Холмогоров, Алексей Павлович

Рувикиын таӵе фамилиен мукет муртъёс сярысь гожтосъёс вань. Учке: Холмогоров.

Алексей Павлович Холмогоров
Вордӥськем нуналыз	24-тӥ инвожое 1925(1925-06-24)
Вордӥськем интыез	Молчаны, Сарапул округ, Урал улос, СССР
Кулэм нуналыз	30-тӥ куарусёнэ 1987(1987-09-30) (62 арес)
Кулэм интыез	Ижкар, Удмурт АССР, СССР
Кунмуртлыкез	СССР СССР
Жанр	живопись
Дышетскемез	Мускоысь В. И. Суриков нимо суредаськонъя институт (1959)
Данъетъёсыз

Алексе́й Па́влович Холмого́ров (1925-тӥ арын 1-тӥ южтолэзе Вотка ёросысь Молчаны гуртын, Удмурт АССР—1987-тӥ арын 30-тӥ куарусёнэ Ижкарын) — совето суредась, живописец но портретист. СССР-ысь Суредаськисьёслэн огазеяськонысьтызы ёзчиез (1960). РСФСР-ысь И. Е. Репин нимо Кун премилэн лауреатэз (1981). РСФСР-ысь дано суредась (1972). РСФСР-ысь калык суредась (1981). Быдӟым Атыкай тыложе пыриськем мурт. РСФСР-ысь Суредаськисьёслэн огазеяськонысьтызы секретарь (1972—1985). РСФСР-ысь Суредаськисьёслэн огазеяськонзылэн Удмурт ёзэзлэн тӧроез (1962—1965).

Улон сюресэз

1925-тӥ арын 1-тӥ южтолэзе Удмурт АССР-ысь Вотка ёросысь Молчаны гуртысь репрессиос улэ сюрем семьяын вордӥськиз. Пинал но егит дырыз нюлэс дасян каргуртъёсын ортчиз. 7 классэз йылпумъямез бере, атаез сямен ик, нюлэс дасяз, грузчик но кочегар луыса тыршиз.

1943-тӥ арысен А. П. Холмогоров РККА-лэн радъёсаз басьтэмын но ожгар армие келямын, Дальневосточной фронтын Быдӟым Атыкай оже пыриськемын. Ожгар службаын дыръяз Мускоысь Н. К. Крупская нимо калык университетын суредаськонъя курсъёсын заочно амалэн дышетскыны кутскиз. 1947-тӥ арын совето армилэн радъёсысьтыз демобилизовать каремын. 1985-тӥ арын тыложе пыриськемез понна Быдӟым Отечественной войналэн II степенё орденэныз пусъемын.

1947-тӥ арысен 1948-тӥ арозь А. П. Холмогоров Палехысь суредаськонъя училищеын дышетскиз, 1948-тӥ—1951-тӥ аръёсы — Кузонысь суредаськонъя училищеын. 1951-тӥ арысен «Удмурт художник» эштосысь суредаськись луиз. 1953-тӥ—1959-тӥ аръёсы Мускоысь В. И. Суриков нимо суредаськонъя институтын В. Г. Цыплаковлэн мастерскояз тодон-валанзэ муромытӥз.

1952-тӥ арын нырысьсэ Удмуртиысь Суредаськисьёслэн огазеяськонзылэн но «Удмурт художник» эштосысь суредаськисьёслэн ужъёсынызы адӟытонэ пыриськиз.

1959-тӥ арысен А. П. Холмогоров, творчествоен вырем сяна, дышетӥз но — Удмурт кун пединститутысь суредаськонъя но графикая факультетысь дышетӥсь, бӧрысь доцент вал.

Таӵе ужъёслэн авторзы луэ:

• 1955-тӥ арын — «Гужем»;
• 1956-тӥ арын — «Турнан вакыт» но «Кутергин пересь»;
• 1959-тӥ арын — «Берытскон»;
• 1960-тӥ арын — «Егит удмурт анай» но «Кибашлы»;
• 1961-тӥ арын — «Д. Д. Дмитриевалэн портретэз»;
• 1963-тӥ арын — «Машенька»;
• 1965-тӥ арын — «Школаысь бертон» но «Анайёс»;
• 1967-тӥ арын — «Кыйлудысь колхозник»;
• 1969-тӥ арын — «Баграш-Биграысь Дарья Курбатова песянай», «Удмурт автономилэн нырысетӥ тӧроез И. А. Наговицын», «Егит удмурт анай» но «Вашкалаез оружейник П. В. Алексеев»;
• 1972-тӥ арын «Совето Союзысь Геройлэн А. Н. Сабуровлэн портретэз», «М. Лямин писательлэн портретэз» но «Колхоз предлэн, Социалистической Ужысь Геройлэн Н. Е. Семёновлэн портретэз»;
• 1975 -тӥ арын— «Н. Дмитриевалэн портретэз»;
• 1978-тӥ арын — «Партиысь ветеран Е. В. Русинова»;
• 1980-тӥ арын — «Консилиум»;
• 1982-тӥ арын — «М. Т. Калашников конструкторлэн портретэз».

