Этапен пункт (музей)
| Этапен пункт | |
|---|---|
 | |
| Кылдытэмын | 2000 |
| Адресэз | Эгра ёрос, Бачкей гурт, Сибирской ульча, 16 б юрт |
 |
|
Этапен пункт (ӟуч: Этапный пункт (музей)) — Удмуртиысь Эгра ёросысь Бачкей гуртысь музей, лулчеберетъя но историяя объект экскурсиосъя но туризмъя «Сибирь тракт — дауръёс пыр сюрес» маршрутэ пыре. 2000-тӥ арын вашкала школалэн юртаз, азьвыл Сибирь тракт вылысь этапной пунктын усьтэмын. Улосэн утёно синпелет[1].
Али дыре кык пӧлысь огез[2], нош мукет ивортонъёсъя — Россиысь огназ утиськем этапен пункт.
Историез
Бачкей гуртысь этап юртэз 1837-тӥ арын артысь гуртъёсысь рекрутъёс пуктӥзы[3]. Со Сибирь тракт кузя мынӥсь каторжникъёс понна лэсьтэм огез шутэтскон инты вал[1]. Чакламъя юрт 1890-тӥ арозь кутӥськиз[4].
Пермь чугун сюрес лэсьтэм бере, ссыльнойёсты поездъёсын нуллыны кутскизы[4], соин ик этап пункт кулэ ӧз луы ни. 1900-тӥ арысен юртын кык классъем земской училище интыяськылӥз, нош бератаз, 1999-тӥ арозь, татын Бачкей школа ужаз. Таин валче гинэ юрт утиськиз, та дыр ӵоже сое огпол но рос-прос ӧз тупатъялэ ке но[3]. Борддоръёсыз вылын арестантъёсын ӵабъяса кельтэм гожтэмъёс но кылизы[4].
Музеез кылдытон
Музеез кылдытыны кичӧлтонэн Бачкей школалэн директорез, Быдӟым Атыкай ожысь ветеран Н. Я. Максимов потӥз[5]. Сибирь трактлэн историезлы сӥзем музей 2000-тӥ арын усьтӥськиз. Но со вакытэ Удмуртиын Сибирь трактлэн историезлы сӥзем мукет музей ужа ни вал — Дэбесын. Соин ик Бачкейын XVII—XIX дауръёсысь арестантъёслэн улэм-вылэмзы сярысь темаез ӝутоно кариськизы.
Сюрес дуре юрт азе сьӧд-тӧдьы гожмо буям юбо пуктӥзы — сыӵе юбоос быдэс Сибирь тракт кузя юнматъямын вал, соос сюреслэсь кузьдалазэ ивортылӥзы[2]. Юрт пушкы арестантъёслы кӧлон ньыль камераосты вашкалаысь улӟытыса пуктӥзы[4].
Экскурсиос но театр адӟытонъёс
Музейысь ӧнерчиос туристъёслы асьсэды XIX даурысь арестантъёс шӧдыны юрттӥсь программа малпазы. Озьы Этапен пунктэ вуэм куноос чурыт нараос вылын кылльыны, кандалаосты но робаез мертаны, озьы ик кизер но шӧг ӝукез веръяны быгато[4]. Экскурсоводъёс пусъемъя, ву вылын но сылалтэк-сакыртэк пӧзьтэм ӝукез туристъёслэн веръямзы уз поты, вылды, соин ик пӧзьтыкузы кӧня ке сылал йылто ик. Таин сэрен ик сезьы интые тари кеньырен ӝук пӧрало. Чае но сакыр поно, тужгес но — турист нылпиослы[2].
Музейысь куноослы озьы ик арестантъёслы чаклам камераысь ӟусъёс вылын но уйзэс ортчытыны луонлык сётӥське[2]. Озьы ик музейын ужасьёсын гинэ ӧвӧл, гуртысь огшоры калыкен валче пуктэм театр возьматонэз адӟыны, отчы пыриськыны быгато[2].
Гуртэ пырись туристъёсты сюрес дурын кандалаосын пукись арестантъёс пумитало. Ссыльнойёсты котыр ласянь утё. Конвойлэн командаезъя, ссыльнойёс султо но, жильыосын лынгыр-лангыр карыса, гурт кузя вамышто. Вылазы йӧскалык дӥськутэн, пыдазы кутъёсын гуртоос, конвой соосты уллятозь, арестантъёслы нянен пичи пуйыос, вуэн кружкаос сётыны выро. Ссыльнойёсты этап пунктлэн юртаз пырто, нош сюрес дурысь ӝож тусын нылкышноос арестант нылмуртлэн адӟонэз сярысь кырӟан кырӟало[2].
Валэктонъёс
- ↑ 1 2 Музей «Этапный пункт» [ӟуч] Культура.РФ. Эскеремын 20.08.2025 арын
- ↑ 1 2 3 4 5 6 Экстрим-туризм в Удмуртии: ночь в кандалах и арестантская каша [ӟуч] izh.kp.ru (6 июня 2012). Эскеремын 20.08.2025 арын
- ↑ 1 2 Этапная изба, Бачкеево [ӟуч] Музей «Этапный пункт» в д. Бачкеево (27 июля 2020). Эскеремын 20.08.2025 арын
- ↑ 1 2 3 4 5 Музей Этапный пункт [ӟуч] visitudmurtia.org. Эскеремын 20.08.2025 арын
- ↑ Музей «Этапный Пункт» в Бачкеево [ӟуч] udm.travel. Эскеремын 20.08.2025 арын
Литература
- Грахов В. П. История строительства Сибирского тракта в Удмуртии. — Ижевск: УИР ИжГТУ имени М. Т. Калашникова, 2021. — 501 с. — ISBN 9785752609442.
- Дебёсы и Сибирский тракт: библиографический указатель / М. Р. Шубина. — Дебёсы: Дебёсская районная межпоселенческая библиотека, 2022. — 32 с.
- Жилин С. А. Будни Сибирского тракта (рус.) // Деловой квадрат. — 2014. — № 8. — С. 50—53.
- Книга на Сибирском / Е. В. Егорова. — Ижевск: Национальная библиотека Удмуртской Республики, 2020. — С. 55–64. — 85 с.
- По Большому Сибирскому тракту... Краеведческий альманах газеты «Байгурезь»: материалы по истории удмуртского участка Сибирского тракта / Павел Роготнев. — Дебёсы, 1998. — С. 1—7.
- Рыбин С. Старый Сибирский тракт (рус.) // Удмуртская правда. — 1965. — 6 тулыспалэ (№ 8). — С. 2.
Чӧлсконъёс
- Музей Этапный пункт Сибирского тракта_ Удмуртия, Игринский район, деревня Бачкеево [ӟуч], vk.com. Эскеремын: 19 гудырикошконэ 2025 арын.
