Эгралась шаертодонъя музей

РФ Лулчеберетъя министерство

Министерство культуры Российской Федерации

«Эгралась шаертодонъя музей» лулчеберетъя бюджет муниципал ужъюрт
Та юртын Эгралась шаертодонъя музей интыяськемын
Кылдытэмын	1993
Интыяськемын	Россия Россия, Удмуртия Удмуртия
Адресэз	427145, Удмурт Элькун, Эгра ёрос, Эгра каргурт, Советской ульча, 25-тӥ юрт
Кивалтӥсез	Чиркова Елена Михайловна
Сайтэз	igrakm.ru

Эгралась шаертодонъя музей («Эгралась шаертодонъя музей» МБУК; ӟуч: Игринский районный краеведческий музей) — Удмурт Элькунысь лулчеберетъя бюджет муниципал ужъюрт, татын Эгра ёрослэн инкуазез, этнографиез, наукая историез, лулчеберетэз, промышленностез, ожгарын но ужын данэ потэм интыысь улӥсьёс возьматэмын. Музеез Мария Тимофеевна Шуб кылдытӥз, 1993-тӥ арын усьтӥськиз. Музейлэн валтӥсь фондаз 3000-лэсь ятыр экспонатъёс утисько. Эгралась шаертодонъя музей Музейёслэн но кибашлыослэн туризмъя центрысьтызы ёзэз сямен ужа.

Эгра ёросысь Эгра каргуртысь Советской ульчаысь 25-тӥ юртын интыяськемын.

Историез

Шаертодонъя музеез усьтыны ӵектӥсь но сое кылдытӥсь — Мария Шуб (ворд. 1939-тӥ арын). 1970-тӥ аръёсы Мария Шуб Эгралан музей кылдытон ужез быдэстон борды басьтӥськиз, Кез каргуртысь пионеръёслэн юртсы бордын ужась музее мынӥз, татын Эгра ёросысь колхозъёслэн историенызы герӟаськем экспонатъёсты но материалъёсты утчаны кутскиз. 1973-тӥ арын пионеръёслэн юртсы тылпуын сутскиз, таин валче историысь альбомъёс но нырысетӥ экспонатъёс быризы. Музей кылдытонъя уж озьы ог кызь арлы гуньдӥз.

1993-тӥ арын Мария Шуб Эгра ёросысь лулчеберетъя ёзэн кивалтӥсь сямен каргурт пумысь азьвыл леспромхозлэн юртаз музей усьтӥз. Солы кивалтӥсе ӟуч кылъя но литературая дышетӥсез Клавдия Сергеевна Граховаез юнматӥзы. Ож аръёслы но леспромхозлэн историезлы сӥзем кык экспозициос возьматэмын вал.

1993-тӥ арын 28-тӥ куарусёнэ Эгралась шаертодонъя музей усьтэмын вал.

1995-тӥ арын улослэн инкуазь аспӧртэмлыкъёсызлы но этнографияя узырлыкезлы сӥзем адӟытонъёс дасямын вал. Валентин Николаевич Субботин, Эгралась мувӧй кыскон базаен кивалтӥсь, Эгра удмурт выжылэн тодметэз луись лулосъёслэсь — ӝакылэсь, куакалэсь но кионлэсь — чучелооссэс басьтыны коньдонэн юрттӥз.

2000-тӥ арын Эгралась музей 1912-тӥ арын ӝутэм пулэсь юртэ выжиз, татын азьвыл волостьысь правление, школа, райком, ёросысь гурт удысысь управление но статистикая ёз интыяськылӥзы. Выль юртын Эгралась мувӧй но газ кысконъя управленилэн историезлы сӥзем ялан ужась экспозиция радъямын вал, озьы ик ожгарчиослэн данзылы сӥзем зал, улосысь инкуазьлэн аспӧртэмлыкеныз но этнографиеныз тодматӥсь возьматонъёс ужаны ӧдъязы.

