Глазов ёросысь историяя но шаертодонъя музей комплекс

РФ Лулчеберетъя министерство

Министерство культуры Российской Федерации

«Глазов ёросысь историяя но шаертодонъя музей комплекс» лулчеберетъя муниципал бюджет ужъюрт
М. И. Столбов купечлэн азьвыл коркаез. Али та юртын Глазов ёросысь историяя но шаертодонъя музей комплекс интыяське
Кылдытэмын	2000
Интыяськемын	Удмуртия Удмуртия Россия Россия
Адресэз	427621, Росси Федерация, Удмурт Элькун, Глазов, Киров ульча, 11-тӥ юрт
Кивалтӥсез	Иванова Райда Камилевна
Сайтэз	grikmk.ru

Глазов ёросысь историяя но шаертодонъя музей комплекс (вакч. — «ГРИКМК» МБУК; ӟуч: Глазовский районный историко-краеведческий музейный комплекс) — Удмурт Элькунысь лулчеберетъя муниципал бюджет ужъюрт. Глазкарысь Киров ульчаысь 11-тӥ юртын интыяськемын.

Музей 2000-тӥ арын усьтэмын.

Историез

Глаз ёрос администрацилэн йырызлэн 2000-тӥ арын 1-тӥ тулыспалэ юнматэм пуктэтэзъя Глазов ёросысь историяя но шаертодонъя музей комплекс кылдытэмын вал, со Коӵышгуртысь «Сепычкар» но Пӧжы (Золотарёво) гуртысь «Истоки» шаертодонъя музейёсты огазеяз, таос ёзъёсыз луизы.

Историяя но шаертодонъя «Сепычкар» музей 1990-тӥ арын 21-тӥ коньывуонэ усьтэмын вал. Глазов ёросын со нырысетӥез колхоз музей луиз. 1965-тӥ арын музей комната усьтон сярысь огкылэ вуизы. 1988-тӥ арын 4-тӥ южтолэзе колхоз правленилэн кенешаз Ильич нимо колхозлэн предэзлэсь Валерий Корепановлэсь музеез усьтонлэн кулэлыкез сярысь докладзэ кылзӥзы. Кенешлэн йылпумъянъёсызъя, колхозлэн шор усадьбаяз, Коӵышгуртын, музей усьтӥзы. Музейысь огез висъет Ильич нимо колхозлэн 30 ар ӵоже быгатыса ужамезлы но вормонъёсызлы сӥземын луыны кулэ вал. Таӵе составен радъясь-быдэстӥсь кенеш юнматӥзы: председатель — Валерий Сергеевич Корепанов, предлэн воштӥсез — Владимир Золотарёв, кенешлэн ёзчиосыз — Рахиля Касимова, Галина Щепина, Есмина Рахимова, Галина Горбушина, Нина Чупина. Валерий Сергеевич Корепанов «Сепычкар» музеез но усьтыны ӵектӥсь но кылдытӥсь луиз. Музейын таӵе экспозициос адӟытэмын:

• «XX даурысь техника»;
• «Бигер юрт»;
• «Ильич нимо колхозлэн историез».

Коӵышгуртысь историяя но шаертодонъя «Сепычкар» музеен кивалтӥсь — Корепанова Вера Евгеньевна.

