Сибирь тракт

Википедиысь материал

Сибирь тракт яке Муско тракт (мукет нимъёсыз: Валтӥсь Сибирь почта тракт, Бадӟым Сибирь тракт, Бадӟым тракт, Быдӟым тракт, Муско-Иркутск тракт, Муско-Сибирь тракт, Осьмой кун сюрес, Государьлэн сюресэз но мукет; ӟуч: Сибирский тракт) — европейской Россиысь Сибирь пыр Китаёзь но берен нуись музъем вылтӥ ветлон вашкала маршрут. Шундыӝужан палан (Сибирьын) Россилэн гожъёсаз Вылӥ Удинскысен Нерчинскозь но Кяхтаозь кык сюреслы люкиськыса йылпумъяськылӥз. Шундыпуксён палан сюреслэн пумыз Мускоын вал, таин валче Сибирь тракт валатонэ ӵемысь шундыӝужан пала нуись сюрес пырылӥз, нош Муско тракт валатонэ — шундыпуксён пала нуись сюрес. Мускоысен Пекинозь нуись сюреслэн огъя кузьдалаез одӥгъёсызлэн лыдъямзыя 8332 верста, мукетъёсызлэн лыдъямзыя — 8839 верста вал.

Сибирь трактлэн картаез.

Историез

Россилэн европейской лыдъяськись люкетсэ Сибирен герӟась сюресъёс ӧй вал бере, кема дыр ӵоже шуръёс вылтӥ сюрес лёгылӥзы. Музъем вылтӥ Бабино сюрес гинэ вал, со асэныз Чердынь сюресэз воштӥз. Кузонысен Алабго пыр Соликамскозь Арск сюрес  [ӟуч] (удм. лэсьтэмын вал. 1689-тӥ арын Россия но Китай куспын нырысьсэ Нерчинской огкыл юнматэмын вал, та Россия но Китай вискысь кусыпъёсты юнматонлы кутскон сётӥз. Вузкаронэз радъян вылысь кунъёс куспын тыро-пыдо транспорт коридор кылдытон сярысь лэчыт ужпум султӥз. 1689-тӥ арын 12 (22) шуркынмонэ Мускоез Сибирен герӟась тракт лэсьтон сярысь эксэй указ потӥз. Озьы ке но ньыльдон ар ӵоже та ужпум бумага вылын гинэ пусйиськылӥз.

Пётр I  [ӟуч] (удм. император кивалтон вакытэ Европаысь Азие сюрес азьвыл сямен ик музъем вылтӥ нуись уно сюресъёслэсь, волокъёслэсь, ву сюресъёслэсь пӧлэстӥськылӥз. Та маршрутэтӥ ортчон сярысь протопоп Аввакумлэн  [ӟуч] (удм. «Житие» книгаяз но «Робинзон Крузолэн  [ӟуч] (удм.» кыкетӥ люкетаз гожтэмын.

Ангар шур вамен выжон.
Николай Добровольский, 1886

1725-тӥ арын Савва Рагузинский-Владиславич граф валтэм улсын Китае посольство ыстэмын вал. Кык ар ӵоже вераськонъёс нуыса, 1727-тӥ арын вуоно Кяхта кар котырысь гожъёсты пусъён сярысь Буринской огкыл  [ӟуч] (удм. гожтэмын вал, озьы ик Россия но Китай вискысь политикая но вузкаронъя кусыпъёсты пусъёнъя Кяхтинской огкыл  [ӟуч] (удм. юнматэмын вал. Куинь ар ортчыса, Сибирь трактэз лэсьтон борды басьтӥськизы — XIX даурлэн шораз гинэ йылпумъямын вал.

