Балезино ёросысь историяя но шаертодонъя музей

РФ Лулчеберетъя министерство

Министерство культуры Российской Федерации

«Удмурт Элькунысь Балезино ёрос муниципал округ» муниципал кылдытэтлэн Балезиноысь историяя но шаертодонъя ёрос музеез» лулчеберетъя муниципал бюджет ужъюрт
Та юртын Балезино ёросысь историяя но шаертодонъя музей интыяськемын
Кылдытэмын	2000
Интыяськемын	Россия Россия, Удмуртия Удмуртия
Адресэз	427550, Росси Федерация, Удмурт Элькун, Балезино ёрос, Балезино каргурт, Киров ульча, 10-тӥ юрт
Кивалтӥсез	Ившина Ольга Николаевна
Сайтэз	myzei-balez.udm.muzkult.ru

Балезино ёросысь историяя но шаертодонъя музей (вакч. — "БРКМ МО «Удмурт Элькунысь Балезино ёрос муниципал округ» МБУК; ӟуч: Балезинский районный историко-краеведческий музей) — Балезино ёрослэн этнографиез, совето вакытэ улон-вылонэз но историез сярысь экспозициосын «Удмурт Элькунысь Балезино ёрос муниципал округ» муниципал кылдытэтлэн лулчеберетъя муниципал бюджет ужъюртэз. Кылдытӥсез — Шулятьев Демьян Николаевич, 2000-тӥ арын усьтэмын. Музейлэн валтӥсь фондаз 15 000-лэсь ятыр экспонатъёс утисько.

Удмурт Элькунысь Балезино ёросысь Балезино каргуртысь Киров ульчаысь 10-тӥ юртын интыяськемын.

Историез

Нырысетӥ музей фондъёсты 1961-тӥ арын историяя дышетӥсьлэн Демьян Николаевич Шулятьевлэн кичӧлтэмезъя люканы ӧдъязы, ӵапак со Балезиноысь 1-тӥ школа бордын шаертодонъя сэрег кылдытӥз.

1990-тӥ арын Юнды черкогуртын Балезино ёросысь историяя музейлэн ёзэз усьтэмын вал. Ужъюрт азьвыл сельсоветлэн юртаз таӵе адресъя интыяськемын: Центральной ульча, 49-тӥ юрт. Музей бесерман калыклэн лулчеберетэзлы но историезлы сӥземын. Музейын кык экспозициос адӟытэмын: нырысетӥ залын — улон-вылонын кутӥськись арбериос, йӧскалык дӥськут но бесерман кибашлыосын лэсьтэм арбериос, нош кыкетӥяз — Удмуртилэн но Юнды черкогуртлэн историезлы сӥзем материалъёс. Музейлэн кивалтӥсез — Ившина Ольга Николаевна.

2000-тӥ арын тулыс Балезино каргуртысь школалэн инъетаз ёрос муниципал музей кылдытон сярысь решение кутэмын вал. 2000-тӥ арын 9-тӥ куартолэзе, Вормон Нуналэ, нырысетӥ экспозиция усьтӥськиз. 2000-тӥ арын 5-тӥ пӧсьтолэзе, вань радъяно ужрадъёсты дасям бере, ёрос администрацилэн йырызлэн Балезиноын историяя но шаертодонъя ёрос музей кылдытон сярысь постановлениез потӥз. 2001-тӥ арын огдырлы чаклам 3 адӟытонъёс но ог 100 пумо ужрадъёс, экскурсиос, лекциос но мукетыз ортчытэмын вал.

Музей ёросын шаертодон ужпумъёсты радъянъя но методикая центр луэ. Музейын арлы быдэ аслаз коллекциосыныз, озьы ик коммерция амалъя палэнысь вуттэм материалъёсын огдырлы чаклам 10—14 адӟытонъёс возьматэмын луо. Кык арлы огпол музей «Балезино ёрослэн историезъя но этнографиезъя выль эскеронъёс» наукая но практикая шаертодонъя ёрос конференция ортчытэ.

Музейлэн фондъёсыз выльдӥсько, наукая эскеронъёс таӵе ӧръёсъя азинтӥсько: Балезино ёрослэн но Балезино каргуртлэн историез, интыысь улӥсьёслэн геройлыко но ужазинлыко данзы, ёросысь дано муртъёс, совето провинциальной улон-вылонлэн историез, вылӥ чупчи группаысь уйпал удмуртъёслэн, ӟучъёслэн (соос пӧлын старообрядцъёслэн но), озьы ик чупчи бигеръёслэн но бесерманъёслэн этнографизы.

Балезино каргуртын музейлэн ёзэз — Адӟытонъёсын зал ужа, со таӵе адресъя интыяське: Энгельслэн ульчаез, 7-тӥ юрт. Музеен кивалтэ Ившина Ольга Николаевна.

Арлы быдэ музее 1800 мурт вуылэ. Экспозициосъя но адӟытонъёсъя интыослэн быдӟалазы — 186,5 м², огдырлы чаклам адӟытонъёслэн — 11,8 м², утёно фондъёслэн — 14,7 м².

Музеез кылдӥсь «Удмурт Элькунысь Балезино ёрос муниципал округ» муниципал кылдытэт луэ.

Музейлэн директорез — Ившина Ольга Николаевна.