1995-тӥ арын 11-тӥ шуркынмонэ Пӧжы гуртын «Истоки» шаертодонъя музей усьтӥськиз. 1985-тӥ арын Пӧжыысь лулчеберетъя юртын утялскись Анна Морозова гынсапег лэсьтон колодка — «Сапег каб» — вуттӥз. Лулчеберетъя юртын ужасьёс вашкала арбериосты бичан сярысь огкылысь кенешизы. Музейлэн валтӥсь ужез — вашкала сям-йылолъёсты вунэтэмысь ӝутон, удмурт кырӟанъёсты гожтон, альбомъёс люкан-лэсьтон, йылолъёсты люкан, вашкала лэсьтосъёсты но юртъер котырын кутӥськись тӥрлыкез туспуктон. Музейын XX даурысь удмурт коркаослэн макетъёссы утисько. Ужъюртэ Эстонияысь, Финляндияысь, Швейцарияысь, Бельгияысь, Италияысь, Венгрияысь, США-ысь, Германияысь куноос но делегациос вуылӥзы. Музей ужзэ музей но дышетон программаосъя радъя, ужрадъёс, шаертодонъя урокъёс, лекциос, кенешонъёс но экскурсиос ортчытъя. Музей озьы ик гуртъёслэн но ужъюртъёслэн историзылы сӥзем наукая но эскеронъя ужъёс радъя. Музейлэн экспозициосыз вить залъёсын возьматэмын:

• «Уйпал удмуртъёслэн улон-вылонзы»;
• «Асьме шаермы — ож тылын»;
• «Школа улонлэн историез»;
• «Кибашлыослэн творчествозы»;
• «Инкуазь но адями».

Пӧжы гуртысь «Истоки» шаертодонъя ёзлэн кивалтӥсез — Городилова Ольга Валентиновна.

«Сепычкар» ёзлэн фондъёсыз — Ильич нимо колхозлэн историысьтыз но Глазов ёросысь бырем гуртъёсъя туспуктэмъёс но ужкагазъёс. Музейын адӟытэмын: радиолаос, патефонъёс, совето вакытысь крезьгуро проигрывательёс. «Истоки» ёзэт уйпал удмуртъёслэсь лулчеберетсэс адӟытэ. Тужгес вашкала арбериос XIX—XX дауръёс пумен герӟаськемын. Та ёзын «Асьме шаермы — граждан ож тылын» экспозициен возьматэмын.

Музейлэн экспозицияя но адӟытонъя интыез — 226 м², утёно фондъёслэн — 19 м². Музее арлы быдэ оглом 4200 адями вуылэ.

Музей комплекслэн кылдытӥсез «Глазов ёрос» муниципал кылдытэтлэн администрациез луэ.

Музей комплекслэн директорез — Иванова Райда Камилевна.

Юртэз

Музей «Историысь синпелет (Столбов купечлэн азьвыл коркаез)» юртын интыяськемын. 1890-тӥ аръёсы пуктэм корка ІІ гильдиысь купечлэн М. И. Столбовлэн ваньбурез вал. 1920-тӥ арын юртын Вотской Автономной областьлэн Ревкомез интыяськылӥз, 1941-тӥ арын — 49-тӥ нимысьтыз стрелковой бригадаез кылдытонъя штаб. УАССР-ысь СМ-лэн 1979-тӥ арын 5-тӥ толсуре юнматэм 362 номеро постановлениезъя, юрт лулчеберетысь улосэн утёно объектъёс пӧлы пыртэмын.

Коллекциосыз

Музейлэн фондаз ваньмыз-ӧвӧлэз 4285 экспонатъёс утисько, таос пӧлысь 3142 арбериос валтӥсез луо.

Музей фондын пӧртэм пумо аспӧртэм арбериосын 12 коллекциос утисько:

