Г. Д. Красильниковлэн музей-квартираез
| Г. Д. Красильниковлэн музей-юртэз | |
|---|---|
 | |
| Кылдытэмын | 1989 |
| Интыяськемын | |
| Адресэз | Ижкар, Максим Горькийлэн ульчаез, 45-тӥ юрт |
 |
|
Г. Д. Красильниковлэн музей-квартираез (ӟуч: Музей-квартира Г. Д. Красильникова) — Ижкарын Геннадий Красильниковлэн улэм квартираяз усьтэм музей. Удмуртиысь литературая кун музейёс пӧлын одӥг гинэ луэ[1].
1989-тӥ арын гожъяськисьлэн палкышноез но Удмуртиысь Писательёслэн огазеяськонзы кичӧлтэмен кылдытэмын вал. Удмурт Элькунысь Кузебай Герд нимо йӧскалык музейлэн ёзэз луэ[2].
Историез
1989-тӥ арын 12-тӥ коньывуонэ Ижысь Максим Горькийлэн ульчаысьтыз 45 номеро вить этажъем юртысь 18-тӥ квартираын Геннадий Красильниковлэн музей-квартираез усьтӥськиз[1]. Ужрад удмурт литературалы 100 ар тырмонлы сӥземын вал, писательлэн палкышноез Зинаида Красильникова но Удмуртиысь Писательёслэн огазеяськонзы кичӧлтонэн потӥзы[3][4].
Ижысь квартирае писатель семьяеныз ӵош 1964-тӥ арын улыны пыриз. Красильниковез Удмуртиысь Писательёслэн огазеяськонзылы тӧрое быръемен, Алнашысь Иже выжоно луизы. Отӥяз УАССР-ысь но РСФСР-ысь Вылӥ Кенешъёсысь депутат луиз, собере — Удмуртиысь Вылӥ Кенешлэн Тӧроез[1].
Экспозициосыз
Геннадий Красильниковлэн музей-юртаз ялан ужась но огдырлы чаклам экспозициос вань. Берпуметӥосыз удмурт калыклэн но удмурт литературалэн историысьтызы юбилей но дано учыръёслы сӥземын луо[3].
Валтӥсь экспозиция удмурт писательлэн но кун ужасьлэн Красильниковлэн улон-вылонэныз но творчествоеныз тодматэ. Со куинь интылы сямен люкемын: Алнаш, Муско но Ижевск. Котькуд та интыосын писатель кӧня ке ар улӥз[1][3][4].
Музейын квартира кузёлэн ужкагазъёсыз, гожтэтъёсыз, туспуктэмъёсыз, книгаосыз возьматэмын[3]. Музейысь ӧнерчиос Красильниковъёслэн семья туспуктэмъёссыя комнатаослэсь пушсэс выльысь лэсьтӥзы. Огаз витринаын писательлэн дӥськутэз но пыдкутчанэз адӟытэмын. Солэн кабинетаз лампаен, тамак куртконэн, очкиосын но печатлан машинкаен ужан ӝӧкез сылэ[1].
Ужрадъёс
Г. Д. Красильниковлэн музей-квартираяз экскурсиос гинэ уг, мукет ужрадъёс но ортчыло: квартирник нимо концертъёс, крезьгуръя но литературая ӝытъёс, лекциос, мастер-классъёс[1].
Уноез пумиськонъёс дышетон программаос улсын ортчо:
- «Литературая музей — дышетон ӧрын» — кунын гожъяськонлэн историезъя но грамотностьлэн кылдэмезъя занятиос;
- «Вашкалаысь страницаосты берыкъяса» — историысь валтӥсь учыръёсын тодматон[4].
Валэктонъёс
- ↑ 1 2 3 4 5 6 Анжела Поздеева (26 августа 2019) Красильниковский путь [ӟуч] Удмуртская правда. Эскеремын 04.09.2025 арын
- ↑ Литературный музей-квартира Г. Д. Красильникова [ӟуч] vmuzey.com. Эскеремын 04.09.2025 арын
- ↑ 1 2 3 4 Музей-квартира Г. Д. Красильникова [ӟуч] Культура.РФ. Эскеремын 04.09.2025 арын
- ↑ 1 2 3 Музей-квартира Г. Д. Красильникова [ӟуч] idemvmuzei.ru. Эскеремын 04.09.2025 арын
Литература
- Девятова Н. Г. Концепция новой экспозиции Музея-квартиры Г. Д. Красильникова (рус., удм.) // Художественная индивидуальность писателя и литературный процесс Урало-Поволжья : сб. ст.. — 2009. — С. 202.
- Титова А. М. Использование QR-кодов в работе литературного Музея-квартиры Г. Д. Красильникова (рус.) // Основные тенденции гуманитарного образования: векторы современного развития : Материалы Итоговой очно-заочной научно-практической конференции преподавателей и студентов. — 2022. — 8 инвожое. — С. 436—439.
- Ившина М. В. История, современное состояние и перспективы деятельности Музея-квартиры Г. Д. Красильникова (рус.) // Основные тенденции гуманитарного образования: векторы современного развития : Материалы Итоговой очно-заочной научно-практической конференции преподавателей и студентов. — 2022. — 8 инвожое. — С. 412—416.
- Зайцева Т. И. К вопросу взаимодействия музея-квартиры Г. Д. Красильникова с посетителем (рус.) // Просветительство в истории и современном развитии литературы, культуры и образования народов России : Cб. cт.. — 2023. — 15 коньывуонэ. — С. 343—349.
- Имамова Г. А. Популяризация творческого наследия удмуртских писателей музеем-квартирой Г. Д. Красильникова (рус.) // Провинциальная книжность: изучение, продвижение, сохранение : Cб. cт.. — 2024. — С. 20—23.
 |
|---|