Экспозициосыз

Музейын таӵе экспозициос ялан ужало:

• Этнографилы сӥзем зал (Экспонатъёс пӧлын: бесерманъёслэн йӧскалык дӥськутсы, улон-вылонын кутӥськись арбериос но бесерманъёслэн вашкалаысь юртсы, кибашлыосын быдэстэм арбериос. Асьсэ киын лэсьтэм посуда тӥрлык. Посуда лэсьтонын кутӥськись валтӥсь материал — пу, туй, писпу выжы, горд сюй но мукетыз);
• Совето улон-вылонлы сӥзем зал;
• Балезино ёрослэн историезъя зал.

Музейлэн официальной сайтаз таӵе виртуальной экспозициос поттэмын:

• «Бесерманъёслэн улон-вылонзы но йылолъёссы»;
• «Адямиос. Улон. Вакыт» (совето вакыт сярысь; экспозициез со вакытысь туспуктэмъёс чеберъяло);
• «Выль ар открыткаос», «Кыдёкысь авиациысь штурман» (Торопов Артемий Демидович сярысь (1915—2005), Ленин нимо кык орденъёсын, Горд Знамялэн ньыль орденъёсыныз, Горд Кизили орденэн, Атыкай ожысь II степенё орденэн, «Ожгар вормонъёс понна» кык медальёсын, «Ленинградэз утем понна», «Мускоез утем понна», «Сталинградэз утем понна», «Будапештэз киултэм понна», «Берлинэз киултэм понна», «Германиез вормем понна», «Кёнигсбергез киултэм понна» медальёсын пусъемын. СССР-ысь Вылӥ Кенешлэн Президиумезлэн Указэныз 1946-тӥ арын 15-тӥ куартолэзе Совето Союзлэн Героез нимын сӥлы каремын);
• «Азбука» (вуж славян азбукаос сярысь — глаголица но кириллица, соослэн кылдэмзы, вӧлмемзы но ужын кутӥськемзы сярысь, кириллицаен гожъяськонлэн азинскемез сярысь — уставной стильысен скоропись дорозь, озьы ик вашкала ӟуч рукописьёсты радъян, соослэн чеберлыксы но символиказы сярысь);
• «Нимо-дано аспалчиос» (пӧртэм удысъёсын данэ потэм улосчиоссы сярысь: спортсменъёс, лулчеберет удысын тыршисьёс, ожгарчиос, тодосчиос но конструкторъёс, хозяйствоосын но администрациосын ужасьёс но мукетъёсыз).

Коллекциосыз

Музейлэн фондъёсаз 15 000-лэсь ятыр экспонатъёс утисько. Тужгес вашкала экспонатъёс пӧлын IX—XIV дауръёсысь археологияя арбериос, озьы ик кулэм пӧйшуръёслэн лысьӧмъёссы: мамонтлэн бивенез, саблезубой тигрлэн вазерпинь бервылыз, пужейлэн урдлыез, гоно носороглэн пуньылыэз (ӟуч: лопатка). Музейын озьы ик 100 сюрсысен 1,5 миллион арозь арлыдъем измем пу утиське.

Ужан вакытыз

Музейлэн коньывуонысен оштолэзёзь ужан вакытыз:

• Вордӥськон-удмуртарня: 8:00—17:00, нуназеян вис: 12:00—13:00;
• Котькуд толэзьлэн берпуметӥ покчиарняяз: 10:00—19:00 (Быдэ вуымтэослы музее дунтэк пырон нунал);
• Котькуд толэзьлэн берпуметӥ кӧснуналаз: 10:00—15:00 (Музейын семьяен шутэтскон);
• Кӧснунал но арнянунал — азьвыл гожтӥськемъя.

Куартолэзьысен куарусёнозь ужан вакытыз:

• Вордӥськон-удмуртарня: 8:00—16:00 — куное вуэмъёсын ужан,17:00 часозь — методикая час (фондъёсты утись), нуназеян вис: 12:00—13:00;
• Котькуд толэзьлэн берпуметӥ удмуртарняяз 8:00—16:00 (16 арессэс тырмымтэос понна дунтэк пырон нунал);
• Кӧснунал но арнянунал: шутэтскон нунал.

Дунтэк пырон нуналъёс: 9-тӥ куартолэзе, 18-тӥ куартолэзе, 1-тӥ инвожое, 12-тӥ инвожое, 22-тӥ инвожое, 1-тӥ куарусёнэ.

Кызьы вуоно

Каргурт пала нуись «Ижкар — Балезино» автобусъёс, озьы ик «Ижкар — Яр», «Ижкар — Балезино» поездъёс.

Автобуслэн «Центр» нимо дугдылонниез. Музей пала 11-тӥ автобус нуэ.

Вормонъёсыз но данъетъёсыз

• Балезино ёросын вордскем муртлэн геройлыко сюресэз сярысь, Совето Союзысь Геройлы Владимир Васильевич Лупповлы сӥзем «Кык армиослэн офицерзы» проектэз понна 2022-тӥ арын Лулчеберетъя кичӧлтонъёсын фондлэн кыкетӥ конкурсаз вормись.

Ужез

Музейын радъяськись валтӥсь экскурсиос: «ХХ даур кутсконысь Балезино ёрослэн интывылыз», «Совето властьлэн кылдэмез но Балезино ёрослэн интывылаз Граждан ож», «Балезино ёрос Быдӟым Атыкай ож аръёсы», «Балезино каргуртлэн историез», «ХХ дауре Балезино ёрослэн мерлыко но экономика ласянь азинскемез». Озьы ик интыысь интые нуллоно адӟытонъёс, шулдыръяськон-дышетон шудон ужрадъёс но лекциос ортчытъяло.

Валэктонъёс