Виноградов, Семён Николаевич
| Семён Николаевич Виноградов | |
|---|---|
 | |
| Вордӥськем нуналыз | 27-тӥ толшоре 1936 (90 арес) |
| Вордӥськем интыез | Шайтангурт (Алнаш ёрос), Алнаш ёрос, Удмурт АССР |
| Кунмуртлыкез |
 СССР |
| Жанр | живопись |
| Дышетскемез |
Можга педколледж (1955), Кузонысь суреданъя училище (1960), Мускоысь В. И. Суриков нимо суредаськонъя институт (1967) |
| Данъетъёсыз |
Удмуртиысь калык суредась, Трокай Борисов но Кузебай Герд нимо йӧскалык премиослэн лауреатъёсыз, Удмурт Элькунлэн Дано кунмуртэз, Алнаш ёрослэн дано муртэз |
Семён Никола́евич Виногра́дов (ворд. 1936-тӥ арын 27-тӥ толшоре Алнаш ёросысь Шайтангуртын, Удмурт АССР) — удмурт живописец, этнограф, дышетӥсь. Живописья профессор, Россиысь Суредаськисьёслэн огазеяськонзылэн ёзчиез, Удмуртиысь калык суредась. Трокай Борисов но Кузебай Герд нимо йӧскалык премиослэн лауреатъёсыз. Удмурт Элькунлэн Дано кунмуртэз.
Улон сюресэз
1936-тӥ арын 27-тӥ толшоре Удмурт АССР-ысь Алнаш ёросысь Шайтангуртын вордӥськиз. Атаез, Николай Петрович, колхозэ пыремъёс пӧлысь гуртын нырысетӥез вал, Быдӟым Атыкай ож пыр потӥз, кык пол сӧсырмылӥз. Анисья Андреевна анаез эмъянын кутӥськись турынъёсты тодылӥз, сям-йылолъёсты утьылӥз. Семён семьяын кыкетӥез пинал вал, солэсь азьвыл вордӥськем апаез но со бӧрсьы вордӥськем кык вынъёсыз пичи дыръязы кулӥзы[1].
Семён Виноградовлэн пичи дырыз война вакытлы тупаз, соин ик со сизьым аресказ ик ужаны кутскиз: етӥн ишкиз, тышказ, сэстӥз. Азамат шор ёзо школаез йылпумъяса, 1951-тӥ арын Можгаысь педучилищее, отӥяз Кузонысь суредаськонъя но ремеслоя училищее дышетскыны пыриз. Солэн тодэ ваемъёсызъя, со туж секыт аръёс вал: училищелэн огъяулонниез ӧй вал, нош улон интылы, сиён-юонлы, дӥськутлы уксёез студентлэн ӧз тырмылы; «трос пол урамын но подвалъёсын кӧлалляз, одӥг пол кезьыт музъем борды но кынмиз», но дышетсконзэ ӧз кушты[2][3].
Отӥяз Мускоысь В. Суриков нимо суредаськонъя кун институтэ пыриз, сое 1967-тӥ арын горд дипломен йылпумъяз. Егит ӧнерчиез Краснодар улосысь, Сахалинысь но Камчаткаысь ужсётӥсьёс доразы ӧтё вал, но со Удмуртие берытскиз[1].
1967-тӥ арын СССР-ысь Суредаськонъя фондлэн Удмурт ёзаз уже кутскиз. 1969-тӥ арысен — Удмурт кун пединститутысь суредаськон искусствоосъя кафедраысь суредаськонъя но графикая факультетысь ассистент, УАССР-ысь Министръёслэн Кенешсы бордын ужась наукая но эскеронъя институтысь наукая ӧнерчи. Наукаысь бадӟымез ужась сямен экспедициосы поталляз, удмурт дӥсьлы сӥзем альбом поттӥз[1].
1973-тӥ арысен — СССР-ысь Суредаськисьёслэн огазеяськонзылэн ёзчиез. Соку солы Удмуртиысь вань суредасьёс пӧлысь нырысь ик удалтӥз Францие творчествоя командировкае вуылыны. 1980-тӥ арын со УАССР-ысь нырысетӥез калык суредась луиз[1][4][3].
1992-тӥ арын Удмурт кун университетын живописья кафедра усьтон пумысен сюлмаськиз, ачиз ик дасо ар ӵоже соин кивалтӥз[4][1]. 1996-тӥ арын Россиысь Вылӥ дышетонъя кун комитетлэн решениезъя Виноградовлы живописья профессор ним сётэмын[4].
