Удмурт пужыё куиськон
| Удмурт пужыё куиськон | |
|---|---|
 | |
| Огъя ивортодэт | |
| Типез | сӥньысъёслэсь лэсьтэм арбериос |
| Кылдэм кунэз |
 Россия |
| Материал |
етӥн ыжгон |
| Кылдон дырыз | XIII дауре |
Удмурт пужыё куиськон (ӟуч: Удмуртское узорное ткачество) — удмуртъёслэн калык киужзы, XIX даур пумын—XX даур кутсконын тужгес зол азинскиз. Удмуртилэн лымшор ёросъёсазгес вӧлмемын. Куиськон йылолъёс ӧз бырылэ — пыдлось гуртъёсын утиськизы; XXI даур кутсконын кибашлы юртъёс кылдытэмын вал, соослэн валтӥсь ужпумзы пужы пуктон вашкала амалъёсты тодон-дышетон но утён вал.
Историез
Археологияя эскеронъёс возьматӥзы: туала Удмуртилэн интывылаз куиськон станокъёс XI дауре ик шараяськылӥзы, соослэн инъетсы музъем валлин лэсьтэмын вал — вертикальной сярысь трослы ярамонгес. XIX дауре удмуртъёслэн куиськон станокъёсазы ӟучъёслэн музэн рамаез но мышказ навоез ӧй вал, но XX даур кутсконын ӟуч типъем станокъёс вӧлмыны ӧдъязы[1].
XIX даурын анилин буёл кылдэмен, пужы пуктыса куиськон амал зол азинскиз[2]. Соос шортэз яркыт буяны юрттылӥзы, дась арбериослэсь дунлыксэс ӝутылӥзы. Анилин буёлъёс потэмлэсь азьло будосъёсты уже кутылӥзы, таос небыт но бездытгес буёл кылдытыны юрттылӥзы.
Нылъёсты 7 арескысенызы куиськыны дышетылӥзы. Кибашлыос асьсэос ик юртъер котырлы но быдэс семьялы дӥськут дасяллязы. Нырысь нылмурт аслыз пирдан куиз, быземез бере но быдэс улонзэ куиськиз, бускельёсыныз пужы пуктыны быгатонлыкъёсыныз вожвылъяськыса. Удмуртъёслэн вашкала улон интыоссы чильпам-куэм-пужыятэм катанчиосын, ӝӧккышетъёсын, валес шобретъёсын чеберъямын вал; вурем дӥськутъя но пужыезъя тодыны луэ вал, кыӵе выжыысь кибашлы кышномурт. Удмурт куэм арбериос пӧлын тужгес вылӥ дунъяськылӥзы вольыт пужыятыса куэм ковёръёс: Парижын ортчем дунневыл адӟытонын соос медальёсын пусъемын вал[3].
XX даур пумын пужы пуктыса удмурт куиськон куинь пумо вал[4]:
- Асьсэ кулэяськонъёссы понна куэм арбериосты доразы лэсьтон. Удмуртилэн лымшор ёросъёсазгес утиськемын. Йылолъёсты пичи дырысенызы утем мӧйы куиськисьёс тодон-валанзэс киужъёсъя юртъёсын дышетскисьёслы кельтӥзы;
- Гуртазы ужан. Вузан вылысь арбериосты куись кибашлыос творчествозэс рыноклэн куронъёсызлы тупатъязы, та арбериослэн чеберлыко дунлыксы вылын шӧдӥськылӥз;
- Нимысьтыз кылдытэм кибашлыослэн юртазы тыршись усточиос-профессионалъёс. Таослэсь ужзэс коммерцияя эгесъёс ӧз кортналлялэ; киужен вырисьёс вашкала йылолъёсты эскерылӥзы но, вакытлэсь куронъёссэ лыдэ басьтыса, соосты азинтылӥзы.
1991-тӥ арын Удмурт Элькунысь Правительство калык киужъя йылолъёсты выльысь улӟытон вылысь кибашлыосъя 23 юртъёслэсь сӧзнэт кылдытӥз. Ужзэс валтӥз Декоративно-прикладной устолыкъя но öнеръя йöскалык центр; та удысын вырись тодосчиос «куиськисьёслэсь школазэс» усьтэмзы понна 2012-тӥ арын РФ-ысь Правительстволэн премиеныз пусъемын вал[5].
2010-тӥ арын данэ потэм «Брангурт песянайёс» коллективлы фольклор костюмъёс вашкала куэм удмурт пужыосъя куэмын вал. Вуж Мӧньяысь кибашлыослэн юртысьтызы усточиос Л. Н. Имполитова но Е. В. Анисимова лымшор палась удмурт традиционной нылкышно дӥсез эскеризы но солэсь формазэ, тусбуйзэ но пужызэ улӟытӥзы. Ансамбльысь кырӟасьёс асьсэос чаклаллязы, выль костюмъёс анайёссылэсь но песянайёссылэсь кылем вашкала дэремъёслэсь медаз висъяське шуыса[3].
