Дэриысь историяя но лулчеберетъя музей

РФ Лулчеберетъя министерство

Министерство культуры Российской Федерации

«Дэриысь историяя но лулчеберетъя музей» муниципал бюджет ужъюрт
Дэриысь историяя но лулчеберетъя музейлэн юртэз
Кылдытэмын	1998
Интыяськемын	Россия Россия, Удмуртия Удмуртия
Адресэз	427000, Удмурт Элькун, Дэри ёрос, Дэри черкогурт, Чкаловлэн ульчаез, 29-тӥ юрт
Кивалтӥсез	Крикова Елена Владимировна (директорлэсь ужзэ быдэсъясь)
Сайтэз	zavmuzei.ru

Дэриысь историяя но лулчеберетъя музей (вакч. — «Дэриысь МИиК» МБУ; ӟуч: Завьяловский музей истории и культуры) — Удмурт Элькунысь муниципал бюджет ужъюрт. 1998-тӥ арын кылдытэмын. Музейлэн валтӥсь фондаз 4000-лэсь ятыр экспонатъёс утисько.

Дэри ёросысь Дэри черкогуртысь Чкаловлэн ульчаысьтыз 29-тӥ юртын интыяське.

Историез

Дэриысь историяя но лулчеберетъя музеез кылдытон борды 1997-тӥ арын 1-тӥ инвожое ӟуч, удмурт, бигер но пор лулчеберетъя обществоослэн, озьы ик Дэри ёросысь ветеранъёслэн кенешсылэн кичӧлтэменызы кутскизы.

1998-тӥ арын 22-тӥ куарусёнэ Дэри ёрос администрацилэн йырызлэн «Дэриын шаертодонъя музей но Лулчеберетъя парк усьтон сярысь» пуктэтэз потӥз. Кык ар ӵоже ёросын улӥсьёс музейлы экспонатъёс люказы-бичазы.

2000-тӥ арын 4-тӥ шуркынмонэ музеез усьтон радъяськиз. 2011-тӥ арын «Дэриысь историяя но лулчеберетъя музей» муниципал бюджет ужъюрт кылдытэмын. 2022-тӥ арын музей «Музейёсты техника ласянь выльдон» программая выльдэмын вал.

Музее арлы быдэ 6980 адями вуылэ. Экспозициосъя но адӟытонъёсъя интыез — 73,3 м², огдырлы чаклам адӟытонъёслэн — 77,3 м², утёно фондъёслэн — 23,1 м ².

Удмуртиысь одӥг гинэ музей, кытын кырӟанъя но эктонъя «Италмас» ансамбльлэн чеберлыкъя кивалтӥсезлэн но валтӥсь дирижёрезлэн, РСФСР-ысь калык артистлэн, РСФСР-ысь искусство удысысь дано ужасьлэн Анатолий Васильевич Мамонтовлэн 1000-лэсь ятыр арбериосыныз коллекция утиське. Музейысь «Дэри Эбек» арт-объект татысь ӧнерчиосын кылдытэмын вал.

Музеез кылдытӥсь «Удмурт Элькунысь Дэри ёрос муниципал округ» муниципал кылдытэтлэн администрациез луэ.

Музейысь директорлэсь ужзэ быдэсъясь — Крикова Елена Владимировна.

Юртэз

Музей «Норка» нимо юртын интыяське. Азьвыл та юртын пӧйшур куаосты ниёнъя-выльдонъя цех ужаз.

Экспозициосыз

Музейын 5 экспозициос ялан ужало:

• «Этнографияя зал» (2000-тӥ арын кылдытэмын);
• «Историяя зал» (2000-тӥ арын кылдытэмын);
• «Гуртысь юртъер. Музейысь хроника» (2012-тӥ арын кылдытэмын);
• «Коммунальной квартира» (2013-тӥ арын кылдытэмын);
• «Историысь бамъёсты берыкъяса» (2017-тӥ арын кылдытэмын).

«Коммунальной квартира» экспозиция — коммунальной улон-вылонлы сӥзем Удмуртиысь одӥг гинэ экспозиция, коридорен но кышнопалэн 3 комнатаем квартира выллем лэсьтэмын, быдӟалаез — 50 м². Экспозициез лэсьтон улсын музей сэрегез театрын сямен амалъёсты кутыса быдэстӥзы, отын таӵе персонажъёс кылдӥзы: пенсионер Майя, мещан Зинаида Арчибальдовна, заводын ужась Серафима Павловна, солэн картэз Васенька но диссидент. Та адӟытон залын «Азьлань вашкалае!» вакчи фильм пуктӥзы, озьы ик сюан шудӥсьёслы совето вакытъя туспуктон сессиос радъяллязы. Татын квартирникъёс, мастер-классъёс но «Тодма крезьгурез» викторина ортчытъяло.