Сибирь тракт Мускоысен таӵе каръёс пыр ортчылӥз: Муром, Арзамас, Козьмодемьянск, Кузон, Оса, Пермь, Кунгур, Екатеринбург, Тюмень, Тобольск, Бадӟым Уки (азьвыл — Рыбино, татын «Муско-Сибирь тракт» музей-заповедник кылдытэмын[1]), Тара, Каинск, Колывань, Томск. Отӥяз уйпал ваез Енисейск, Якутск, Охотск пала кошкылӥз, нош лымшорысез — Иркутск, Вылӥ Удинск пала. Вылӥ Удинскез ортчыса, сюрес нош вайяськылӥз: огез шундыӝужан пала Шилка но Амур шуръёс кузя Нерчинске нуиз, мукетыз лымшор пала Цин империлэн гожъёсыз дорысь Кяхтаозь вуттылӥз. Ӵапак та лымшор вай «Быдӟым чай сюрес» (ӟуч: «Великий чайный путь») нимаськылӥз. Отӥяз чаен вузкарисьёс Монголилэсь степьёссэ ортчылӥзы но Калганозь вуылӥзы — Китайлэн быдӟым борддорысьтыз бадӟым заставае, сое Китае пырон капкаосын лыдъяллязы.

XVIII даурлэн шораз трактлэн сюресэз лымшор палагес воштӥськиз: Ялуторовск, Ишим, Тюкалинск, Омск, Томск, Ачинск но Красноярск пыр Тюменьысен Иркутскозь нуиз, отӥяз азьвыл сямен ик.

Владимир тракт (XIX даурлэн шорысеныз Муско-Нижний Новгород шоссе) Сибирь трактлэн люкетэз луэ[2].

XIX даурлэн пумаз Сибирь тракт Россиысь экономикалэсь кулэяськонъёссэ тырмыт быдэстыны ӧз вормы ни, таин валче Транссибирской чугун сюрес магистраль лэсьтоно луиз.

Чаен караванъёсын вузкарон

Трактлэн шундыӝужан палась люкетэз — Сибирьысен Калганозь — Быдӟым буртчин сюрес (ӟуч: Великий шёлковый путь) сямен ик выль историографиын «Быдӟым чай сюрес» ним басьтӥз. Со вылтӥ Китайысь Россие караванъёсын чай вуттылӥзы.

1727-тӥ арын Буринской огкылэз юнматэм бере ӟуч-китай кунгож вылын Троицкосавск кар ӝутыны ӧдъязы, со вӧзын вузкаронъя Кяхта ӟуч слобода но вузкаронъя Маймачен китай кар кылдӥзы. Та кунъёс куспын ӟырдыт вузкаронлы кутскон сётӥз, сыӵе кусыпъёс 300 ар пала кыстӥськизы. 1787-тӥ арын Россиын «Перлов пиосыныз» нимо нырысетӥ чаен вузкаронъя компания усьтӥськиз. Бератазгес чаен вузкаронъя висъяськись клан кылдӥз — «чайникъёс». Та дырысен чаен шоркаръёсын но котырысьтызы каръёсын гинэ ӧвӧл, Россиысь мукет улосвылъёсын но вузаськыны ӧдъязы.

Иркутскысь векчи вузъёсын вузкарон базар (XIX даур)

Чай сюрес Ухань карысен кутскылӥз, музъем но ву вылтӥ ортчись кӧня ке маршрутъёслы висъяськылӥз, соос 150-лэсь ятыр каръёс пыр потылӥзы. Музъем вылтӥ ортчись сюресъёс вылэ шедем тужгес бадӟымъёсыз пунктъёс: Тяньмэнь, Юэкоу, Цзинчжоу, Шаян, Тайгу, Синсянь, Шаньинь, Датун, Калган (али —Чжанцзякоу), Пекин, Чжанбэй, Ундерхаан, Мурэн, Хух-Хото, Улан-Хуа, Замын-Уула, Эрдэнэ, Урген, Айраг, Чойр, Баян, Налайх, Урга (али — Улан-Батор), Дархан, Маймачен (али —Алтанбулак), Троицкосавск (али — Кяхта), Селенгинск, Вылӥ Удинск (али — Улан-Удэ), Кабанск, Мысовой (али — Бабушкин), Слюдянка, Иркутск, Улӥ Удинск, Илимск, Енисейск, Канск.