2021-тӥ арын Удмуртиын куиськонъя мастерскойёслэн лыдзы 50-лэсь ортчиз, нош гуртазы ужась усточиос 150 кузя вал. Гуртазы куиськыса вань коньдон поттӥсьёсты Декоративно-прикладной устолыкъя но öнеръя йöскалык центрлэн электронной базаяз пыртӥзы, та соослы луонлык сётӥз куспазы кенешыны, ог-огзылэсь адӟем карыны но вуззэс вӧлмытыны[3].
Чеберлыко аспӧртэмлыкез
Удмурт пужыё басмаосты кылдытонын кутӥськись валтӥсь материалъёс: ыжгон но етӥн, шергес — пыш. Уйпал удмуртъёслэн куиськонзы вылын шӧдӥськиз ӟучъёсын бускельяськонзы, лымшоръёслэн — артэ улӥсь кузон бигеръёсын кусып воземзы. Таин валче уйпал но лымшор удмурт арбериос буёлъёссыя но пужыоссыя зол висъясько; озьы ке но огкадь пусъёссы но вань[6].
Огез универсальной луись элемент — со выжы писпу. Со дуннелэсь универсальной модельзэ возьматэ: выжыосыз, модосэз но вайёсыз — со ортчемез, алиез но вуоноез яке пыдъёс, мугор но йыр, яке тыл, ву но музъем[7]. Тросэз пужыос инкуазьысь потэмын: кыз, шунды, толэзь. Ӵемысь пумисько ромбъёс: соос пӧртэм пумо асьсэ коже элемент выллем луо яке басмаез мукет пужыос пуктэм люкетъёслы висъяло. Тужгес тодмоез пус — толэзез я легезьпу сяськаез возьматӥсь тямыс сиё розетка. Та пусэз Удмурт Элькунлэн кунпусысьтыз но куншетысьтыз адӟыны луэ[3].
Ӟуч пужыятэм куиськонын сямен ик, уйпал удмуртъёс киужазы кутылӥзы горд-тӧдьы пужыосты, лымшор удмуртъёс — турлы буёлооссэ. Эскерисьёс лымшор удмуртъёсты куать этнографияя группаослы висъяло, таослэн дэремъёсазы, айшетъёсазы, ӵушконъёсазы, кускерттонъёсазы, ӝӧккышетъёсазы, ковёръёсазы пужыоссы висъясько, но ваньзэсты огазея мажор луись буёл. Уйпал удмуртъёслэн киужъёсазы ӵемысь пумиське ӝуткаса куиськон, лымшоръёслэн — бичаса куиськон. Нимысьтыз особняк выллем луо удмуртъёслэн вылӥ иж-шаркан группазы — соослэн арбериоссы пиктыса куиськон амалъя быдэстэмын, таиз вылын башкир калыкен кусып воземзы шӧдӥське. Соослы тупало вуюись кадь гожъёс но зигзаг выллем пужыос[5].
Валэктонъёс
- ↑ И. А. Косарева. Традиционное удмуртское узорное ткачество. — Ижевск: Удмуртский университет, 2004. — 38 с. — ISBN 5-7029-0121-5.
- ↑ И. А. Косарева. Традиционное декоративно-прикладное искусство срединных удмуртов // Ежегодник финно-угорских исследований. — 2010. — № 4.
- ↑ 1 2 3 4 Е. И. Ковычева, М. В. Военкова. Удмуртское узорное ткачество: уникальность, пути возрождения и реновации // Многонациональное искусство ткачества: материалы Международного симпозиума, посвященного 100-летию Ф.Х. Валеева : сборник. — 2021. — Декабрь.
- ↑ Декоративно-прикладное искусство и ремесла Удмуртии [ӟуч] Свердловская областная межнациональная библиотека (8-07-2022). Эскеремын 24-02-2026 арын
- ↑ 1 2 Ковычева Е. И., Косарева И. А. Многообразие художественных воплощений традиций в узорном ткачестве Удмуртии // III Всероссийская выставка народного искусства «Традиционные народные промыслы в современной России. Нижегородцы приглашают» : каталог. — 2016.
- ↑ Декоративно-прикладное творчество удмуртов [ӟуч] studfile.net (8-07-2019). Эскеремын 24-02-2026 арын
- ↑ Л. А. Молчанова. «Древесная» символика в декоративном убранстве удмуртского костюма: истоки, бытование, смысл // Культурология : сборник. — 2022. — Т. 14, № 2. — С. 207—219. — ISSN 2076-2577. — doi:10.15507/2076-2577.014.2022.02.207-222.
Литература
- И. А. Косарева. Традиционное удмуртское узорное ткачество. — Ижевск: Удмуртский университет, 2004. — 38 с. — ISBN 5-7029-0121-5.
- К. М. Климов. Удмуртское народное ткачество. — Ижевск: Удмуртия, 1979. — 140 с. — 16 000 экз.
- К. М. Климов. Традиционное декоративное искусство удмуртов. — Ижевск: Удмуртия, 1994. — 33 с. — 5000 экз. — ISBN 5-7659-0569-2.
- Е. В. Байкова, Н. А. Кузнецова. Декоративно-прикладное искусство Удмуртии. — Ижевск: Удмуртия, 2013. — 158 с.