1960-тӥ арысен А. П. Холмогоров СССР-ысь Суредаськисьёслэн огазеяськонысьтызы ёзчиез луэ. 1967-тӥ арын А. П. Холмогоровлы Удмурт АССР-ысь калык суредась ним сёто. 1962-тӥ—1965-тӥ аръёсы — РСФСР-ысь Суредаськисьёслэн огазеяськонзылэн Удмурт ёзэзлэн тӧроез. 1972-тӥ—1985-тӥ аръёсы А. П. Холмогоровез РСФСР-ысь Суредаськисьёслэн огазеяськонысьтызы секретаре бырйизы.

1970-тӥ арын «„Шаерысьтым адямиос“ серия портретъёсыз понна: „Удмурт автономилэн нырысетӥ тӧроез И. А. Наговицын“, „Баграш-Биграысь Дарья Курбатова песянай“, „Егит удмурт анай“ но „Вашкалаез оружейник П. В. Алексеев“» А. П. Холмогоровез Удмурт АССР-ысь Кун премиен пусйизы.

1972-тӥ арын РСФСР-ысь Вылӥ Советлэн Президиумезлэн Указэныз А. П. Холмогоровез РСФСР-ысь дано суредась нимын сӥлы каро, 1981-тӥ арын — РСФСР-ысь калык суредась нимын.

1981-тӥ арын «Советской Удмуртиысь тодмо муртъёслы сӥзем суредъёсыз понна» А. П. Холмогоров РСФСР-ысь И. Е. Репин нимо Кун премиен пусъемын, нош «Удмуртиысь нылкышноос» циклысь портретъёсыз но «Консилиум» суредэз понна" СССР-ысь Суредаськонъя академилэн азвесь медаленыз данъямын.

Холмогоров Алексей Павлович кичӧлтӥз Уваын калык суредъёсъя галерея усьтыны (1973).

Третьяковской галереяын солэн произведениосыз утисько: «Зоя Михайловалэн портретэз» (1983) но «Вормон Нунал. Гуртысь ветеранъёс» (1985).

1987-тӥ арын 30-тӥ куарусёнэ Ижкарын улонысь кошкиз.

Данъетъёсыз

Валтӥсь источник:

• Отечественной войналэн II степенё орденэз (6.11.1985).

Дано нимъёсыз

• РСФСР-ысь калык суредась (1981 — «искусство удысын бадӟымесь вормонъёсыз понна»);
• РСФСР-ысь дано суредась (1972);
• Удмурт АССР-ысь калык суредась (1967).

Премиосыз

• РСФСР-ысь И. Е. Репин нимо Кун премиез (1981 — «Советской Удмуртиысь адямиослы сӥзем картинаосыз понна»);
• Удмурт АССР-ысь Кун премия (1970 — «„Шаерысьтым адямиос“ серия портретъёсыз понна: „Удмурт автономилэн нырысетӥ тӧроез И. А. Наговицын“, „Баграш-Биграысь Дарья Курбатова песянай“, „Егит удмурт анай“ но „Вашкалаез оружейник П. В. Алексеев“»).

Мукет данъетъёсыз

• СССР-ысь Суредаськонъя академилэн азвесь медалез (1981).

Валэктонъёс

Литература

• Русские художники XVIII—XX веков : свод. список художников / Соловьёв В. Д. — М. : Эксперт-клуб, 2005 г. — 429 с. — ISBN 5-98881-001-2
• Народный художник РСФСР, лауреат Государственной премии РСФСР им. И. Е. Репина, лауреат Республиканской премии Удмуртской АССР Алексей Павлович Холмогоров, 1925—1987 : Кат. выст. / Сост. Т. А. Блавацкая; Авт. вступ. ст. В. Ф. Карпов. — М. : Сов. художник, 1988 г. — 48 с. — ISBN 5-269-00154-3