Ву но сюрес вылтӥ ортчись маршрутъёс Янцзы шур вылтӥ (Хуанши, Цзюйцзян, Чичжоу, Жэньцзян пыр) Шанхайёзь вуттылӥзы, отӥяз — Порт-Артур (али — Люйшунькоу), Вафандянь, Гайчжоу, Дашицяо, Хайчэн, Ляоян, Мукден (али — Шэньян), Телин, Сыпин, Чанчунь, Харбин, Чжаодун, Дацин, Лунцзян, Цицикар, Хайлар, Нерчинск. Вылӥ Удинскын кыкез но маршрутъёс ваче вуылӥзы.

Иркутскысен Лена шур кузя Якутск пыр Аляскаозь сюреслэн тужгес паськытэз ваез ортчылӥз.

Байкал котырын музъем вылтӥ ортчись сюресъёс Хамар-Дабан хребет (Удунгин, Иваново, Хамар-Дабан, Игумн трактъёс, Кругобайкальской сюрес) пыр потылӥзы, озьы ик ву вылтӥ ортчись сюресъёс Байкал но Селенга пыр радъямын вал.

Китайысь чаез вуттон мукет сюресъёс но вал. Куд-ог вузъёс Быдӟым буртчин сюрес нимо вашкала маршрутъя вуылӥзы — Шор Азия пыр. Бератаз чаез Россие зарезь сюресъя Суэцкой канал но Одесса пыр вайылыны ӧдъязы. Приморьее чаез Владивосток пыр вуттылӥзы. Мукет кунъёсы чай зарезь сюрес кузя шедьылӥз. Шанхайысен маршрутъёс Лондон, Ливерпуль, Бостон доры кыстӥськылӥзы.

Ӟуч чай историын 1903-тӥ ар тужгес бадӟым инты басьтӥз — Транссиб чугун сюрес магистралез лэсьтон йылпумъяськиз, та караванъёсын вузкаронлы пум понӥз. Соин валче, вузъёс ӝоггес вуэмен, Россиын чай трослы дунтэмаз, нош сое юон калык пӧлын зол вӧлмиз.

Тракт сярысь тодэ ваён

Сибирь тракт сюрес вылаз шедем каръёсты но оглом Сибирез азинтонын бадӟым инты басьтӥз.

Уралысен Сибирёзь сюрес: Свердловск но Тюмень улосъёслэн туала Р351 автотрасса вылысь гожзы, калыкын Сибирь тракт нимало
Томск: Муско тракт лымшор палась выж вылтӥ ортче

Кузонын Сибирь тракт ульча вань — со кузя карысь Арск пала потыны луэ.

Пермьысь Кузон тракт 1965-тӥ арысен Космонавтъёслэн шоссезы нимаськиз. Озьы ик татын Сибирской ульча вань, со Кам шурлэн ярдурысеныз (азьвыл шур вамен выжон) карлэн шортӥз шундыӝужан пала нуэ. Та урамын Дворянъёслэн собранизы, губернаторлэн юртэз, застава, «Загородный сад» (али — Горький нимо сад), пересыльной тюрьма интыяськылӥзы. Со кузя но отӥяз Хасанлэн Геройёсызлэн ульчазы кузя карысь потыны но Кунгур пала мыныны луэ.

Кунгурын Сибирь тракт ульча вань — со кузя карысь потыны но Екатеринбург пала шонтыны луэ.

Екатеринбургын озьы ик Сибирь тракт урам вань, со сяна, Муско тракт, Выль Муско тракт, Сибирь трактлэн огпарез — кар сьӧрын. Свердловск улослэн шундыӝужан палаз улӥсьёс Сибирь трактэн нимало Екатеринбург—Тюмень Р351 автотрассаез  [ӟуч] (удм..

Тюменьын Муско тракт, Тобол тракт, Вуж Тобол тракт ульчаос вань. 2015-тӥ арын мыло-кыдо тюмень адями аналтэм Сибирь тракт кузя Тюменьысен Тобольскозь пыдын ортчиз, ужпумез туристъёслы та маршрутэз выльысь усьтон вал[3].

Томскын Сибирь трактэз тодэ вайытӥсь кык ульчаос утиськизы — шундыӝужан пала нуись Иркутск тракт но Томь шур пыртӥ лымшор но шундыпуксён пала нуись Муско тракт.