• Живописья коллекциос (интыысь суредасьёслэн 30 картинаоссы);
• Графикая коллекциос (суредам но почта открыткаос, киноафишаос, плакатъёс, интыысь топографияя картаос — 133 утёно единица);
• Скульптурая коллекциос (Владимир Ильич Ленинлэн 4 бюстэз);
• Этнографияя коллекциос (XIX даур пумысь—XX даурлэн нырысетӥ люкетысьтыз уйпал удмуртъёслэн но чупчи бигеръёслэн улон-вылонысьтызы но лулчеберетысьтызы арбериосын тужгес бадӟымез коллекция — 1882 утёно единица);
• Нумизматикая коллекциос (292 утёно единица: революцилэсь азьвыл кутӥськем манетъёс но коньдон банкнотаос, совето кунысь но союзной республикаосысь, озьы ик 1990-тӥ ар пумысь но 2000-тӥ ар кутсконысь коньдон пусъёс, совето вакытысь гадьпусъёс);
• Шер пумиськылӥсь книгаосын коллекциос (13 книгаос: Владимир Ленинлэн сочинениосыныз быдэс собраниос, СССР-ысь маршал Георгий Константинович Жуковлэн «Воспоминания и размышления», «Справочником почтовой индексации 1969 года» книгаосыз, Т. П. Костицина шаерчилэн Удмуртиысь пионер огазеяськонъёслэн историзылы сӥзем аспӧртэм материалэн «Родина-родина, ты — это мы!» книгаез);
• Ужкагазъёсын коллекциос (Ильич нимо колхозлэн, «Зотовский» совхозлэн историзыя, ожгар аръёсысь ужкагазъёс, туспуктэмъёсын но негативъёсын коллекция — 476 утёно единица. Гуртысь улон-вылонлы, йылолъёслы но колхоз улонысь пӧртэм вакытъёсысь учыръёслы сӥзем туспуктэмъёс);
• Естественно-научной арбериосын коллекциос (ботаникая, геологияя, зоологияя, палеонтологияя арбериос — 21 утёно единица, озьы ик будосъёсын гербарийлы, Удмуртилэн уйпалысьтыз музъем образецъёсын коллекциос);
• Техникая тӥрлыклы коллекция (совето вакытысь фото-видео-крезьгур тӥрлык — 145 арбери);
• Печать вузэн арбериосын коллекция (пӧртэм удысын кутӥськись 14 арбериос);
• Музон коллекция (555 утёно единица: животъёслэн чучелооссы, Быдӟым Атыкай ожысь арбериос, пластинкаос, черкъёсысь вӧсяськон арбериос).

Кызьы вуоно

Вуоно: 1, 2, 4, 5 номеро автобусъёсын «Свободалэн площадез» остановка дорозь.

Ужан вакытыз

• Вордӥськон—удмуртарня: 8:00—17:00;
• Кӧснунал но арнянунал: шутэтскон нунал;
• Экскурсиен лыктэм группаос понна — азьвыл кенешемъя.

Вормонъёсыз но данъетъёсыз

• Удмурт Элькунысь лулчеберетъя но туризмъя министерстволэн элькун конкурсэзлы йылпумъянъёсъя, 2018-тӥ арын «Гурт поселениосысь устоез муниципал ужъюрт но солэн ужасьёсыз» номинациын вормись;
• Музей комплекслэн «Нимтэм солдатъёс» проектэз лулчеберетъя кичӧлтонъёсын президент фондысь 2023-тӥ арын ялэм кыкетӥ валтӥсь грант конкурсын вормись луиз.

Ужез

Музей комплексын таӵе валтӥсь экскурсиос радъясько — «Эшъяськон сюрес», «Улэп ву», «Вашкалаослэн пытьыоссы кузя», «Усьты лушкем ватосэз», «Уйпал удмуртъёс доры куное», «Государь сюрес», «Асьме аспалчиос», «Родной Глазов», «Сюрес, кудзэ ми бырйиськом», «Пӧжы вырйыл», озьы ик — пӧртэм темаослы сӥзем адӟытонъёс, шаертодонъя кружокъёс, темаосъя лекциос, семинаръёс. Музей экскурсиосъя но туризмъя «Эшъяськон сюрес», «Улэп ву», «Улэп крезьгуръя храм» маршрутъёсы пыртэмын.

Музей Глазов ёросысь удмурт, бигер но бесерманъёс лулчеберетъя центръёсын валче ужа но экскурсиосъя но туризмъя маршрутъёс радъя, татын инкуазьысь, историысь но лулчеберетысь аспӧртэм синпелетъёс возьматэмын.

Валэктонъёс