Творчествоез
Семён Виноградов портрет, пейзаж, натюрморт жанрен ужа, удмурт калыклэн этногафиезлы сӥзем темаосты эскере[4]:
1950-тӥ–1960-тӥ аръёсы адӟытонъёсын пӧртэм йӧскалык республикаосысь художникъёслэсь суредъёссэс учкисько вал, соос выжы калыксэс возьматыны тыршизы, йӧскалык ымныр тусъёслы, йылолъёслы тужгес бадӟым саклык висъяллязы, костюмъёссылэсь аспӧртэмлыксэс, пужыоссэс нимысьтыз пусйылӥзы. Нош Удмуртиын йӧскалык дӥсен удмуртъёсты, соослэсь йылолъёссэс, праздникъёссэс возьматыны ӧз дыртылэ – сяме пыремын ӧй вал. Лыдъяло вал: вань удмуртэз – со вашкалае, бере кылем маке, нош советоез – азьмынӥсь, прогрессивной. Но калыкез искусство пыр ӧд возьматы ке, со воксё но ӧвӧл кадь. Мынам адӟытэме потӥз, удмуртъёс мукет выжы калыкъёслэсь чеберлыкенызы, лулчеберетэнызы, историенызы, дунъетъёсынызы воксё но уродгес ӧвӧл шуыса[3].
Семён Виноградовлэн уноез ужъёсыз Удмуртиысь суредаськон искусствоосъя музейын утисько. Озьы ик адӟытонъёсыз Алнашысь историяя но литературая музейын радъясько. «Гудыри» картиназэ Россиысь Лулчеберетъя министерство басьтӥз. Куд-ог произведениосыз частной коллекцие сюризы, соосты таӵе кунъёсы поттӥзы: Венгрия, Франция, Китай, США, Саудовской Аравия но мукет[5].
Суредасьлэн уно произведениосыз школа учебникъёсы, «Удмуртская Республика» энциклопедие, озьы ик шаертодонлы но удмуртъёслэн сям-йылолъёсылы сӥзем бичетъёсы но монографиосы пыремын [5].
Семьяез
Кузпалыз — Антонида Гавриловна. Кык пиоссы: Сергей но Андрей. Вить нуныкайёссы[1].
Данъетъёсыз
- УАССР-ысь калык суредась;
- Алнаш ёрослэн дано муртэз;
- Т. Борисов нимо йӧскалык премилэн лауреатэз;
- Кузебай Герд нимо йӧскалык премилэн лауреатэз[2][1][5];
- Удмурт Элькунлэн Дано кунмуртэз.
Семён Виноградовлэн нимыз Азамат шор ёзо школалы сётэмын, ӵапак татын со дышетскиз[2][5].
Библиография
- Виноградов С. Н. Кладезь удмуртской философии и магии: ст. об обычаях, традициях, мировоззрении удмуртов. — Ижевск, 2010. — 148 с.
- Виноградов С. Н. Терминология удмуртских народных узоров // Ежегодник финно-угорских исследований. — 2008. С. 178—188.
- Виноградов С. Н. Удмуртская одежда: [альбом] / С. Виноградов. — Ижевск: Удмуртия, 1974. — 68.
Озьы ик учке
Валэктонъёс
- ↑ 1 2 3 4 5 6 7 Виноградов Семен Николаевич [ӟуч] Воршуд.
- ↑ 1 2 3 Кристина Романова С растопыренными глазами Известия Удмуртской Республики.
- ↑ 1 2 3 Анна Вардугина Художник, пишущий историю Удмуртии Удмуртская правда.
- ↑ 1 2 3 4 Виноградов Семен Николаевич [ӟуч] Удмуртский республиканский музей изобразительных искусств.
- ↑ 1 2 3 4 Калыкез югдыто, азьлане бурдъяло [удм.] Удмурт дунне.
Литература
- Гартиг В. О. Портрет Ижевска в зеркале времени // Ежегодник финно-угорских исследований. 2015. Вып. 1. С. 131—135.
- Семён Виноградов/[авторы текстов: В. В. Краснова, В. О. Гартиг]. — Ижевск: Удмуртия, 2014. — 94 с.
- Семён Виноградов: Очерк творчества / [Авт.-сост. В. О. Гартиг]. — Ижевск: Удмуртия, 2000. — 82, [2] с.: ил., портр.; 29 см; ISBN 5-7659-0027-5