Омск улосын вашкала дырысен али нуналозь Сибирь трактлэн люкетъёсыз утемын (Секменёво, Новологиново, Зудилово, Орлово, Радищево, Кушайлы, Бадӟым Уки — Становка участок но мукетъёсыз), таос туннэ историысь улосэн утялтоно синпелетъёс пӧлы пыро.

Красноярскын «Сибирь» федерал автотрассалэн шундыӝужан палась люкетэз котьку Муско тракт нимаськылӥз, котьма ке но, берло дасо аръёссэ озьы верасьёс кулэсмо ни.

Ангарскын Московская ульча вань. Со историысь трактлы тупа. 1965-тӥ арын ульчалэн кутсконаз калык коньдонэн та тракт кузя нуэм политзаключённойёслы но каторжникъёслы синпелет пуктэмын.

Сибирь трактлы ньыль музейёс сӥземын. Кыкез соос пӧлысь «Сибирь трактлэн историезъя музейёс» нимасько: огез Удмурт Элькунысь Дэбес черкогуртын (1991-тӥ арын «улӥ чинъёслэн казармаоссы» юртын кылдытэмын), мукетыз Татарстанысь Балтаси ёросысь Карадуван черкогуртын (экспонатъёссэ интыысь улӥсьёс люказы-бичазы). «Муско-Сибирь трактлэн историезъя музей» Омск улосысь Бадӟым Уки черкогуртын ужа, экспонатъёсыз Омскысь Иртыш котыре выжыяськонлэн историеныз герӟаськемын (музей озьы ик тракт кузя экскурсиос радъя). Эшшо Удмуртиысь Эгра ёросысь Бачкей гуртысь «Этапен пункт» музей, 2000-тӥ арын азьвыл этапной пунктын усьтэмын[4].

Валэктонъёс

  1. ↑ Большеуковский историко-культурный музей-заповедник «Московско -Сибирский тракт». — DRIVE2
  2. ↑ В. Н. Алексеев, В. С. Лизунов. Моя малая родина. Руководство по краеведению. — Орехово-Зуево, 1998.
  3. ↑ Ермак Кристина. Житель Тюмени откроет новый туристический маршрут: 61-летний Борис Воронцов пройдёт около 350 километров за 10 дней, Наша Газета Тюмень (14.03.2015). Эскеремын: 10 пӧсьтолэзе 2025 арын.
  4. ↑ Музей «Этапный пункт» [ӟуч], ФКУ «Цифровая культура». Эскеремын: 10 пӧсьтолэзе 2025 арын.

Литература

  • Вистицкий М. С. От Москвы № 27 // Указатель дорог Российской империи. — СПб.: Тип. Театральной дирекции, 1804. — Т. I. — С. 26—30. — XIV, 519 с.
  • Грачёв А. Д. и др. Слободы и Слободчики Урала. — Екатеринбург, 2014. — С. 24. — 81 с. — ISBN 978-5-91256-186-3.
  • Ефремов В. А.   // Сибирский тракт, ямщик и колокольчик //Тезисы докладов и сообщений научно-практической конференции «Словцовские чтения-95». — Тюмень, 1996. — С. 85-86.
  • Миненко Н. А. .   // По старому Московскому тракту. — Новосибирск: Новосибирское книжное издательство, 1990.
  • Катионов О. Н. Московско-Сибирский тракт и его жители в XVII—XIX в.. — Новосибирск: Новосибирский государственный педагогический университет, 2004. — Т. I. — 586 с. — 300 экз. экз. — ISBN 5-85921-417-0.
  • Рыженко Л. И. . Великий Сибирский тракт: справочник. — Омск-Тюкалинск: Ассоциация «Сибирский тракт», 2020. — Т. I. — 288 с. — 300 экз. экз. — ISBN 5-85921-417-0.
  • Рыженко Л. И. . Великий Сибирский тракт: справочник. — 2-е изд. исправленное и дополненное. — Омск-Тюкалинск: Ассоциация «Сибирский тракт», 2020. — Т. I. — 288 с. — 300 экз. экз. — ISBN 5-85921-417-0.

Чӧлсконъёс

«https://udm.ruwiki.ru/w/index.php?title=Сибирь_тракт&oldid=506917»-ысь басьтэмын