2004-тӥ арысен музей мыло-кыдо пыриськыны кутскиз музей кичӧлтонъёсъя «Воштӥськись музей воштӥськись дуннеын» конкурсэ. Та конкурсэз арлы быдэ ортчытӥсь Владимир Олегович Потанин нимо благотворительной фондлэн юрттэменыз, шаертодонъя музей кык проектъёсты быдэстӥз. 2005-тӥ арын музей «Этапен пункт. Арестант улон-вылонъя музей» нимо проект дасяз, со Владимир Потанин нимо фондлэн программаезъя грант утӥз. Висъям коньдонэн Эгралась музейлэсь Бачкей гуртысьтыз ёзаз экспозиция лэсьтэмын вал. Вуонояз 2006-тӥ арын удмурт калыклэн мадёсъёсызлы но выжыкылъёсызлы сӥзем зал радъямын вал. 2008-тӥ арын — «Лӧпшо Педунен шудон Эгралан» экскурсиосъя но туризмъя маршрут» проект, 2018-тӥ арын «Гуртъёсты котыр ласянь азинтон» кун программая — «Этапен пункт. Арестант улон-вылонъя музей» проект. 2012-тӥ арын Эгралась спортлэн азинскемезлы сӥзем экспозиция усьтӥськиз.

Музейлэн коллективез калыкен ужез умоятонъя но материально-технической базаез выльдонъя проектъёс малпа-кылдытэ.

Музее арлы быдэ 15 000 адями вуылэ.

Эгралась шаертодонъя музейлэн директорез — Чиркова Елена Михайловна.

Юртэз

2000-тӥ арысен Эгралась шаертодонъя музей 1912-тӥ арын пуктэм азьвыл волость управленилэн юртаз интыяське. Та юртын школа, ёросысь гурт удысъя управление, райком, статистикая ёз ужаллязы.

Экспозициосъя но адӟытонъя площадьлэн быдӟалаез — 250 м², огдырлы чаклам адӟытонъёслэн — 25 м², утёно фондэзлэн — 13 м².

Экспозициосыз

Музейын куинь экспозициос ялан ужало:

• «Дыр хороводэн бергатэ» (куинь валтӥсь люкетъёс: удмуртъёслэн вашкала улэм-вылэмзы, семьязы. Экспонатъёс пӧлын: ужын, юртъер котырын кутӥськись тӥрлык но мукет);
• «Пӧйшурасьлэн коркаез» (Эгра ёрослэн фаунаез);
• «Улэп тодэ ваён» (Быдӟым Атыкай оже Эгра ёросысь пыриськемъёслы сӥземын. Адӟытэм экспонатъёс: стендъёсысь но залысь витринаосысь ужкагазъёс, арбериос).

Коллекциосыз

Музейлэн фондаз 3800-лэсь ятыр арбериос утисько, соос пӧлысь 2115-ез валтӥсьёсыз луо.

Нырысетӥ экспонатъёсты — удмуртъёслэн вашкалаысь лулчеберетъя узырлыксы луись куиськон станок, валес, ухватъёс, горшокъёс но выж лёгетъёс — музейлы дышетӥсь Мария Корепанова но час тупатъясь Мария Баймачева кузьмазы. Гереево гуртын улӥсь нылкышно аналтэм атай-атай юртъерысьтыз трактор уробо, озьы ик коркан кутӥськись пӧртэм арбериосты вайиз: йыр понэтъёсын валес, пу пуньыос, туес, горд сюй горшокъёс, кутъёс но чугунъёс.

Ужан дырыз

• Вордӥськон—вирнунал: 9:00-сен 17:00-озь;
• Покчиарня: 9:00-сен 19:00-озь;
• Удмуртарня: 9:00-сен 16:00-озь;
• Нуназеян вакыт:12:00-сен 13:00-озь;
• Кӧснунал:10:00-сен 15:00-озь;
• Арнянунал: шутэтскон нунал.

Кызьы вуыны

Каръёс куспын ветлӥсь автобусъёс: «Ижкар—Эгра», «Ижкар—Глазов», «Глазов—Эгра», «Пермь—Нижнекамск»

«Центр» автобус дугдылонни. Музей пала таӵе автобусъёс мыно: № 1, № 2, № 3.