Музейын огдырлы чаклам таӵе адӟытонъёс радъяськылӥзы: «Выль ар», «Мамонтов. Улон герӟетъёс», революцилэсь азьвыл, Бадӟым Атыкай ожысь крестьян семьяосысь кышномуртъёслы сӥзем «Дэри ёрос. Нылкышно портрет» (1941-тӥ—1945-тӥ аръёсысь Быдӟым ожын Вормонлы 79 ар тырмон нуналэ), «Ожысь иськемъёс», «Россия» колхоз кылдэм дырысен 95 ар тырмонлы сӥзем «Секыт шуд сярысь повесть», «Щелкунчиклэн Выль ар историез», «Игорь Безносов. Пинал дырен кенешон», Лудорвай музей-заповедникен но Дэриысь историяя но лулчеберетъя музеен валче радъям «Удмуртъёслэн сяме пырем крезьгуро тӥрлыксы» адӟытон но мукет.

Коллекциосыз

Музейлэн валтӥсь фондаз 4000-лэсь ятыр арбериос, нош наукая но юрттӥсь арбериос — 1950.

Ужан вакытыз

• Вордӥськон—кӧснунал: 8:00—17:00;
• Арнянунал: шутэтскон нунал.

Кызьы вуоно

Вуыны луэ автобусэн «Дэри» нимо дугдылонниозь. Музей пала таӵе автобусъёс вутто: 301-тӥ, 304-тӥ, 319-тӥ, 321-тӥ, 328-тӥ, 360-тӥ, 367-тӥ.

Котырысьтыз лулчеберетъя объектъёс

Дэриысь историяя но лулчеберетъя музеен артэ интыяськемын:

• 1941-тӥ—1945-тӥ аръёсысь Быдӟым ожын быремъёслы синпелет, адресэз: Дэри черкогурт, Шор парк;
• Совето Союзысь Геройлэн Василий Петрович Зайцевлэн бюстэз, адресэз: Дэри черкогурт, Шор парк;
• Совето Союзысь Геройлы Никифор Савельевич Павловлы сӥзем синпелет, адресэз: Дэри черкогурт, Шор парк;
• Завьял нимо синпелет, адресэз: Дэри черкогурт, Завьяловлэн ульчаез.

Вормонъёсыз но данъетъёсыз

• 2024-тӥ арын радъям лулчеберет кичӧлтонъёсъя Президент фондлэн нырысетӥ конкурсаз «Ма сярысь чус улэ Дор» проектэныз вормись;
• 2023-тӥ арын радъям лулчеберет кичӧлтонъёсъя Президент фондлэн кыкетӥ конкурсаз «Емельян Пугачёв. Прикамьелэн тылыз» проектэныз вормись;
• 2020-тӥ арын радъям «Пичи каръёсысь но гуртъёсысь лулчеберетъя мозаика» улос конкурсын вормись, вожвылъяськон Удмуртиысь пичи интывылъёсысь мерлыко но лулчеберетъя кичӧлтонъёссылы юрттон но соосты азинтонлы сӥземын вал. Проектэн валче, черкогуртысь валтӥсь ульчаослэсь топонимиказэс лыдэ басьтыса, кӧня ке арт-объектъёс кылдӥзы, дышетонъя геокешинг технологиез уже кутӥзы. Проектэ черкогуртысь 5 ульчаос пыризы: Октябрьской, Пугачёвской, Калининлэн, Чкаловлэн, Пушкинской.

Ужез

Музей таӵе дышетон ужрадъёс дэмла: «Шунды инты» но «Арлыд. Net» кружокъёс, «Кино пукто» интенсив, командаен тыршыны дышетскон, киноактёрлэн, сценаристлэн, режиссёрлэн уженыз тодматскон вылысь «Азьлань вашкалае!» вакчи фильм пуктон. Со сяна, Дэри черкогуртысь нылпи садэ ветлӥсьёс понна «Петрушкалэн Вöйдыре учыръёсыз», «Коӵыш корка» крезьгуро занятиос ортчыло.

Музейын радъяськись валтӥсь экскурсиос: «50-тӥ квартира» но Дэри черкогуртэтӥ экскурсиос. Озьы ик Дэри ёросэтӥ «Православной ёрос», «Вакытъёстӥ — пыдын» турпоход, Дэри черкогуртэтӥ экскурсиен маршрут, экскурсилэн программаез: «Кутон дырзэ чаклатэк».

Арлы быдэ музейын ортчись пусъёно нуналъёс но шулдыръяськонъёс: музеез кылдытон но усьтон нуналъёс, «Музей уй», «Искусствоосъя уй», «Росси кадетъёслы музей нунал» калыккуспо но росси акциос.

Музейын лулчеберет кичӧлтонъёсъя Президент фондэн умоен лыдъям таӵе проектъёс быдэсмо: «Ма сярысь чус улэ Дор», «Емельян Пугачёв. Прикамьелэн тылыз», «Дмитрий Константинович Зеленин нимо музей мастерствоя школа/18». «Дмитрий Константинович Зеленин нимо музей мастерствоя школа/18» нимо проект улсын Удмурт Элькунысь кызь гурт музейёсты профессиысь быгатонлыкъёсты азинтон но музей ужасьёслэсь опытсэс вӧлмытон вылысь огазеяны чакламын. Школалэн нимыз Дэри ёросын вордскем Дмитрий Константинович Зеленинлы сӥземын, со диалектолог, фольклорист, этнограф но музееведение удысысь ӧнерчи вал. Та ӵектосэз 2023-тӥ арысен улонэ пыӵатыны кутскизы.

Валэктонъёс