Удмурт Элькунысь изобразительной искусствоосъя музей
| Удмурт Элькунысь изобразительной искусствоосъя музей | |||
|---|---|---|---|
 | |||
| Кылдытэмын | 1980-тӥ арын 28-тӥ южтолэзе | ||
| Адресэз | Ижкар, Киров нимо ульча, 128 | ||
| Кивалтӥсез | Сергеева Анастасия Вячеславовна (директорлэсь ужзэ быдэсъясь) | ||
| Сайтэз | urmii.ru | ||
|
|
|||
 |
|||
 Медиафайлъёс РувикиМедиа пушкын | |||
Удмурт Элькунысь изобразительной искусствоосъя музей (ӟуч: Удму́ртский республика́нский муз́ей изобрази́тельных иску́сств) интыяськемын Удмурт Элькунлэн шоркараз, Ижкарын, Киров нимо ульчаын.
Историез
Музей кылдытэмын 1980-тӥ арын суредаськисьёслэн но карысь интеллигенцилэн кичӧлтэмзыя, усьтӥськиз 1980-тӥ арын 29-тӥ коньывуонэ Удмурт АССР-лэн кылдэм дырысеныз 60 ар тырмонлы сӥзьыса[1].
Музейлэн фондэз Элькунысь шаертодонъя музейлэн коллекциезлэн инъетэз вылын кылдытэмын. Нырысь-валысь музейлэн фондъёсаз 565 единица вал, со пӧлысь 53-ез Кун музей фондысь вуиз. Бӧрысь мукет музейёсысь но фондъёсысь вуэм произведениосын тырмытӥзы. Кӧняез ке ужъёс суредаськисьёслэн мастерскойёсысьтызы но коллекционеръёслэсь басьтэмын, куд-огъёссэ авторъёс но нимаз адямиос кузьмаллязы[1].
2012-тӥ арын 1-тӥ толшорозь музейлэн коллекциосаз 11 сюрс 345 единица лыдъяськиз, адӟытонлэн быдӟалаез 328 м², фондохранилищелэн быдӟалаез — 725 м²[1].
Музееен кивалтӥзы: Е. Ф. Шумилов (1980—1982), В. В. Яковлева (1982—1994), Т. В. Глухова (с 1995 года)[1]. Али дыре директорлэсь ужзэ быдэсъя Сергеева Анастасия Вячеславовна[2].
Вылтусыз
Музей коллекцилэн инъетаз 565 произведение — XVIII даурлэн пумысеныз XX даурлэн кутсконозяз кылдытэм ӟуч но лымшор европаысь искусстволэн пичи шедевръёсыз. Соос Удмуртиысь шаертодонъя элькун музейлэн чеберлыкъя ёзэтысьтыз татчы выжтэмын. Берлогес коллекциез совето но туала удмурт художникъёслэн ужъёсынызы паськытатӥзы. Али дыре фондъёсын 14 сюрс пала арбери лыдъяське, соос пӧлын удмурт живописьлы но графикалы, декоративно-прикладной искусстволы сӥзем экспонатъёс но скульптураос. Татын огдырлы усьтӥськылӥсь адӟытонъёс но радъяськыло.
Юртэз
Музей интыяськемын Ижысь архитекторлэн Василий Петрович Орловлэн проектэзъя 1953-тӥ арын пуктэм Коммунистической партилэн райкомезлэн юртаз[1]. Бӧрысь татчы Пионеръёслэн дворецсы интыяськылӥз[3]. Та юртэ музей кылдытыку, типповой юртлэсь пушсэ быдэсак выльдӥзы. Пырон азьысь липет йылэ фронтон пуктӥзы, отын кык музаос киязы музейлэн нимыныз картушез возё (скульпторез Виталий Александрович Цибульник), валтӥсь пырон палась укноосты витражен чебермазы.
Валэктонъёс
- ↑ 1 2 3 4 5 Удмуртская Республика : Культура и искусство : Энциклопедия / гл. ред. А. Е. Загребин. — Ижевск : Удмуртский институт истории, языка и литературы УрО РАН, 2012. — С. 323—324. — 540 с. — 300 экз. — ISBN 978-5-901304-62-4.
- ↑ Официальный сайт Удмуртского республиканского музея изобразительных искусств
- ↑ Светлана Сидорова 60 лет отмечает Дворец детского (юношеского) творчества в Ижевске Известия Удмуртской Республики. Эскеремын 2020-03-25 арын
Чӧлсконъёс
- Страница Удмуртского республиканского музея изобразительных искусств в социальной сети «ВКонтакте»
- Удмуртский республиканский музей изобразительных искусств // museum.ru
 |
|---|
