз, семьяен туспуктэмъёсыз, ӵыжы-выжыосызлэн но современникъёслэн портретъёссы, картинаос, грампластинкаос, фономатериалъёс (кассетаос но солэн кураеныз дискъёс), арбериосыз, юртъер котырын кутӥськем тӥрлык но мебель, ужаз кутэм эмъян тӥрлык, поэтасса сярысь тодэ ваёнъёсын 70-лэсь ятыр гожтэтъёс, медициная пособиос, гожъяськисьёслэн кинюртэменызы книгаос но ужкагазъёс[7][8].
Коллекциосыз
Музей фондын ваньмыз-ӧвӧлэз 2533 экспонатъёс, таос пӧлысь 2165-ез — валтӥсь фондысь арбериос.
Тужгес дуно коллекциос: лымшор удмуртъёслэн пужыё куиськонзы — 63 утёно единица, удмуртъёслэн йыркерттэт но чеберлыкъя ӵушконъёс — 52 утёно единица. Музейын коллекциос таӵе темаосъя люкамын: «Лымшор удмуртъёслэн пужыё куиськонзы», улон-вылонын кутӥськись арбериос, интыысь суредасьёслэн картинаоссы, Алнаш ёросын вордскем гожъяськисьёслэн, тодосчиослэн, артистъёслэн туспуктэмъёссы[9].
Котырысьтыз лулчеберетъя объектъёс
Алнашысь историяя но литературая музей котырын интыяськемын:
- Г. Д. Красильниковлэн мемориал музей-юртэз, адресэз: Алнаш черкогурт, Красильниковлэн ульчаез, 16-тӥ юрт[6].
- Ожгарчиослы синпелет, адресэз: Алнаш черкогурт, Красильниковлэн ульчаез[10].
Ужез
Музейын ортчись валтӥсь экскурсиос: «Данъяськисько тонэн, Алнаш музъем», «Дауръёс пыдсысь», «Алнашысь историяя но буре ваён интыосъя пыдын экскурсия». Музейын лекциосъя циклъёс радъясько: «Удмурт калыклэн йылолъёсыз», «Алнаш ёросысь суредасьёс», «Алнаш черкогуртлэн историез»[9], озьы ик квестъёс — «Уйсы бызьылонъёс», «Инкуазез тодӥсьёс»[4].
Музейын арлы быдэ таӵе нимо-дано нуналъёсты но шулдыръяськонъёсты пусъё: музеез усьтон нунал, Музейёслэн калыккуспо нуналзы, Тодон-валан басьтон нунал, Красильниковлэн ульчаезлэн праздникез, Л. Г. Векшиналэн (Ашальчи Оки) вордскем нуналыз но сое буре ваён нунал, Г. Д. Красильниковлэн вордскем нуналыз но сое буре ваён нунал, «Ӟечбур, Паска», Ымусьтон тунаськонъёс, «Музей уй» калыккуспо акция[9].
Валэктонъёс
- ↑ 1 2 3 4 5 О музее [ӟуч] Алнашский историко-литературный музей муниципального образования «Алнашский район». Эскеремын 06.09.2025 арын
- ↑ 1 2 Контакты [ӟуч] Алнашский историко-литературный музей муниципального образования «Алнашский район». Эскеремын 06.09.2025 арын
- ↑ Центр культуры и искусства [ӟуч] Информационный партнёр журнала «Мир Музея» и федерального центра гуманитарных практик. Эскеремын 06.09.2025 арын
- ↑ 1 2 3 4 Главная [ӟуч] Алнашский историко-литературный музей муниципального образования «Алнашский район». Эскеремын 06.09.2025 арын
- ↑ Алнашский объединенный историко-литературный музей [ӟуч] Культура.РФ. Эскеремын 06.09.2025 арын
- ↑ 1 2 3 Мемориальный дом-музей Г. Д. Красильникова [ӟуч] Алнашский историко-литературный музей муниципального образования «Алнашский район». Эскеремын 06.09.2025 арын
- ↑ 1 2 Литературный дом-музей Ашальчи Оки [ӟуч] Культура.РФ. Эскеремын 06.09.2025 арын
- ↑ 1 2 Мемориальный дом-музей первой удмуртской поэтессы Л. Г. Векшиной (Ашальчи Оки) [ӟуч] Алнашский историко-литературный музей муниципального образования «Алнашский район». Эскеремын 06.09.2025 арын
- ↑ 1 2 3 Алнашский объединенный историко-литературный музей [ӟуч] idemvmuzei.ru. Эскеремын 06.09.2025 арын
- ↑ Воинам-освободителям [ӟуч] yandex.ru. Эскеремын 06.09.2025 арын
 |
|---|