Артысь лулчеберетъя объектъёс

Эгралась шаертодонъя музейлы кӧня ке вамышлы артэ интыяськемын:

• Иоанн Богослов нимо черк, адресэз: Эгра каргурт, Коммунальной ульча, 4-тӥ юрт;
• Эгра ёрос библиотекалэн сквераз Александр Сергеевич Пушкинлы синпелет пуктэмын. 1979-тӥ арын 6-тӥ инвожое поэт вордӥськем дырысен 180 ар тырмонэн валче усьтэмын. Скульпторез: Ирина Фёдоровна Блюмель;
• Нимтэм солдатлы синпелет.

Ужез

Музейын таӵе экспозициосъя но адӟытонъёсъя экскурсиос радъясько: «Улэп тодэ ваён», «Дыр хороводэн бергатэ», «Пӧйшурасьлэн коркаез», «Дауръёсын герӟась мадёсъёс», «Быдӟым оже пыриськем аспалъёслэн подвигзы», «Мувӧй — асьмелэн узырлыкмы». Музейысь «Дыр хороводэн бергатэ» аудиоэкспозиция фольклор произведениос но кырӟанъёс, гуртын кутӥськись арбериос пыр учкись вашкала вакытэн тодматэ, озьы ик историысь тодэ ваёнъёс но видеоматериалъёс гожтыса кельтэмын. Та экспозиция учкисез гурт улонэ быдэсак вуттэ кадь.

Музейын таӵе маршрутъёс радъямын:

• «Лӧпшо Педуньлэн вордскем палаз» (удмурт калыклэн вашкала дырысен утем узырлыкез, йӧскалык шудонъёс, кырӟанъёс но сиёнъёс. Программа улсын удмурт выжыкылъёсысь геройлэн Лӧпшо Педуньлэн воршудэныз тодмато. Озьы ик котькуд мылкыд карисьлы аслэсьтыз выжы писпузэ лэсьтыны юртто. Кибашлыослэн юртазы усточиос чакламъя туйлэсь «Лӧпшо Педунлэсь шудо песьтэр» пичиесь арбериос лэсьто. Со сяна, шулдыръяськон программа улсын Лӧпшо Педунен пумиськон ортчыто, хороводэн бергало, удмурт шудонъёсын шудо, турын-куарен чаен но табанен куноясько);
• «Сибирь тракт — дауръёс пыр сюрес…» (Программа улсын арестант улон-вылонэн тодматскыны но Удмурт лулчеберетъя центре вуылыны, озьы ик удмурт сиёнэз — перепечез — оскалтыны ӵекто. Сибирь трактлэн улонын интыез туж бадӟым — со Удмуртия пыр ортчись но Росси кунлэсь вить сю аръем историзэ возьматӥсь историысь но лулчеберетысь аспӧртэм синпелет луэ. Та маршрутэтӥ Сибире каторжникъёсты келяло вал. Удмуртиын трактлэн Петербург но Муско вайёсыз герӟаськылӥзы, татысен ни сюрес Сибирёзь азьланьтӥськылӥз. Эгра пыртӥ ортчись маршрутэ таӵе объектъёс пыро: Бачкей гуртысь «Этапен пункт» музей — арестант улон-вылонлы сӥзем экспозиция; Сундурысь Удмурт лулчеберетъя центр — я усьтэм инбам улын архитектурая но этнография музей, татын удмурт азбарен, юртъерен тодматскыны но семья йылолъёслы сӥзем ужрадъёсы пыриськыны луэ).

Музейын арлы быдэ буре ваён нуналъёсты пусъё, ужрадъёс ортчыто: музеез усьтон нунал, Быдӟым Вормон Нунал, Музейёслэн калыккуспо нуналзы, музейлэн вордӥськем нуналыз, «Музей уй» калыккуспо акция, йӧскалык серекъянлы сӥзем «Лӧпшо Педунь серекъя» фестиваль.

Валэктонъёс